Coinneamh mu dhuilgheadasan seirbheis a' phuist am Muile

Tha dùil ri coinneimh Diciadain eadar am Post Rìoghail agus cuid de mhuinntir Mhuile, agus gearan ann gu bheil seirbheisean a' phuist san eilein air a dhol am miosad sna mìosan a chaidh seachad.

A rèir mhuinntir an eilein tha maill mhòr air litrichean cudromach leithid bhilichean agus fiosrachadh mu choinneamhan meadaigeach a bhith a' ruighinn an eilein, agus iad ag ràdh gu bheil àireamh mhòr de pharsailean a' cur ris an uallach a th' air luchd-obrach a' phuist.

Coinnichidh muinntir an àite ri riochdairean a' Phuist Rìoghail Diciadain airson bruidhinn mun trioblaid.

Thuirt am Post Rìoghail gu bheil obair mhòr an lùib a bhith a' cumail seirbheis ri coimhearsnachdan eileanach, agus gu bheil iad an eisimeil bhàtaichean-àiseig, agus seirbhisean adhair, rudan ris nach eil gnothach aca.

Thuirt neach-labhairt gu bheil duighleadasan air a bhith aca cuideachd le bhith a' fastadh agus a' cumail luchd-obrach ionadail.

Thuirt e gu bheil iad fhathast a' feuchainn ri eileanaich fhastadh, agus gu bheil iad a' tabhainn duais airgid do dh'fheadhainn a thig a dh'obair dhaibh, agus nach eil iad a' cleachdadh luchd-obrach eadar-amail ach nuair a dh'fheumas iad.

Tha a' choinneamh a' tachairt goirid an dèidh mar a dh'iarr Luchd-cleachdaidh Alba air Riaghaltas na Rìoghachd Aonaichte piseach a thoirt air seirbheisean puist nan sgìrean eileanach - a' sònrachadh Arcaibh, Sealtainn agus na h-Eileanan an Iar, ach gun iomradh air eileanan Earra-Ghàidheal.

Chaidh dragh a thogail le cuid de dhaoine ris an do bhruidhinn a' bhuidheann mu chosgaisean a bharrachd a tha cuid de chompanaidhean a' cur air a bhith a' lìbhrigeadh stuth dha na h-eileanan seach tìr-mòr, sin ma tha iad fiù 's deònach stuth a chur gu eileanan.

Bha gearan ann cuideachd air oifisean puist a bhith a' dùnadh no a' gluasad gu làraichean taobh a-muigh meadhan bhailtean, no a' gearradh air ais air na h-uairean fosglaidh aca.

Chaidh a ràdh nach eil earbsa aig muinntir nan eilean anns an t-seirbheis gum faigh iad stuth a thathas a' cur thuca.