Ingabo za Irak zinjiye mu mu kigo gikuru c’umurwi w’abarwanyi wa Kataib Hezbollah
Ingabo za reta ya Irak zinjiye kuri uyu wa gatanu mu kigo gikuru ca Kataib Hezbollah, umuhari witwaje ibirwanisho ushigikiwe na Irani, mu kiboneka nk’umwumvikano ufise intego yo kuzibira ko haba imishamirano ya gisirikare hagati y’uwo muhari n’ingabo za reta.
Umunyamakuru wa AFP ari mu karere ka Jurf Nasr, mu bumanuko bw’umugwa mukuru Bagdad, yavuze ko ingabo za reta zari zarenganye bariyeri ya mbere ya Kataib Hezbollah, mu gihe abarwanyi b’uwo muhari bagumye mu bibanza vyabo.
Umuvugizi w’igisirikare yavuze ko izo ngabo zinjiye muri Jurf Nasr kuri uyu wa gatanu, ku mabwirizwa y’umushikiranganji wa mbere, Ali al-Zaidi.
Kataib Hezbollah imaze imyaka irenga cumi ikorera muri ako karere, inyuma yo kugira uruhara mu gusubiza mu maboko ya reta akarere ka Jurf Nasr kari kigaruriwe n’umuhari wiyitirira reta ya Kisilamu (ISIS).
Ariko rero, Irak iriko iraremerwa bikomeye na Reta Zunze Ubumwe za Amerika kugira ngo igabanye uruhara rwa Irani muri ico gihugu no kugenzura imirwi yitwaje ibirwanisho ishigikiwe na Tehran (ubutegetsi bwa Irani), iyo Washington (ubutegetsi bwa Amerika) ifata nk’“imirwi y’iterabwoba”.
Muri ino ndwi, umushikiranganji wa mbere wa Irak, Ali Zaidi, yahaye Kataib Hezbollah igihe ntarengwa co kuva mu karere ka Jurf Sakhr, kazwi kandi nka Jurf Nasr.
Iyi ngingo yafashwe inyuma y’aho reta ya Irak imenyeshereje ko muri ako karere hariko habera magendo y’igitoro, Kataib Hezbollah yoyo ikaba ibihakana.
Nk’uko biri mu masezerano yashoboye gushikwako biciye ku bayobozi ba poritike b’Abashiite, bitegekanijwe ko Kataib Hezbollah izova muri ako karere ikimurira ibikorwa vyayo mu bindi bice vya Irak.
Ayandi makuru ushobora gusoma: