Cead tilleadh dhachaigh do mhuinntir Dhrochaid Neithich

Thugadh cead do na daoine a chaidh a ghluasad a-mach às na taighean aca air a' Ghàidhealtachd mar thoradh air teine fiadhaich am beanntan a' Mhonaidh Ruaidh tilleadh dhachaigh.

B' fheudar do na daoine ann an Drochaid Neithich an dachaighean fhàgail às dèidh do na poilis suidheachadh èiginn a ghairm.

Ach thuirt Poileas Alba oidhche Shathairne nach robh an teine fiadhaich air a mheasadh mar mhòr-thachartas tuilleadh.

Thuirt an Supt Judy Hill "nach robh cunnart èiginneach ann tuilleadh a thug air na daoine ann an Drochaid Neithich an taighean fhàgail."

Thug ise taing dhan luchd-smàlaidh, geamaireach, cùmnantaichean agus com-pàirtichean a thug taic dhaibh thairis air 24 uairean de thìde.

Rinn am Prìomh Mhinistear, Iain Swinney, moladh air na daoine a tha air a bhith an sàs airson smachd fhaighinn air an teine.

Tha an teine ann an Pàirc Nàiseanta a' Mhonaidh Ruaidh air a bhith a' dol airson 10 la.

Bha ceò bho theine fiadhaich am Pàirc Nàiseanta a' Mhonaidh Ruaidh ri fhaicinn 59 mìltean air falbh ann an Obair Dheathain tron t-seachdain an dèidh mar a dh'atharraich a' ghaoth.

Tha heileacoptairean air a bhith a' dòrtadh uisge air an teine agus tha drònaichean air a bhith gan cleachdadh airson innse do na smàladairean mar a tha an teine a' gluasad.

Tha meud 1,748 mìle am Pàirc Nàiseanta a' Mhonaidh Ruaidh agus tha e a' toirt a-steach còig ùghdarrasan ionadail - Siorrachd Obair Dheathain, Machair Aonghais, A' Ghàidhealtachd, Moireibh agus Peairt is Cinn Rois.