UHI Inbhir Nis a' beachdachadh air obraichean a ghearradh gus £2m a shàbhaladh

Tha UHI Inbhir Nis air sgeama a chur air chois a leigeas le daoine an dreuchdan fhàgail len toil.

Tha seo ann an oidhirp lùghdachadh de thimcheall air £2m sa bhliadhna a thoirt air cosgaisean luchd-obrach.

Thuirt ceannardan aig an làraich, a tha mar phàirt de lìonra Oilthigh na Gàidhealtachd 's nan Eilean, gum feum iad a bhith cinnteach gu bheil iad ann an suidheachadh seasmhach a thaobh ionmhais.

Chaidh innse do luchd-obrach mun sgeama ann an coinneamhan aghaidh ri aghaidh agus air loidhne.

Thuirt a' Phrìomh Ollamh Chris O'Neil nach robh UHI Inbhir Nis air na targaidean aca mu thimcheall àireamhan oileanach a choileanadh am-bliadhna, a' fàgail beàrn nan teachd a-steach.

Thuirt e: "Tha e riatanach gun dèan sinn rudeigin an-dràsta gus a bhith seasmhach san ùine fhada a thaobh ionmhais agus structair.

"Mar sin, 's urrainn dhuinn cumail oirnn a' lìbhrigeadh an fhoghlaim agus nan sgilean air a bheil feum airson taic a chur ri soirbheachas eaconomaigeach na sgìre.

"Tha sinn taingeil gu bheil taic againn bho bhuidhnean aonaidh agus sinn ag ullachadh airson an sgeama seo a chur an sàs."