Nin Kitaabka Qur'aanka intuu jeexjeexay suuli ku guray oo maxkamad lasoo taagay

Eedeysane ayaa xirtay muraayadaha qorraxda (ookiyaale madow), isaga oo isla markaana cabbayay sigaarka korontada xilli uu maxkamadda kaga soo muuqday muuqaal isaga oo xabsi ku jira si loogu rido xukun la xiriira dambiyo nacayb ah—ka hor inta uusan qolka ka bixin isaga oo caraysan.

Ibrahim Iqbal, oo 30 jir ah, ayaa lagu helay labo dambi oo ah waxyeello bareer ah oo salka ku haysa nacayb diimeed iyo hal dambi oo waxyeello hantiyeed ah gudaha Maxkamadda Degmada Leeds ee Leeds Magistrates' Court ee dalka UK taariikhdu markay ahayd 4-tii Febraayo, ka dib markii uu bogagga Qur'aanka Kariimka ah ku guray musqusha qolka salaadda ee isbitaal, sidoo kalena uu qoraallo nacaybka Yuhuudda ah ku qoray gidaarka qolka xabsiga.

Intii uu socday dhegeysiga xukunka ee isla maxkamaddaas, Iqbal ayaa eryay qareenkiisii isaga oo ku eedeeyay " tamar xun", wuxuuna sheegay inuu isagu ismeteli doono.

Si lama filaan ah ayuu uga baxay dacwaddii markii la dhegeysanayay faahfaahinta dambiyadiisa loo aqrinayay garsoorayaasha inta lagu guda jiray codsi dammaanad raadis ah.

Maxkamadda ayaa hore u maqashay in Iqbal uu meel ka dhac ku sameeyay dhowr nuqul oo Qur'aanka Kariimka ah — oo ah kitaabka barakaysan ee Islaamka — isagoo bogag ka jeexay, dab qabadsiiyay, ka dibna ku guray weelka wejiga lagu dhaqdo iyo musqusha qolka lagu dhex tukanayay ee Isbitaalka St James ee Leeds, bishii Noofambar ee sanadkii hore.

Ka dib markii la xiray bishii Diseembar, ayuu gidaarka qolkiisa xabsiga ku qoray hal-ku-dhig ka dhan ah dadka Yuhuudda ah isagoo u adeegsaday qalin midabaysan, sida uu sheegay Xafiiska Xeer-ilaalinta Qaranka (CPS).

Intii ay socotay dhageysigii maxkamadda ee Isniintii, waxaa garsoorayaasha loo sheegay in Iqbal sidoo kale lagu eedeeyay inuu weeraray sarkaal boolis ah 25-kii Noofambar, isagoo jilibkiisa uga garaacay caloosha qeybta hoose isagoo katiinadaysan. Ka dibna waxaa lagu eedeeyay fal dambiyeed burburin hanti ah, markii uu jeex-jeexay buugga anshaxa ee booliska intii uu ku jiray xabsiga.

Iqbal ayaa ku dooday inuusan wax aqoon ah u lahayn waxa lagu xukumay, bishii horena qareenkiisa ayaa u sheegay maxkamadda inuu diiday inuu ka soo baxo qolkiisa xabsiga HMP Leeds maalintii dacwaddiisu socotay.

Eedeysanaha, oo maxkamadda uga soo muuqday muuqaalka fogaan-aragga isla markaana sheegay inuu deggan yahay waddada Middleton ee Belle Isle, ayaa sheegay inuusan haysan "wax ikhtiyaar ah" oo aan ka ahayn inuu iska dhaafo qareen u dooda, isagoo ku eedeeyay qareenkiisii ay dowladu u qabatay inuu leeyahay "tamar xun". Waxa uu ku hanjabay inuu dacwayn doono qareenkiisii hore iyo lataliyaha sharciga ee maxkamadda labadaba.

Kiiska ayaa dib loo dhigay ilaa lixda Maarso si xukunka loo rido, si loogu oggolaado in la diyaariyo warbixinta asluubta, iyadoo Iqbal uu sii jiri doono xabsiga ilaa waqtigaas.