Cead 'son ospadal ùr a' Ghearasdain air beulaibh chomhairlichean

Thèid iarraidh air comhairlichean air a' Ghàidhealtachd gabhail ri planaichean airson ospadal ùr a thogail sa Ghearasdan.

Chaidh iarrtas oifigeil a chur gu Comhairle na Gàidhealtachd sa Ghearran a' sireadh cead air a shon.

Gabhaidh e àite Ospadal a' Bhelford a tha mu 60 bliadhna a dh' aois agus nach eil freagarrach tuilleadh a thaobh feumalachdan slàinte a' phobaill.

Cosgaidh e £137m agus thèid a thogail air làrach air a' Bhlàir Mhòir, faisg air Caol a' Ghearasdain.

Am measg nam planaichean tha roinn tubaist is èiginn ùr-nòsach, seòmraichean-lannsa agus ionad màthaireachd.

Tha luchd-iomairt slàinte air a bhith ag iarraidh ospadal ùr sa Ghearasdan fad bhliadhnaichean.

Tha an Dr Mìcheil Foxley, a bha roimhe na cheannard air Comhairle na Gàidhealtachd, nam measg.

Chuir an Dr Foxley fàilte mhòr air a' ghluasad agus tha e toilichte gun deach fuasglaidhean fhaighinn airson cuid de dhùbhlain.

"Tha sinn fhathast a' putadh airson uidheamachd MRI a bhios ann fad na h-ùine.

"Tha sinn a' putadh cuideachd airson seòmar endoscopy, seach sin a bhith ga dhèanamh san t-seòmar airson lannsa."

"Tha feum cuideachd air àite-laighe do heileacoptar nam maor-cladaich agus cha deach fuasgladh maireannach fhaighinn airson sin fhathast."

Thèid na planaichean, taobh a-muigh air beulaibh chomhairlichean air Comataidh Dealbhachaidh a' Chinn a Deas air an 17mh den Ògmhios.

Thuirt Bòrd Slàinte na Gàidhealtachd roimhe gur dòcha gun tòisich an obair cho tràth ris an Dàmhair an ath-bhliadhna ach chan eil clàr-ama sam bith dearbhte fhathast.