Spòrs

Bidh An Taobh Siar an aghaidh An Rubha sa chuairt dheireannaich de Chupa Jock Stein is an dà sgioba air adhartas a dhèanamh oidhche Luain.

'S iad na Siaraich a chaidh air thoiseach an aghaidh a' Bhac tro Ross Dòmhnallach, ach bha an geama co-ionnan aig letheach slighe le tadhal dha na Gormaich bho Elliot Henderson.

Ged a chuir Daibhidh MacAnndrais Am Bac air thoiseach san dàrna leth, fhreagair An Taobh Siar le dà thadhal ann an trì mionaidean bho Chailean MacRath 'son an cur troimhe 3-2.

'B e seo an siathamh turas air an t-seusan seo a bha na sgiobaidhean air coinneachadh is na Siaraich air ceithir dhuibh a bhuannachadh.

San iar-chuairt dheireannaich eile thug An Rubha pronnadh 10-1 air United.

Chuir na Rubhaich dà thadhal sa chiad deich mionaidean den gheama is bha iad 7-1 air thoiseach aig letheach slighe.

'S iad Ethan MacAdam (2), Aonghas Dòmhnallach (2), Daniel Broker (2), Dean Clinton (2) is Rob Jones (2) a fhuair na tadhail dha na Rubhaich.

Bidh a' chuairt dheireannach Disathairne an 5mh den t-Sultain aig Pàirc Chnoc nan Gobhar.

Tha aona gheama ann an Lìog Taobh Siar na Gàidhealtachd oidhche Mhàirt is cothrom aig Malaig ceum mòr a ghabhail a dh'ionnsaigh an tiotail ma nì iad a' chùis air Caol Àcain aig an taigh.

Ann an Lìog Uibhist is Bharraigh thèid Saints an Ìochdair an aghaidh Bharraigh.

Tùs an deilbh, Cluba ball-coise Èirisgeigh

Tha gàirdeachas ga dhèanamh ann an Èirisgeigh às dèidh dhaibh a' chùis a dhèanamh 5-4 air Beinn na Faoghla gus Cupa Billy McNeill a bhuannachadh.

'S e sàr oidhirp a bh' ann bho Èirisgeigh is iad air a bhith 4-1 air dheireadh sa gheama le beagan is 20 mionaid air fhàgail.

Fhuair Dominic MacAmhlaigh trì tadhail do dh'Èirisgeigh is Dòmhnall MacLachlainn is Calum Caimbeul cuideachd air an targaid.

Ann an Lìog Taobh Siar na Gàidhealtachd ghabh Malaig ceum mòr a dh'ionnsaigh an tiotal a bhuannachadh nuair a rinn iad a' chùis 5-4 air Slèite is an Srath.

Tha feum aca air ceithir puingean bho na trì geamaichean mu dheireadh aca gus a bhith cinnteach air an duais - is cothrom air trì dhiubh a thogail oidhche Mhàirt nuair a chluicheas iad Caol Àcainn.

Bha aona gheama eile san lìog Disathairne is Iar-Thuath an Eilein Sgitheanaich air a' chùis a dhèanamh 6-3 air a' Ghearasdan.

Ann an Leòdhas is Na Hearadh bidh iar-chuairtean deireannach Chupa Jock Stein ann oidhche Luain.

Bidh Am Bac an aghaidh An Taobh Siar agus United an aghaidh An Rubha.

Thuirt manaidsear Camanachd an Òbain gun do sheall an sgioba aige an spiorad a th' aca le a bhith a' buannachadh Cupa MhicAmhlaigh dìreach seachdain às dèidh dhaibh a dhol a-mach à Cupa na Camanachd air buillean-peanais.

Rinn an t-Òban a' chùis 2-1 air Ceann a' Ghiùthsaich ann an ùine a bharrachd aig Pàirc Mossfield airson Cupa MhicAmhlaigh a thogail 'son a' chiad uair bho 2023.

Bha iad air a dhol air thoiseach tro Ross Caimbeul is 17 mionaidean air an cluich - oidhirp bho astar ris nach do dhèilig Bob MacGriogair eadar na puist do Cheann a' Ghiùthsaich.

Chuir MacLeod Dawson òg tadhal le 13 mionaidean air fhàgail gus an geama a thoirt do dh'ùine a bharrachd, ach 's iad sgioba an Òbain a fhuair an ath thadhal cudromach bho Ross MacMhaolain gus an cupa a bhuannachadh.

"Tha mi cho moiteil às na balaich," thuirt Daniel Camshron, is e ag radh gur e briseadh-dùil mòr a bh' aca an aghaidh Bhaile Ùr an t-Slèibh ann an Cupa na Camanachd.

"Buille mhòr a bh' ann an t-seachdain seo chaidh is bha iad sgìth - bha e doirbh an togail agus an uairsin ùine a bharrachd a chluich a-rithist an seo.

"Tha mi cho moiteil àsta uile - 's e fìor oidhirp sgioba a bha seo."

Tha e a' ciallachadh gu bheil Cupa MhicAmhlaigh aig an Òban a-nise cho math ris a' Chupa Cheilteach a bhuannaich iad san Ògmhios.

Thuirt an Camshronach aig an àm sin gur e an targaid a bh' aige a' bheàrn gu Ceann a' Ghiùthsaich is Baile Ùr an t-Slèibh a dhùnadh - is faodaidh e a ràdh a-nise gu bheil an dà gheama mu dheireadh air sealltainn nach eil beàrn idir ann.

Lìog

Sa Phrìomh Lìog Disathairne rinn Baile Ùr an t-Slèibh a' chùis 5-0 air Caol Bhòid agus shoirbhich Cabar Fèidh 3-2 an aghaidh nan Sgitheanach ann am Port Rìgh.

Sa gheama eile chrìochnaich Caol-Gleann is An Gearasdan co-ionnan 1-1 aig Clachan Ghlinn Da-Ruail.

Ann an Lìog Tuath 2 's e 3-2 a bh' ann dha na Leòdhasaich an aghaidh Loch Carran.

Bha aona gheama ann am Prìomh Lìog nam ban is Bàideanach air a' chùis a dhèanamh 1-0 air GMA le tadhal bho Zoe Reid.

Tha geama fìor mhòr ann a-nise Didòmhnaich seo tighinn eadar Bàideanach is Ceann Loch Seile.

Tha Bàideanach feumach air puing airson an lìog a bhuannachadh ach bidh an gnothach ann an làmhan Cheann Loch Seile ma nì iadsan a' chùis.

Ghluais Aths gu bhith dìreach puing air cùlaibh An Rubha aig mullach Lìog Leòdhais agus Na Hearadh às dèidh a' chùis a dhèanamh air a' Bhac oidhche Chiadain.

Chaidh Aths air thoiseach taobh a-staigh dìreach deich diogan mus robh Am Bac co-ionann mionaid às dèidh sin.

Bha Aths air thoiseach a-rithist às dèidh cairteal na h-uaireach ach deich mionaidean goirid ron leth-uair chuir Louie Dòmhnallach Am Bac co-ionann uair eile.

Fhuair Aths an uair sin breab-peanais le Harry Bray ga chur a-steach bhon spot.

Ghluais sgioba Steòrnabhaigh nas fhaide air thoiseach san dàrna leth a dh'aindeoin is gun robh iad shìos gu deichnear.

Fhuair Am Bac an uair sin breab-peanais dhaibh fhèin le Campbell Dòmhnallach gan gluasad nas fhaisge.

Ach a dh'aindeoin 's gun robh leth uair de thìde air fhàgail sa gheam cha b' urrainn dhaibh lorg fhaighinn air a' chòrr thadhail agus thàinig Aths am bàrr 4-3.

Tha sin a' fàgail Aths puing air cùlaibh An Rubha aig a' mhullach ged a tha geam a bharrachd aig na Rubhaich ri chluich.

Thèid an dà sgioba an aghaidh a chèile air an 28mh den Lùnastal.

Bidh Beinn na Faoghla an aghaidh Èirisgeigh sa chuairt dheireannaich de Chupa Billy McNeill is an dà sgioba air adhartas a dhèanamh oidhche Mhàirt.

'S e 6-5 a bh' ann do Bheinn na Faoghla ann an geama iongantach an aghaidh Bharraigh ann am Bàgh a' Chaisteil.

Bha dràma gu leòr aig Cnoc na Monadh cuideachd far an do rinn Èirisgeigh an gnothach 5-4 air Saints an Ìochdair.

Bha Èirisgeigh air a bhith 4-1 air thoiseach le leth-uair air fhàgail ach thàinig Saints air ais gus an geama fhàgail co-ionann anns na diogan mu dheireadh.

Nochd cò eile ach Dominic MacAmhlaigh ge-tà gus an tadhal fhaighinn a chuir Èirisgeigh troimhe.

Bidh a' chuairt dheireannach ann Disathairne seo tighinn aig Pàirc an Eilein Duirche aig meadhan-là.

Chaidh Slèite is an Srath gu mullach Lìog Taobh Siar na Gàidhealtachd oidhche Mhàirt nuair a rinn iad a' chùis 5-3 air Loch Aillse.

Chuir Josh Knowles trì do Shlèite is Connaire Yoxon is Teàrlach MacGilleBhràtha cuideachd air an targaid.

Ged a tha Slèite aig bàrr na lìge, tha iad air dà gheama a bharrachd a chluich na Malaig, a tha còmhla riutha air 24 puingean.

Sa gheama eile ann an Lìog Taobh Siar na Gàidhealtachd oidhche Mhàirt rinn Caol Àcainn an gnothach 3-2 air Port Rìgh.

Tùs an deilbh, Cupa Amaitearach na Gàidhealtachd

Thàinig dearbhadh gur ann eadar Golspie Stafford is Whalsay a bhios cuairt dheireannach Chupa Amaitearach na Gàidhealtachd.

Bha Whalsay air a' chùis a dhèanamh 3-1 air Black Rock Rovers san iar-chuairt dheireannaich is Goillspidh air a dhol troimhe 3-1 an aghaidh Mhalaig.

Thog Malaig ceist às dèidh a' gheama sin ge-tà an robh fear de chluicheadairean Ghoillspidh air a chlàradh mar a bha còir.

Rinn comataidh Chupa Amaitearach na Gàidhealtachd sgrùdadh is tha iad a-nise air dearbhadh gun robh an duine clàraichte.

Tha sin a' ciallachadh gun tèid a' chuairt dheireannach eadar Golspie Stafford is Whalsay air adhart Disathairne 29mh ann an Inbhir Ùige.

Tha a h-uile coltas ann a-nise gur e rèis eadar An Rubha is Aths a th' ann airson tiotal Lìog Leòdhais is Na Hearadh às dèidh dhan Bhac call ris An Taobh Siar oidhche Luain.

'S iad Ross Dòmhnallach is Coinneach Mitchell a fhuair na tadhail dha na Siarach ann an Col Uarach is iad a' soirbheachadh 2-0.

'S e seo an treas geama lìge ann an sreath a bha na Bacaich air call is tha e air cha mhòr cur às gu dòchas sam bith a bh' aca air an tiotal.

Bha aona gheama eile ann oidhche Luain is Na Hearadh air buannachadh 5-1 an aghaidh United.

'S iad Tyler MacGilleÌosa, Ahmed Pandor (2) is Aaron MacLeòid (2) a fhuair na tadhail dha na Hearaich.

Tùs an deilbh, IslandFootie

Tha geama cudromach aig mullach Lìog Lèodhais is na Hearadh oidhche Luain is Am Bac a' cur fàilte air An Taobh Siar.

Às dèidh dhan Bhac call 3-2 an aghaidh An Rubha oidhche Haoine - geama anns an robh iad 2-0 air thoiseach le beagan mhionaidean air fhàgail - tha cruaidh fheum aca air na trì puingean ma tha iad 'son fuireach san rèis aig a' mhullach còmhla ris An Rubha is Aths.

Tha aona gheama eile ann an Leòdhas oidhche Luain is United a' cluich an aghaidh Na Hearadh.

Thig fios oidhche Mhàirt cò bhios sa chuairt dheireannaich de Chupa Billy McNeill is Barraigh a' cluich Beinn na Faoghla is Èirisgeigh a' dol an aghaidh Saints an Ìochdair.

Tha seo a' tighinn às dèidh dha na Barraich adhartas a dhèanamh ann an cupa eile air an deireadh-sheachdain.

Rinn iad an gnothach air Athletic Steòrnabhaigh 7-6 air breaban-peanais ann an iar chuairt dheireannach Chupa MalCivils is an geama fhèin air crìochnachadh 3-3.

Bidh Barraigh an aghaidh A' Bhac sa chuairt dheireannaich.

Bidh dà gheama ann an Lìog Taobh Siar na Gàidhealtachd oidhche Mhàirt cuideachd.

Cluichidh Caol Àcainn an aghaidh Phort Rìgh is bidh Slèite is an Srath an aghaidh Loch Aillse.

Bha deireadh-seachdain air leth ann do sgiobaidhean Bhàideanach an dà chuid ann an iomain nam fear is nam ban.

Disathairne chaidh Baile Ùr an t-Slèibh air adhart gu cuairt dheireannach Chupa na Camanachd far an tèid iad a-rithist an aghaidh nan seann nàimhdean aca Ceann a' Ghiùthsaich.

Bha feasgar dùbhlanach aig a' Bhaile Ùr ann an Taigh an Uillt is iad 2-0 air dheireadh an aghaidh Camanachd an Òbain le dìreach cairteal na h-uaireach air fhàgail - an dà thadhal aig an Òban air tighinn bho Chonnor Howe.

Fhuair am Baile Ùr slighe air ais dhan gheama ge-tà le buille-peanais bho Steafan Dòmhnallach, is bha connspaid ann an uairsin nuair a chaidh Gary MacFhearchair aig an Òban a cur dheth is e air Drew Dòmhnallach a bhualadh leis a chaman - ged a bha MacFhearchair a' cumail a-mach gur e tubaist a bh' ann.

Chuir Mata Sloss tadhal eile dhan Bhaile Ùr le trì mionaidean air fhàgail gus an geama a chur gu ùine a bharrachd.

Cha robh an còrr thadhal san leth uair a bharrachd, ged a bha cairt dhearg ann do Declan Brannan aig a' Bhaile Ùr.

Dh'fhàg sin gun deach iad gu buillean-peanais agus 's e Kenny Ros eadar na puist dhan Bhaile Ùr an gaisgeach a bh' ann, a' sàbhaladh trì de dh'oidhirpean an Òbain gus am Baile Ùr a chur troimhe 2-1.

Bidh iad an aghaidh Cheann a' Ghiùthsaich sa chuairt dheireannaich san Òban air an 19mh den t-Sultain.

Sa Phrìomh Lìog Disathairne ghabh Ceann a' Ghiùthsaich an cothrom gus a' bheàrn eadar iad fhèin is am Baile Ùr aig a' mhullach a ghearradh gu ceithir puingean nuair a rinn iad an gnothach 4-1 air a' Ghearasdan.

Tha cùisean nas soilleire aig a' bhonn cuideachd is Loch Abar air dà phuing luachmhor a thogail le tadhal anns na diogan mu dheireadh an aghaidh Caol-Gleann gus buannachadh 2-1.

Aig an dearbh àm rinn na Sgìtheanaich a' chùis 3-1 air Caol Bhòid - is coltas ann aig an ìre seo gur iad Caol Bhòid is Caol-Gleann a thuiteas sìos dhan Lìog Nàiseanta.

Eachdraidh do Bhàideanach

Ann an iomain nam ban rinn Bàideanach eachdraidh Didòmhnaich nuair a bhuannaich Cupa na Prìomh Lìge.

'S e cupa ùr a tha seo is e leasachadh cudromach a th' ann cuideachd do dh'iomain nam ban le dusan cluicheadair air gach taobh seach deichnear.

Bha mòran an dùil ri geama teann sa chuairt dheireannach eadar Bàideanach is Ceann Loch Seile - sgioba a tha air adhartas mòr a dhèanamh am-bliadhna.

Air a' cheann thall bha Bàideanach cus ro mhath air an là ge-tà is iad a' buannachadh 6-0.

Thàinig na tadhail aca bho Megan Ralph (2), Kirsty Deans (2), Zoe Reid is Lexi NicFhearchair.

Là air leth do Bhàideanach is bidh sùil aca a-nise air a' Phrìomh Lìog is Cupa Valerie Fhriseil a bhuannachadh cuideachd.

'S iad Ceann Loch Seile a bhios san rathad orra a-rithist is na sgiobaidhean gus coinneachadh san lìog air an 30mh den Lùnastal agus ann an cuairt dheireannach Cupa Valerie Fhriseil air a' 5mh den t-Sultain.

Rinn sgioba eile eachdraidh Didòmhnaich cuideachd.

Bhuannaich Dùn Ad Cupa ùr nan Sgiobaidhean Singilte is iad air soirbheachadh 5-3 an aghaidh Ghleann Urchadain às dèidh ùine a bharrachd.

Chuir Eilidh Chamshron ceithir de na tadhail aca is am fear eile a' tighinn bho Grace Drummond.

'S i Rowan Brockie a chuir na tadhail aig Gleann Urchadain.

'S iad Beinn nam Fadhla a th'aig bàrr Lìog Uibhist & Bharraigh fhathast as dèidh dhaibh puing a thogail an aghaidh Bharraigh an-raoir.

Chrìochnaich an geama eadar iad aig 1 - 1 aig Pàirc an Eilein Duirche.

Tha sin air Beinn nam Fadhla fhàgail puing air thoiseach air Uibhist a Tuath aig mullach na lìge, ged a tha iad air geama a bharrachd a chluiche. Tha na Barraich san treasamh àite, puing air thoiseach air Èirisgeigh.

Ann an Lìog Thaobh Siar na Gàidhealtachd, ghluais sgioba A' Ghearasdain suas don chòigeamh àite a raoir.

Rinn iad a chùis air Loch Aillse 3 - 2 anns A' Chaol.

Tha Loch Aillse aig bonn na lìog fhathast, le dìreach trì puingean a-mach as na deich geamannan aca gu ruige seo.

Thàinig iomairt sgioba Chàrlabhaigh gus Cupa Jock Stein a dhìon gu ceann a-raoir, agus iad a' call ris an Rubha aig Cnoc a' Choilich.

Thug dà thadhal bho Aonghas Dòmhnallach, agus aonan eile bho Mhàrtainn Dòmhnallach na Rubhaich troimhe gu iar-chuairtean deireannach farpais na bliadhna seo, agus iad a' buannachadh 3 - 1.

Am measg nan geamannan eile, fhuair sgioba A' Bhac dìoghaltas air na Hearaich as dèidh call riutha ann an Cupa Mholdòbha Leòdhais air a' mhìos seo chaidh. Thàinig na Bacaich am bàrr 5 - 2 air an Tairbeart.

Coinnichidh iadsan An Taobh Siar san ath-chuairt, le na Siaraich a' buannachadh 2 - 1 an aghaidh Athletic Steòrnabhaigh aig Pàirc Chnoc nan Gobhar.

Chaidh cùisean na b' fheàrr do United Steòrnabhaigh ge-tà, agus iadsan a' dèanamh a' chùis air Nis 2 - 1 aig Na Còig Peighinnean. Thèid iadsan an aghaidh An Rubha air an 24mh den Lùnastal airson àite anns a' chuairt dheireannaich aig toiseach na h-ath-mhìos.

Thèid cuairt dheireannach Chupa Eilean an Fhraoich air adhart air an 29mh den Lùnastal.

Thèid an geama, eadar Na Hearadh agus am Bac, a chluiche air a' Bhac.

Bha còir an geama a chluiche ann an Nis Disathairne an 8mh den mhìos, ach chaidh a chur dheth ri linn na droch aimsire.

Thèid na geamannan lìog a bh' aig an dà sgioba oidhche Haoine 28mh den Lùnastal a-nise a chluiche Diciadain 2mh den t-Sultain.

Bidh Am Bac an aghaidh nan Lochan agus tha Na Hearadh an aghaidh An Taobh Siar.

Cha tèid an geama eadar na Hearadh agus Am Bac air adhart Disathairne ann an Nis mar a bha còir anns a' chuairt dheireannaich de Chupa Eilean an Fhraoich.

Tha seo ri linn droch shìde ris a bheil dùil.

Thèid ceann-là eile a chur air dòigh air a shon fhathast.

Thèid ceithir geamannan a chluiche anns na cairteal-cuairtean deireannach de Chupa Jock Stein oidhche Luain.

'S iad sin:

Nis - United

Càrlabhagh - An Rubha

Na Hearadh - Am Bac

Aths - An Taobh Siar

Bhuannaich Gleann Urchadain 3-1 an aghaidh Lòbhat ann an Roinn Nàiseanta na h-iomain oidhche Chiadain.

Tha sin gan cuir sia puingean air thoiseach air sgioba Chill Tharaglain aig mullach na lìog agus ceum nas fhaisge air tilleadh dhan Phrìomh Lìog an ath sheusan.

Thàinig na tadhail do sgioba Dhruim na Drochaid o Neale Reid, Daniel MacIllEathain is Alfie MacLeòid, mus d'fhuair Lewis Tawse tadhal air ais do Lòbhat an dèidh 76m.

Bha aona gheama sa Phrìomh Lìog oidhche Chiadain cuideachd. Rinn Camanachd an Òbain an gnothach air Caol Bhòid 4-1.

Tha Caol Bhòid aig bonn a' Phrìomh Lìog 's gun iad ach dìreach air aona gheama a bhuannachadh air an t-seusan seo.

Tha An Gearsadan gu bhith a' cluiche Ceann Loch Seile oidhche Haoine aig 7f aig An Àird sa Phrìomh Lìog.

Agus anns an 2na Roinn a Tuath oidhche Haoine cuideachd, cuiridh Cill Mhàilidh fàilte air sgioba na Manachainn dhan Chaol.

Ghluais Slèite is an t-Srath gu mullach Lìog Thaobh Siar na Gàidhealtachd às dèidh a' chùis a dhèanamh air Caol Àcainn 6-2 oidhche Mhàirt.

Tha sin gam fàgail air an aon àireamh phuingean ri Malaig aig a' mhullach ach air thoiseach orra air sgàrradh thadhail, ged a tha Slèite is an t-Srath air geama a bharrachd a chluich.

Thèid Malaig agus Slèite is an t-Srath an aghaidh a chèile ann an geam mòr san lìog Disathairne a dh'fhaodadh buaidh gu math mòr a thoirt air far an tèid an tiotal am-bliadhna.

Cuideachd, thèid an sgioba a tha san treasamh àite, Iar Thuath an Eilein Sgitheanaich, an aghaidh Loch Aillse oidhche Haoine, is sgioba an Iar Thuath airson na cothroman aca fhèin air an lìog a bhuannachadh a chumail beò.

Agus anns a' gheama eile Dihaoine, cuiridh an Gearasdan fàilte air Port Rìgh.

Tùs an deilbh, Oban Celtic

Dh'ainmich Comann na Camanachd gu bheil Ceiltich an Òbain air innse dhaibh nach urrainn dhaibh crìoch a chur air an t-seusan aca san Lìg Nàiseanta air sgàth ghainnead chluicheadairean.

Thuirt an cluba, a dh'aindeoin gach oidhirp sgioba fhaighinn air a phàirc, gu bheil e air a bhith doirbh dhaibh na geamaichean aca a choileanadh.

Thuirt Comann na Camanachd gun toir iad cuideachadh don sgioba fhad 's a tha iad a' feuchainn ri cùisean a leasachadh aig a' chluba.

"Tha sinn a' tuigsinn nach e co-dhùnadh furasta a bha seo do Cheiltich an Òbain agus tha sinn a' cur taic ri na planaichean a th' aca airson an cluba a dhèanamh nas seasmhaiche airson seusan 2027", thuirt neach-labhairt bho Chomann na Camanachd.

"Tha sinn a' dèanamh fiughair rim faicinn a' tilleadh nas làidire an ath-sheusan."

A rèir riaghailtean a' chomainn thèid na geamaichean a chluich iad san Lìg Nàiseanta a sguabadh às a' ciallachadh gun tèid na puingean a thog sgiobaidhean nan aghaidh a thoirt air falbh.

Cha do thog Celtich an Òbain iad fhèin puing sam bith air an t-seusan seo agus chaidh 2 phuing a thoirt bhuapa leis nach b'urrainn dhaibh cluich an aghaidh Eilean Bhòid air an 25mh den Iuchar.

Tùs an deilbh, Lewis & Harris Football Association

Thug Na Hearadh buille do dh'iomairt a' Bhac Lìog Leòdhais agus Na Hearadh a bhuannachadh le bhith a' dèanamh a' chùis orra oidhche Luain.

Thàinig na Hearaich am bàrr 3-2 air an Tairbeart a' ciallachadh gu bheil Am Bac a' fuireach san treasamh àite, sia puingean air cùlaibh an Rubha aig a' mhullach, ged a tha aon gheama a bharrach aig na Bacaich ri chluich.

Tha Na Hearadh fhathast sa chòigeamh àite, ach a-niste dìreach puing air cùlaibh Chàrlabhaigh os an cionn.

Bha beagan de bhuille ann cuideachd don sgioba san dàrna àite, Aths, a leig puingean às an aghaidh Chàrlabhaigh.

Chrìochnaich an dà sgioba 3-3, le Aths a' tilleadh bho a bhith 3-1 air dheireadh airson puing a thogail.

Tha sin a' fàgail Aths puing far a' mhullaich, ach tha iad air geama a bharrachd a chluich air an Rubha.

Cuideachd, thug an Taobh Siar droinneadh, 5-1, do Nis.

Agus anns a' chiad chuairt de Chupa Jock Stein fhuair United troimhe às dèidh dhaibh a' chùis a dhèanamh air Na Lochan, 4-0.

Chaill Malaig ri Golspie Stafford 3-1 ann an iar-chuairt dheireannach Chupa Amataireach na Gàidhealtachd aig an deireadh-sheachdain.

Bha Malaig air thoiseach gu na diogan mu dheireadh le tadhal o Sam MacKenzie mus tug Kevin Cairns co-ionnan na Cataich ann an 97m.

Fhuair Golspie Stafford dà thadhal eile ann an ùine a bharrachd tro Gary MacKenzie is an sgiobair Luke MacBeath, gan cur troimhe chun na cuairte deireannaich.

Bidh iad a' cluiche Whalsay à Sealtainn a rinn a' chùis air Black Rock Rovers à Baile Eòghainn 3-1 ann am Baile a' Chaisteil.

Chan eil ann an Whalsay ach an dàrna sgioba à Sealtainn a th' air an ìre seo den fharpais a' ruighinn.

Thèid a' chuairt dheireannach a chluiche Disathairne 15mh den Lùnastal.

Tùs an deilbh, Getty Images

'S e Fin Greumach, à Srath Pheofhair, an treasamh lùth-chleasaiche Gàidhealach a th' air bonn a bhuannachadh aig Geamaichean a' Cho-Fhlaitheis ann an Glaschu.

Bhuannaich e bonn umha ann an rèis C1-C3 1000m TT ann a velodrom Sir Chris Hoy Dihaoine

Thàinig seo às dèidh do Stephen MacCoinnich, à Ullapul, bonn umha a thogail san leum fhada agus Megan Keith, à Inbhir Nis, an aon bhonn a bhuannachadh san 5000m aig Scotstoun.

Chrìochnaich Greumach àir cùlaibh Devon Briggs à New Zealand, a thog am bonn òir, agus Gòrdan Allan à Astràilia a bhuannaich am bonn airgid.

"Mar lùth-chleasaichean para chan eil sinne cleachdte ris an t-seòrsa slòigh a tha seo," thuirt Fin.

"Tha e dìreach iongantach a' cluinntinn na fuaime ud fhad 's a tha sinn a' rothaireachd.

"Tha e a' ciallachadh gun urrainn dhut putadh nas cruaidhe buileach is tha e dìreach sònraichte math tighinn air falbh le bonn umha," thuirt e.

Bidh Fin a' farpais a-rithist Là na Sàbaid san C1-C3 3000m Individual Pursuit.

Tha Aths Steòrnabhaigh dìreach dà phuing far mullach Lìog Leòdhais is Na Hearadh às dèidh dhaibh a' chùis a dhèanamh air United oidhche Haoine.

Thug Aths droinneadh air na nàbaidhean aca sa bhaile, 7-0, airson na trì puingean a thogail agus cuideam a chumail air na Rubhaich.

Anns a' gheam eile oidhche Haoine rinn na Hearadh a' chùis air Nis 3-1 aig Pàirc nan Còig Pèighinnean.

Tha sin a' ciallachadh gu bheil Na Hearadh a' gluasad suas chun a' chòigeamh àite san lìog le Nis fhathast san dàrna àite bhon bhonn.

Cupa Amaitearach na Gàidhealtachd

Thèid na h-iar-chuairtean deireannach ann an Cupa Amaitearach na Gàidhealtachd a chumail an diugh.

Tha Malaig a' siubhal a Bhaile Eòghainn airson cluich an aghaidh Golspie Stafford aig 2f.

'S e seo a' chiad turas a tha Malaig air an ìre seo den fharpais a ruighinn.

Cuideachd, thèid Whalsay an aghaidh Black Rock Rovers ann am Baile a' Chaisteil aig 12:30f.

Ghluais Malaig trì puingean air thoiseach aig bàrr lìog taobh siar na Gàidhealtachd le bhith a' dèanamh a' chùis air Loch Aillse, 4-3, oidhche Mhàirt.

Thug an sgioba aig a' bhonn deagh gheama dhan sgioba aig a' mhullach ach 's iad Malaig a thog na puingean air a' cheann thall.

Aig a' cheart àm shreap Slèite is an Srath suas chun an dàrna àite às dèidh dhaibh a' chùis a dhèanamh air Port Rìgh, 7-0.

Tha sin gam fàgail air an aon àireamh phuingean ri Iar-thuath an Eilein Sgitheanaich ach air thoiseach orra air sgaradh thadhail.

Tha Slèite is an Srath trì puingean far a' mhullaich is iad air an aon àireamh gheamaichean a chluich ri Malaig, le Iar-thuath an Eilein Sgitheanaich air geama a bharrachd a chluich.

Tha geama fìor mhòr eile air thoiseach air Malaig air an deireadh-sheachdain, nuair a chluicheas iad ann an iar-chuairt dheireannach Cupa Amaitearach na Gàidhealtachd airson a' chiad uair an aghaidh Golspie Stafford.

Cuideachd an là sin, cluichidh Iar-thuath an Eilein Sgitheanaich an aghaidh Phort Rìgh ann an cuairt dheireannach Cupa Rois.

Tùs an deilbh, SNS

Dh'ainmich Caley Thistle Inbhir Nis gu bheil iad air Roddy MacGriogair a thoirt air ais chun a' chluba air cùmhnant dà bhliadhna.

Chuir MacGriogair an dà bhliadhna mu dheireadh seachad aig Queen's Park às dèidh dha Caley Thistle fhàgail ann an 2024.

Rugadh is thogadh MacGriogair ann am prìomh bhaile na Gàidhealtachd is bha e na sgoilear aig Bun-sgoil Ghàidhlig Inbhir Nis na bhalach.

Thàinig e tro shiostam òigridh Chaley Thistle sa bhaile is e a' cosnadh cliù aig aois òg mar chluicheadair.

Chluich e dhan sgioba airson a' chiad turas ann an 2018 agus uile gu lèir nochd e dhaibh 113 turas tron chiad ghreis aige aig a' chluba, a' faighinn 6 tadhail.

Thuirt MacGriogair: "Tha mi cho toilichte a bhith air ais. Tha mi air bhioran faighinn gu dol leis gur e àite cho math a th' ann ball-coise a chluich.

"Tha mi eòlach air a' mhanaidsear, Scott Kellachar, agus an leas-mhanaidsear, Billy MacAoidh, agus cuideachd air an t-seòrsa buill-choise a tha iad ag iarraidh a chluich.

"Tha e cho math gan coimhead a' cluich agus thug sin buaidh air a' cho-dhùnadh agam.

"Tha mi eòlach air a' chluba san fharsaingeachd, agus tha mi a' leantainn Inbhir Nis, so bha sin cuideachd am measg nan adhbharan gun do roghnaich mi tilleadh."

Bha 35 tadhail anns na ceithir geamaichean ann an Lìog Leòdhais agus Na Hearadh oidhche Luain.

Ghluais an Rubha nas fhaide air thoiseach aig a' mhullach às dèidh a' chùis a dhèanamh air Na Hearadh, 7-2, ann an Garrabost.

Tha sin a' fàgail nan Rubhach sia puingean air thoiseach air a' Bhac, nach do chluich an-raoir, ged a tha an Rubha air dà gheam a bharrachd a chluich.

Dh'fhuirich Aths Steòrnabhaigh san treasamh àite le bhith a' dèanamh a' chùis air United ann an dearbaidh a' bhaile, 5-0.

Tha e a' ciallachadh gu bheil iad ochd puingean far a' mhullaich ach coltach ris a' Bhac tha dà gheam a bharrachd aca ri chluich.

Bha droinneadh ann cuideachd don sgioba aig a' bhonn is na Lochan a' call 10-1 ri Càrlabhagh.

Cha robh an sgòr buileach cho dona dhan sgioba san dàrna àite bhon bhonn, ach fhathast chaill Nis gu dona cuideachd, 9-1 ris an Taobh Siar.