Batan an Rìgh aig HebCelt 's an Inbhir Nis

Thadhal batan an Rìgh air Fèis Cheilteach Innse Gall ann an Steòrnabhagh Diardaoin an 17mh den Iuchar.

Tha am batan a' dèanamh a shlighe timcheall na h-Alba - a' nochdadh aig tachartasan 's ann an coimhearsnachdan air thoiseach air Geamaichean a' Cho-fhlaitheis ann an Glaschu, a tha a' tòiseachadh air an 23mh den Iuchar.

Bha am batan air a ghiùlain le Stephen Libby a bhuannaich sreath 'The Traitors' agus an snàmhadair, Kara Hanlon, a bha mar phàirt de sgioba na h-Alba aig Geamaichean a' Chlo-fhlaitheis ann am Birmingham ann an 2022.

Choisich iad leis suas gu làrach na fèise anns a' Ghearradh Chruaidh - a' ghrian a' deàrrsadh agus Còmhlan Pìoba Leòdhais 's sluagh mòr air an cùlaibh.

Na b' anmoiche dhen oidhche, nochd iad air a' phrìomh àrd-ùrlar leis a' bhatan fhad 's a bha Mànran a' cluich.

Tha Stephen air a bhith a' dol gu HebCelt bho bha e na bhalach beag agus bha e air a dhòigh glan an cothrom seo fhaighinn.

Thuirt e: "Tha e cho sònraichte a bhith mar phàirt bheag de dh'fhèis na bliadhna.

"Tha e doirbh dhomh a chreidsinn gu bheil seo a' tachairt dhomhsa agus tha e sònraichte dha rìreabh a bhith a' faighinn air seo a dhèanamh aig an taigh."

Bha an fhèis cuideachd mar phàirt mhòr de shamhraidhean Kara agus 's e fìor urram a bha seo dhithse.

"'S e tachartas air leth a th' ann dhan choimhearsnachd," thuirt i.

"'S e fèis cho math a th' ann agus tha i ann an Alba - dè nach eil math mun sin?"

Thàinig am batan a Leòdhas air an aiseag agus chaidh a thoirt far an Loch Seaforth le heileacoptar oidhche Chiadain.

Roimhe sin, stad e ann an Inbhir Nis far an deach tachartas a chumail aig làrach-trèanaidh ùr Caley Thistle agus oifisean Alba FA, sgioba ball-coise do luchd-cleachdaidh na Gàidhlig.

A rèir Chaluim MhicFhearghais bho Alba FA, tha e cudromach gu bheil a' Ghàidhlig air a riochdachadh aig na Geamaichean.

Thuirt e: "Batan an Rìgh a' tighinn an seo an-diugh, tha mi a' smaoineachadh gur e guth airson na Gàidhlig a th' ann.

"Tha sinn tric ag ràdh gur e Alba FA guth na Gàidhlig ann am ball-coise ach 's e guth na Gàidhlig ann an spòrs uile gu lèir."

Chaidh na Geamaichean a chumail roimhe ann an Glaschu ann an 2014 ach bidh an fheadhainn seo nas lugha, le lùth-chleasaichean a' farpais ann an 10 spòrs seach 17.

Thèid an craoladh beò air BBC ALBA.

Gheibhear ticeadan, taobh a-muigh air làrach-lìn nan Geamaichean.