Ceannard CMAL a' cur an aghaidh chùmhnantan ùra do Ghàrradh MhicFhearghais

- Air fhoillseachadh
Thuirt àrd-oifigear CMAL "nach e an rud ceart a bhiodh ann" a bhith a' toirt chùmhnantan 'son aiseagan ùra a thogail do Ghàrradh MhicFhearghais air Chluaidh.
Bha Caoimhin Hobbs a' bruidhinn ri buill Comataidh Còmhdhail Pàrlamaid na h-Alba Diciadain, is iad a' coimhead ri suidheachadh nan aiseasgan.
Dh'innis Riaghaltas na h-Alba sa Mhàrt gun rachadh cùmhnantan airson ceithir bàtaichean ùra a thogail gu dìreach dhan ghàrradh.
Nam measg bhiodh aiseagan beaga ùra 'son a dhol air Caolas na Hearadh is Caolas Bharraigh.
Cha tàinig dearbhadh air na cùmhnantan bhon uairsin.
A' bruidhinn ri buill aig Holyrood Diciadain, thog Mgr Hobbs air mar a bha dàil air aiseagan a bha Gàrradh MhicFhearghais air a thogail roimhe, is nach robh mar sin luach an airgid ann.
Thuirt e nach biodh e ceart air coimhearsnachdan eileanach a bhith a' toirt chùmhnantan gu dìreach dhan ghàrradh.
Nuair a chaidh faighneachd do Mhgr Hobbs am b' fheàrr leis 'son maith eileanach gun cùmhnant a thoirt gu dìreach gu Gàrradh MhicFhearghais, dh'fhreagair e "100%".
Dh'innis e cuideachd gun do sgrìobh CMAL gu Riaghaltas na h-Alba air a' mhìos a chaidh a ràdh gum biodh droch bhuaidh air coimhearsnachdan eileanach fada nas motha na buannachd a dh'fhaodadh a bhith ann do choimhearsnachd Inbhir Chluaidh.
Thuirt e nach d' fhuair iad freagairt fhathast.
Cùmhnant airson LOTI ùr gus a dhol a-mach gu tairgse
- Air fhoillseachadh3 Am Màrt
Riaghaltas na h-Alba "misneachail" gun gabh cùmhnant aiseig a thoirt seachad gun fharpais
- Air fhoillseachadh4 Am Màrt
Cairteal de luchd-obrach Gàrradh MhicFhearghais gus falbh
- Air fhoillseachadh18 An Lùnastal
Bha iomairt air a bhith ann an-uiridh airson an t-aiseag ùr a thèid an àite an Lord of the Isles a thogail aig Gàrradh MhicFhearghais.
'S e aonadh an GMB a bha air a cùl is taic aca bho ghrunn riochdairean coimhearsnachd ann an Inbhir Chluaidh.
Thuirt iad aig an àm gun robh e deatamach gur e Gàrradh MhicFhearghais a gheibhadh an cùmhnant - às aonais farpais a bhith ann - gus an goireas a chumail fosgailte is dreuchdan an luchd-obrach a ghlèidheadh.
Bha aig an dearbh àm dragh ann an Uibhist a Deas is luchd-iomairt an sin ag ràdh gum feumadh pròiseas tairgse àbhaisteach a bhith ann.
'S e sin an co-dhùnadh dhan tàinig Riaghaltas na h-Alba air a' cheann thall sa Mhàrt is iad a' cur cùmhnant an LOTI ùr a-mach gu tairgse, ach a' leigeil fhaicinn gun robh iad an dùil cùmhnantan airson aiseagan ùra do Chaolas na Hearadh is Caolas Bharraigh a thoirt do Ghàrradh MhicFhearghais.
Dh'iarr an GMB as t-samhradh gun rachadh na cùmhnantan sin a dhearbhadh, goirid mus deach cha mhòr an cairteal cuid de luchd-obrach a' ghàrraidh a phàigheadh dheth.
Thuirt Riaghaltas na h-Alba aig an àm gum feumadh iad pròiseasan foirmeil a leantainn airson dèanamh cinnteach gu bheil na cùmhnantan a rèir riaghailtean a thaobh shubsadaidhean is taic stàite.
"Nas miosa na tàmailteach"
Rinn an GMB càineadh air CMAL Diciadain is iad ag ràdh gun robh a' bhuidheann mar-tha air sealltainn nach robh iad 'son 's gun rachadh bàtaichean ùra a thogail aig Gàrradh MhicFhearghais.
Dh'fhàg iad air CMAL gun robh iad air "dèanamh cinnteach gun rachadh cùmhnantan eile thall-thairis le a bhith a' cur chumhachan nan cois a bha do-dhèanta do ghàrraidhean Breatannach".
Thuirt iad cuideachd gun robh pàirt aig CMAL fhèin sna cùmhnantan 'son an Glen Sannox is an Glen Rosa a chaidh gu Gàrradh MhicFhearghais "is a chaidh fada ceàrr".
"Tha cuimhne ghoirid aig daoine ach thog Gàrradh MhicFhearghais an treas cuid de chabhlach ChalMac agus bha e - is chan eil e cho fada sin bhuaithe - na fhactaraidh a thaobh aiseagan na h-Alba," thuirt Robert Deavy bho GMB na h-Alba.
"Mura h-eil e comasach do cheannardan CMAL taic a chumail ri gàrradh aig a bheil eachdraidh shònraichte a thaobh aiseagan a thogail dha na coimhearsnachdan eileanach againn, 's ann a tha an trioblaid le ceannardan CMAL seach Gàrradh MhicFhearghais.
"Tha an dìth lèirsinn is taic do ghàrradh a tha fo shealbh na stàite is le cothroman cho mòr nas miosa na tàmailteach".
Fuasgladh ri lorg fhathast 'son aiseagan ùra do Chaolas na Hearadh is Caolas Bharraigh
- Air fhoillseachadh30 An t-Sultain
GMB a' sireadh soillearachaidh air dà aiseag ùr dha na h-Eileanan an Iar
- Air fhoillseachadh16 An t-Iuchar
Feum air £1bn a bharrachd a chosg air seirbheisean aiseig
- Air fhoillseachadh25 An t-Sultain 2024
Nas tràithe Diciadain bha Mgr Hobbs air innse do Chomataidh na Còmhdhail gur dòcha nach ruith an Glen Sannox is an Glen Rosa air connadh LNG a chaoidh tuilleadh.
Chaidh na bàtaichean connspaideach a thogail is comas aca ruith air ola gas mara traidiseanta air neo LNG.
Chan eil an Glen Sannox tric air LNG a chleachdadh bho thàinig i a-steach gu seirbheis an-uiridh.
Nuair a chaidh faighneachd dha Mgr Hobbs Diciadain am faodadh e a bhith nach ruitheadh an Glen Sannox air LNG a-rithist is nach ruitheadh an Glen Rosa air idir, thuirt e gum faodadh sin tachairt.
Bha Mgr Hobbs air innse do chomhairlichean anns na h-Eileanan an Iar ann an 2024 nach robh CMAL an dùil siostam LNG a chleachdadh 'son aiseagan a-rithist.
"Tha dà bhàta LNG againn is tha fios aig a h-uile duine mun deidhinn," thuirt e aig an àm sin.
"Tha na bàtaichean eile a tha sinn a' togail san Tuirc - agus an LOTI ùr a tha sinn a' dealbh - 's e bàtaichean traidiseanta a bhios annta le siostaman connaidh traidiseanta.
"Tha LNG air a bhith soirbheachail ann an àitichean ach tha an gnìomhachas san fharsaingeachd a' gluasad air falbh bhon sin".