ምስጢር ብሪጣንያውያን ኣብ ቻይና፡ ስለምንታይ እዩ ሕክምናዊ ሓበሬታ ዝስረቕ?

ሓደ ካብቶም ዓበይቲ ስነፍልጠታውያን ትካላት ዓዲ እንግሊዝ ዝዀነ ዩከይ ባዮባንክ፡ ናይ ፍርቂ ሚልዮን ወለንተኛታት ተሳተፍቱ ዝርዝር ሕክምናዊ ሓበሬታ ኣብ ቻይና ብኢንተርነት ንመሸጣ ከም ዝቐረበ መንግስቲ ኣረጋጊጹ።

ምኒስተር ቴክኖሎጂ ኢያን ማሪ ንኣባላት ፓርላማ ኣብ ዝሃቦ ቃል፡ ሓበሬታ ኵሎም ኣባላት ናይቲ ትካል ኣብ መርበብ ሓበሬታ 'Alibaba' ተሰሪዑ ከም ዝተረኽበ ገሊጹ።

እቲ ትካል ብዛዕባ'ዚ ጥሕሰት ምስጢር ዝፈለጠ ብሰኑይ እዩ።

እቲ ንመሸጣ ዝቐረበ ሓበሬታ ስም፡ ኣድራሻ፡ ወይ ቍጽሪ ተለፎን ዘጠቓለለ እኳ እንተ ዘይኰነ፡ ጾታ፡ ዕድመ፡ ወርሕን ዓመትን ልደት፡ ልምድን ቅዲ ናብራን ዝኣመሰሉ ካብ መርመረታት ዝተረኽቡ ዝርዝራት ግን ዝሓዘ እዩ።

ናይቲ ትካል ዋና ስነፍልጠተኛ ፕሮፌሰር ናኦሚ ኣለን ንቢቢሲ ኣብ ዝሃበቶ ቃል፡ "እቲ ጌጋ ናይቶም ካብ ስርዓት ወጻኢ ዝዀኑ ተመራመርቲ እዩ፣ ንማሕበረሰብ ሊቃውንቲ ስነፍልጠት ዓለምና ድማ ስሞም የኽፍኡ ኣለዉ፡" ብምባል ብዝተፈጸመ ነገር ኣዝያ ከም ዝተቘጥዐት ገሊጻ።

ብተመሳሳሊ፡ ቪክቶርያ ኮሊንስ ዝተባህለት ፖለቲከኛ ነቲ ኵነታት "ዓቢ ጥልመት" ክትብል ክትገልጾ ከላ፡ ሪቻርድ ታይስ ዝተባህለ ድማ "ብቻይና ዝተፈጸመ ናይ ሓበሬታ ስርቂ" ክብል ረቚሑዎ።

እቲ ሽግር ብሰንኪ ሳይበራዊ መጥቃዕቲ ኢንተርነት ዝመጽአ ዘይኰነስ፡ ምኒስተር ማሪ ከም ዝገለጾ፡ "እዚ ብሕጋዊ መንገዲ ሓበሬታ ንኽጥቀሙ ፍቓድ ካብ ዝተወሃቦም ትካላት ዝተፈጸመ እዩ፡" ብምባል ሰለስተ ትካላት ምርምር ነቲ ዝተፈራረሙዎ ውዕል ብምጥሓስ ነቲ ሓበሬታ ንመሸጣ ከም ዘቕረቡዎ ተፈሊጡ ኣሎ።

ዋና ኣካያዲ ስራሕ ናይቲ ትካል ፕሮፌሰር ሰር ሮሪ ኮሊንስ ንተሳተፍቲ ኣብ ዝለኣኾ መልእኽቲ፡ "እዚ ሓበሬታ'ዚ ንግዜኡ እኳ እንተ ተለጠፈ፡ ስግኣት ከም ዝፈጥረልኩም ንርዳእ ኢና፡" ኢሉ።

እንተዀነ፡ እቲ ሓበሬታ ስም ስለ ዘይብሉ፡ ብቐጥታ ንውልቀ-ሰባት ፈልዩ ዘመልክት ከም ዘይኰነ ኣረጋጊጹ።

ገሊኦም ወለንተኛታት ከም ፖሊ ቶይንቢ ዝኣመሰሉ ግን ብዙሕ ከም ዘይሰግኡ ይገልጹ።

"ወለንተኛታት ዝገብሩዎ ዘለዉ ነገር ኣዝዩ ክቡር ምዃኑ እዮም ዝኣምኑ፣ እቲ ሓበሬታ ድማ ስም ስለ ዘይብሉ ብዙሕ ዘሰክፍ ኣይኰነን፡" ኢላ።

ብምኽንያት እዚ ፍጻመ፡ እቶም ሓበሬታ ንመሸጣ ዘቕረቡ ትካላትን ግዱሳትን ካብቲ መድረኽ ምርምር ተኣጊዶም ኣለዉ።

ድሕሪ ሕጂ ካብቲ ትካል ዝወጽኡ ፋይላት ዓቐኖም ክውሰን እዩ፣ ዕለታዊ ምክትታል'ውን ክግበር እዩ።

ኮምሽነር ሓበሬታ (ICO) ድማ ብዛዕባ እዚ ጉዳይ እኹል ምርመራ ይገብር ኣሎ።

ባንክ ስነህይወት ዓባይ ብሪጣንያ ንልዕሊ 20 ዓመታት ዝተፈላለዩ ስእሊ (ስካን) ኣካላት፡ ናይ ዲኤንኤ መርመራታትን ሕክምናዊ መዛግብትን ብምእካብ፡ ንሕማማት መንሽሮን ረሲዕን ዝኸውን ዝተፈላለዩ መጽናዕትታት ክካየዱ ዝሓገዘ ዓቢ ትካል ምዃኑ ይፍለጥ።

ስለምንታይ እዩ ሕክምናዊ ሓበሬታ ዒላማ ስርቂ ዝኸውን?

ሕክምናዊ ሓበሬታ ኣብዚ ግዜ'ዚ ካብ ዝዀነ ካልእ ዓይነት ዳታ ንላዕሊ ብሰርሰርቲ (ሰረቕቲ ኢንተርነት) ዝድለ ዘሎ ሃብቲ እዩ።

ኣብቲ "ጸሊም ዕዳጋ"፡ ሓደ ናይ ክሬዲት ካርድ ሓበሬታ ብሒደት ዶላራት ክሽየጥ ከሎ፡ ሓደ ምሉእ ሕክምናዊ መዝገብ ግን ካብ 250 ክሳብ 1,000 ዶላር ክሽየጥ ይኽእል።

ምኽንያቱ ሕክምናዊ ሓበሬታ ከም ስም፡ ዕለተ ልደት፡ ጾታ ወይ ዓይነት ደም ንዘለኣለም ዘይቅየር ስለ ዝዀነ፡ ንዝተፈላለዩ ዓበይቲ ናይ ምትላል ስራሓትን ፖለቲካዊ ጸቕጥታትን የገልግል እዩ።

ኣብ ዝሓለፉ ዓመታት ዓለም ዘዛረቡ ዓበይቲ ስርቂ ሕክምናዊ ምስጢራት ተፈጺሞም እዮም፤

ሕክምናዊ ሓበሬታ ብሰፊሑ ዝስረቐሉ ምኽንያት ንመጻኢ ኣብ ዓውዲ መድሕን ንምትላል፡ ንውልቀሰባት ብምስጢሮም ንምፍርራሕ ወይ ድማ ሃገራት ንዜጋታት ካልኦት ሃገራት ስነህይወታዊ ሓበሬታ ብምእካብ ንስትራተጅያዊ መጽናዕቲ ክጥቀማሉ ስለ ዝደልያ እዩ።

እዚ ሕጂ ኣብ ዓዲ እንግሊዝ ዘጋጠመ'ውን እቲ ሓበሬታ ንመሸጣ ምቕራቡ ነዚ ስግኣት'ዚ እዩ ኣጕሊሑዎ ዘሎ።