Tagaichean GPS a' dol air iolairean-mara gus am buaidh air stoc a mheasadh

Theid tagaichean GPS a chuir air 40 iolaire-mhara air taobh siar na h-Alba a sgrùdas mar a tha na h-eòin a buntainn ri stoc.

Tha am pròiseact, a tha air a ruith eadar grunn bhuidhnean, ag amas air fiosrachadh a chruinneachadh mu mar a tha na h-iolairean ag amas air uain is caoraich.

'S e co-obrachadh a th' anns a' phròiseact eadar grunn bhuidhnean glèidhteachais agus buidhnean tuathanais is croitearachd.

Tha NàdarAlba, an RSPB, NFU na h-Alba agus Caidreachas na Croitearachd am measg na tha an sàs ann.

Chaidh toiseach-tòiseachaidh a dheanamh mar-thà air tagaichean a chuir air iseanan iolairean-mara, a tha mu ochd seachdainean de dh' aois.

Thairis air an dà bhliadhna ri thighinn cuiridh iad taga air 35 isean.

Tha am pròiseact an dòchas coig tagaichean eile a chur air iolairean-mara a tha aig aois brideachaidh.

'S ann air eòin ann an Earra-Ghàidheal, sgìre na Gàidhealtachd agus anns na h-Eileanan an Iar a bhios iad ag amas.

Ann an Earra-Ghàidheal, cuiridh Colaiste Dhùthchail na h-Alba colairean le taga eileagtronaigeach air uain mar phàirt de phròiseact eile.

Thèid am fiosrachadh bhon dà phròiseact a chuir còmhla airson dealbh nas coileanta fhaighinn air an t-suidheachadh.