Trump: Iran waa dal waalan; si dhaqsi ayaan u dhameyneynaa arrintooda

Madaxweynaha Mareykanka Donald Trump ayaa mar kale si adag uga hadlay dalka Iiraan isagoo ka hadlayay isu-soo-bax olole oo ay sameeyeen xisbiga Jamhuuriga oo ka dhacay magaalada Syracuse ee gobolka New York; wuxuuna dalkaas ku tilmaamay mid "waalan" oo "aad u shar badan."

Isu-soo-baxaas oo lagu taageerayay Bruce Blakeman, oo ah musharaxa xisbiga Jamhuuriga u taagan xilka barasaabka New York, ayuu Mr. Trump ka sheegay in marka laga soo tago dagaalka u dhexeeya Ruushka iyo Ukraine, arrinta Iiraan ay sidoo kale ka mid tahay kiisaska uu doonayo inuu "xaliyo ama uu ku guuldareysto."

Isagoo ka hadlayay barnaamijka nukliyeerka ee Iiraan, madaxweynaha Mareykanka ayaa sheegay in Mareykanku uu u baahan yahay inuu "beddelo habka uu u wajahayo arrintan si uu awoodda nukliyeerka uga qaado dal waalan." Wuxuuna raaciyay: "Waa dal waalan. Iyaga laftoodu way og yihiin. Mar walba waan u sheegaa; waxaan ku dhahaa runtii waad waalan tihiin."

Qeyb kale oo ka mid ah khudbaddiisa, madaxweynaha Mareykanka ayaa Iiraan ku tilmaamay "dalka ah argagixisada ugu weyn" wuxuuna yiri: "Lama siin karo hubka nukliyeerka. Shaki la'aan way isticmaali doonaan."

Iiraan ayaa mar walba beenisay inay isku dayayso inay sameysato hubka nukliyeerka, waxayna sheegtaa in barnaamijkeeda nukliyeerka uu yahay mid loogu talagalay ujeeddooyin nabadeed.

Mr. Trump ayaa sidoo kale sheegay in saraakiisha Iran ay hore ugu hadleen qaab hanjabaad ah oo ku saabsan "in la wada dilo qof kasta," iyadoo qaarkoodna ay gadaal ka dhawaaqayeen hal-ku-dhigyo diimeed. "Dabcan, hadda sidaas uma hadlaan," ayuu yiri.

Wuxuu intaas ku daray in Iran ay qaadi karto "tallaabooyin dheeraad ah" ka hor doorashooyinka dhexe ee Mareykanka, maadaama uu aaminsan yahay in tallaabooyinkaas ay waxyeello u geysan doonaan xisbiga Jamhuuriga.

Kadibna Mr. Trump ayaa yiri, "Waxaan arrintan ku soo afjari karnaa si aad u degdeg badan." Wuxuu sidoo kale laba jeer ku celiyay inaysan saraakiisha Iran ogeyn inta uu "dulqaad" u yeeshay iyaga.

Qayb kale oo ka mid ah khudbaddiisa, madaxweynaha Mareykanka ayaa sheegay in arrinta Iran lagu xallin doono "si aad u degdeg ah," isagoo raaciyay in haddii Tehran aysan Mareykanka siin "wax walba," ay "meesha ka bixi doonto."

Donald Trump ayaa sidoo kale mar kale sheegay inuu ka fikirayo inuu magaca "Strait of Hormuz" (Marinka Hormuz) u beddelo "Trump Strait" (Marinka Trump), taas oo ah fikrad uu horay u soo jeediyay xilligii uu ka hadlayay Iran iyo marinkan istiraatiijiga ah.

Hadallada Mr. Trump ayaa yimid ka dib markii uu maalmihii u dambeeyay sheegay in wadahadallada u dhexeeya Washington iyo Tehran ay ahaayeen kuwo "wax-ku-ool ah," isla markaana uusan Mareykanku qaadi doonin weerar cusub oo ka dhan ah Iran ka hor doorashooyinka dhexe ee dhacaya 3-da bisha Nofembar.