Bùth Bharraigh an làmhan na coimhearsnachd

Tha an togalach anns a bheil Bùth Bharraigh gu bhith fo shealbh na buidhne fhèin.

Bheir seo gu ceann iomairt a mhair grunn bhliadhnaichean is buidheann na bùtha air a bhith a' strì le Comhairle nan Eilean Siar.

'S e iomairt shòisealta a tha ann am Bùth Barraigh.

Ghabh iad an togalach, far an robh an seann Cho-op ann am Bàgh a' Chaisteil, air màl bhon Chomhairle ann an 2013.

Bha e air a bhith falamh bho 2009.

Dh'èirich connspaid ge-tà, is a' Chomhairle airson an togalach a leagail mar phàirt de leasachadh air Bàgh a' Chaisteil.

Dh'fheuch Bùth Bharraigh sealbh fhaighinn air an togalach tro Phròiseas Seilbh Goireasan na Coimhearsnachd ann an 2019 ach chaidh an tairgse a dhiùltadh leis a' Chomhairle.

Rinn iad ath-thagradh ge-tà, is a' Chomhairle a-nise air aontachadh an togalach a thoirt dhaibh.

Thuirt a' Chomhairle gu bheil coltas ann gun tigeadh buannachdan a thaobh leasachadh eaconomach, slàinte phoblach, is maith na coimhearsnachd is na h-àrainneachd.

"'S e rathad fada a bha seo is tha sinn 'son taing a thoirt dhan a h-uile duine a thug dhuinn taic", thuirt manaidsear Bùth Bharraigh, Sarah NicIlleathain.

"Chan eil sinn buileach air ar ceann-uidhe a ruighinn ach 's e ceum mòr air adhart a tha seo. Feumaidh sinn a-nise airgead a thogail gus ùrachadh a thoirt air an togalach agus rudeigin sònraichte 'son an eilein gu lèir a chruthachadh.

"'S e faochadh mòr a th' ann agus clach-mhìle a bhith air tighinn cho fada seo", thuirt i.

Dh'innis i gu bheil fadachd air Bùth Bharraigh a bhith ag obair le Comhairle nan Eilean Siar air a' phròiseact is pròiseactan eile bho seo a-mach.