Iran yaanzisha mashambulizi mapya Bahrain, Jordan, Erbil
Iran imetekeleza mashambulizi kwa kutumia ndege zisizo na rubani dhidi ya Kuwait,Bahrain na Jordan huku safari za ndege zikisitishwa kwa muda katika uwanja wa ndege wa Erbil nchini Iraq.
Muhtasari
- Trump: Xi na Putin wameahidi kutoiuzia Iran silaha
- Mkataba wa ulinzi kati ya Kenya na Uingereza bado unaendelea - Musalia Mudavadi
- Wapalestina 4 na Waisraeli 2 wauawa Ukingo wa Magharibi
- Chris Brown akiri kosa la kuzua vurugu
- Maelfu ya watu wakimbia moto wa nyika Ufaransa na Uhispania
- UN yataka mabaharia waliokwama katika Mlango bahari wa Hormuz warejeshwe nyumbani
- Mahakama yasitisha kwa muda mchakato wa kumuondoa Ramaphosa madarakani
- Wakimbizi raia wa DRC wanoishi Burundi wakumbwa na uhaba wa chakula
- Jurgen Klopp ateuliwa kuwa kocha mkuu wa Ujerumani
- Iran yaishambulia Kuwait, Jordan na Bahrain
- Uingereza imesemema iko tayari kujilinda baada ya Iran kusema kuwa kambi zake ni 'maeneo halali' kushambuliwa
- Mhadhiri wa Chuo Kikuu Cha Dodoma akabiliwa na shtaka la ugaidi
- Watatu wahukumiwa kifungo cha maisha jela kwa utekaji wa wanafunzi Nigeria
- Trump: 'Tutagharamia uharibifu wa meli kwa kutumia mali za Iran zilizozuiliwa nchini Marekani'
- Marekani yatoza ushuru kwa mataifa kadhaa ya washirika wa biashara
- Mlinzi wa J.D. Vance asimamishwa kazi kwa kuvujisha taarifa nyeti
- Mataifa ya Kiarabu yapinga kuingia msikiti Al Aqsa kwa waziri wa Israel mwenye msimamo mkali.
- Mashambulizi ya Wahouthi yazua hofu ya mzozo mpana zaidi Mashariki ya Kati na uharibifu wa uchumi duniani
Moja kwa moja
Na Lizzy Masinga & Beldeen Waliaula
Trump: Xi na Putin wameahidi kutoiuzia Iran silaha
Chanzo cha picha, Getty Images
Maelezo ya picha, Picha ya Donald Trump Rais wa Marekani Donald Trump amesema viongozi wa China na Urusi, Xi Jinping na Vladimir Putin, wamemuahidi kwamba hawataiuzia Iran silaha.
Katika ujumbe aliouchapisha kwenye mtandao wa Truth Social, Trump amesema kuwa Rais Xi alimweleza wakati wa mkutano wao wa hivi karibuni mjini Beijing, kwamba hataipa wala kuiuzia Iran silaha.
Trump aliongeza kuwa Rais wa Urusi Vladimir Putin pia alitoa ahadi kama hiyo.
Rais huyo aliongezea kuwa Putin anaelewa fika kuwa Marekani haiuzi silaha moja kwa moja kwa Ukraine, bali kwa nchi wanachama wa NATO, ambao hulipia gharama kamili ya silaha hizo, na hajui silaha hizo hutumika vipi baada ya kuuzwa.
Soma pia:
Mkataba wa ulinzi kati ya Kenya na Uingereza bado unaendelea - Musalia Mudavadi
Chanzo cha picha, Getty Images
Maelezo ya picha, Picha ya Musalia Mudavadi Serikali ya Kenya imekanusha taarifa za kusitisha ushirikiano wao na Kitengo cha Mafunzo ya Jeshi la Uingereza nchini Kenya (BATUK) na kusema ushirikiano wa ulinzi kati ya Kenya na Uingereza bado unaendelea.
Katika taarifa iliyotolewa na ofisi ya Waziri wa Mambo ya Kigeni, Musalia Mudavadi, taarifa hiyo inasema kuwa Kenya na Uingereza zinaendelea na ushirikiano wao wa kimkakati wa muda mrefu ambao unaangazia maslahi ya kila upande na kuheshimiana.
Serikali ya Kenya imesema kuwa mkataba wa ushirikiano wa ulinzi kati ya Kenya na Uingereza kwa sasa uko katika mchakato wa kupata idhini ya bunge.
“Mkataba huo uko mbele ya Kamati ya Bunge ya Ulinzi, Ujasusi na Mahusiano ya Kigeni kwa ajili ya kukaguliwa na kuidhinishwa kwa mujibu wa katiba na sheria za Kenya”
Wizara hiyo imesema itaendelea kutatua masuala mengine yaliyosalia kati ya Uingereza na Kenya kupitia njia ya diplomasia.
Wapalestina 4 na Waisraeli 2 wauawa Ukingo wa Magharibi
Chanzo cha picha, Magen David Adom
Wapalestina wanne na Waisraeli wawili, wameuawa katika tukio la ufyatuaji risasi katika Ukingo wa Magharibi unaokaliwa kimabavu na Israel.
Hili linasemekana kuwa tukio baya zaidi kuwahi kutokea katika eneo hilo kwa miezi kadhaa iliyopita.
Taarifa zinazokinzana zimetolewa kuhusu kilichotokea katika kijiji cha Tal, kaskazini mwa Ukingo wa Magharibi.
Vyanzo vya Kipalestina vimeiambia BBC kuwa wakazi wa kijiji hicho walikuwa wakikabiliana na walowezi wa Kiyahudi waliokuwa wakiwashambulia, kabla ya wanajeshi wa Israel kuwasili na kuanza kuwafyatulia risasi.
Wizara ya Mambo ya kigeni ya Palestina imesema Wapalestina wengine kadhaa walijeruhiwa katika tukio hilo.
Jeshi la Israel (IDF) limesema "magaidi waliiba silaha" ya mlinzi mmoja wa usalama ambaye baadaye aliuawa, kabla ya kuwashambulia Wayahudi waliokuwa wakikwea milima.
Baadaye, jeshi hilo lilitangaza kuwa mwanajeshi mmoja wa Israel pia ameuawa, lakini halikutoa maelezo zaidi kuhusu mazingira ya kifo chake.
Jeshi la Israel limesema linajiandaa kufanya operesheni kubwa katika eneo hilo.
Machafuko katika Ukingo wa Magharibi yameongezeka tangu kuanza kwa vita vya Gaza mwaka 2023, vilivyochochewa na mashambulizi ya Oktoba 7, 2023.
Soma pia:
Chris Brown akiri kosa la kuzua vurugu
Chanzo cha picha, Getty Images
Maelezo ya picha, Picha ya Chris Brown Mwimbaji maarufu wa RnB kutokea nchini Marekani Chris Brown, amekiri kosa la kusababisha ghasia na vurugu katika klabu moja mjini London mwaka wa 2023.
Mwanamuziki huyo mwenye umri wa miaka 37, alikuwa amefikishwa mahakamani kujibu mashtaka yakiwemo jaribio la kusababisha majeraha mabaya ya mwili, kusababisha majeraha ya kawaida na kumiliki silaha hatari, ambayo ilidaiwa kuwa chupa ya pombe aina ya tequila.
Hata hivyo, mashtaka hayo sasa yameondolewa, na atahukumiwa kwa kosa la ghasia pekee mwezi Oktoba.
Mshtakiwa mwenza, Omololu Akinlolu, mwanamuziki wa nyimbo za kufoka ,anayefahamika kwa jina la kisanii la Hoody Baby mwenye umri wa miaka 40, pia amekiri kosa hilo.
Kosa la kusababisha ghasia hufafanuliwa kama kutumia au kutishia mtu na kumfanya ahofie usalama wake.
Chris Brown aliwasilisha ombi lake la kukiri kosa hilo katika Mahakama ya Southwark Crown mjini London hii leo, katika kikao kilichodumu dakika tano.
Jaji Tony Baumgartner atasikiliza kesi ya Chris Brown na mshtakiwa mwenzake, Omololu Akinlolu, kuhusu kosa la kusababisha ghasia tarehe 26 mwezi Oktoba mwaka wa 2026.
Chris Brown anafahamika kwa nyimbo maarufu kama Loyal, Look At Me Now, na With You.
Maelfu ya watu wakimbia moto wa nyika Ufaransa na Uhispania
Chanzo cha picha, Getty Images
Maelfu ya watu wamekimbia moto mkubwa wa nyika magharibi mwa Ufaransa kwa kutumia magari na boti,huku Uhispania ikitangaza hali ya dharura ya kitaifa kutokana na moto uliotokea nje ya mji mkuu wa Madrid.
Mamlaka za Ufaransa ziliamuru kuhamishwa kwa watu wote kutoka rasi ya Cap Ferret, eneo maarufu la utalii katika pwani ya Atlantiki.
Mataifa yote mawili yameomba msaada kutoka Umoja wa Ulaya baada ya moto huo kuathiri uwezo wa vikosi vya wazima moto na watoa huduma za dharura.
Soma pia:
UN yataka mabaharia waliokwama katika Mlango bahari wa Hormuz warejeshwe nyumbani
Chanzo cha picha, Getty Images
Umoja wa Mataifa umetaka nchi zinazohusika katika vita vinavyoendelea Mashariki ya Kati kushirikiana kuhakikisha mabaharia wapatao 6,000 waliokwama katika Mlango bahari wa Hormuz wanaondolewa kwa njia salama na kurejeshwa makwao.
Kamishna mkuu wa Umoja wa Mataifa wa haki za binadamu, Volker Türk, ametoa wito wa hatua za haraka kuchukuliwa ilikushughulikia hali ya maelfu ya mabaharia hao, akisema wanakabiliwa na "mgogoro mkubwa wa kibinadamu” katika eneo hilo la bahari.
Awali, kabla ya kuzuka upya kwa mapigano kati ya Iran na Marekani, Shirika la Umoja wa Mataifa la Masuala ya Bahari (IMO) lilitangaza kuwa angalau mabaharia 6,000 waliokuwa ndani ya mamia ya meli walikuwa wamekwama katika Mlango bahari wa Hormuz.
Mabaharia hao bado hawajaweza kuondoka eneo hilo wala kurejea makwao, hali ambayo imeendelea kuzua wasiwasi wa kibinadamu.
Soma pia:
Mahakama yasitisha kwa muda mchakato wa kumuondoa Ramaphosa madarakani
Chanzo cha picha, Getty Images
Maelezo ya picha, Picha ya Rais Cyril Ramaphosa Mahakama Kuu ya Western Cape nchini Afrika Kusini imempa afueni Rais Cyril Ramaphosa, kwa kusitisha kwa muda mchakato wa kamati ya bunge, ya kumuondoa madarakani.
Mahakama hiyo imesema kesi ya Ramaphosa ya kupinga uhalali wa ripoti iliyobaini kuwa anaweza kuwa na mashtaka ya kujibu kuhusu mwenendo wake, lazima isikilizwe kwanza mwezi Septemba kabla ya mchakato wa kumuondoa madarakni kuendelea.
Kesi hiyo inahusu namna Rais Ramaphosa alivyoshughulikia wizi wa takriban dola 580,000 za Marekani uliotokea mwaka 2020 katika shamba lake la Phala Phala
Jopo la majaji watatu lilisikiliza kesi hiyo. Majaji wawili waliunga mkono ombi la Ramaphosa la kusitisha kwa muda shughuli za kamati ya bunge, huku jaji mmoja akitaka ombi hilo litupiliwe mbali.
Kutokana na uamuzi wa wengi, mchakato wa uchunguzi wa bunge kuhusu uwezekano wa kumuondoa rais huyo madarakani hautaendelea, hadi kesi yake nyingine itakapomalizika.
Ramaphosa amekuwa akikanusha mara kwa mara kufanya kosa lolote na amesisitiza kwamba hatajiuzulu kutokana na sakata hilo maarufu kama ‘Farm Gate’, tangu ilipobainika kuwa alikuwa na kiasi hicho cha fedha za kigeni, ambazo hakuwa ametangaza rasmi, na baadaye zikaibiwa katika shamba lake mwaka wa 2020.
Rais huyo alijitetea kuwa dola 580,000 za Marekani zilizokuwa zimefichwa katika nyumba yake ya kifahari kwenye shamba la Phala Phala, mkoani Limpopo, kaskazini mwa Afrika Kusini, zilikuwa mapato yaliyotokana na mauzo ya nyati.
Soma pia:
Wakimbizi raia wa DRC wanoishi Burundi wakumbwa na uhaba wa chakula
Chanzo cha picha, Getty Images
Na Robert Kiptoo
BBC Nairobi
Zaidi ya wakimbizi laki moja na thelathini walioko nchini Burundi, wengi wao waliokimbia machafuko na mapigano mashariki mwa Jamhuri ya Kidemokrasia ya Congo, wanakabiliwa na hatari ya ukosefu wa chakula katika miezi ijayo
Shirika la Mpango wa Chakula Duniani, WFP, limeonya kuwa linahitaji dola milioni 35 za Marekani ili kuendelea kuwapatia chakula na huduma za lishe wakimbizi hao hadi Agosti mwaka ujao.
WFP imesema kuwa maelfu ya wakimbizi hao wanaoishi katika kambi za muda nchini Burundi kwa sasa wanaishi kwa lishe moja kwa siku huku baadhi wakikosa chakula.
WFP imesema kuwa bila ufadhili mpya, ugawaji wa chakula unaweza kusitishwa kabisa kuanzia mwezi Oktoba mwaka huu.
Wengi wa wakimbizi hao walifika Burundi wakitafuta usalama, mlo wa siku na mahali pa kuishi. Lakini sasa msaada huo ambao umekuwa tegemeo lao kuu uko hatarini kutoweka kabisa.
Tayari upungufu wa fedha umeilazimu shirika hilo la WFP kupunguza mgao wa chakula kwa wakimbizi wengi. Shirika hilo linaonya kuwa ikiwa msaada utasitishwa kabisa, njaa itaongezeka, utapiamlo utakuwa mkubwa zaidi miongoni mwa wakimbizi hao hasa watoto na kina mama.
Mwishoni mwa mwaka uliopita, kuongezeka kwa mapigano mashariki mwa Congo kulisababisha zaidi ya watu laki moja kukimbilia Burundi.
Soma pia:
Jurgen Klopp ateuliwa kuwa kocha mkuu wa Ujerumani
Chanzo cha picha, Getty Images
Maelezo ya picha, Picha ya Jurgen Klopp Baada ya timu ya taifa ya Ujerumani kushindwa katika Kombe la Dunia baada ya kufungwa na Paraguay kwa mikwaju ya penalty, kocha mkuu wa timu hiyo Julian Nagelsmann alijiuzulu.
Wiki tatu tu baadaye, Jurgen Klopp ametwikwa jukumu la kurejesha timu ya Ujerumani katika hadhi yake ya awali.
Klopp ametia Saini mkataba wa miaka minne wa kuwa kocha mkuu wa timu ya Ujerumani kwa miaka minne.
Kocha huyo ataiongoza timu hiyo katika fainali za Euro 2028 na Kombe la Dunia la 2030, huku mechi yake ya kwanza akiwa kocha wa Ujerumani ikitarajiwa kuwa dhidi ya Uholanzi tarehe 24 mwezi Septemba.
Klopp, ambaye ametwaa ubingwa wa Ligi ya Mabingwa Ulaya na Ligi Kuu ya England akiwa na Liverpool, pamoja na mataji mawili ya Bundesliga akiwa na Borussia Dortmund, tayari anahesabiwa kuwa mmoja wa makocha bora zaidi katika historia ya soka la Ujerumani.
Soma pia:
Iran yaishambulia Kuwait, Jordan na Bahrain
Chanzo cha picha, Reuters
Iran imesema imeshambulia vituo vya kijeshi vya Marekani vilivyoko Mashariki ya Kati kwa kutumia ndege zisizo na rubani.
Iran imesema mashambulizi hayo ni ya kulipiza kisasa mashambulizi ya Marekani dhidi ya taifa hilo ambayo yamedumu sasa kwa siku 13 mfululizo.
Awali milipuko iliripotiwa katika maeneo ya pwani ya Ghuba ya Uajemi nchini Iran, pamoja na maeneo ya magharibi, kaskazini na katikati mwa nchi hiyo. Kwa mujibu wa vyombo vya habari vya serikali ya Iran, watu wanne wameuawa na wengine watano kujeruhiwa katika shambulio lililotokea kusini magharibi mwa taifa hilo.
Kwa kujibu shambulio hilo Iran ilianzisha mashambulizi dhidi ya Kuwait, mshirika wa Marekani, huku ving'ora vya tahadhari vikisikika nchini Bahrain na Jordan. Safari za ndege pia zilisitishwa katika uwanja mkubwa wa ndege nchini Iraq kufuatia taarifa za kuanguka kwa droni karibu na eneo hilo.
Hatua ya Iran imejiri wakati taifa hilo imekuwa ikilaani mpango wa Marekani wa kutumia mali za Iran zilizozuiliwa kufidia uharibifu uliosababishwa na vita, jambo linaloashiria kuongezeka kwa mvutano kati ya mataifa hayo mawili.
Hapo jana, Rais wa Marekani Donald Trump alisema kuwa fidia ya uharibifu uliosababishwa kwa meli za mizigo katika Mlango bahari wa Hormuz italipwa kwa kutumia "fedha za Iran ambazo zinadhibitiwa na Marekani."
"Uharibifu huu unaweza kuwa mkubwa sana, lakini huo ndio utaratibu wa haki na usawa," Trump aliandika kwenye mtandao wake wa Truth Social.
Waziri wa Mambo ya Kigeni wa Iran, Abbas Araghchi, alijibu kwa kusema kuwa, kunyakua mali za taifa lingine ili kulipia madai yasiyohusiana ni "kuchochea migogoro zaidi."
Soma pia:
Uingereza imesemema iko tayari kujilinda baada ya Iran kusema kuwa kambi zake ni ‘maeneo halali' kushambuliwa
Chanzo cha picha, EPA
Serikali ya Uingereza imesema iko tayari kujilinda saa 24 kwa siku, baada ya Iran kutangaza kuwa kambi za kijeshi za Uingereza zinazotumiwa na Marekani ni malengo halali ya kushambuliwa.
Uingereza imeiruhusu Marekani kutumia vituo vya kijeshi vya Uingereza vinavyohifadhi wanajeshi na ndege za Marekani kwa shughuli ilizozieleza kuwa za kujilinda, huku ikikataa kushiriki katika mashambulizi ya moja kwa moja dhidi ya Iran.
Wizara ya Mambo ya Nje ya Iran imeituhumu Uingereza kuwa mshirika wa Marekani katika vita hivyo, huku Kikosi cha Walinzi wa Mapinduzi ya Kiislamu (IRGC) kikisema kuwa nchi yoyote itakayoiunga mkono Marekani kijeshi itabeba matokeo ya hatua hizo.
Kauli hiyo imekuja wakati Marekani ikiendelea na usiku wa 13 mfululizo wa mashambulizi dhidi ya malengo mbalimbali nchini Iran.
Rais wa Marekani Donald Trump amekuwa akiikosoa serikali ya Uingereza na aliyekuwa Waziri Mkuu Sir Keir Starmer, akidai hawajaunga mkono vya kutosha kampeni ya kijeshi ya Marekani.
Hata hivyo, Iran imeendelea kuichukulia Uingereza kama sehemu ya operesheni hiyo ya kijeshi.
Mwezi Machi, wakati wa siku za mwanzo za vita vinavyoongozwa na Marekani na Israel dhidi ya Iran, Uingereza iliruhusu Marekani kutumia vituo vya kijeshi vya RAF Fairford na Diego Garcia kushambulia miundombinu ya kijeshi ya Iran iliyodaiwa kutumika kushambulia mataifa ya Ghuba na meli katika Mlango bahari wa Hormuz.
Kwa mujibu wa taarifa, sera hiyo imeendelea hata baada ya Andy Burnham kuwa Waziri Mkuu mpya wa Uingereza, kufuatia uamuzi wa kuongeza muda wa makubaliano hayo na Marekani.
Katika taarifa iliyochapishwa na shirika la habari la Tasnim, linalohusishwa na IRGC, kundi hilo lilidai kuwa ndege za Marekani ziliondoka katika kambi ya RAF Fairford siku mbili kabla kutekeleza mashambulizi dhidi ya Iran.
Unaweza kusoma;
Mhadhiri wa Chuo Kikuu Cha Dodoma akabiliwa na shtaka la ugaidi
Chanzo cha picha, UDOM
Sakata la kisheria linalomkabili mhadhiri wa Chuo Kikuu cha Dodoma (UDOM), Melkisedeki Kaijage, limechukua mkondo mpya baada ya upande wa mashtaka kubadilisha shtaka lake na kumfungulia kesi ya ugaidi, The Citizen limeripoti.
Bw. Kaijage amekuwa akishikiliwa na polisi tangu Julai 8, 2026, baada ya kukamatwa kwa tuhuma za kuchochea maandamano ya umma, kosa ambalo awali halikuruhusu dhamana.
Kutokana na hali hiyo, Chama cha Wafanyakazi wa Taaluma cha UDOM (UDOMASA) kiliwasilisha maombi ya kumtaka apewe dhamana, ambayo yalisikilizwa Jumanne, Julai 21, 2026.
Baada ya mahakama kutoa mwongozo uliowezesha mchakato wa dhamana kufuatia shtaka la awali la uchochezi, mawakili wa utetezi pamoja na viongozi wa UDOMASA walipoanza kukamilisha taratibu za kuachiwa kwake, mamlaka zilibadilisha shtaka hilo.
Mwenyekiti wa UDOMASA, Dk. Gerald Shija, alisema Bw. Kaijage sasa anakabiliwa na shtaka la ugaidi, ambalo halina dhamana, na amehamishwa kutoka mahabusu ya polisi kwenda Gereza la Isanga.
"Jana tulipata taarifa kwamba Bw. Kaijage amepelekwa mahakamani. Tulipofika, tulibaini tayari alikuwa amewekwa rumande kwa shtaka jipya la ugaidi," alisema Dk. Shija.
Shtaka hilo jipya linaweka vikwazo vikubwa vya kisheria kwa familia yake na wenzake katika jitihada za kumtoa kwa dhamana.
Kwa mujibu wa wenzake, Bw. Kaijage anafahamika kama mhadhiri anayependwa na wanafunzi na mwenye uhusiano mzuri nao, hali ambayo wanaieleza kuwa inatokana na mbinu zake za ufundishaji zinazowavutia wanafunzi, badala ya shughuli za uhamasishaji wa kisiasa.
Watatu wahukumiwa kifungo cha maisha jela kwa utekaji wa wanafunzi Nigeria
Chanzo cha picha, Chukwunaeme Obiejesi
Wanaume watatu nchini Nigeria wamehukumiwa kifungo cha maisha jela baada ya kukiri makosa yanayohusiana na utekaji wa makumi ya wanafunzi na walimu katika jimbo la Oyo, kusini-magharibi mwa nchi.
Watuhumiwa hao walikiri kuficha taarifa kuhusu watu waliohusika na mashambulizi hayo, na pia kukubali kuwa wanachama wa kundi linalohusishwa na Boko Haram.
Hukumu hiyo imekuja karibu wiki mbili baada ya mamlaka kutangaza kuwa wanafunzi na walimu 44 waliotekwa nyara katika mashambulizi ya kuratibiwa dhidi ya shule tatu wilayani Oriire mwezi Mei waliokolewa.
Matukio hayo ya utekaji yalisababisha maandamano kutoka kwa wazazi, vyama vya walimu na mashirika ya kutetea haki za binadamu, ambayo yalitaka serikali kuimarisha usalama wa shule.
Katika miaka ya hivi karibuni, utekaji wa watu kwa ajili ya kudai fidia umekuwa ukiongezeka nchini Nigeria, huku makundi yenye silaha yakilenga maeneo yenye ulinzi hafifu kama vile shule, makanisa, misikiti na vijiji vya mbali.
Nigeria inaendelea kukabiliwa na changamoto mbalimbali za kiusalama, zikiwemo magenge ya wahalifu yanayojulikana kama "bandits", ambayo hujihusisha na uporaji na utekaji wa watu kwa ajili ya kudai fidia.
Nchi hiyo pia inakabiliwa na uasi wa makundi ya wanamgambo wa Kiislamu, migogoro ya ardhi kati ya jamii mbalimbali, pamoja na machafuko yanayochochewa na makundi yanayotaka kujitenga katika baadhi ya maeneo ya nchi.
Trump: 'Tutagharamia uharibifu wa meli kwa kutumia mali za Iran zilizozuiliwa nchini Marekani'
Chanzo cha picha, EPA
Maelezo ya picha, Rais Donald Trump Rais wa Marekani Donald Trump aliandika kwenye mtandao wa kijamii wa Truth Social siku ya Alhamisi jioni: "Taarifa hii ichukuliwe kuwa tangazo rasmi hadi hapo taarifa nyingine itakapotolewa kwamba, kuanzia sasa na kuendelea, uharibifu wowote kwa meli, mizigo, au chochote kinachohusiana navyo, utalipwa kwa kutumia mali za Iran zinazomilikiwa na kudhibitiwa na Marekani.
Uharibifu huo unaweza kuwa mkubwa sana, lakini hata hivyo, huu ndio uamuzi wa haki na usawa zaidi."
Hata hivyo, matumizi ya mali za Iran zilizopo Marekani yanahitaji idhini ya mamlaka za kisheria na mahakama.
Katika kesi zilizopita, kama vile maombi kutoka kwa manusura wa mashambulizi ya kigaidi ambayo Iran iliyaunga mkono au kuhusika nayo, mahakama za Marekani mara kwa mara zimeamua dhidi ya Iran na kusema kuwa haina haki ya kisheria ya kuamua kesi za aina hiyo.
Bw. Trump pia aliwaambia waandishi wa habari siku ya Alhamisi kuwa huenda akaamuru shambulio kubwa sana dhidi ya Iran siku ya Ijumaa asubuhi, shambulio ambalo rais huyo wa Marekani alilielezea kuwa "lisiloweza kulinganishwa" na mashambulizi ya awali.
Marekani yatoza ushuru kwa mataifa kadhaa ya washirika wa biashara
Chanzo cha picha, Getty Images
Marekani imetangaza ushuru mpya kwa washirika wake 60 wa kibiashara, wanaowakilisha sehemu kubwa ya bidhaa zinazoingizwa nchini humo, kwa madai kwamba hawajachukua hatua za kutosha kukomesha ajira za kulazimishwa.
Ushuru huo, unaoanzia asilimia 10 hadi 12.5, unazihusu nchi na maeneo muhimu ya kiuchumi, ikiwemo Uingereza, China, Umoja wa Ulaya, Canada, Japan na India.
Unaanza kufanya kazi Ijumaa, baada ya ushuru wa muda wa asilimia 10 uliowekwa mapema mwaka huu kumalizika.
Hatua hiyo ni mwendelezo wa mvutano wa vita vya kibiashara uliochochewa tena na Rais wa Marekani Donald Trump baada ya kurejea madarakani mwaka jana.
Mapema mwaka huu, Mahakama Kuu ya Marekani iliamua kuwa ushuru mwingi uliowekwa duniani chini ya mamlaka ya dharura ulikuwa umeanzishwa kinyume cha sheria.
Tangu uamuzi huo, Trump amekuwa akitafuta njia nyingine za kutekeleza sera yake kuu ya biashara.
Mwezi uliopita, Ikulu ya Marekani ilipendekeza ushuru wa asilimia 10 hadi 12.5 kwa bidhaa kutoka mataifa kadhaa, ikidai hayafanyi juhudi za kutosha kukabiliana na ajira ya kulazimishwa.
Siku ya Alhamisi, Mwakilishi wa Biashara wa Marekani, Jamieson Greer, alisema ushuru huo utaanza kutekelezwa kwa maelekezo ya Rais Trump.
Katika taarifa yake alisema hatua hiyo italenga kurekebisha ukiukwaji wa haki za binadamu na biashara isiyo ya haki, huku ikilenga kuboresha ustawi wa wafanyakazi duniani.
Ushuru huo mpya utawahusu washirika 60 wakuu wa biashara wa Marekani, ambao kwa pamoja wanachangia asilimia 99.4 ya bidhaa zote zinazoingizwa nchini humo, kwa mujibu wa mamlaka za Marekani.
Ofisi ya Mwakilishi wa Biashara wa Marekani ilisema kuwa Rais Donald Trump ameifanya marufuku ya uagizaji wa bidhaa zinazozalishwa kwa kutumia ajira ya kulazimishwa kuwa sehemu muhimu ya makubaliano ya biashara ya pande mbili na mataifa mengine.
Kwa mujibu wa ofisi hiyo, hadi sasa washirika 10 wa kibiashara wamekubali kuweka marufuku hiyo katika makubaliano yao na Marekani, huku mataifa mengine yakichukua hatua kama hizo kufuatia uchunguzi uliofanywa katika wiki za hivi karibuni.
Mataifa ambayo yameahidi kutunga na kutekeleza kikamilifu marufuku ya bidhaa zinazotokana na ajira ya kulazimishwa yatatozwa ushuru wa asilimia 10. Nchi ambazo hazijatoa ahadi hiyo zitatozwa ushuru wa juu zaidi wa asilimia 12.5.
Mwakilishi wa Biashara wa Marekani, Jamieson Greer, alisema ameridhishwa na hatua za haraka zilizochukuliwa na baadhi ya washirika wa biashara kupiga marufuku bidhaa zinazozalishwa kwa ajira ya kulazimishwa, na akaeleza kuwa anatarajia kuhakikisha hatua hizo zinatekelezwa ipasavyo.
Unaweza kusoma;
Mlinzi wa J.D. Vance asimamishwa kazi kwa kuvujisha taarifa nyeti
Chanzo cha picha, AFP via Getty Images
Shirika la Ulinzi wa Viongozi wa Marekani (US Secret Service) limetangaza kuwa mmoja wa maafisa wa kikosi cha ulinzi cha Makamu wa Rais J.D. Vance amesimamishwa kazi na anachunguzwa kwa madai ya kuvujisha taarifa nyeti.
Maelezo kuhusu taarifa hizo zinazodaiwa kuvujishwa hayajawekwa wazi, lakini Anthony Guglielmi, msemaji wa shirika hilo, alisema afisa huyo anakabiliwa na uwezekano wa uchunguzi wa kijinai kuhusiana na madai ya kuhatarisha usalama wa operesheni na taarifa.
"Tabia yoyote inayoweza kuhatarisha usalama wa mtu anayelindwa haitavumiliwa," aliongeza. Ikulu ya Marekani imekataa kutoa maoni kuhusu uchunguzi huo.
Hata hivyo, mtandao wa MS Now uliripoti wiki iliyopita, ukirejelea vyanzo vinavyofahamu suala hilo, kwamba baadhi ya wanachama wa kikosi cha ulinzi cha Bw. Vance hawakuridhishwa na safari za familia yake. CNN iliripoti kuwa kusimamishwa kazi kwa afisa huyo kulihusiana na kuchapishwa kwa ripoti hiyo.
Kulingana na MS Now, baadhi ya maafisa walikuwa wameonyesha kutoridhika katika majadiliano ya ndani kuhusu mipango ya safari za familia ya J.D. Vance, ikiwa ni pamoja na safari iliyopangwa ya helikopta ya kijeshi kumpeleka mtoto mdogo wa Makamu wa Rais kwenye mazoezi ya gofu, pamoja na safari za familia yake kutafuta nyumba katika eneo la Washington, D.C. BBC bado haijaweza kuthibitisha ripoti hizi kwa njia huru.
Mataifa ya Kiarabu yapinga kuingia msikiti Al Aqsa kwa waziri wa Israel mwenye msimamo mkali
Chanzo cha picha, EPA/Shutterstock
Nchi nane za Kiarabu na Kiislamu zimelaani vikali kuingia kwa waziri wa Israel na walowezi katika Msikiti wa Al-Aqsa kupitia taarifa ya pamoja.
Mawaziri wa mambo ya nje wa Saudi Arabia, Falme za Kiarabu (UAE), Jordan, Misri, Qatar, Uturuki, Pakistan, na Indonesia walitoa taarifa ya pamoja wakilaani vikali kitendo cha Itamar Ben-Gvir, Waziri wa Usalama wa Taifa wa Israel, na walowezi wa Israel kuingia katika Msikiti wa Al-Aqsa.
Taarifa hiyo, iliyotolewa jioni ya Alhamisi, Agosti 2, ilieleza kuwa kitendo hiki ni ukiukaji wa wazi wa hali ya kihistoria na kisheria ya Msikiti wa Al-Aqsa na uchokozi usiokubalika ambao unaweza kusababisha kuongezeka kwa mivutano katika eneo hilo.
Nchi hizo nane pia zilisisitiza yafuatayo:
Haja ya kuheshimu mamlaka ya usimamizi ya Jordan juu ya maeneo matakatifu ya Kiislamu na Kikristo mjini Jerusalem;
Kupinga jaribio lolote la kubadilisha hadhi ya kihistoria na kisheria ya Msikiti wa Al-Aqsa;
Haja ya kusitisha vitendo vya uchokozi na vya upande mmoja ambavyo vinaweza kuhatarisha usalama na utulivu wa eneo hilo;
Kuzingatia sheria za kimataifa na maazimio ya Umoja wa Mataifa kuhusu Jerusalem. Taarifa hiyo ilitolewa baada ya Itamar Ben-Gvir kuingia katika eneo la Msikiti wa Al-Aqsa akiwa na mamia ya walowezi wa Israel, kitendo ambacho kimelaaniwa vikali na Wapalestina, Jordan, pamoja na nchi kadhaa za Kiarabu na Kiislamu.
Mashambulizi ya Wahouthi yazua hofu ya mzozo mpana zaidi Mashariki ya Kati na uharibifu wa uchumi duniani
Chanzo cha picha, NASA Worldview/Reuters
Wapiganaji wa kundi la Houthi nchini Yemen wanadai kushambulia meli katika Bahari ya Shamu, hatua inayotishia kuzidisha hali tete tayari iliyopo Mashariki ya Kati.
Kwa kulazimisha meli kurejea nyuma kutoka kwenye mlango mwembamba wa bahari wa Bab el-Mandeb, wametishia kukatiza njia kuu ya usafiri wa baharini inayounganisha Ulaya na Asia.
Haya yanajiri huku mashambulizi kati ya Marekani na Iran yakiendelea, na wakati ambapo makubaliano ya kuendeleza sekta ya nyuklia ya Saudi Arabia yakizua hofu ya mbio za silaha.
Kwa sasa, mwaka wa 2026 unadhihirika kwa masikitiko kuwa mmoja wa miaka yenye vurugu na machafuko makubwa kwa baadhi ya maeneo ya Mashariki ya Kati.
Kwa usiku 13 mfululizo, Kamandi Kuu ya Marekani (Centcom) imefanya mashambulizi ya anga dhidi ya Iran.
"Vituo vya amri ya kijeshi vya Iran, ghala za kuhifadhia ndege zisizo na rubani (drones), mitandao ya mawasiliano, vituo vya ufuatiliaji wa pwani, na uwezo wa kijeshi wa baharini ili kudhoofisha zaidi tishio linaloletwa na Iran kwa mabaharia raia na meli za kibiashara zinazopita katika Mlango-Bahari wa Hormuz," ilisema Centcom katika taarifa yake usiku wa Alhamisi.
Nchi za Kiarabu za Ghuba ambazo kwa kawaida ni maeneo tulivu yenye uhalifu mdogo na kodi nafuu sasa zinapaswa kujifunza kuishi huku zikikabiliwa na mashambulizi ya mara kwa mara kutoka kwa jirani yao mwenye silaha nyingi ng'ambo ya bahari: Jamhuri ya Kiislamu ya Iran.
Hujambo na karibu katika matangazo yetu ya moja kwa moja
