మల దానం: ఎవరు అర్హులు, దాతలు ఎలాంటి ఆహారం తీసుకుంటారు, ఎంత సంపాదిస్తారు?

ఫొటో సోర్స్, BBC/ Emmanuel Lafont
- రచయిత, సోఫియా ఖ్వాగ్లియా
- హోదా, బీబీసీ ప్రతినిధి
- ప్రచురణ
- చదివే సమయం: 9 నిమిషాలు
మల మార్పిడి చికిత్సలు పెరుగుతున్నాయి.
అయితే, కేవలం 3 శాతం కంటే తక్కువ మంది మాత్రమే దానానికి అర్హమైన నాణ్యమైన మలాన్ని కలిగి ఉంటున్నారు.
ఇక 'సూపర్ పూపర్స్' (అత్యుత్తమ మల దాతలు) అయ్యేవారు ఇంకా చాలా తక్కువ.
అత్యంత శ్రేష్ఠమైన మలం కోసం సాగుతున్న అన్వేషణకు సంబంధించిన కథ ఇది.
ఆడమ్ ఫేయ్ 2013లో ఒక రోజు.. ‘రాత్రికి ఎలాంటి భోజనం తింటే అత్యుత్తమ నాణ్యత గల మలం వస్తుంది?’ అని ఆలోచిస్తున్నారు.
ఆ సమయంలో ఫేయ్ నాలుగో సంవత్సరం వైద్య విద్యార్థిగా 'క్లోస్ట్రిడయోయిడ్స్ డిఫిసిల్' అనే బ్యాక్టీరియా ఇన్ఫెక్షన్కు చికిత్స చేయడం నేర్చుకుంటున్నారు.
ఇది తీవ్రమైన జీర్ణకోశ సమస్యలను కలిగిస్తుంది.
అంతేకాదు అనేక యాంటీబయాటిక్స్కు కూడా లొంగదు.

ఒక పెద్దావిడ తీవ్రమైన తరచుగా తిరగబెట్టే ఇన్ఫెక్షన్లతో బాధపడుతున్నారు. ఆమెకు 'ఫీకల్ ట్రాన్స్ప్లాంట్' (మల మార్పిడి) అవసరమైంది.
ఈ ప్రక్రియలో మరొకరి మలాన్ని నేరుగా ఆమె పెద్దపేగులోకి ప్రవేశపెట్టడం ద్వారా ఆమె కడుపులోకి ఆరోగ్యకరమైన సూక్ష్మజీవుల సమూహాన్ని పంపిస్తారు.
ఇవి క్లోస్ట్రిడయోయిడ్స్ డిఫిసిల్ బ్యాక్టీరియాతో పోరాడి పొట్టలో తిరిగి సమతుల్యత తెస్తాయని ఆశించారు.
అయితే ఆ మలాన్ని ఎక్కడి నుండి తీసుకురావాలి? ఆ సమయంలో స్టూల్ బ్యాంకులు (మల నిధి కేంద్రాలు) ఎక్కువగా లేవు.

ఫొటో సోర్స్, Emmanuel Lafont/ BBC
రోగి కుటుంబ సభ్యులు, స్నేహితులు దానం చేయడానికి సిద్ధంగా లేరు లేదా అర్హులు కారు. దాంతో ఫేయ్ స్వయంగా ముందుకొచ్చారు.
ఆ ముఖ్యమైన రోజుకు ముందు రాత్రి, ఫేయ్ రాత్రి భోజనంగా ఒక బురిటో (రోటీలో వివిధ పదార్థాలను ఉంచి చుట్టి తయారుచేస్తారు) తిన్నారు.
మరుసటి రోజు ఉదయం, తన స్టూడెంట్ హాస్టల్లో ఆయన ఒక గులాబీ రంగు మెడికల్ బేసిన్లో మల విసర్జన చేశారు.
తర్వాత దాన్ని ఉప్పు ద్రావణంతో కలిపి కాటన్ గాజు గుడ్డలో వడకట్టి ఒక సీసాలోకి నింపారు.
"ఆ మురికి నీళ్ల సీసాను పట్టుకుని నడుస్తున్నప్పుడు ఎవరూ చూడకుండా దాన్ని ఒక పేపర్ బ్యాగ్లో పెట్టిన విషయం నాకు గుర్తుంది" అని ఆయన చెప్పారు.
కొన్ని గంటల తర్వాత కొలొనోస్కోపీ ప్రక్రియ ద్వారా ఫేయ్ మలాన్ని ఆ రోగి పేగుల లోపల స్ప్రే చేశారు.
ప్రస్తుతం ఫేయ్ న్యూయార్క్ యూనివర్సిటీలోని లాంగోన్ హెల్త్లో గ్యాస్ట్రోఎంటరాలజిస్ట్గా పనిచేస్తున్నారు.
పెద్దావిడ విషయంలో తన చికిత్స విజయవంతమైందని తర్వాత ఆయన తెలుసుకున్నారు.
ఆమెకు ఆ తర్వాత మళ్లీ ఎప్పుడూ క్లోస్ట్రిడయోయిడ్స్ డిఫిసిల్ ఇన్ఫెక్షన్ రాలేదు.

ఫొటో సోర్స్, Emmanuel Lafont/ BBC
మారుతున్న చికిత్స విధానాలు
ఆ తర్వాత కాలంలో ఆరోగ్యంలో 'గట్ మైక్రోబయోమ్' (పేగు సూక్ష్మజీవులు) పాత్రపై పరిశోధనలు బాగా పెరిగాయి.
దీంతో పాటు మల మార్పిడి లేదా ఫీకల్ మైక్రోబయోటా ట్రాన్స్ప్లాంట్స్పై ఆసక్తి పెరిగింది. క్లోస్ట్రిడయోయిడ్స్ డిఫిసిల్ చికిత్సకు ఈ మార్పిడులకు ఇప్పటికే ఆమోదం లభించింది.
అంతేకాకుండా ఇరిటబుల్ బొవెల్ సిండ్రోమ్, మధుమేహం, ఆటిజం, ఆస్టియోపోరోసిస్ వంటి వ్యాధుల చికిత్స కోసం ప్రపంచవ్యాప్తంగా వీటిపై ప్రయోగాలు జరుగుతున్నాయి.
మెదడు పనితీరు మందగించడం వంటి మానసిక అనారోగ్యాలకు సంబంధించిన చికిత్సలలోనూ వీటిని వాడటంపై ఆసక్తి నెలకొంది.
మల మార్పిడిని నేరుగా ఒకరి పేగుల్లోకి ప్రవేశపెట్టవచ్చు లేదా మలాన్ని క్యాప్సూల్ (మాత్ర) రూపంలోకి మార్చి నోటి ద్వారా కూడా ఇవ్వవచ్చు.
కానీ ఈ ప్రయోజనాల కోసం వాడటానికి అర్హమైన మలం ఉన్నవారిని కనుగొనడం అంత సులభం కాదు. దీని ఎంపిక ప్రక్రియ చాలా కఠినంగా ఉంటుంది.
అత్యంత ఆరోగ్యవంతమైన అభ్యర్థులను మాత్రమే సరైన దాతలుగా ఎంచుకుంటారు.
ఇక 'సూపర్ పూపర్స్' అని పిలిచే దాతల నుంచి లభించే అత్యుత్తమ మలం దొరకడం ఇంకా కష్టం.
ఈ కథనం కోసం నేను ఆరు స్టూల్ బ్యాంకులు ప్రయోగశాలలను వారి దాతలను ఇంటర్వ్యూ చేయడానికి అనుమతి అడిగాను.
అయితే నమ్మకమైన దాతలను కనుగొనడం చాలా కష్టమని వారి గోప్యతకు భంగం కలిగిస్తే వాళ్లు వెనక్కి తగ్గే ప్రమాదం ఉందని స్టూల్ బ్యాంకులు చెప్పాయి.
ఇంతకీ ఈ అత్యుత్తమ మల దాతలు ఎవరు? పరిపూర్ణమైన మలాన్ని సైన్స్ ఎలా కనుక్కుంటుంది?

ఫొటో సోర్స్, Getty Images
దాతలను ఎలా ఎంపిక చేస్తారు?
మల దాత ఎంపిక ప్రక్రియ ఒకేలా ఉండదు. మలాన్ని ఏ వ్యాధికి వాడుతున్నారనే దానిపై ఇది ఆధారపడి ఉంటుంది. ఇది చాలా క్షుణ్ణంగా జరుగుతుంది.
"మేం మానవ ఆరోగ్యానికి అత్యుత్తమ ఉదాహరణగా ఉండే వ్యక్తి కోసం చూస్తాం. ఒక అవయవ దాతను పరీక్షించినట్లే వీరిని కూడా పరీక్షిస్తాం" అని న్యూయార్క్లోని వెయిల్ కార్నెల్ మెడిసిన్కు చెందిన గ్యాస్ట్రోఎంటరాలజిస్ట్ కార్ల్ క్రాఫోర్డ్ చెప్పారు.
కిడ్నీ లేదా రక్తదానం చేసే వ్యక్తిని పరీక్షించినట్లే వీరికి కూడా కఠిన పరీక్షలు పెడతారు.
మల దాత కావాలంటే ముందుగా అనేక ఆరోగ్య సర్వేలు ఇంటర్వ్యూలతో పాటు అంటువ్యాధుల నిర్ధారణ కోసం వివరమైన రక్త, మల పరీక్షలు చేయించుకోవాలి.
ఈ జాబితాలో 30కి పైగా వ్యాధికారకాలు (పాథోజెన్స్), పరాన్నజీవులు, మందులకు లొంగని సూక్ష్మజీవులు ఉంటాయి.
కొన్ని క్లినిక్లు కోవిడ్-19, ఫ్లూ పరీక్షలను కూడా తప్పనిసరి చేస్తున్నాయి.
ఎందుకంటే అనేక అంటువ్యాధులు మలం ద్వారా వ్యాప్తి చెందుతాయి.
కొన్ని సందర్భాల్లో ఫీకల్ మైక్రోబయోటా ట్రాన్స్ప్లాంట్ వల్ల అనుకోకుండా ఇ.కోలి బ్యాక్టీరియా వ్యాప్తి చెందిన దాఖలాలు ఉన్నాయి.
టాయిలెట్ ఫ్లష్ చేసినప్పుడు గాలిలోకి వచ్చే మల కణాల ద్వారా కోవిడ్-19 వంటి శ్వాసకోశ ఇన్ఫెక్షన్లు కూడా వ్యాపించవచ్చు.
దాతలకు గతంలో ఉన్న ఆటో ఇమ్యూన్ వ్యాధులు లేదా మానసిక ఆరోగ్య సమస్యల చరిత్రను కూడా పరిశీలిస్తారు.

ఫొటో సోర్స్, Emmanuel Lafont/ BBC
ఆహారం, జీవనశైలిపై కఠిన నిబంధనలు
కొన్ని ప్రయోగశాలలు దాతలు తీసుకునే మందులు మల్టీవిటమిన్లు, ఐరన్ వంటి సప్లిమెంట్లను కూడా నిశితంగా పరిశీలిస్తాయి.
"మేం వాటి గురించి ప్రశ్నిస్తాం. వాటిని ఆపడం సాధ్యమవుతుందో లేదో చూస్తాం" అని టొరంటో విశ్వవిద్యాలయానికి చెందిన మెడికల్ మైక్రోబయాలజిస్ట్ సుసాన్ పౌటానెన్ చెప్పారు.
అక్కడి దాతలు గత వారంలో సాధారణ అలెర్జీ కారక ఆహారాలు ఏమైనా తిన్నారో లేదో కూడా నమోదు చేయాలి.
"కొన్నిసార్లు మాకు వేరుసెనగ లేని మలం అవసరమవుతుంది" అని సుసాన్ వివరించారు.
దాతలు సాధారణంగా 18 నుండి 48 ఏళ్ల మధ్య వయస్సు కలిగి ఉంటారు. కానీ ఎవరైనా ఈ మార్పిడి చికిత్సను పొందవచ్చు.
"మేం 17 ఏళ్ల వారికి అలాగే 96 ఏళ్ల వారికి కూడా చికిత్స చేశాం" అని మల మార్పిడి చేసే టొరంటో విశ్వవిద్యాలయ అంటువ్యాధుల నిపుణురాలు సూసీ హోటా చెప్పారు.
చాలా స్టూల్ ప్రోగ్రామ్లు దాతల ఆహారపు అలవాట్లను ప్రత్యేకంగా అంచనా వేయకపోయినా వారు ఎక్కువ ఫైబర్ (పీచు పదార్థం) ఉన్న ఆరోగ్యకరమైన ఆహారం తీసుకోవడం ఉత్తమం.
పండ్లు, కూరగాయలు, తృణధాన్యాలు పేగులోని సూక్ష్మజీవులు వృద్ధి చెందడానికి సరైన పోషకాలను అందిస్తాయి.
"దాతలు శాకాహారులుగా ఉండాలని ఎవరైనా అనుకోవచ్చు. కానీ మాంసాహారం, శాకాహారం రెండూ తినేవారి (ఆమ్నివోరస్) జీర్ణకోశంలో ఎక్కువ జీవవైవిధ్యం ఉన్నట్లు కనిపిస్తోంది" అని క్రాఫోర్డ్ అన్నారు.
వీలైనంత వరకు దాతలు సన్నగా ఉండాలని హోటా, పౌటానెన్ అంటున్నారు.
ఒక సందర్భంలో, ఆరోగ్యంగా ఉన్నప్పటికీ అధిక బరువు ఉన్న దాత నుండి మలం పొందిన తర్వాత అంతకుముందు సన్నగా ఉన్న 32 ఏళ్ల మహిళ స్థూలకాయురాలిగా మారారు.
మల దాతలకు సంబంధించి మద్యపానం, వ్యాయామం, నిద్రతో పాటు అనేక ఇతర అంశాలను కూడా పరిగణనలోకి తీసుకుంటారు.
దాతలు అనుకోకుండా మందులకు లొంగని బ్యాక్టీరియా బారిన పడకుండా ఉండేందుకు వారిపై కఠినమైన ప్రయాణ ఆంక్షలు కూడా ఉండవచ్చు.

ఫొటో సోర్స్, Getty Images
‘100 మందిలో ఒక్కరు దొరకడం కూడా కష్టమే’
స్వయంగా మలాన్ని సేకరించనప్పటికీ కేవలం 3 శాతం మంది మాత్రమే ప్రాథమిక స్క్రీనింగ్లో ఉత్తీర్ణులవుతారని క్రాఫోర్డ్ చెప్పారు.
వారిలో సగం మంది వద్ద మాత్రమే రెగ్యులర్ దానానికి సరైన బ్యాక్టీరియా సమతుల్యత ఉంటుంది.
టొరంటోలోని హోటా వద్ద కేవలం 1.6 శాతం మంది మాత్రమే ప్రాథమిక పరీక్షల్లో పాసవుతారు. వీరిలో 0.6 శాతం మంది మాత్రమే రెగ్యులర్ దాతలుగా కొనసాగుతారు.
అయితే మల దాతగా ఉండటానికి కావాల్సిన ఆచరణాత్మక నియమాలను తక్కువ అంచనా వేయకూడదని స్టూల్ బ్యాంకులు, పరిశోధన కార్యక్రమాలు నిర్వహించే శాస్త్రవేత్తలు చెబుతున్నారు.
ఫేయ్ విషయంలో జరిగినట్లుగా, తెలిసిన రోగికి ఒక్కసారి దానం చేయడం సాధారణం కాదు.
మీరు పరీక్షల్లో నెగ్గిన అరుదైన దాతలలో ఒకరైతే, మిమ్మల్ని రెగ్యులర్ ప్రోగ్రామ్లో చేరమని ఆహ్వానిస్తారు.
ఇందులో భాగంగా దాదాపు ప్రతిరోజూ ప్రయోగశాలకు వెళ్లి, ప్రత్యేకంగా కేటాయించిన టాయిలెట్లో మలవిసర్జన చేయాల్సి ఉంటుంది.
చాలా స్టూల్ బ్యాంకులు దాతలకు డబ్బు చెల్లిస్తాయి. ఉదాహరణకు అమెరికాలో, ఒక్కో దానానికి 25 డాలర్ల (రూ.2300) నుంచి సుమారు 100 డాలర్ల (రూ.9300) వరకు చెల్లిస్తారు.
ప్రతిసారీ కొత్తవారిని వెతకడం కంటే ఉన్న దాతలను పదేపదే వాడుకోవడం సులభం కాబట్టి ప్రతి స్టూల్ బ్యాంకుకు కొందరు శాశ్వత దాతలు ఉంటారు.
"దాతలతో ఉండే అనుబంధం నాకు చాలా ఆసక్తికరంగా అనిపిస్తుంది" అని హోటా అన్నారు.
వారి వ్యక్తిగత స్వేచ్ఛను గౌరవిస్తూనే నమ్మకాన్ని నిర్మించుకోవాలని ఆమె వివరించారు. ఉదాహరణకు దాతలు తమ జీవనశైలిలో వచ్చే చిన్నపాటి మార్పులను కూడా ఎప్పటికప్పుడు తెలియజేయాల్సి ఉంటుంది.

ఫొటో సోర్స్, AFP via Getty Images
ఎవరు ఈ 'సూపర్ పూపర్స్'?
ఈ ప్రాథమిక పరీక్షలు కొంతవరకు మాత్రమే అంచనా వేయగలవు.
అర్హత సాధించిన ఏ దాత మలమైనా, తరచుగా తిరగబెట్టే క్లోస్ట్రిడయోయిడ్స్ డిఫిసిల్ ఇన్ఫెక్షన్ను విజయవంతంగా నయం చేయడంలో సమాన అవకాశాన్ని కలిగి ఉంటుంది. అయితే కొన్ని ప్రత్యేక వ్యాధుల విషయానికొస్తే కొందరు ప్రత్యేక దాతల మలం ఇతరుల కంటే చాలా ఎక్కువ ఫలితాలను ఇస్తుందని పరిశోధనలు చెబుతున్నాయి.
ఉదాహరణకు 2015లో 'అల్సరేటివ్ కొలైటిస్' (ఒక రకమైన పేగు వ్యాధి) కోసం చేసిన మల మార్పిడి అధ్యయనంలో 38 మందిలో కేవలం తొమ్మిది మంది మాత్రమే కోలుకున్నారు.
వారిలో ఏడుగురికి ఒకే దాత నుండి సేకరించిన మలాన్ని ఇచ్చారు.
2017లో జరిగిన మరో అధ్యయనంలో ఏడుగురు దాతల మలాన్ని కలిపి రోగులకు ఇచ్చారు.
అందులో ఒక ప్రత్యేక దాత మలం కలిసిన మిశ్రమాన్ని పొందిన వారు అది లేని మిశ్రమాన్ని పొందిన వారి కంటే దాదాపు రెట్టింపు వేగంగా కోలుకున్నారు.
కానీ ఈ అత్యుత్తమ మలం ఇంత ప్రభావవంతంగా ఉండటానికి కారణమేమిటో స్పష్టంగా తెలియదు.
మల దానం సమయంలో పూర్తి స్థాయి మైక్రోబయోమ్ పరీక్షలు సాధారణంగా చేయరు. అయితే సూపర్ పూపర్స్ పొట్టలో అధిక సంఖ్యలో విభిన్న రకాల బ్యాక్టీరియా ఉన్నట్లు పరిశోధనలో తేలింది.
వారి మలంలో 'ఫేకాలిబాక్టీరియం ప్రౌస్నిట్జీ' వంటి ప్రయోజనకరమైన జాతులు ఎక్కువగా ఉంటాయి.
ఈ జాతి 'బ్యూటిరేట్' అనే ఫ్యాటీ యాసిడ్ను ఉత్పత్తి చేస్తుంది.
ఇది వాపును తగ్గించడం పేగుల లోపలి పొరను రక్షించడం వంటి అనేక ఉపయోగకరమైన పనులు చేస్తుంది.
అయినప్పటికీ, ఏ ఒక్కరి మలం అన్ని వ్యాధులకు దివ్యౌషధం కాదు. క్లోస్ట్రిడయోయిడ్స్ డిఫిసిల్కి ఆదర్శవంతమైన దాత మలం ఇరిటబుల్ బొవెల్ సిండ్రోమ్ లేదా డిప్రెషన్ ఉన్నవారిపై ఎటువంటి ప్రభావం చూపకపోవచ్చని ఫేయ్ చెప్పారు.
"ఆ రహస్య సూత్రం ఏంటో కనుక్కోవడానికి మేమిప్పటికీ ప్రయత్నిస్తున్నాము" అని ఆయన అన్నారు.
"సూపర్ పూపర్ అనేవారు కచ్చితంగా ఉన్నారని నాకు తెలుసు" అని హోమాన్ అన్నారు. అయితే సూపర్ పూ అంటే ఏమిటో కచ్చితమైన నిర్వచనం లేనందున వారిని గుర్తించడానికి శాస్త్రవేత్తల వద్ద ఇంకా నమ్మకమైన పరీక్షలు లేవని ఆమె చెప్పారు.
కేవలం పరిపూర్ణమైన మలం కోసం వెతకడం కంటే, రోగులకు సరిపోయే మల దాతలను జత చేయడం మరింత ఆశాజనకమైన విధానమని పెరుగుతున్న పరిశోధనలు సూచిస్తున్నాయి.
దాతలు, రోగులను వారి పేగు సూక్ష్మజీవుల వైవిధ్యం వంటి అంశాల ఆధారంగా శాస్త్రవేత్తలు వివిధ వర్గాలుగా విభజించవచ్చు.

ఫొటో సోర్స్, AFP via Getty Images
మలం నుంచి మాత్రల వరకు.. భవిష్యత్ వైద్యం!
అత్యంత ప్రభావవంతమైన సూపర్-పూపర్స్ నుండి సేకరించిన అత్యుత్తమ మలంతో కూడా మల మార్పిడి అనేది ఇంకా కచ్చితమైన శాస్త్రం కాదు.
"ఫేకల్ మైక్రో బయోటా మార్పిడి అనేది నాకున్న అతిపెద్ద సందేహం" అని లండన్లోని క్వీన్ మేరీ విశ్వవిద్యాలయానికి చెందిన సారా బెంటెర్కియా అన్నారు.
"మీరు ఒక మొత్తం సూక్ష్మజీవుల సమూహాన్ని బదిలీ చేస్తున్నారు, కాబట్టి పరిగణించవలసిన అంశాలు చాలా ఉన్నాయి" అని ఆమె చెప్పారు.
వేర్వేరు దాతలు, తయారీ విధానాలు, గ్రహీతల వల్ల వేర్వేరు సూక్ష్మజీవుల మార్పులు సంభవించవచ్చు.
మరోవైపు, మరింత ప్రామాణిక చికిత్సలకు ఈ మల మార్పిడులు ఒక తొలి అడుగు అని క్రాఫోర్డ్ అంటున్నారు.
ఉదాహరణకు, ఫెర్రింగ్ ఫార్మాస్యూటికల్స్ కంపెనీ 'రిబ్యోటా' (పేగు ఇన్ఫెక్షన్ను నివారించడానికి ఉపయోగించే ఒక మందు) అనే మందును మలం నుంచి తయారు చేస్తుంది.
ప్రయోజనకరమైన బ్యాక్టీరియా అధికంగా ఉన్న దాతల మలం నుండి దీనిని ఉత్పత్తి చేస్తారు.
సెరెస్ థెరప్యూటిక్స్ కంపెనీ మానవ మలం నుండి తయారు చేసిన కొన్ని బ్యాక్టీరియా బీజాంశాలతో కూడిన 'VOWST' మాత్రలను ఉత్పత్తి చేస్తుంది.
తరచుగా వచ్చే క్లోస్ట్రిడయోయిడ్స్ డిఫిసిల్ ఇన్ఫెక్షన్ చికిత్స కోసం ఈ రెండింటికీ ఫుడ్ అండ్ డ్రగ్ అడ్మినిస్ట్రేషన్ ఆమోదం లభించింది.
నిజానికి భవిష్యత్లో క్లోస్ట్రిడయోయిడ్స్ డిఫిసిల్ ఇన్ఫెక్షన్కు చికిత్స మంచి దాతల నుంచి ఎంచుకున్న సూక్ష్మజీవులను ల్యాబ్లో పెద్ద ఎత్తున పెంచి మాత్రల రూపంలో ఇచ్చే అవకాశం ఉందని క్రాఫోర్డ్ చెబుతున్నారు.
"మైక్రోబయోమ్ ఆధారిత చికిత్సలకు భవిష్యత్తు వైద్యరంగంలో కీలక పాత్ర పోషించే సామర్థ్యం ఉందని నేను భావిస్తున్నాను" అని ఆయన అన్నారు.
అయితే ఆధునిక జీవనశైలి మానవ సహజ మైక్రోబయోమ్ను తీవ్రంగా దెబ్బతీస్తున్న సమయంలో భవిష్యత్తులో వీటిని వాడుకోవడంపై క్రాఫోర్డ్ ఆందోళన వ్యక్తం చేస్తున్నారు. ఉదాహరణకు అల్ట్రా-ప్రాసెస్డ్ ఫుడ్స్ పేగులోని సూక్ష్మజీవుల వైవిధ్యాన్ని తగ్గిస్తాయని ఇప్పటికే నిరూపణ అయింది.
"రాబోయే కొత్త వ్యాధులతో పోరాడటానికి మనకు సహాయపడే అనేక జీవుల లక్షణాలను మన జీర్ణకోశంలో కోల్పోతామేమోనని నేను భయపడుతున్నాను" అని క్రాఫోర్డ్ అన్నారు. పేగులోని ఈ అద్భుతమైన స్వస్థత శక్తిని ఆయన ఉష్ణమండల వర్షారణ్యాలలో గుర్తించిన ఔషధ మొక్కల రసాయనాలతో పోల్చారు.
"మన జీర్ణకోశంలోని మైక్రోబయోమ్ చాలా విశాలమైనది. అది మనకు బాగా సాయం చేస్తుంది. అయితే మనం దాని విలువ గుర్తించడం లేదు" అని క్రాఫోర్డ్ చెప్పారు.
(ఈ కథనంలోని సమాచారం సాధారణ అవగాహన కోసం మాత్రమే. దీనిని ఆరోగ్య నిపుణుల వైద్య సలహాకు ప్రత్యామ్నాయంగా పరిగణించకూడదు. అనారోగ్య సమస్యలు ఉంటే వైద్య నిపుణులను సంప్రదించి వారు సూచనలు తీసుకోవాలి)
(బీబీసీ కోసం కలెక్టివ్ న్యూస్రూమ్ ప్రచురణ)
(బీబీసీ తెలుగును వాట్సాప్,ఫేస్బుక్, ఇన్స్టాగ్రామ్, ట్విటర్లో ఫాలో అవ్వండి. యూట్యూబ్లో సబ్స్క్రైబ్ చేయండి.)





























