Ath-thagradh ga dhiùltadh do dh'èigniche Ghàidhealach
Chaidh Dàibhidh Brown a dhìteadh anns a' Chèitean
- Air fhoillseachadh
Chaidh ath-thagradh a dhiùltadh do dhràibhear tacsaidh air Ghàidhealtachd a bha a' cur an aghaidh a dhìteadh airson boireannach òg èigneachadh agus a' bhinn a chaidh a chur air.
Chaidh beagan gann air seachd bliadhna prìosain air Dàibhidh Brown sa Chèitean airson na h-ionnsaigh a thachair san Dùbhlachd 2023.
Thog e am boireannach, a bh' air a bhith air oidhche a-muigh ann an Inbhir Nis, agus dhràibh e seachad air far an do dh'iarr i air a leigeil às, mus tug e ionnsaigh oirre ann an camas-parcaidh.
Na bu thràithe den mhìos seo, bhòt comhairlichean gu làidir airson cion-earbsa a nochdadh ann an còignear chomhairlichean a bh' air leigeil le Brown dà chead tacsaidh a ruith a chumail an dèidh a dhìteadh.
Thàinig e am bàrr san Iuchar gun robh dùil aig Brown ath-thagradh a dhèanamh an aghaidh gach cuid a dhìteadh agus a bhinn.
An dèidh dha an deugaire èigneachadh, dh'fhàg Brown i a-muigh ann an aimsir fhuar ann an Inbhir Pheofharain.
A' cur binn air Brown aig an Àrd-Chùirt ann an Sruighea sa Chèitean, dh' innis am britheamh, am Morair Renucci, dha gun tug e air a' bhoireannach, a bha 18 aig an àm, uabhas fhulang.
Draibhear tacsaidh gus ath-thagradh a dhèanamh an aghaidh dìteadh 'son èigneachaidh
- Air fhoillseachadh13 An t-Iuchar
Dh'èignich draibhear tagsaidh deugaire mus do dh'fhàg e i a-muigh an sìde reòta
- Air fhoillseachadh15 An Cèitean
Fearg nach do chaill draibhear tagsaidh a dh'èignich deugaire cead tagsaidh a ruith
- Air fhoillseachadh2 An t-Iuchar
An uair sin, anns an Ògmhios, bhòt sianar bhall fireann de chomataidh na ceadachd aig Comhairle na Gàidhealtachd airson leigeil le Brown an dà chead tacsaidh aige a chumail.
Bhòt ceathrar bhall boireann an aghaidh sin.
Thug Brown na ceadan aige suas an dèidh buaireadh a lean an co-dhùnadh sin.
Chaidh bhòt cion-earbsa anns na buill Sean Ceanadach, Chris Birt, John Grafton, Ruraidh Stiùbhart, agus Donnchadh Mac a' Phearsain.
Mus deach a' bhòt a chumail, leig ceathrar de na comhairlichean an àite air comataidh na ceadachd seachad, a thuilleadh air Uilleam MacAoidh, a dh'fhàg a' chomhairle cuideachd.
Thèid fo-thaghadh a chumail anns an uàrd a bha e a' riochdachadh, Inbhir Ùige agus Gallaibh an Ear, Diardaoin.
Tha Chris Birt fhathast na bhall den chomataidh.
Tha e an urra ri buill iad fhèin co-dhiù leig iad dhiubh an dreuchdan mar chomhairlichean.
