Call do ghuth: "Chan eil mi a' faireachdainn mar neach-labhairt na Gàidhlig tuilleadh"
Chaill Raonaid Kello a guth san t-Samhain an-uiridh
- Air fhoillseachadh
Bidh gu leòr a' call an guth às dèidh oidhche mhòir ach dè nam falbhadh e gu tur?
Sin a thachair do Raonaid Kellow san t-Samhain an-uirigh ri linn muscle tension dysphonia, a dh'fhàg na fèithean timcheall air bràgh an sgòrnain garbh teann.
Bha seo a' ciallachadh gun robh fuaimreagan uabhasach duilich dhi.
Leis gu bheil a' Ghàidhlig cho stèidhichte air fuaimreagan, bha e cha mhòr do-dhèanta dhi a bruidhinn.
Mu ochd mìosan an dèidh dha a guth falbh, choinnich mi rithe na dachaigh agus bha e follaiseach gun robh cùisean fhathast duilich dhi.
Bha a guth a' briseadh tric, gu h-àraid mu thimcheall fhuaimreagan agus bha aice ri dhol dhan Bheurla grunn thursan leis gu bheil sin nas fhasa dhi.
Bha Raonaid far a cuid obrach mar thidsear Gàidhlig fad sia mìosan
Tha dìth guth air a beatha agus a pearsa atharrachadh gu tur.
"Chaill mi mo Ghàidhlig airson sia mìosan agus tha e dìreach air tilleadh air ais," thuirt i.
"Chan urrainn dhomh a dhol a-mach ach chan eil mi ag iarraidh a dhol a-mach.
"Oir ma bhios tòrr dhaoine a' bruidhinn agus mise a' feuchainn ri faighinn a-steach dhan chòmhradh - cha chluinn iad mi agus an uairsin chan eil thu a' faireachdainn mar gu bheil thu mar phàirt den bhuidhinn."
Chan eil cùisean air a bhith furasta aig an taigh a bharrachd agus banais air fàire san Lùnastal.
"Tha an t-eagal orm nach urrainn dhomh na bòidean agam a leughadh no fiù 's ainm an duine agam a ràdh," thuirt i.
'S e suidheachadh aonranach a th' ann, 's Raonaid den bheachd nach eil tuigse aig daoine air a' bhuaidh a tha seo a' toirt oirre.
Gun chomas labhairt chan eil agad ach do smuaintean agus a rèir Raonaid, glè thric "chan e deagh bheachdan a bhios a' tighinn a-steach ort".
Call do ghuth... call do phearsa?
A thuilleadh air a beatha phearsanta, tha dìth guth air a beatha phroifeiseanta a chur bun-os-cionn.
'S e tidsear Gàidhlig a th' innte agus nuair a dh'fhalbh a guth an toiseach, dh'fhuirich i san sgoil airson mìos bhon a bha fo-dheuchainnean gu bhith aig na sgoilearan aice.
"Tha cuimhne agam a bhith san sgoil agus mi a' cagairt ris na sgoilearan agus a' teagasg leasanan seach nach robh mi ag iarraidh a dhol dheth.
"Ach cuideachd, chaidh mi air ais nas luaithe air sgàth 's na sgoilearan.
Bha i far a h-obrach fad sia mìosan uile gu lèir 's mun àm a thill i, bha i air a misneachd a thaobh a bhith a' bruidhinn na Gàidhlig a chall.
Tha Raonaid a' pòsadh a dh'aithghearr agus tha uallach oirre nach tèid aice air na bòidean aice a ràdh
"A' tòiseachadh a-rithist"
An-diugh, tha Raonaid air adhartas a dhèanamh às dèidh mhìosan de theiripe cainnte phrìobhaideach.
Ach tha slighe fhathast roimhpe agus chan eil fhios aice an slànaich a guth a-chaoidh.
Tha i an dòchas gun tig tuilleadh pisich ach tha i nearbhasach mu bhith a' tilleadh dhan sgoil às dèidh saor-làithean an t-samhraidh agus mì-chinnteach mun àm ri teachd.
"Chan eil mi a' faireachdainn mar neach-labhairt na Gàidhlig a-nis," thuirt i.
"Tha mi a' faireachdainn mar gu bheil mi a' tòiseachadh a-rithist.
"Chan eil mi ag iarraidh a dhol gu tachartasan far a bheil Gàidhlig oir tha eagal orm nach tèid agam air cumail sa Ghàidhlig 's gun tèid mi dhan Bheurla.
"Chan eil daoine ga mo thuigsinn bhon a tha mi a' call mo ghuth."
Mura slànaich a guth, tha ceist mhòr mu a coinneimh a thaobh a cuid obrach.
'S e tidsear Gàidhlig an aon dreuchd a th' air a bhith aice agus chan eil fhios aice dè dhèanadh i mura b' e sin.
"Ma dh'fhalbhas mo ghuth tric an ath-bhliadhna, bidh agam ri smaoineachadh air rudeigin eile.
"Ach dè an obair Ghàidhlig as urrainn dhut a dhèanamh gun a bhith a' bruidhinn na Gàidhlig?
"Chan eil fear ann."
