అసెంబ్లీ ఎన్నికలు -2026 : తమిళనాడు సీఎం స్టాలిన్‌ ఓటమి

లైవ్ కవరేజీ

1. 59 నిమిషాలు క్రితం‘ఇది ఎమర్జెన్సీ కంటే దారుణం’ : పోలీసుల అదుపులో మమత, కేజ్రీవాల్

   

   ఫొటో సోర్స్, SaketGokhale/ArvindKejriwal

   పశ్చిమ బెంగాల్ మాజీ ముఖ్యమంత్రి మమతా బెనర్జీని దిల్లీ పోలీసులు అదుపులోకి తీసుకున్నారని తృణమూల్ కాంగ్రెస్ (టీఎంసీ) అధికార ప్రతినిధి సాకేత్ గోఖలే ఇన్‌స్టాగ్రామ్‌లో పోస్ట్ చేశారు.

   "మమతా దీదీ సహా మమ్మల్ని ఐదుగురిని, దీదీ నివాసం బయట దిల్లీ పోలీసులు, సీఆర్‌పీఎఫ్ అదుపులోకి తీసుకుని పోలీస్ వ్యాన్‌లో ఎక్కించారు. మమ్మల్ని ఏదో గుర్తుతెలియని ప్రదేశానికి తీసుకువెళ్తున్నారు. భారత్‌లో ఇది ప్రజాస్వామ్య మరణమే" అని సాకేత్ గోఖలే పోస్ట్ చేశారు.

   ‘మమతా బెనర్జీతో పాటు టీఎంసీలోని ఇతర నాయకులు సౌత్ అవెన్యూలోని బస్ స్టాండ్ వద్ద నిరసన నిర్వహించారు. అనంతరం దిల్లీ పోలీసులు వారిని అదుపులోకి తీసుకున్నారు’ అని న్యూస్ ఏజెన్సీ పీటీఐ తెలిపింది.

   "మేం జంతర్ మంతర్‌కు వెళ్లాలనుకున్నాం. కానీ మమ్మల్ని వెళ్లనివ్వలేదు. ఈ పరిస్థితి ఎమర్జెన్సీ కంటే కూడా దారుణంగా ఉన్నట్లు అనిపిస్తోంది" అని అదుపులోకి తీసుకోడానికి ముందు మమతాబెనర్జీ వ్యాఖ్యానించారు.

   మరోపక్క తన పార్టీ నాయకులతో కలిసి అరవింద్ కేజ్రీవాల్ జంతర్ మంతర్ వైపు ర్యాలీగా వెళ్తుండగా పోలీసులు ఆయనను అదుపులోకి తీసుకున్నారు.

   "దేశ యువత మేల్కొంది. మోదీ నియంతృత్వానికి మేం భయపడబోం. ఇప్పుడు జ్ఞానేశ్ కుమార్ రాజీనామా చేయాల్సిందే. ఓట్ల చోరీ ఆరోపణలను ప్రజలు ఇకపై సహించరు" అని పోలీసులు అదుపులోకి తీసుకున్నతర్వాత విడుదల చేసిన వీడియోలో అరవింద్ కేజ్రీవాల్ అన్నారు.

   వీడియోలో పోలీసులు ఆయన్ను తీసుకెళ్లడం కనిపిస్తోంది.

   "సిగ్గులేని దిల్లీ పోలీసులు ఆమ్ ఆద్మీ పార్టీ జాతీయ కన్వీనర్‌పై దాడి చేశారు" అని సౌరభ్ భరద్వాజ్ ‘ఎక్స్‌’‌లో రాశారు.

   ఈ వీడియోలో కేజ్రీవాల్‌తో పాటు రాజ్యసభ ఎంపీ సంజయ్ సింగ్ కూడా కనిపిస్తున్నారు.

2. ఒక గంట క్రితందిల్లీ : 12 ఫోటోలలో సీజేపీ ఆందోళన

3. ఒక గంట క్రితంగురుద్వార బంగ్లా సాహెబ్‌లోకి ఎలా ప్రవేశిస్తారు? నేహా బోరా

   

   ఫొటో సోర్స్, RAJU RENTALA

   

   ఫొటో సోర్స్, RAJU RENTALA

   ‘’ఇప్పటి వరకూ మూడు బస్సుల్లో ఇక్కడున్న నిరసనకారులను పోలీసులు తీసుకెళ్లిపోయారు. కొద్ది సేపటి కిందట లాఠీచార్జ్ జరిగింది. జంతర్ మంతర్‌కు ఎవ్వరినీ వెళ్లనివ్వడం లేదు. మమ్మల్ని అడ్డుకుంటున్నారు. గురుద్వారలో మరో 300 మంది వరకూ ఉన్నాం. మా నిరసనల కొనసాగిస్తాం’’ అని హైదరాబాద్‌కు చెందిన అజయ్ జింగాడే బీబీసీ తెలుగు ప్రతినిధి పవన్ కాంత్ దిగవల్లికి చెప్పారు.

   సీజేపీ నిరసనల కోసం శుక్రవారం రాత్రికే దిల్లీకి చేరుకున్న కొంతమంది నిరసనకారులు జంతర్‌మంతర్‌కు సమీపంలోని గురుద్వార బంగ్లా సాహిబ్‌లో బస చేశారు. జంతర్ మంతర్‌కు ఈ గురుద్వార కిలోమీటరు దూరంలో ఉంటుంది.

   గురుద్వారలో బసచేసిన నిరసనకారులలో అజయ్ జింగాడే కూడా ఉన్నారు.

   ‘‘గురుద్వార గేట్ నంబర్ 3 లోంచి పోలీసుల బలగాలు లోపలికి వచ్చి నిరసనకారులను బలవంతంగా లాక్కుపోతున్నారు, నిరసనకారులను తరుముతున్నారు'' అని వరంగల్ నుంచి వచ్చిన మరో నిరసనకారుడు చేతన్ ప్రమోద్ బీబీసీ తెలుగుతో చెప్పారు

   బీబీసీ ప్రతినిధి పవన్ కాంత్ దిగవల్లితో మాట్లాడిన కొందరు నిరసనకారుల కథనం ప్రకారం – శుక్రవారం సాయంత్రం నుంచీ గురుద్వారలో దాదాపుగా 600 మంది ఉన్నారు. ఇవాళ ఉదయం నుంచీ వీళ్లంతా జంతర్ మంతర్‌కు ప్రదర్శనగా వెళ్లే ప్రయత్నం చేస్తున్నారు.

   కానీ గురుద్వారనాలుగు ప్రవేశ ద్వారాల బయట, గురుద్వార చుట్టుపక్కల రోడ్లు , ముఖ్యమైన జంక్షన్లలోనూ పోలీసులు భారీగా బారికేడ్లు పెట్టారు. పెద్ద సంఖ్యలో భద్రతా బలగాలను మోహరించారు.

   గురుద్వారలోని నిరసనకారులను బయటకు రానీయకుండా బలగాలు అడ్డుకుంటున్నాయి.

   ఉదయం నుంచీ బయటకు వచ్చి ప్రదర్శనగా వెళ్లేందుకు ప్రయత్నించిన నిరసనకారులపైన లాఠీచార్జ్ జరిగింది.

   ‘ ఇంత పెద్ద సంఖ్యలో పోలీసు బలగాలను చూసినప్పుడు భయం కలగడం సహజమే. అయినప్పటికీ మేం నిరసన కొనసాగిస్తాం. జంతర్ మంతర్‌కు చేరుకునేందుకు ప్రయత్నిస్తూనే ఉంటాం’ అని అజయ్ జింగాడే అన్నారు.

   గురుద్వార ఘటనలపై నేహా బోరా ‘ఎక్స్’లో స్పందించారు.

   ‘సిగ్గుచేటు...ఓట్ల చోరీకి వ్యతిరేకంగా నిరసన తెలుపుతున్న యువతను అదుపులోకి తీసుకునేందుకు పోలీసులు గురుద్వారా బంగ్లాసాహిబ్‌లోకి ప్రవేశించారు. గురుద్వారా పవిత్రతను, గౌరవాన్ని వాళ్లు మర్చిపోయారా’’ అని ఆమె ప్రశ్నించారు. దీంతో పాటు గురుద్వారా దగ్గరి వీడియోను రీ పోస్ట్ చేశారు.

4. 2 గంటలు క్రితంవిజయవాడ: ఏపీ పీసీసీ అధ్యక్షురాలు షర్మిల, వామపక్ష నేతల అరెస్ట్

   

   సర్ ప్రక్రియను వ్యతిరేకిస్తూ, చీఫ్ ఎలక్షన్ కమిషనర్ జ్ఞానేశ్ కుమార్ రాజీనామా డిమాండ్ చేస్తూ ఏపీ కాంగ్రెస్ కమిటీ ఆధ్వర్యంలో ఇండియా కూటమి పార్టీలు, వామపక్షాల ఆందోళనను విజయవాడలో పోలీసులు అడ్డుకున్నారు.

   ఆందోళనలో భాగంగా చలో రాజ్ భవన్ కి ఆయా పార్టీలు పిలుపునిచ్చాయి.

   విజయవాడ లెనిన్ సెంటర్ నుంచి లోక్ భవన్ వరకు చలో రాజ్ భవన్ పేరిట నిరసన ప్రదర్శన చేయాలని నిర్ణయించారు.

   దసరా ఉత్సవాల కారణంగా ఎటువంటి ఆందోళనలకు అనుమతి లేదని పోలీసులు అంతకుముందే ప్రకటించారు.

   శనివారం తెల్లవారుజాము నుంచే పోలీసులు వామపక్షాల నేతలను గృహనిర్బంధం చేశారు.

   పీసీసీ అధ్యక్షురాలు వైయస్ షర్మిలను విజయవాడ సమీపంలోని గన్నవరం వద్ద అరెస్ట్ చేశారు.

   పోలీసుల ఆంక్షలు దాటి లెనిన్ సెంటర్ వరకు వచ్చిన సీపీఎం నేతలను అరెస్టు చేసి ఇబ్రహీంపట్నం పోలీస్ స్టేషన్ కు తరలించారు.

   లెనిన్ సెంటర్లో అరెస్టు చేసిన సీపీఎం రాష్ట్ర కార్యదర్శి వర్గ సభ్యులు సిహెచ్ బాబురావు, ఐద్వా రాష్ట్ర ప్రధాన కార్యదర్శి వి సావిత్రి, కేవీపీఎస్ రాష్ట్ర కార్యదర్శి ఏ మాల్యాద్రి తదితర నాయకులను ఇబ్రహీంపట్నం పోలీస్ స్టేషన్‌కు తరలించారు.

   అరెస్ట్ అయిన నేతలు, కార్యకర్తలు పోలీస్ స్టేషన్‌లో ఆందోళన సాగిస్తున్నారు

   

   

5. 2 గంటలు క్రితంతనిఖీలు,నిర్బంధాలు,ఇంటర్‌నెట్ బంద్, ఎక్కడికక్కడ బారికేడ్లు.. దిల్లీలో ఇప్పటిదాకా ఏం జరిగింది, బీజేపీ ఏమంది?

6. 2 గంటలు క్రితం

   గుడ్ ఆఫ్టర్‌నూన్..

   బీబీసీ తెలుగు లైవ్ పేజీ అప్‌డేట్లకు స్వాగతం,

   నేను బీబీసీ ప్రతినిధి కమలాదేవి నల్లపనేని. ఇప్పటినుంచి రాత్రి 10గంటల వరకు ముఖ్యమైన వార్తలను మీకు అందిస్తాను.

7. 2 గంటలు క్రితంపోలీసుల అదుపులో నేహా బోరా

   

   ఆల్ ఇండియా స్టూడెంట్స్ అసోసియేషన్ (ఏఐఎస్ఏ) జాతీయ అధ్యక్షురాలు నేహా బోరాను దిల్లీ పోలీసులు అదుపులోకి తీసుకున్నారు. ఆమెతో పాటు పలువురు నిరసనకారులను ప్రత్యేకబస్సులో తరలిస్తున్నారు.

   దీనిపై నేహా బోరా ‘ఎక్స్’లో స్పందించారు.

   ‘‘నేను డిటెన్షన్‌లో ఉన్నా. ఉద్యమం కొనసాగించాలి. ప్రజలిప్పుడు సఫ్దర్ జంగ్ ఫ్లై ఓవర్ దగ్గర ఉన్నారు. అక్కడకి వెళ్లండి. మిమ్మల్ని ఆపితే ఎక్కడ ఆపారే అక్కడే కూర్చుని నిరసన కొనసాగించండి’’ అని నేహా బోరా పోస్ట్ చేశారు.

   అంతకుముందు దిల్లీ హట్ దగ్గర కలుసుకుందామని ఆమె ‘ఎక్స్’లో పోస్ట్ చేశారు.

   "ఇప్పుడు దిల్లీహట్ జంతర్ మంతర్ అయ్యింది! అక్కడ కలుద్దాం!’’ అని ఆమె ఆ పోస్ట్‌లో రాశారు.

   ఈ పోస్ట్ తర్వాత నేహా బోరా దిల్లీహట్‌లో నిరసన తెలుపుతూ కనిపించారు.

   నేహాబోరాతోపాటు యోగేంద్ర యాదవ్, ప్రశాంత్ భూషణ్, దీపాంకర్ భట్టాచార్యలను సఫ్దర్ జంగ్ ఫ్లై ఓవర్ వద్ద అదుపులోకి తీసుకున్నారని బీబీసీ కరస్పాండెంట్ దిల్ నవాజ్ పాషా చెప్పారు.

   ఆమె వెంట సుప్రీంకోర్టు సీనియర్ న్యాయవాది ప్రశాంత్ భూషణ్, సామాజిక-రాజకీయ కార్యకర్త యోగేంద్ర ఉన్నారు.

8. 4 గంటలు క్రితంసీజేపీ ప్రతినిధులను విమానంలోనే ఎలా అదుపులోకి తీసుకున్నారంటే...

9. 4 గంటలు క్రితంరష్యా నుంచి చమురు దిగుమతికి ట్రంప్ నిర్ణయం: అమెరికన్ల ఆశ్చర్యం, జెలియెన్‌స్కీ ఆగ్రహం

10. 5 గంటలు క్రితందిల్లీలో సీజేపీ నిరసనల నడుమ చెన్నైకి రాహుల్ గాంధీ

    

    ఫొటో సోర్స్, Anindito Mukherjee/Bloomberg via Getty Images

    చెన్నైలో ‘ఛాత్రోంకి గూంజ్( విద్యార్థుల గొంతుక) కార్యక్రమంలో భాగంగా విద్యార్థులు, యువతతో లోక్‌సభలో ప్రతిపక్ష నేత, కాంగ్రెస్ ఎంపీ రాహుల్ గాంధీ సంభాషించనున్నారు. ఈ క్యాంపెయిన్‌లో ఇది ఆరో కార్యక్రమం.

    మరోవైపు ప్రధాన ఎన్నికల కమిషనర్ జ్ఞానేశ్ కుమార్ రాజీనామా కోరుతూ కాక్రోచ్ జనతా పార్టీ (సీజేపీ) ఈరోజే దిల్లీలో నిరసనకు పిలుపునిచ్చింది. ఇందులో పాల్గొనాలని సీజేపీ అన్ని ప్రతిపక్ష పార్టీలకు ఆహ్వానం పంపింది. నిరసనలో లెఫ్ట్ పార్టీలైన సీపీఎం, సీపీఐ, సీపీఐ-ఎంఎల్, ఆర్‌ఎస్పీ, ఆల్ ఇండియా ఫార్వర్డ్ బ్లాక్‌తో పాటు ఆమ్ ఆద్మీ పార్టీ, మమతా బెనర్జీ నేతృత్వంలోని తృణమూల్ కాంగ్రెస్ పాల్గొనే అవకాశం ఉంది.

    ఇక, ‘ఛాత్రోంకి గూంజ్’ క్యాంపెయిన్‌లో భాగంగా చెన్నైలో రాహుల్ గాంధీ నిర్వహించే ఈ కార్యక్రమం దక్షిణ భారతదేశంలో మొదటిది.

    దీనికి ముందు కోటా, దెహ్రాడూన్, ప్రయాగ్‌రాజ్, పుణె, ఇందౌర్‌లో ఆయన ఈ కార్యక్రమాలు నిర్వహించారు.

11. 6 గంటలు క్రితంముకేశ్ అంబానీని 'ప్రధానమంత్రి' అంటూ కామెంట్ చేసిన ఎలాన్ మస్క్, వీరి మధ్య వివాదం ఏంటి?

12. 6 గంటలు క్రితందిల్లీ: అభిజిత్, సౌరవ్ దాస్, అశుతోష్‌లను విమానంలోనే అదుపులోకి తీసుకున్న పోలీసులు

    

    ఫొటో సోర్స్, Sanchit Khanna/Hindustan Times via Getty Images

    కాక్రోచ్ జనతా పార్టీ వ్యవస్థాపకుడు అభిజిత్ దీప్కే, సహ కన్వీనర్ అశుతోష్ రాంకా అలాగే సౌరవ్ దాస్‌లను పోలీసులు దిల్లీ ఎయిర్‌పోర్టులో విమానంలోనే అదుపులోకి తీసుకున్నారు.

    ఈ సమయంలో అభిజిత్ దీప్కే మాట్లాడుతూ, తాను అరెస్టుకు భయపడనని, సిద్ధంగా ఉన్నానని తెలిపారు.

    “దేశం ఏ దిశలో వెళ్తుందో చూడండి. విమానంలోనే మమ్మల్ని అదుపులోకి తీసుకుంటున్నారు. ఇలాంటిది ఇందిరా గాంధీ కూడా ఎప్పుడూ చేయలేదు. ఇది నిరంకుశత్వం, కానీ మేం వీటికి భయపడం” అన్నారు.

    తమను అదుపులోకి తీసుకోవడానికి వచ్చిన పోలీసులతో అభిజిత్ దీప్కే, “నేను మీకు భయపడను, మేం అరెస్టుకు సిద్ధంగా ఉన్నాం” అని చెప్పారు.

    

    ఫొటో సోర్స్, CJP

    అభిజిత్, సౌరవ్ అలాగే అశుతోష్‌లను అదుపులోకి తీసుకోవడానికి మహిళా పోలీసులు ముందుకు వచ్చారు. దీనిపై దీప్కే, ఆయన సహచరులు పురుష పోలీసులను పంపాలని కోరారు.

    కాగా, దిల్లీ పోలీసుల తీరు 'నిరంకుశమైనది'గా అభివర్ణించిన సీజేపీ, ముగ్గురు ప్రతినిధులను తక్షణమే బేషరతుగా విడుదల చేయాలని డిమాండ్ చేసింది. ఇది ప్రజల స్వేచ్ఛా సంచార హక్కును ఉల్లంఘించడమేనని సీజేపీ పేర్కొంది.

    దీనికి ముందు ప్రముఖ యూట్యూబర్ ధ్రువ్ రాఠీ, సీజేపీ లీగల్ అఫైర్స్ హెడ్ రత్నా సింగ్‌ను కూడా పోలీసులు అదుపులోకి తీసుకున్నట్లు వార్తలు వచ్చాయి.

13. 7 గంటలు క్రితంజంతర్ మంతర్‌కు వస్తున్న వారిని అదుపులోకి తీసుకుంటున్న పోలీసులు

    

    ఫొటో సోర్స్, ANI Video grab

    దిల్లీలోని జంతర్-మంతర్‌కు వస్తున్న నిరసనకారులను పోలీసులు అడ్డుకుని, అదుపులోకి తీసుకుంటున్నారు.

    సీజేపీ నిరసనను దృష్టిలో ఉంచుకుని దిల్లీ రైల్వే స్టేషన్లు, హోటళ్లు, ప్రధాన సరిహద్దు ప్రాంతాల్లో నిఘా పెంచారు. రైల్వే స్టేషన్లకు చేరుకుంటున్న ప్రయాణికులను, హోటళ్లలో బస చేస్తున్నవారిని తనిఖీ చేస్తున్నారు. అంతేకాకుండా నిరసనలో పాల్గొనడానికి దిల్లీకి చేరుకుంటున్న వారిపై కూడా పోలీసులు దృష్టి సారించారు.

    జంతర్-మంతర్ వద్ద తలపెట్టిన నిరసనకు ముందే ఫిరోజ్ షా రోడ్డు, మండి హౌస్‌ల వద్ద రాపిడ్ యాక్షన్ ఫోర్స్ (ఆర్ఏఎఫ్) బలగాలను మోహరించారు. అలాగే దిల్లీ-నోయిడా సరిహద్దులో కూడా భారీ సంఖ్యలో పోలీసులను మోహరించారు.

    నిరసన పిలుపు నేపథ్యంలో దక్షిణ జిల్లాతో పాటు మొత్తం దిల్లీలో సమగ్ర భద్రతా ఏర్పాట్లు చేశామని దక్షిణ దిల్లీ డీసీపీ అనంత్ మిట్టల్ తెలిపారు. అనధికార వ్యక్తులు దిల్లీలోకి ప్రవేశించకుండా పోలీసులు తనిఖీల ద్వారా అడ్డుకునే ప్రయత్నం చేస్తున్నారని ఆయన చెప్పారు.

    డీసీపీ అనంత్ మిట్టల్ వెల్లడించిన వివరాల ప్రకారం, నిరసన సమయంలో శాంతిభద్రతలను కాపాడటమే పోలీసుల ప్రథమ ప్రాధాన్యం. ఇందుకోసం వివిధ సరిహద్దుల్లో దాదాపు 12 పోలీసు పికెట్లను ఏర్పాటు చేశారు. అంతేకాకుండా జిల్లా అంతటా అనేక చోట్ల పోలీసు పికెట్లను ఏర్పాటుచేశారు.

    

    ఫొటో సోర్స్, ANI Video grab

    

    ఫొటో సోర్స్, ANI Video grab

14. 7 గంటలు క్రితంయూట్యూబర్ ధ్రువ్ రాఠీని అదుపులోకి తీసుకున్న పోలీసులు

    

    ఫొటో సోర్స్, EPA/Shutterstock

    సీజేపీ నిరసన నేపథ్యంలో యూట్యూబర్ ధ్రువ్ రాఠీని పోలీసులు శనివారం ఉదయం అదుపులోకి తీసుకున్నారు.

    బీబీసీ ప్రతినిధి దిల్‌నవాజ్ పాషా తెలిపిన వివరాల ప్రకారం, ధ్రువ్ రాఠీని అదుపులోకి తీసుకున్న విషయాన్ని ఆయన సన్నిహితుడు, అలాగే గురుగ్రామ్ పోలీసులు ధ్రువీకరించారు. గురుగ్రామ్ సెక్టార్-56 నుంచి ధ్రువ్ రాఠీని అదుపులోకి తీసుకున్నట్లు ఆయన సన్నిహితుడు తెలిపారు. పీటీఐ వార్తా సంస్థ కూడా రాఠీ అరెస్టు గురించి సమాచారం ఇచ్చింది.

    అంతకుముందు, ధ్రువ్ రాఠీ శుక్రవారం రాత్రి సోషల్ మీడియాలో ఒక రీల్ పోస్ట్ చేశారు. ఆ వీడియోలో ఆయన ఇండియా గేట్ ఎదురుగా తిరుగుతూ కనిపించారు.

    “నేను దిల్లీకి వచ్చాను. ప్రధానమంత్రి 50కి పైగా మెట్రో స్టేషన్లను మూసివేశారని, అనేక రైళ్లు, బస్సులను రద్దు చేశారని విన్నాను. నిరసన కారణంగా దిల్లీని లాక్‌డౌన్‌లో ఉంచుతున్నారు” అని ఆ వీడియోలో ధ్రువ్ రాఠీ అన్నారు.

    “మోదీజీ ఏం చేస్తున్నారో నాకు అర్థం కావడం లేదు. మా నిరసనలో జనసంచారం ఉండదని ఒకవైపు మీ ఐటీ సెల్ చెబుతోంది. ఒకవేళ జనం రాకపోతే, ఇవన్నీ ఎందుకు చేస్తున్నారు? మీరు భయపడ్డారని భావిస్తున్నాను. నిజానికి ప్రజలందరూ మేల్కొన్నారు” అన్నారు.

    ఈ నిరసనలో పాల్గొనడానికి జంతర్ మంతర్ చేరుకుంటున్న పలువురు ఆందోళనకారులను కూడా దిల్లీ పోలీసులు అదుపులోకి తీసుకున్నారు.

    మరోవైపు, ఎస్ఐఆర్‌కు వ్యతిరేకంగా ఈరోజు మధ్యాహ్నం ముంబయిలోని ఆగస్ట్ క్రాంతి మైదాన్‌లో నిరసన ప్రదర్శన ఉండటంతో, సామాజిక కార్యకర్తలు తుషార్ గాంధీ, ఫిరోజ్ మిథిబోర్వాలాను పోలీసులు అదుపులోకి తీసుకున్నట్లు 'హం భారత్ కే లోగ్' సంస్థ ఓ ప్రకటనలో తెలిపింది.

15. 8 గంటలు క్రితం"రైలు ఎక్కి తనిఖీలు చేశారు, పోలీసుల నిర్బంధాలు చూస్తే భయమేస్తోంది"-తెలుగు రాష్ట్రాల యువకులు ఇంకా ఏం చెప్పారు?

16. 9 గంటలు క్రితందిల్లీ: జంతర్ మంతర్ చుట్టూ కట్టుదిట్టమైన భద్రత, కఠిన ఆంక్షలు

    

    ఫొటో సోర్స్, ANI

    కాక్రోచ్ జనతా పార్టీ నిరసన ప్రదర్శన నేపథ్యంలో జంతర్-మంతర్ అలాగే దాని చుట్టుపక్కల ప్రాంతాల్లో దిల్లీ పోలీసులు భారీగా భద్రతా బలగాలు ఏర్పాటు చేయడంతో పాటు, ఆంక్షలను కఠినతరం చేశారు.

    పోలీసు బలగాలు, సెక్యూరిటీ ఫోర్సులు, పోలీసు వ్యాన్‌లు కనిపిస్తున్న కొన్ని ఫోటోలను ఏఎన్‌ఐ వార్తా సంస్థ విడుదల చేసింది.

    సీజేపీ ఆధ్వర్యంలో జరుగుతున్న ఈ నిరసనకు అనుమతి లభించలేదు. అయినా తాము జంతర్-మంతర్‌కు చేరుకుంటామని సీజేపీ నాయకులు చెబుతున్నారు. చరిత్ర సృష్టిస్తామని పార్టీ సహ కన్వీనర్ అశుతోష్ రాంకా శుక్రవారం రాత్రి పేర్కొన్నారు.

    "ప్రియమైన కాక్రోచ్‌లు.. మనం ఇప్పటివరకు ఎంత దూరం ప్రయాణించామో తలచుకుంటే గర్వంగా ఉంది. ఏది ఏమైనప్పటికీ మనం కచ్చితంగా చరిత్ర సృష్టిస్తాం" అని అశుతోష్ రాంకా ఎక్స్ పోస్టులో తెలిపారు.

    అలాగే, "ఒకటే గుర్తుంచుకోండి - చేతిలో రాజ్యాంగం, గుండెల్లో గాంధీ. ఏం జరిగినా మన చేయి ఎత్తరాదు. భారత్ మాతా కీ జై" అని రాశారు.

    ఆయనతో పాటు సీజేపీ వ్యవస్థాపకుడు అభిజీత్ దీప్కే, సుప్రీంకోర్టు సీనియర్ అడ్వకేట్ ప్రశాంత్ భూషణ్, సామాజిక రాజకీయ కార్యకర్త యోగేంద్ర యాదవ్, ఐసా అధ్యక్షురాలు నేహా బోరా, ప్రముఖ యూట్యూబర్ ధ్రువ్ రాఠీ కూడా ప్రజలు తరలిరావాలని పిలుపునిచ్చారు.

    

    ఫొటో సోర్స్, ANI

    

    ఫొటో సోర్స్, ANI

    

    ఫొటో సోర్స్, ANI

    

    ఫొటో సోర్స్, ANI

17. 9 గంటలు క్రితంకాక్రోచ్ జనతా పార్టీ నిరసన నేపథ్యంలో 250కి పైగా రైళ్లు రద్దు

    

    ఫొటో సోర్స్, Getty Images

    కాక్రోచ్ జనతా పార్టీ (సీజేపీ) నిరసన ప్రదర్శన నేపథ్యంలో, న్యూదిల్లీ, హజ్రత్ నిజాముద్దీన్ రైల్వే స్టేషన్ల నుంచి రాకపోకలు సాగించే 250కి పైగా రైళ్లను అధికారులు రద్దు చేశారు.

    పీటీఐ వార్తాసంస్థ కథనం ప్రకారం, అక్టోబర్ 9న మధ్యాహ్నం 2 గంటల తర్వాత ఆయా ప్రారంభ స్టేషన్ల నుంచి బయలుదేరాల్సిన ప్యాసింజర్ రైళ్లను రైల్వేబోర్డు ఆదేశాల మేరకు రద్దు చేశారు.

    అంతేకాకుండా, అక్టోబర్ 10న ఉదయం 4 గంటల నుంచి మధ్యాహ్నం 2 గంటల మధ్య న్యూదిల్లీ లేదా హజ్రత్ నిజాముద్దీన్ స్టేషన్‌కు చేరుకోవాల్సిన రైళ్లు కూడా రద్దయ్యాయి.

    రైల్వే మాజీ అధికారులు, ప్రయాణికుల సంఘాలు, ఉద్యోగ సంఘాలు ఈ చర్యను తప్పుబట్టాయి.

    "ఇంత భారీ సంఖ్యలో రైళ్లను రద్దు చేయడం ఆందోళనకారుల ముందు తలవంచడమే" అని రైల్వే బోర్డు మాజీ సభ్యుడు (ఇంజనీరింగ్) సుబోధ్ జైన్ పేర్కొన్నారు.

    దేశంలోని ఏదైనా ప్రాంతంలో నిరసనలు లేదా ఉద్యమాల కారణంగా ఒకేసారి ఇంత పెద్ద సంఖ్యలో రైళ్లు రద్దు కావడం తన అనుభవంలో లేదని ఆల్ ఇండియా రైల్వేమెన్స్ ఫెడరేషన్ ప్రధాన కార్యదర్శి శివ్ గోపాల్ మిశ్రా పీటీఐతో అన్నారు.

    అకస్మాత్తుగా రైళ్లు రద్దు కావడం వల్ల వేలాది మంది ప్రయాణికులు తీవ్ర ఇబ్బందులు పడుతున్నారని తెలిపారు.

    మరోవైపు, దిల్లీ మెట్రో రైల్ కార్పొరేషన్ (డీఎంఆర్‌సీ) కూడా 57 మెట్రో స్టేషన్ల ప్రవేశ, నిష్క్రమణ మార్గాలను మూసివేసింది.

18. 10 అక్టోబర్ 2026రష్యాతో డీజిల్ దిగుమతికి అమెరికా ఒప్పందం

    

    ఫొటో సోర్స్, Anna Moneymaker/Getty Images

    ఇంధన ధరలను తగ్గించాలనే ఒత్తిడిని ఎదుర్కొంటున్న అధ్యక్షుడు డోనల్డ్ ట్రంప్, రష్యా నుంచి అమెరికాకు డీజిల్‌ దిగుమతి చేసుకునే ఒప్పందాన్ని ప్రకటించారు.

    అమెరికా, ప్రపంచ మార్కెట్ల కోసం 3 లక్షల టన్నుల డీజిల్‌ను తక్షణమే సరఫరా చేయడానికి పుతిన్ అంగీకరించారని, నవంబర్‌లో 5 లక్షల టన్నులు, ఆ తర్వాత మరో మిలియన్ టన్నులు ఇస్తారని ట్రంప్ తెలిపారు.

    శుక్రవారం నాటి ఈ నిర్ణయంపై యుక్రెయిన్ అధ్యక్షుడు జెలియెన్‌స్కీ ఆగ్రహం వ్యక్తం చేశారు. ఇది పుతిన్‌కు బహుమతి అని, అంతం కావాల్సిన యుద్ధాన్ని పొడిగించే పెట్టుబడిగా అభివర్ణించారు.

    ఈ ఒప్పందంలో భాగంగా రష్యన్ డీజిల్ ఎగుమతులపై ఆంక్షలను అమెరికా ట్రెజరీ ఏప్రిల్ 7 వరకు ఎత్తివేసింది. అయితే, అమెరికా బ్యాంకుల్లో ఉన్న మిగతా రష్యన్ ఆస్తులపై ఆంక్షలు అలాగే ఉన్నాయి.

    యుక్రెయిన్ దాడుల కారణంగా దెబ్బతిన్న రిఫైనరీల పనితీరును బట్టి, త్వరలోనే మరో 3 మిలియన్ టన్నుల రష్యన్ డీజిల్ సరఫరా అవుతుందని ట్రంప్ తన ట్రూత్ సోషల్ పోస్ట్‌లో పేర్కొన్నారు.

19. 10 అక్టోబర్ 2026జంతర్‌ మంతర్ నిరసన: ముందస్తు అరెస్టులు, భారీ సంఖ్యలో కేంద్ర బలగాలు

20. 10 అక్టోబర్ 2026గుడ్ మార్నింగ్

    బీబీసీ తెలుగు లైవ్ పేజీ అప్‌డేట్లకు స్వాగతం,

    నేను బీబీసీ ప్రతినిధి వద్ది ప్రభాకర్. మధ్యాహ్నం 2 గంటల వరకు ముఖ్యమైన వార్తలను మీకు అందిస్తాను.

    నిన్నటి లైవ్ పేజీ కోసం ఈ లింక్‌ను క్లిక్ చేయండి.