Trì colaistean aig UHI air a dhol còmhla

Thug Riaghaltas na h-Alba cead dha trì colaistean aig Oilthigh na Gàidhealtachd is nan Eilean a dhol còmhla.

Thig na colaistean - UHI Innse Gall nam measg - ri chèile bhon chiad là den ath-mhìos.

Dh'innis Oilthigh na Gàidhealtachd is nan Eilean bho chionn dà bhliadhna gun robh iad airson trì colaistean - UHI Innse Gall, UHI an Iar, is UHI a Tuath - a chur ri chèile.

Thuirt iad gum biodh guth nas làidire aca còmhla, le barrachd chothroman rannsachaidh is cothroman ùra eile do dh'oileanaich, is gum biodh sin a' freagairt nas fheàrr air feumalachdan nan sgìrean anns a bheil iad stèidhichte.

Ged a thog cuid draghan bho nochd am plana an toiseach, thuirt UHI nach bi an gluasad a' ciallachadh gum bi seirbheisean air an gluasad chun a' mheadhain.

Bhòt na trì colaistean an-uiridh airson a dhol còmhla.

Tha Riaghaltas na h-Alba a-nise air cead a thoirt dhan phlana - is thig na colaistean còmhla air an 1mh den Lùnastal.

'S e UHI a Tuath, an Iar is Innse Gall an t-ainm a bhios air a' bhuidhinn ùr.

Thuirt Ceannard Ainmichte UHI a Tuath, an Iar is Innse Gall, Lydia Rohmer: “Tha còrr air dà bhliadhna air a dhol seachad bhon thòisichear a’ planadh UHI a Tuath, an Iar is Innse Gall agus cha bhiodh cùisean air a bhith comasach às aonais an fhrèam-obrach air leth de cheannardan, luchd-obrach, oileanaich agus bùird rianachd.

"Bu mhath leam cuideachd taing a thoirt do UHI agus Comhairle Maoineachaidh na h-Alba airson an taic tron phròiseas seo."

Bheir seo buaidh air mu 9,000 oileanach is 600 luchd-obrach thar 19 làraichean ann an Gallaibh, Caitaibh, Taobh Sear Rois 's Cromba, Loch Abar, Taobh Siar Rois, an t-Eilean Sgitheanach agus na h-Eileanan an Iar.

Tha an sgìre anns a bheil làraichean UHI a Tuath, an Iar is Innse Gall nas motha na a' Chuimrigh le 40% de chladaichean na h-Alba.

Chuir UHI fàilte air a' cho-dhùnadh is thuirt iad gu bheil cothroman mòra na lùib do choimhearsnachdan agus dhan Ghàidhlig am measg eile.