ژوندۍ پاڼه, ټرمپ وايي د "ایران طرحه ژر څېړم، خو فکر نه کوم چې دا به د منلو وړ وي"

ژوندی پوښښ

1. ۴۸ دقیقې وړاندېد اسرائیلو بریدونو له کبله په لبنان کې د لږ تر لږه اوو تنو د وژل کېدو خبر ورکړل شوی

   د لبنان په جنوب کې د اسرائیلو بریدونو له کبله لږ تر لږه اووه کسان وژل شوي او څو نور ټپیان دي. دغه بریدونه په داسې مهال شوې چې لا هم په سيمه کې اوربند پر ځای دی.

   راپورونه وايي، د اسرائیلو پوځ په جنوبي لبنان کې د ودانیو ویجاړولو ته هم دوام ورکړی دی. په دې کې د کاتولیکانو یو عبادتځای هم شامل دی چې د بلډوزر په واسطه نړول شوی دی.

   د اسرائيلوپوځ ادعا کوي چې حزب الله له دې ځای پراسرائیلو توغندي توغول او له دې ځایه یې د مرکز په توګه کار اخیست خو د لبنان کاتولیکې کلیسا دا ادعارد کړې ده.

2. ۲ ساعتونه وړاندېټرمپ وايي د "ایران طرحه ژر څېړم، خو فکر نه کوم چې دا به د منلو وړ وي"

   د امریکا ولسمشر ډونلډ ويلي، د ایران طرحه ژر څېړي، خو زیاته کړې یې ده، "زه فکر نه کوم چې دا به د منلو وړ وي."

   نوموړي پر خپله ټولنيزه رسنۍ ټروت سوشل، یوه پیغام کې لیکلي، ایران "د هغه څه په اړه چې د بشريت او نړۍ پر ضد یې کړي کافي بيه نه ده پرې کړې."

   ښاغلي ټرمپ په فلوريډا کې الوتکې له پورته کېدو دمخه، د ایران د وړاندیز په اړه د یوې پوښتنې په ځواب کې وویل، "ما ته د تړون عمومي چوکاټ تشریح شوی او دوی به اوس ماته بشپو متن راکړي."

   نوموړي پر ټولنيزو رسنيو ويلي، باور لري دا وړاندیزونه د منلو وړ نه دي او ایران "د خپلو کړنو لپاره کافي بيه نه ده پرې کړي".

   له هغه وپوښتل شول چې ایا پرایران به بریدونه بیا پیل کړي، ټرمپ وویل، "زه نه غواړم دا ووایم، زما مطلب دا دی چې زه دا خبریال ته نشم ویلی. که دوی ناوړه چلند وکړي یا کوم غلط کار وکړي، نو دا به لیدل کېږي، خو د دې شونتيا شته چې داسې پېښ شي."

   وړاندې، د ایران د بهرنیو چارو مرستیال وزیر کاظم غریب ابادي ويلي وو، ایران خپل پلان پاکستان ته د منځګړي په توګه وړاندې کړی چې هدف یې دایمي جګړه پایته رسول دي او "اوس توپ له امریکا سره دی چې د ډېپلوماسۍ لاره غوره کوي اویا د مقابلې چلند ته دوام ورکوي."

   د ایراني چارواکو په وینا، هغه وړاندیزونه چې تر دې دمه د ډونلډ ټرمپ لخوا رد شوی، د هرمز تنګي بیا پرانیستل، پر ایران د کلابندۍ پایته رسول اود ایران د اټومي پروګرام په اړه خبرې اترې بل وخت ته ځنډول شامل دي.

3. ۵ ساعتونه وړاندېد لبنان د روغتيا وزارت وايي د اسرائیلو بریدونو کې ۱۳ تنه وژل شوي دي

   د لبنان د روغتیا وزارت وايي، د جمعې په ورځ د لبنان په جنوب کې د اسرائیلو په هوايي بریدونو کې د څلورو ښځو او یوه ماشوم په ګډون ۱۳ کسان وژل شوي او ۳۲ نور ټپیان دي.

   د حبوش په سیمه کې چې د اسرائیلو دفاعي ځواکونو یې د خالي کولو امر کړی و، د دوو ښځو او یو ماشوم په ګډون اته کسان وژل شوي دي.

   د دوو ښځو په ګډون څلور کسان په صیدا سيمه کې وژل شوي او يوه کس بيا په عين بال سيمه کې خپل ژوند له لاسه ورکړی دی.

   په لبنان کې اوربند د دریو اونیو لپاره عځول شوی دی خو د حزب الله او اسرائیلو ترمنځ نښتې دوام لري.

   حزب الله د شنبې په ورځ وویل، په لبنان کې اسرائيلي عسکراو موټرونه په نښه کړي دي.

   د اسرائیلو پوځ ويلي، د دوی یو عسکر د پنجشنبې په ورځ د لبنان په جنوب کې په جګړه کې وژل شوی دی. په وروستيو شخړو کې تر اوسه پورې ۱۷اسرائیلي سرتېري وژل شوي دي.

4. ۸ ساعتونه وړاندېد لبنان او امریکا لوړ پوړو پوځي چارواکي په بیروت کې سره کتلي

   د لبنان پوځ په یوه خبرپاڼه کې ويلي، د وسله والو ځواکونو قومندان په بیروت کې د امریکا له لوړ پوړي پوځي چارواکي سره چې د لبنان د حزب الله او اسرائیلو ترمنځ د اوربند څارنه کوي، ليدلي دي.

   د خبرپاڼې له مخې د غونډې پر مهال، دواړو خواوو د لبنان د امنیتي وضعیت او سیمه ییزو پرمختګونو په اړه بحث کړی دی.

   په خبرپاڼه کې راغلي، د غونډې ګډونوالو د لبنان د پوځ د رول پر ارزښت او په اوسني پړاو کې د هغې د ملاتړ پر اړتیا ټینګار کړی دی.

5. ۸ ساعتونه وړاندېسنېټکام: د سمندري کلابندۍ له پیل راهیسې ۴۸ کښتۍ بېرته استول شوې

   د امریکا مرکزي قومندانۍ (سنېټکام) ویلي، په تېرو ۲۰ ورځو کې د سمندري کلابندۍ له پیل راهیسې ۴۸ کښتۍ بېرته استول شوې دي.

   امریکا په خلیج او عمان سمندر کې ټول ایراني بندرونه کلابند کړي دي. ایراني بندرونو ته په تلونکو او له هغه ځايه پر وتونکو کښتیو بنديز لګولی دی.

   هر کښتۍ چې ایران ته ځي او یا له هغه ځايه روانه وي، درول کېږي.

6. ۹ ساعتونه وړاندېد یمن له سمندر غاړې د تېلو بېړۍ تښتول شوې ده

   د یمن سمندري ځواکونه وايي، ناپېژاندو وسله والو د تیلو یوه بېړۍ د دغه هېواد له سمندر غاړې تښتولې ده. دوی وايي، دغو وسله والو د بېړۍ کنټرول په لاس کې اخيستی او بيا یې د سوماليا په لور روانه کړې ده.

   سمندري ځواکونه وايي څو کښتۍ یې په دې موخه عدن خلیج ته لېږلې دي.

   وړاندې د بریتانیا د سمندري سوداګرۍ مرکز، چې د نړیوالو بار وړونکو لارو څارنه کوي، د يمن جنوب لوېديځ کې یوې بېړۍ ته د دوو کوچنيو کښتيو د نژدې کېدو خبر ورکړی و.

7. ۱۲ غویی ۱۴۰۵ - ۲ می ۲۰۲۶وروستی, رویټرز: د اوپک‌پلس اووه غړي د تېلو تولید شاوخوا ۱۸۸ زره بېرله زیاتوي

   رویټرز خبري اژانس د دوو باخبره سرچینو له قوله راپور ورکړی د اوپک‌پلس سازمان اوو غړو هېوادونو په اصولو کې منلې چې په راتلونکې میاشت کې د تېلو خپل ورځنی تولید شاوخوا ۱۸۸ زره بېرله ډېر کړي.

   ټاکل شوې چې د دې ډلې اووه غړي سبا (یکشنبه) انلاین غونډه ترسره کړي.

   د تېلو تولید کې د دغه احتمالي زیاتوالی خبر داسې حال کې ورکول کېږي، چې متحدو عرب اماراتو له اوپک او اوپک‌پلس دواړو د وتلو اعلان کړی دی.

   دا ګام تېره میاشت د تېلو په ورځنې تولید کې له ۲۰۶ زره بېرله زیاتوالي سره ورته دی، خو دا ځل د متحدو عرب اماراتو ونډه ترې ایستل شوې ده.

   د یوې سرچینې په وینا، دا پرېکړه ښيي چې اوپک‌پلس "د سوداګرۍ د عادي بهیر" تګلاره جاري ساتي.

8. ۱۲ غویی ۱۴۰۵ - ۲ می ۲۰۲۶ناټو وايي واشنګټن سره له جرمني د ۵۰۰۰ امریکايي سرتېرو د کمولو پرېکړې په اړه تماس کې ده

   د شمالي اتلانتیک تړون سازمان (ناټو) وایي دوی له متحدو ایالتونو سره په جرمني کې د ۵۰۰۰ امریکايي سرتېرو د کمولو پرېکړې په تړاو اړیکه کې دي.

   ناټو ویلي پر دې بوخت دې چې په دې تړاو نور مالومات ترلاسه کړي.

   دا پرېکړه د امریکا او جرمني د مشرانو ترمنځ له ترینګلتیا وروسته شوې ده.

   د جرمني صدراعظم فریدرېش مېرڅ تېره اوونۍ ویلي وو چې ایران په منځني ختیځ کې د جګړې پای ته رسولو لپاره په روانو خبرو اترو کې واشنګټن سپکوي.

   د امریکا ولسمشر ډونلډ ټرمپ هم تازه یو ځل بیا د جرمني پر صدراعظم نیوکه کړې ده.

   د ناټو یوه ویاند پر ایکس خپاره کړي پیغام کې ویلي: "موږ له متحدو ایالتونو سره همکاري کوو چې په جرمني کې د دوی د ځواکونو په اړه د پرېکړې جزییات روښانه شي."

   په دغه پیغام کې همداراز ویل شوي: "موږ مخنیوي او دفاع لپاره پر خپلې وړتیا هم باورمن یو، په داسې حال کې چې د ناټو په چوکاټ کې د لا ځواکمنې اروپا پر لور دا بدلون دوام لري."

9. ۱۲ غویی ۱۴۰۵ - ۲ می ۲۰۲۶د سپاه پاسداران ۱۴غړي امریکا سره له جګړې د پاتې ناچاوده مهماتو شنډولو پر مهال چاودنه کې وژل شوي دي

   د ایران دولتي خبري اژانس ایرنا ویلي، د دغه هېواد په زنجان ولایت کې له امریکا او اسرائيل سره له جګړې د پاتې ناچاوده مهماتو د شنډولو عملیاتو پر مهال چاودنه شوې چې د سپاه پاسداران ۱۴ غړي پکې وژل شوي دي.

   د سپاه پاسدران لخوا په دې تړاو یوه خپاره شوي بیان کې ویل شوي، چې ټیمونو یې له جګړې پاتې کلسټر بمونه او ورته مهمات شنډول چې د کرنیزو ځمکو په ګډون یې تر ۱۲۰۰ هکتاره زیاته سیمه له خطر سره مخامخ کړې وه.

   په بیان کې زیاته شوې چې په دغو مهماتو کې ځینې خورا حساس او تر درېیو مترو پورې ځمکه کې ښخ شوي وو چې د لټون او شنډولو چاره یې خورا خطرناکه ده.

10. ۱۲ غویی ۱۴۰۵ - ۲ می ۲۰۲۶وروستی, په ایران کې دوه تنه "اسرائيل ته د جاسوسۍ" په تور اعدام شوي

    په ایران کې دوه تنه، یعقوب کریم‌پور او ناصر بکرزاده، "اسرائیل لپاره د جاسوسۍ" په تور اعدام شوي دي.

    د ایران د قضائیه قویې په وینا د دغو دواړو کسانو د اعدام سزاګانې د دغه هېواد د سترې محکمې له لوري تایید شوې وې.

    یعقوب کریم‌پور پر دې تورن شوی و چې د جګړې پر مهال یې "له موساد سره خپلې اغېزناکې همکارۍ ته دوام ورکړی او د هېواد حساس مالومات یې د موساد یوه افسر ته لېږلي دي."

    د ایران قضائیه قویې ویلي، ناصر بکرزاده "په حساسو سیمو کې مشکوک تګ‌را تګ درلود."

    دغه بنسټ ادعا کړې چې هغه "د موساد د یوه افسر په لارښوونه د مهمو دولتي، مذهبي او ولایتي چارواکو مشخصات او همدارنګه د نطنز په څېر د مهمو مرکزونو مالومات راټول او د استخباراتي شبکې عامل ته لېږلي دي."

    بي‌بي‌سي نه شي کولی دغه تورونه په خپلواکه توګه رد یا تایید کړي.

    د یادونې ده چې له امریکا او اسرائيل سره تر جګړې راوروسته په ایران کې د اعدامونو لړۍ چټکه شوې ده.

    د بشري حقونو مدافع بنسټونو او مدني فعالانو هم دغه هېواد کې د اعدامونو د شمېر د لوړېدو په اړه اندېښنه ښودلې.

    دوی د دغو قضیو د څېړنې بهیر او د حکمونو صادرېدل د بشري حقونو خلاف ګڼي.

11. ۱۲ غویی ۱۴۰۵ - ۲ می ۲۰۲۶وروستی, د ایران د خاتم‌الانبیا قرارګاه مرستیال: احتمال شته چې د ایران او امریکا ترمنځ جګړه بیا پیل شي

    په ایران کې د پوځي‌ عملیاتو د پلان، همغږۍ او عملیاتي څارنې تر ټولو د لوړې قرارګاه خاتم‌الانبیا مرستیال محمد جعفر اسدي وايي، دا احتمال شته چې د ایران او امریکا ترمنځ جګړه بیا پیل شي.

    هغه ویلي "شواهدو هم ښودلې چې امریکا پر هېڅ ژمنه او تړون ټینګ نه درېږي."

    د ښاغلي اسدي په وینا د امریکايي چارواکو کړنې او څرګندونې تر ډېره رسنیزه بڼه لري‌ او د دې لپاره دي، چې د تېلو د بیو د راټیټېدو مخه ونیسي او له هغه حالته ځان وباسي، چې پخپله یې رامنځ ته کړی دی.‌

    هغه زیاته کړې چې د ایران وسله‌وال‌ ځواکونه هر ډول احتمالي ځواب وینې ته په بشپړ ډول چمتو دي.

    دا څرګندونې داسې مهال کېږي چې د امریکا او ایران ترمنځ د اوسني نازک اوربند پر پیلېدو درې اوونۍ اوړي خو هرمز تنګی اوس هم په نسبي دول تړلی دی.

12. ۱۲ غویی ۱۴۰۵ - ۲ می ۲۰۲۶وروستی, د ایران د جګړې له کبله سعودي کې د الکولي مشروباتو کمښت

    په سعودي عربستان کې د الکولي مشروباتو یوازېنی رسمي پلورنځی د بېر، شرابو او ټېکیلا په ګډون د ځینو توکو له کمښت سره مخ شوی دی. رویټرز خبري اژانس ته لیدونکو ویلي چې د ایران د جګړې له امله رامنځته شوې ګډوډۍ د بار وړلو محمولو لېږد ځنډولی دی.

    دغه پلورنځی چې د ریاض په ډیپلوماتیکه سیمه کې موقعیت لري، پرته له نوم او لوحې فعالیت کوي. دا ځای په ۲۰۲۴ کال کې د نامسلمانو ډیپلوماتانو لپاره پرانیستل شو او تېر کال یې خپل خدمات شتمنو غیرمسلمانو بهرنیو اوسېدونکو ته هم پراخ کړل.

    په سعودي عربستان کې د الکولو پر استعمال بشپړ بندیز، چې له ۱۹۵۲ کال راهیسې نافذ دی، لا هم په رسمي ډول پر ځای پاتې دی. خو سره له دې چې سعودي عربستان په دودیز ډول محافظه‌کار هېواد ګڼل کېږي، د بهرنیو کارکوونکو د جذب لپاره یې د جواز لرونکي یوه پلورنځي د فعالیت اجازه ورکړې ده.

    د رویټرز د راپور له مخې، چې په وروستیو ورځو کې یې د ریاض له دغه پلورنځي د لیدنې کوونکو پنځو کسانو خبرې نقل کړې دي، اوس مهال د پلورنځي المارۍ تر ډېره تشې دي او یوازې ګران‌بیه یا لږ پېژندل شوي برانډونه پکې عرضه کېږي.

13. ۱۲ غویی ۱۴۰۵ - ۲ می ۲۰۲۶وروستی, امریکا منځني ختیځ کې پر خپلو متحدانو د نژدې ۹ میلیارده ډالرو وسلې پلوري

    د امریکا د بهرنیو چارو وزارت تایید کړې چې له ۸ اعشاریه ۶ میلیارده ډالرو ډېرې پوځي وسلې به خپلو متحدانو ته په منځني ختیځ کې، چې اسرائیل، قطر، کویت او متحده عربي امارات پکې شامل دي، وپلوري.

    دا په داسې حال کې ده چې د ایران پر ضد د امریکا او اسرائیل جګړه نهمې اونۍ ته داخله شوې او له هغه نازک اوربنده څه باندې درې اونۍ تېرېږي چې عملي شوی و.

    د دې پرېکړې له مخې، قطر ته د "پټریوټ" هوايي او توغندیز دفاعي سیسټم د ملاتړ او خدماتو خرڅلاو، چې ارزښت یې له ۴ میلیارده ډالرو ډېر دی، تایید شوی دی.

    همداشان، اسرائیل ته د نژدې ۱ میلیارده ډالرو په ارزښت د دقیقو وسلو سیستمونو د پېلو موافقه کړې ده.

    همداراز دغه هېواد ته د "پرمختللو دقیق هدایت شوو وسلو" (APKWS) سیسټمونو خرڅلاو، چې ارزښت یې ۹۹۲ میلیونه او ۴۰۰ زره ډالره دی، هم منظور شوی دی.

    همداراز کویت ته د یوه مدغم جنګي قوماندې سیسټم د ۲ اعشاریه ۵ میلیارده ډالرو په ارزښت د خرڅلاو او اسرائیل ته د "پرمختللو دقیق هدایت شوو وسلو" (APKWS) سیسټمونو د څه باندې ۹۹۲ میلیونه ډالرو په ارزښت د پلور پرېکړه هم تصویب شوې ده.

    د امریکا د بهرنیو چارو وزارت متحده عربي اماراتو ته هم د همدې سیسټمونو د څه باندې ۱۴۷ میلیونه ډالرو په ارزښت د خرڅلاو تایید کړی دی.

14. ۱۲ غویی ۱۴۰۵ - ۲ می ۲۰۲۶ټرمپ: له ایران سره جګړه پای ته رسېدلې، خو موږ نه غواړو هغوی ژر پرېږدو

    ډونلډ ټرمپ د ایران پر ضد د پوځي برید په اړه د امریکا کانګرس ته له خپلې لومړۍ خبرتیا ۶۰ ورځې وروسته، اعلان وکړ چې جګړه "پای ته رسېدلې" ده، خو ټینګار یې وکړ چې نه غواړي له تهران سره تقابل ژر پای ته ورسوي.

    هغه همداراز استدلال وکړ چې د جګړې د دوام لپاره د امریکا د قانون جوړوونکو اجازې ته اړتیا نه لري.

    ټرمپ وایي چې د ایران له تازه وړاندیزونو راضي نه دی، هغه وړاندیزونه چې ویل کېږي تهران یې په پاکستان کې منځګړو ته سپارلي دي.

    د امریکا ولسمشر تهران تورن کړ چې داسې غوښتنې یې مطرح کړې دي چې د ده لپاره د منلو وړ نه دي، خو نور جزییات یې ورنه کړل.

    د امریکا د قوانینو له مخې، د هر ډول پوځي ځواک کارول باید د ۶۰ ورځو په موده کې پای ته ورسېږي، خو دا چې کانګرس د هغې د غځولو موافقه وکړي.

15. ۱۲ غویی ۱۴۰۵ - ۲ می ۲۰۲۶وروستی, له ایران سره د جګړې پر سر لانجه؛ امریکا له جرمني خپل پنځه زره سرتېري وباسي

    د امریکا دفاع وزارت (پنټاګون) اعلان کړی چې متحده ایالات به شاوخوا ۵ زره سرتېري له جرمني وباسي.

    دا اقدام د ناټو له خپل نژدې ټلوال سره د خبرداري پیغام په توګه لیدل کېږي، په داسې حال کې چې د ولسمشر ډونلډ ټرمپ او اروپا ترمنځ د ایران جګړې په اړه اختلافات زیات شوي دي.

    ډونلډ ټرمپ د روانې اونۍ په پیل کې ګواښ کړی و چې په جرمني کې به د امریکا پوځي حضور کم کړي.

    دا څرګندونې وروسته له هغې وشوې چې نوموړي د جرمني له صدراعظم فریدریش مېرتس سره لفظي شخړه وکړه.

    مېرتس ویلي وو چې ایران د هغو خبرو اترو پر مهال "متحده ایالات شرموي" چې موخه یې د امریکا او اسرائیل له خوا له ایران سره د دوو میاشتو راهیسې روانه جګړه پای ته رسول دي.

    بل لور ته، د پنټاګون ویاند شون پارنېل ویلي چې "تمه کېږي د ځواکونو د ایستلو بهیر له شپږو تر ۱۲ میاشتو پورې بشپړ شي."

16. ۱۱ غویی ۱۴۰۵ - ۱ می ۲۰۲۶وروستی, "د ایران د جګړې له امله میلیاردونه خواړه له خطر سره مخ دي"

    د سرې (کیمیاوي کود) یا ښېرازۍ د یوه ستر نړیوال تولیدوونکي مشر ویلي، د ایران د جګړې له امله د سرې او د هغې د مهمو خامو موادو د عرضې ګډوډي ښايي په نړۍ کې هره اونۍ تر ۱۰ میلیارده خوړو پورې اغېزمن کړي او بېوزله هېوادونه به تر ټولو ډېر زیان وویني.

    د "یارا" شرکت اجرائیه رئیس سویین توره هولسېتر بي بي سي ته ویلي، په خلیج کې جګړې او شخړو، چې د هرمز تنګي له لارې یې سمندري لېږد بند کړی، د نړۍ د خوړو تولید له خطر سره مخ کړی دی.

    هغه خبرداری ورکړ چې د سرې د کم استعمال له امله د حاصلاتو کمېدل ښايي د خوړو لپاره د سختې سیالۍ سبب شي.

    هغه له اروپايي هېوادونو هم وغوښتل چې د بیو د جګړې اغېزې دې پر هغو هېوادونو په دقت وارزوي چې "تر ټولو ډېر زیانګالي" دي.

    بشپړ مطلب دلته لوستلی شئ

17. ۱۱ غویی ۱۴۰۵ - ۱ می ۲۰۲۶وروستی, ټرمپ وایي 'لېونیانو' ته به د اټومي وسلو لرلو اجازه ورنه کړي او مجتبی خامنه‌يي 'اقتصادي مقابلې' غوښتې

    د امریکا ولسمشر وایي چې هېواد به یې هېڅکله 'لېونیانو' ته د اټومي وسلو د لرلو اجازه ورنه کړي او ټینګار یې کړی چې امریکا به 'د هرې هغې وسلې د ختمولو لپاره لاس په کار شي چې نړۍ ګواښلی شي'.

    بل لور ته، د ایران د ستر رهبر زوی مجتبی خامنه‌يي له خلکو غوښتي چې 'اقتصادي مقابله' وکړي او د جګړې د پایلو په درشل کې 'د دولت د دوښمنانو هڅې ناکامې کړي.'

18. ۱۱ غویی ۱۴۰۵ - ۱ می ۲۰۲۶وروستی, ټرمپ کانګرس ته: اوربند دا معنا نه چې زه به د ایران جګړې ته د کانګرس تصویب ته اړ یم

    ولسمشر ډونلډ ټرمپ کانګرس ته ویلي چې له ایران سره د امریکا جګړه د روان اوربند له امله "پای ته رسېدلې" ده او هغه استدلال کړی چې د دې شخړې لپاره د قانون جوړوونکو رسمي اجازه ته اړتیا نه لري.

    هغه د کانګرس مشرانو ته په یوه لیک کې لیکلي: "له ۲۰۲۶ کال د اپرېل له ۷مې نېټې راهیسې د امریکا د ځواکونو او ایران ترمنځ هېڅ ډول د ډزو تبادله نه ده شوې. هغه جګړه چې د ۲۰۲۶ کال د فبرورۍ په ۲۸مه پیل شوې وه، پای ته رسېدلې ده."

    دا په داسې حال کې ده چې د هغه له خوا کانګرس ته د ایران پر ضد د بریدونو د رسمي خبر ورکولو ۶۰مه ورځ وه.

    د امریکا د قانون له مخې، ولسمشر مکلف دی چې له داسې خبر ورکولو وروسته د ۶۰ ورځو په ترڅ کې د زور کارول پای ته ورسوي، که کانګرس د دوام اجازه ورنه کړي.

    ټرمپ په خپلو جمعې ورځو لیکونو کې زیاته کړې:

    "زه د خپلې قانوني او اساسي دندې له مخې، د بهرني سیاست د مشري، د اعلی قوماندان په توګه او د اجرائیه رئیس په حیث، د امریکا د وسله والو ځواکونو د لارښوونې واک لرم او دې ته به دوام ورکړم."

19. ۱۱ غویی ۱۴۰۵ - ۱ می ۲۰۲۶وروستی, ایران له امریکا سره د خبرو لپاره خپله نوې طرحه پاکستان ته سپارلې

    د ایران د بهرنیو چارو وزارت ویاند اسماعیل بقايي وايي چې ایران له امریکا سره د جګړې د پای ته رسولو لپاره خپله تازه او وروستۍ شوې طرحه پاکستان ته سپارلې ده.

    د ایران د ایرنا خبري اژانس د خبر له مخې، ایران پرون پنجشنبه ماښام پاکستان ته د منځګړي په توګه دا طرحه تسلیم کړې ده.

    د دې طرحې په اړه نور جزیات نه دي ورکړل شوي خو ښاغلي بقايي تېره شپه په یوه تلویزوني خپرونه کې ټينګار کړی و چې د جګړې پای‌ ته رسول او د تل‌پاتې سولې رامنځ‌ته کول له امریکا سره د ایران د خبرو اترو په لومړیتوبونو کې دي.

    اسماعیل بقايي همداراز ویلي وو چې پاکستان د دواړو لورو ترمنځ منځګړی دی او ټینګار یې وکړ چې، "ګڼ هېوادونه په دې برخه کې مرستې ته لېواله دي خو رسمي منځګړی پاکستان دی".

20. ۱۱ غویی ۱۴۰۵ - ۱ می ۲۰۲۶وروستی, عراقچي: امریکا د ایران د جګړې د لګښتونو په اړه دروغ وايي

    د ایران بهرنیو چارو وزیر عباس عراقچي وايي د امریکا دفاع وزارت له دوی سره د جګړې د لګښتونو په اړه "دروغ" وایي.

    د یادونې ده چې د امریکا دفاع وزیر پیت هېګېسټ ویلي وو چې د دوی لخوا له ایران سره پر جګړې شاوخوا ۲۵ میلیارد ډالره لګښت شوی.

    خو د ایران بهرنیو چارو وزیر دغو شمېرو ته په شارې پر خپله اېکس پاڼه لیکلي: "پنتاګون دروغ وایي. د نتنیاهو قمار تر اوسه امریکا لپاره په مستقیم ډول ۱۰۰ میلیارد ډالره لګښت لرلی دی؛ تر هغې څلور برابره لوړ چې ادعا یې شوې."

    ښاغلي عراقچي زیاته کړه: " امریکايي مالیه‌ورکوونکو لپاره غیرمستقیم لګښتونه تر دې هم لوړ دي. هرې امریکایۍ کورنۍ لپاره میاشتنی لګښت ۵۰۰ ډالرو ته رسېږي او په چټکۍ سره د ډېرېدو په حال کې دی."

    نوموړي وویل چې د "لومړی اسرائیل" تګلارې معنا "وروستی امریکا" ده.

    د یادونې ده چې امریکا دفاع وزیر پېت هېګېست د استازو جرګې د وسله‌والو خدمتونو کمېټې له مشاجرې ډکه غونډه کې د ایران پر ضد جګړه کې د خپلو کړنو دفاع کړې وه.

    هغهوویل چې تر اوسه د دې جګړې لګښت شاوخوا ۲۵ میلیارد ډالره اټکل شوی او دا چې دغه لګښت د نوموړ په وینا "د ایران له لوري د اټومي وسلو د ترلاسه کولو د مخنیوي ارزښت درلود."