Misneachd gu leòr aig Duaisean Litreachais na Gàidhlig

Tha Comhairle nan Leabhraichean ag ràdh gu bheil iad air am misneachadh gu mòr mu litreachas na Gàidhlig is na duaisean bliadhnail aca air a bhith ann oidhche Mhàirt.

Chaidh farsaingeachd de dhuaisean a thoirt seachad aig a' chuirm ann an Taigh-cluiche Cottiers ann an Glaschu.

Bha barrachd leabhraichean cloinne ann na riamh roimhe agus dà fharpais fa-leth 'son a' chiad turas eadar leabhraichean do phàistean eadar 0-7 agus do chloinn nas sine.

'S i Mòrag Anna NicNèill a fhuair an duais airson an Leabhar as Fheàrr do Chloinn Aois 8+ airson Èiginn Ùisdein.

Chaidh duais an Leabhar as Fheàrr do Chloinn Aois 0-7 gu Tawana Maramba, airson Anesu agus na Creutairean Uisge - a' chiad leabhar a sgrìobh i riamh.

Tha an sgeulachd stèidhichte air nighean òg à Zimbabwe a tha a' dol a-steach gu Foghlam tro Mheadhan na Gàidhlig.

"Bha sinn ag iarraidh sgeulachd a sgrìobhadh a bha mu dheidhinn measgachadh de chultaran - tha sin gu math coltach ris an sgeulachd a th' agamsa," thuirt Tawana.

"Rugadh mi ann an Dùn Èideann is bha mi ann am Foghlam tro Mheadhan na Gàidhlig ach 's ann à Zimbabwe a tha mo theaghlach,

"Tha an sgeulachd aig Anesu gu math coltach ris an sgeulachd agam fhèin is bha mi dìreach ag iarraidh seòrsa de litir gaoil a sgrìobhadh gu sgeulachdan mar sin".

A thaobh nan duaisean eile, bhuannaich Seonag Monk Duais Chomann Gàidhealach Lunnainn airson an leabhair fhicsein as fheàrr leis an leabhar aice Dealan-Dè.

Chaidh Duais Dhòmhnaill Meek airson leabhair neo-fhicsein a bhuileachadh air Iain Mac an Tàilleir airson an leabhair aige Bho Pheairt gu Hiort.

'S e Iain Urchardan a bha soirbheachail ann an Duais Ruaraidh MhicThòmais airson an leabhair bhàrdachd aige Ceum.

Fhuair Màrtainn Mac an t-Saoir duais an Làmh-sgrìobhainn as Fheàrr do dh'Inbhich, leis an leabhar aige Puskás am Pailteas aig Hearts.

Agus 's ann do Chairistiona Stone a chaidh an duais airson an Làmh-Sgrìobhainn as Fheàrr do Chloinn/Òigridh, le Gog-gàg Thuirt an t-Each.

Bha Stiùiriche Comhairle nan Leabhraichean, Alison Laing, air a dòigh leis na bh' ann de dh'fharpais airson nan duaisean am-bliadhna.

"Cuid de leabhraichean le sgrìobhadairean ùra, cuid de leabhraichean le foillsichearan ùra no le foillsichearan a tha ùr dhan Ghàidhlig ach 's dòcha a bha a' foillseachadh ann an cànanan eile," thuirt i.

"Mar sin tha mi air mo bhrosnachadh gu mòr le cho fallain 's a bha na raointean do leabhraichean cloinne gu sònraichte.

"Ach anns na raointean eile cuideachd bha fìor dheagh mheasgachadh de leabhraichean de dhiofar sheòrsaichean ann."

Thuirt Alison gu bheil gach neach a tha a' leughadh no a' ceannach leabhar Gàidhlig a' dèanamh feum.

Is a dh'aindeoin diofar dhùbhlan dha litreachas san fharsaingeachd, a thuilleadh air saoghal na Gàidhlig, tha i misneachail mun àm ri teachd.

"Chan eil là nan leabhraichean seachad, is cha bhi fhad 's a tha sinn fhathast a' dèanamh oidhirp airson sgrìobhadh agus foillseachadh a bhrosnachadh".