لائیو, امریکہ کے ایران پر حملوں کا ’تیسرا مرحلہ،‘ پاسدارانِ انقلاب نے ’اگلے اعلان‘ تک آبنائے ہرمز بند کر دی
امریکی سینٹرل کمانڈ (سینٹکام) کے مطابق ایران پر حملوں کا تیسرا مرحلہ شروع ہو گیا ہے۔ جو پاسدارانِ انقلاب کی جانب سے قبرض کے کنٹینر بردار جہاز ’جے ایف ایس گلیکسی‘ پر حملے کے ردِعمل میں شروع کیے گئے ہیں۔ دوسری جانب پاسدارانِ انقلاب نے کہا ہے کہ امریکی مداخلت کے خاتمے اور اگلے اعلان تک آبنائے ہرمز بند رہے گی۔
عمان کے قریب متاثرہ کنٹینر بردار جہاز کے عملے نے جہاز چھوڑ دیا
برطانوی میری ٹائم ٹریڈ آپریشنز اتھارٹی کا کہنا ہے کہ عمان کے قریب ایک کنٹینر بردار جہاز کے پچھلے حصے کو نقصان پہنچنے اور وہاں آگ لگنے کے بعد عملے نے جہاز کو چھوڑ دیا ہے۔
ادارے نے اس سے قبل بتایا تھا کہ اسے عمان سے مشرق کی جانب 9 ناٹیکل میل (تقریباً 16 کلومیٹر) کے فاصلے پر پیش آنے والے ایک واقعے کی اطلاع ملی ہے۔ تازہ ترین بیان کے مطابق عملہ اب لائف بوٹ میں موجود ہے اور حکام واقعے کی تحقیقات کر رہے ہیں۔
امریکی فوج نے بھی اتوار کی صبح ایران کے خلاف حملوں کا ایک نیا سلسلہ شروع کیا، امریکی حکام کا کہنا ہے کہ یہ کارروائی آبنائے ہرمز سے گزرنے والے قبرص کے پرچم بردار کنٹینر جہاز پر حملے کے ردعمل میں کی گئی ہے۔
سینٹ کام نے بتایا کہ عملے کا ایک رکن لاپتہ ہے اور آگ لگنے نیز انجن روم کو شدید نقصان پہنچنے کے باعث جہاز اپنا سفر جاری رکھنے کے قابل نہیں رہا۔
آئی آر جی سی (IRGC) کی بحریہ نے اس سے قبل کہا تھا کہ جہاز کو اس وقت نشانہ بنا کر روکا گیا جب اس نے اپنے سسٹمز بند کر دیے اور ایک ’غیر مجاز‘ راستے سے گزرنے کی کوشش کی۔
ایران کو اپنے غلط فیصلوں کی قیمت چکانی پڑ رہی ہے: امریکی وزیرِ دفاع
،تصویر کا ذریعہGetty Images
امریکی وزیرِ دفاع پیٹ ہیگستھ نے ایران پر تازہ حملوں پر تبصرہ کرتے ہوئے کہا ہے کہ ایران کو اس کے غلط فیصلوں کی قیمت چکانی پڑ رہی ہے۔
ایکس پر اپنے بیان میں امریکی وزیرِ دفاع نے امریکی سینٹرل کمانڈ کا ایران پر حملوں سے متعلق بیان شیئر کرتے ہوئے لکھا کہ ’ایران نے غلط فیصلہ کیا، اب اسے اس کی قیمت چکانی پڑے گی۔‘
امریکی سینٹرل کمانڈ (سینٹ کام) نے اعلان کیا تھا کہ امریکی فوج نے ایران کے خلاف حملوں کا تیسرا مرحلہ شروع کر دیا ہے۔
اس سے قبل، پاسدارانِ انقلاب کی بحریہ نے اعلان کیا تھا کہ آبنائے ہرمز ’اگلے حکم اور امریکی مداخلت کے خاتمے تک‘ بند رہے گی اور کسی بھی جہاز کو اس آبی گزرگاہ سے گزرنے کی اجازت نہیں دی جائے گی۔
ایران کے ٘مختلف شہروں میں دھماکوں کی آوازیں
ایرانی میڈیا کا کہنا ہے کہ امریکی فوج نے بندر عباس، سیرک، جاسک، چابہار، کنگان، بندر دیر اور عسلویہ کے علاقوں کو نشانہ بنایا ہے۔
ایرانی نشریاتی ادارے نے صوبہ خوزستان کے جنوبی حصے میں واقع گاؤں ’شاہ عبداللہ‘ اور صوبہ بوشہر کی ’دیلم کاؤنٹی‘ کے داخلی راستے پر بھی ایک دھماکے کی اطلاع دی ہے جس میں کسی جانی نقصان کی اطلاع نہیں ملی۔
بوشہر گورنریٹ کے ایک عہدیدار کے مطابق، بوشہر، عسلویہ اور دیر شہروں پر ہونے والے حملوں میں اب تک کسی جانی نقصان کی اطلاع نہیں ملی ہے۔
ایرانی نشریاتی ادارے کا یہ بھی کہنا ہے کہ بندر عباس، سیرک اور جاسک میں صورتحال اب پرسکون ہے۔
امریکہ کے ایران پر مزید حملے، پاسدارن انقلاب نے آبنائے ہرمز بند کر دی, رابرٹ گرینال اور ٹیبی ولسن
،تصویر کا ذریعہReuters
امریکہ نے کہا ہے کہ تہران کی جانب سے آبنائے ہرمز سے گزرنے والے ایک جہاز کو نشانہ بنائے جانے کے بعد اس نے ایران پر
حملوں کی ایک نئی لہر شروع کی ہے۔
ایران کے پاسداران انقلاب کا کہنا ہے
کہ اگلے اعلان تک آبی گزر گاہ بند کر دی گئی ہے اور سرکاری میڈیا کے مطابق ’خلاف
ورزی کرنے والے‘ جہاز پر اس وقت حملہ کیا گیا جب وہ اپنی شناخت اور ٹریکنگ والا
نظام بند کر کے منظور شدہ راستے سے ہٹ گیا۔
امریکی فوج کی مرکزی کمان (سینٹ کام)
کے مطابق جب پاسداران انقلاب نے قبرص کے پرچم بردار ایک جہاز کو نشانہ بنایا تو اس
نے ’رواں ہفتے تیسری بار حملے کیے۔‘
یہ پیش رفت اس ہفتے کے اوائل میں پیش
آنے والے ان واقعات کے بعد سامنے آئی ہے جن میں تین تجارتی بحری آئل ٹینکروں کو
نشانہ بنایا گیا تھا، جس کے نتیجے میں امریکہ نے ایران پر حملے کیے اور ایران نے جواب
میں مشرق وسطیٰ میں موجود امریکی اڈوں کو نشانہ بنایا۔
سینٹ کام نے کہا کہ جہاز کے انجن روم
کو نقصان پہنچا اور وہ ’اپنا سفر جاری نہ رکھ سکا۔‘ سینٹ کام کے مطابق جہاز پر
موجود عملے کا ایک رکن لا پتہ ہے۔
سوشل میڈیا ویب سائٹ ایکس پر اپنے
بیان میں سینٹ کام نے لکھا: ’تجارتی جہازوں پر پہلے حملوں کے لیے جوابدہ ٹھہرائے
جانے کے بعد ایران کو مفاہمتی یادداشت کی پاسداری کا ایک اور موقع فراہم کیا گیا
تھا، لیکن وہ ایک بار پھر ناکام رہا ہے۔‘
امریکی وزیر دفاع پیٹ ہیگسیتھ نے یہی
بیان شیئر کرتے ہوئے لکھا: ’ایران نے ایک غلط انتخاب کیا۔ اب اسے اس کی قیمت چکانی
ہو گی۔‘
اتوار کے روز اس سے پہلے ایران کے سرکاری
میڈیا نے کہا تھا کہ غیر منظور شدہ راستے پر سفر کرنے کی کوشش کرنے والے ایک بحری
جہاز پر کروز میزائل داغنے کے بعد اگلے اعلان تک آبنائے ہرمز بند کر دی گئی ہے۔
سرکاری خبر رساں ایجنسی کی جانب سے
نشر کیے گئے ایک بیان کے مطابق پاسداران انقلاب نے کہا کہ ہدایات کو بار بار نظر
انداز کرنے کے بعد جہاز کو ’انتباہی فائرنگ کا نشانہ بنایا گیا اور روک دیا گیا۔‘
پاسدارن انقلاب نے یہ انتباہ بھی دیا
کہ بندش کے نتیجے میں کسی بھی امریکی ’جارحیت‘ کا ’شدت‘ سے جواب دیا جائے گا اور
خطے میں نئی اڈوں کو نشانہ بنایا جائے گا۔
ایران پر حملوں کا تیسرا مرحلہ جاری ہے: امریکی سینٹرل کمانڈ
امریکی سینٹرل کمانڈ (سینٹکام) کے مطابق ایران پر حملوں کا تیسرا مرحلہ شروع ہو گیا ہے۔ جو پاسدارانِ انقلاب کی جانب سے قبرض کے کنٹینر بردار جہاز ’جے ایف ایس گلیکسی‘ پر حملے کے ردِعمل میں شروع کیے گئے ہیں۔
سینٹ کام کے مطابق، جہاز کے عملے کا ایک رکن لاپتہ ہے اور آگ لگنے اور انجن روم کو شدید نقصان پہنچنے کے باعث جہاز اپنا سفر جاری رکھنے کے قابل نہیں رہا۔
سینٹ کام کے بیان میں کہا گیا ہے کہ تجارتی جہازوں پر گذشتہ حملوں کے بعد ایران کے پاس مفاہمت کی یادداشت (ایم او یو) کی پاسداری کرنے کا ایک اور موقع تھا، لیکن اس نے ایک بار پھر ایسا کرنے سے انکار کر دیا۔
سینٹ کام نے کہا کہ امریکہ ایران کی اس صلاحیت کو کم کرنے کے لیے اپنے حملے جاری رکھے ہوئے ہے جس کے ذریعے وہ آبنائے ہرمز سے گزرنے والے شہری ملاحوں اور تجارتی جہازوں کو نشانہ بناتا ہے۔ یہ حملے امریکی صدر کی ہدایت پر کیے جا رہے ہیں۔
ایران اور عمان آبنائے ہرمز پر مذاکرات جاری رکھنے پر متفق
،تصویر کا ذریعہ@s_a_araghchi
عمان کی سرکاری خبر رساں ایجنسی نے اطلاع دی ہے کہ ملک اور ایران نے بین الاقوامی قوانین کی بنیاد پر آبنائے ہرمز میں جہاز رانی کے معاہدے تک پہنچنے کے مقصد سے اپنے تکنیکی اور سیاسی مذاکرات جاری رکھنے پر اتفاق کیا ہے۔
واضح رہے کہ ایرانی وزیر خارجہ عباس عراقچی اس مسئلے پر بات چیت کے لیے عمان گئے ہیں۔
آج اپنے دورے کے دوران انھوں نے عمانی وزیر خارجہ بدر بسیدی سے ملاقات کی۔
عباس عراقچی نے اپنے ٹیلیگرام چینل پر لکھا کہ دونوں ممالک نے ’اسلام آباد مفاہمتی یادداشت کی شق 5 کے مطابق آبنائے ہرمز کے ذریعے بحری جہازوں کے محفوظ گزرنے کے لیے مناسب طریقہ کار پر خیالات کا تبادلہ کیا۔‘
ادھر ایک امریکی اہلکار کا کہنا ہے کہ میڈیا میں بعض قیاس آرائیوں کے باوجود امریکی تکنیکی ٹیم عمان میں جاری مذاکرات میں براہ راست شریک نہیں ہوگی۔ تاہم امریکہ عمانی اور قطری حکام کے ذریعے مذاکراتی عمل سے رابطے میں رہے گا۔
یہ سفارتی سرگرمیاں ایسے وقت میں جاری ہیں جب گذشتہ ہفتے آبنائے ہرمز میں کم از کم تین تجارتی جہازوں کو نشانہ بنائے جانے کے واقعات کے بعد قطر، سعودی عرب اور امریکہ نے ان حملوں کا ذمہ دار ایران کو قرار دیا تھا۔
ان واقعات کے بعد امریکہ نے مسلسل دو رات ایران میں مختلف اہداف پر فوجی حملے کیے، جس کے نتیجے میں خطے میں کشیدگی مزید بڑھ گئی ہے۔
پریس ٹی وی، جو ایران کا سرکاری انگریزی زبان کا نیوز چینل ہے، نے ایک سینیئر انٹیلی جنس ذریعے کے حوالے سے دعویٰ کیا ہے کہ ایران آبنائے ہرمز کے لیے اپنے انتظامی منصوبے پر عمل درآمد کے لیے تیار ہے اور ’امریکی دھمکیوں، نفسیاتی دباؤ اور میڈیا مہم‘ کے سامنے پسپائی اختیار نہیں کرے گا۔
یہ بیان ایک ایسے وقت میں سامنے آیا ہے جب ایک روز قبل اقوام متحدہ کی میری ٹائم ایجنسی کی گورننگ کونسل نے رکن ممالک کو مشورہ دیا تھا کہ وہ آبنائے ہرمز پر ایران کی خودمختاری کے دعوے اور آبی گزرگاہ میں بحری آمدورفت کی نگرانی سے متعلق اس کے ’یکطرفہ فیصلے‘ کو تسلیم نہ کریں۔
سعودی اور امریکی وزرائے خارجہ کا رابطہ، خطے کے امن اور سمندری سلامتی پر زور
سعودی عرب کی سرکاری خبر رساں ایجنسی کے مطابق ولی عہد شہزادہ محمد بن سلمان اور امریکی صدر ڈونلڈ ٹرمپ کے درمیان ٹیلیفونک گفتگو کے بعد دونوں ممالک کے وزرائے خارجہ کے درمیان بھی رابطہ ہوا۔
رپورٹ کے مطابق سعودی وزیر خارجہ شہزادہ فیصل بن فرحان اور امریکی وزیر خارجہ مارکو روبیو نے فون پر گفتگو کے دوران خطے کی تازہ صورتحال اور باہمی دلچسپی کے امور پر تبادلہ خیال کیا۔
سعودی پریس ایجنسی کے مطابق دونوں رہنماؤں نے اس عزم کا اظہار کیا کہ وہ خطے میں امن، سلامتی اور استحکام کے فروغ کے لیے مشترکہ کوششیں جاری رکھیں گے۔
بیان میں کہا گیا ہے کہ سعودی اور امریکی قیادت نے مختلف سیاسی سطحوں پر ایران اور امریکہ کے درمیان جاری مذاکرات پر بھی تبادلہ خیال کیا۔ اس موقع پر بحری جہازوں اور اہم سمندری گزرگاہوں کی سلامتی کی اہمیت پر زور دیا گیا، جبکہ خطے میں استحکام کے لیے کی جانے والی تمام سفارتی اور سیاسی کوششوں کی حمایت کا اعادہ بھی کیا گیا۔
یہ رابطے ایسے وقت میں ہوئے ہیں جب گذشتہ ہفتے آبنائے ہرمز میں تجارتی جہازوں پر حملوں کے بعد سعودی عرب اور امریکہ ایران پر ان حملوں کی ذمہ داری عائد کر چکے ہیں، تاہم تہران نے ان الزامات کو مسترد کیا ہے۔
آبنائے ہرمز دنیا کی اہم ترین تیل بردار گزرگاہوں میں شمار ہوتی ہے، اور وہاں پیدا ہونے والی کشیدگی عالمی توانائی منڈیوں اور علاقائی سلامتی پر براہِ راست اثر ڈال سکتی ہے۔
پونچھ میں جوائنٹ عوامی ایکشن کمیٹی کے کارکنوں اور قانون نافذ کرنے والے اداروں کے اہلکاروں کے درمیان جھڑپوں میں ایک شخص ہلاک، پانچ زخمی: پولیس, شہزاد ملک، بی بی سی اردو ڈاٹ کام، اسلام آباد
،تصویر کا ذریعہAFP via Getty Images
،تصویر کا کیپشنفائل فوٹو
پولیس اور مقامی انتظامیہ نے تصدیق کی ہے کہ پاکستان کے زیر انتظام
کشمیر کے پونچھ ڈویژن کے علاقے ارجا کے نزدیک حکومت کی جانب سے کالعدم قرار دی گئی تنظیم جموں کشمیر جوائنٹ عوامی ایکشن کمیٹی کے
کارکنوں اور قانون نافذ کرنے والے اداروں کے اہلکاروں کے درمیان جھڑپوں کے نتیجے میں ایک شخص ہلاک اور پانچ زخمی ہو گئے ہیں۔
زخمیوں میں سے ایک شخص
کی حالت تشویشناک بتائی جاتی ہے۔
راولاکوٹ پولیس کے ایک
اہلکار نے بی بی سی کو بتایا کہ راولاکوٹ روڈ پر پولیس کی ایک چیک پوسٹ واقع ہے جسے
کچھ روز قبل ایک منصوبہ بندی کے تحت خالی کیا گیا تھا۔
اہلکار نے دعویٰ
کیا کہ سنیچر کو جب پولیس اہلکار اس چیک پوسٹ کو بحال کرنے اور وہاں پر ڈیوٹی ادا کرنے
کے لیے جا رہے تھے تو قریبی علاقے میں چھپے ہوئے کالعدم تنظیم کے کارکنوں نے مبینہ
طور پر پولیس اہلکاروں پر فائرنگ کر دی۔ پولیس اہلکار کے بقول اس کے جواب میں پولیس
اہلکاروں نے اپنے دفاع میں فائرنگ کی جس کے نتیجے میں کالعدم تنظیم کا ایک کارکن ہلاک
ہو گیا جبکہ پانچ افراد زخمی ہو گئے جن میں سے ایک کی حالت تشویش ناک بتائی جاتی ہے۔
انھوں نے کہا کہ فائرنگ کے تبادلے میں قانون نافذ کرنے والے اداروں کے دو اہلکار بھی معمولی زخمی ہوئے
ہیں۔
مقامی انتظامیہ کے ایک اعلیٰ عہدیدار نے بھی اس واقعے کی تصدیق کی ہے۔
دوسری جانب پاکستان
کے زیر انتظام کشمیر کی حکومت نے 15 جولائی
کو عوامی ایکشن کمیٹی کی لانگ مارچ کی کال کو روکنے اور امن وامان کی صورت حال برقرار
رکھنے کے لیے مرکز ی حکومت سے ایف سی اور رینجرز کی اضافی نفری کی درخواست کی تھی۔ اس درخواست کے جواب میں وزارت
داخلہ نے نفری مرحلہ وار کشمیر روانہ کرنا شروع کر دی ہے۔
الیکشن کمیشن کے حکام
کا کہنا ہے کہ پاکستان کے زیر انتظام کشمیر کے زیادہ تر علاقوں میں انتخابی مہم جاری
ہے جبکہ پونچھ ڈویژن کے شہر راولاکوٹ میں کالعدم جماعت کی جانب سے دھرنا دیے جانے کی
وجہ سے انتخابی مہم سُست روی کا شکار ہے۔
پاکستان کے زیر انتظام
کشمیر کے الیکشن کمیشن نے انتخابات کا سامان دوردراز علاقوں کے مختلف حلقوں تک پہنچانے
کے لیے وفاقی حکومت سے ہیلی کاپٹر فراہم کرنے کی درخواست کی ہے۔
ورلڈ کپ میں شرکت کے چند روز بعد جنوبی افریقی فٹبالر کی لاش گھر سے برآمد
،تصویر کا ذریعہNurPhoto via Getty Images
،تصویر کا کیپشنایڈمز نے فٹبال ورلڈ کپ میں جنوبی افریقہ کی جانب سے گروپ مرحلے کے تینوں میچ کھیلے تھے۔
جنوبی افریقہ کی قومی فٹبال ٹیم کے مڈفیلڈر جیڈن ایڈمز 25 برس کی عمر میں وفات پا گئے ہیں۔ چند روز قبل ہی انھوں نے اپنی قومی ٹیم کی جانب سے ورلڈ کپ میں شرکت کی تھی۔
ایڈمز نے ٹورنامنٹ میں جنوبی افریقہ کی جانب سے گروپ مرحلے کے تینوں میچ کھیلے تھے۔ جنوبی افریقہ ناک آؤٹ مرحلے تک پہنچنے میں کامیاب رہا تھا لیکن ماک آؤٹ راؤنڈ میں کینیڈا کے ہاتھوں شکست کے بعد ایونٹ سے باہر ہو گیا تھا۔
جنوبی افریقہ کے وزیرِ کھیل گیٹن میکینزی نے جیڈن ایڈمز کی موت پر افسوس کا اظہار کرتے ہوئے کہا ہے کہ جنوبی افریقی فٹبال اپنے ایک نمایاں نوجوان ٹیلنٹ سے محروم ہو گئی ہے۔
25 سالہ جیڈن ایڈمز کی لاش وسطی کیپ ٹاؤن کے نواحی علاقے شٹسکیلوف میں واقع ان کے گھر سے سنیچر کی صبح ملی تھی جس کے بعد جنوبی افریقہ کی پولیس نے تحقیقات کا اعلان کیا ہے۔
میکینزی کا کہنا ہے کہ ’جیڈن کی موت کی وجہ کی ابھی تصدیق نہیں ہوئی ہے اور میں میڈیا اور عوام سے اپیل کرتا ہوں کہ وہ تحمل اور ہمدردی کا مظاہرہ کریں اور قیاس آرائیوں سے گریز کریں۔‘
ان کا مزید کہنا ہے کہ اس حوالے سے کوئی بھی معلومات مناسب وقت پر متعلقہ حکام کی جانب سے جاری کی جائیں گی۔
ویتنام میں تیز رفتار کشتی الٹنے سے انڈین سیاحوں سمیت 15 افراد ہلاک
،تصویر کا ذریعہAFP via Getty Images
ویتنام کی مقامی میڈیا نے حکام کے حوالے سے بتایا ہے کہ ملک کے جنوبی حصے میں ایک جزیرے کے نزدیک انڈین سیاحوں کو لے جانے والی ایک سپیڈ بوٹ (تیز رفتار کشتی) الٹنے سے 15 افراد ہلاک ہو گئے ہیں۔
حکام کے مطابق کشتی میں 32 انڈین سیاح اور عملے کے چار ارکان سوار تھے جب سنیچر کے روز خراب سمندری موسم کے باعث کشتی ہون مائے رت نگوائی جزیرے سے تقریباً 400 میٹر کے فاصلے پر الٹ گئی۔
ویتنام کے اخبار وی این ایکسپریس کے مطابق علاقے میں موجود متعدد سیاحتی کشتیوں نے فوری طور پر امدادی کارروائیوں میں حصہ لیا اور کشتی میں پھنسے کئی مسافروں کو بچا لیا۔ بعض اطلاعات کے مطابق ہلاک ہونے والے تمام افراد انڈین شہری ہیں۔ اس حادثے میں 21 افراد کو بچا لیا گیا ہے۔
خلیجِ تھائی لینڈ میں واقع این تھوئی جزائر کے سلسلے میں شامل چھوٹا سا جزیرہ ہون مائے رت نگوائی کشتیوں کے ذریعے مختلف جزیروں کی سیر کے لیے آنے والے سیاحوں میں کافی مقبول ہے۔
ہون مائے رت نگوائی ویتنام کے سب سے بڑے جزیرے فو کووک سے تقریباً 10 کلومیٹر جنوب میں واقع ہے۔
علاقے کے ایک سینیئر کمیونسٹ عہدیدار نگوین تیئن ہائی نے بتایا ہے کہ حکام ہلاکتوں اور زندہ بچ جانے والوں کی درست تعداد کا تعین کر رہے ہیں۔
،تصویر کا ذریعہẢNH CHỤP TỪ VIDEO
مشہد میں نیم فوجی دستے بسیج کے دو اہلکاروں کو فائرنگ کر کے ہلاک کر دیا گیا: پاسدارانِ انقلاب
،تصویر کا ذریعہLightRocket via Getty Images
ایرانی پاسدارانِ انقلاب کے امام رضا کور کے شعبۂ تعلقات عامہ کا کہنا ہے کہ مشہد شہر میں اس کے ماتحت نیم فوجی دستے بسیج کے دو اہلکار ہلاک ہو گئے ہیں۔
امام رضا کور کی جانب سے جاری بیان میں کہا گیا ہے کہ دونوں کو مشہد کے سرافرازان اسکوائر کے قریب اس وقت نشانہ بنایا گیا جب وہ گشت پر تھے۔
بتایا گیا ہے کہ اس واقعے میں ایک راہ گیر بھی زخمی ہوا، جسے ہسپتال منتقل کر دیا گیا۔
فائرنگ کرنے والوں کے بارے میں مزید کوئی تفصیلات جاری نہیں کی گئیں۔
اس سے قبل خراسان رضوی گورنری کے نائب سکیورٹی عہدیدار امیراللہ شمقدری نے تردید کی تھی کہ یہ سکیورٹی نوعیت کا واعہ نہیں۔ ان کا کہنا تھا کہ فائرنگ ’ذاتی نوعیت‘ کا معاملہ ہے اور اس کا ’دہشت گردی یا سکیورٹی اقدامات سے کوئی تعلق نہیں۔‘
سرافرازان بولیوارڈ، جہاں فائرنگ کا یہ واقعہ پیش آیا، مشہد کے مغرب میں روضۂ امام رضا سے تقریباً 17 کلومیٹر کے فاصلے پر ہے۔
شدید گرمی اور تیز بارشوں کے باعث خیبر پختونخوا میں گلیشیائی جھیلوں کے پھٹنے کا خطرہ ہے: پی ڈی ایم اے
پاکستان کے صوبہ
خیبر پختونخوا میں قدرتی آفات سے نمٹنے کے ادارے پی ڈی ایم اے نے صوبے کے بالائی اضلاع
میں موجود گلیشیائی جھیلوں کے پھٹنے (گلوف) کا الرٹ جاری کر دیا۔
پی ڈی ایم اے کی
جانب سے جاری بیان میں کہا گیا ہے کہ صوبہ کے بالائی اضلاع میں شدید گرم موسم اور آئندہ
ہفتے ہونے والی تیز بارشوں کے باعث تیزی سے گلیشیرز کے پگھلنے کا خدشہ ہے جس کے باعث
گلیشیائی جھیلیں پھٹ سکتی ہیں جبکہ سیلاب اور لینڈ سلائیڈنگ کا خطرہ بھی بڑھ گیا۔
ادارے کا کہنا ہے
کہ اپر اور لوئر چترال، سوات، بحرین، اپر دیر، کوہستان اور مانسہرہ کی ضلعی انتظامیہ
کو پیشگی اقدامات کے لیے ہدایات جاری کر دی گئی ہیں۔
پی ڈی ایم اے نے سیاحوں
کو مشورہ دیا ہے کہ وہ غیر ضروری سفر سے گریز کریں اور دریا، ندی نالوں اور گلیشیائی
علاقوں سے دور رہیں۔
علی خامنہ ای کی موت کا بدلہ لینا ’قوم کا مطالبہ‘ ہے: ایرانی رہبرِ اعلیٰ مجتبی خامنہ ای
،تصویر کا ذریعہGetty Images
ایران کے رہبرِ اعلیٰ آیت اللہ مجتبیٰ خامنہ ای نے سنیچر کے روز کہا ہے کہ ان کے والد اور پیش رو علی خامنہ کی موت کا بدلہ لینا ’قوم کا مطالبہ‘ ہے اور اسے ’ضرور پورا‘ کیا جانا چاہیے۔
بین الاقوامی خبر رساں ادارے روئٹرز کے مطابق انھوں نے یہ بات اپنے ٹیلیگرام اکاؤنٹ پر جاری ایک تحریری پیغام میں کہی۔
خامنہ ای نے یہ پیغام اپنے والد آیت اللہ علی خامنہ ای کی تدفین کی تقریبات کے بعد جاری کیا ہے۔
یاد رہے کہ علی خامنہ ای 28 فروری کو امریکہ اور اسرائیل کی جانب سے ایران پر کیے گئے فضائی حملوں کے ابتدائی گھنٹوں میں ہی اُس وقت مارے گئے تھے جب اُن کی رہائش گاہ اور دفتر پر مشتمل کمپاؤنڈ کو نشانہ بنایا گیا تھا۔
مجتبیٰ خامنہ ای نے اپنے یغام میں کہا ہے ’ہم شہید رہنما اور ان دو جنگوں کے تمام شہدا کے خون کا بدلہ مجرم اور رسوا قاتلوں سے لینے کا عہد کرتے ہیں۔‘
یاد رہے کہ اپنے والد کی ہلاکت کے بعد ایران کے رہبرِ اعلیٰ بننے والے مجتبیٰ خامنہ ای نے اپنے والد کے جنازے میں شرکت نہیں کی تھی۔
یاد رہے کہ سنیچر کی صبح اپنے سوشل میڈیا پلیٹ فارم ٹروتھ سوشل پر جاری ایک بیان میں امریکی صدر ڈونلڈ ٹرمپ نے خبردار کیا تھا کہ ’اگر ایرانی حکومت دُنیا کے مختلف حصوں میں بارہا دہرائی گئی اس دھمکی پر عمل کرتی ہے کہ وہ امریکہ کے موجودہ صدر یعنی مجھے قتل کرے گی یا قتل کرنے کی کوشش کرے گی تو اسلامی جمہوریہ ایران کی جانب پہلے ہی ایک ہزار میزائل نشانے پر رکھے جا چکے ہیں اور ان کے فوراً بعد مزید ہزاروں میزائل بھی داغے جائیں گے۔‘
ایران کی حالیہ امریکی حملوں میں 17 ہلاکتوں کی تصدیق
،تصویر کا ذریعہGetty Images
ایرانی وزارتِ صحت نے بتایا ہے کہ حالیہ امریکی حملوں میں 17 افراد ہلاک اور 115 زخمی ہوئے۔
ایرانی وزارتِ صحت کے انفارمیشن سینٹر کے سربراہ حسین کرمان پور نے بتایا ہے کہ چھ شہروں پر ہونے والے حالیہ امریکی حملوں میں 17 افراد ہلاک ہوئے، جن میں ایک خاتون بھی شامل ہے۔
حسین کرمان پور نے کہا کہ آٹھ اور نو جولائی کو ہونے والے امریکی حملوں میں 115 افراد زخمی بھی ہوئے۔
ان کے مطابق زخمیوں میں سے کئی افراد کو طبی امداد کے بعد ہسپتال سے فارغ کر دیا گیا ہے۔
آبنائے ہرمز میں تین جہازوں کو نشانہ بنائے جانے کے بعد، امریکہ نے بندر عباس، قشم، سیرک، چابہار اور بوشہر میں مختلف اہداف پر حملے کیے تھے۔
ایرانی وزیرِ خارجہ عباس عراقچی کی عمان میں حکام سے ملاقاتیں
،تصویر کا ذریعہisna
ایران کے وزیرِ خارجہ عباس عراقچی عمانی حکام سے مذاکرات کے لیے مسقط پہنچ گئے ہیں۔
ذرائع کے مطابق یہ دورہ ایران اور عمان کے درمیان دوطرفہ مشاورت کے سلسلے کی کڑی ہے، جس میں خطے کی صورتحال، خصوصاً آبنائے ہرمز سے متعلق امور پر تبادلۂ خیال کیا جائے گا۔
ایران اور عمان کے وزرائے خارجہ کے درمیان ’اسلام آباد مفاہمتی یادداشت‘ کی شق پانچ کی بنیاد پر آبنائے ہرمز سے جہازوں کی محفوظ آمد و رفت کے لیے مناسب طریقۂ کار پر گفتگو اور تبادلۂ خیال متوقع ہے۔
یہ دورہ ایسے وقت میں ہو رہا ہے جب حالیہ دنوں میں امریکہ اور ایران کے درمیان باہمی حملوں کے بعد آبنائے ہرمز کے حوالے سے کشیدگی میں اضافہ دیکھا گیا ہے۔
دریں اثنا، قطری مذاکرات کاروں کا ایک وفد بھی ایران پہنچا ہے، جس کا مقصد ایران اور امریکہ کے درمیان مذاکرات کی بحالی کی راہ ہموار کرنا اور دونوں ممالک کے درمیان کشیدگی کم کرنے کی کوشش کرنا ہے۔
سپین میں شدید گرمی کے باعث جنگلات میں آگ لگنے سے 12 افراد ہلاک
،تصویر کا ذریعہGetty Images
جنوب مشرقی سپین میں جنگلات میں لگنے والی آگ کے نتیجے میں چار برطانوی شہریوں سمیت 12 افراد ہلاک اور 23 لاپتہ ہو گئے ہیں۔
ایمرجنسی سروسز کے مطابق یہ سپین میں جنگلات میں آگ لگنے کے بڑے واقعات میں سے ایک ہے۔
ہسپانوی حکام کے مطابق، سینکڑوں فائر فائٹرز اور دیگر ماہرین کو جنوب مشرقی سپین کے قصبے بیدر کے ارد گرد تعینات کیا گیا ہے جہاں 12 افراد ہلاک ہوئے ہیں۔
المیریا کے علاقے لاس گیلارڈوس میں مقامی حکام نے خبردار کیا ہے کہ مرنے والوں کی تعداد بڑھ سکتی ہے، خدشہ ہے کہ ہلاک ہونے والوں میں مزید برطانوی بھی شامل ہیں۔
واضح رہے کہ سپین میں شدید گرمی کی لہر جاری ہے اور درحہ حرارت 40 ڈگری سینٹی گریڈ (104 فارن ہائیٹ) تک پہنچ چکا ہے۔ گرمی کے باعث جنوبی یورپ خاص طور پر فرانس، پرتگال اور سپین میں جنگل کی آگ کے واقعات رپورٹ ہوئے ہیں۔
،تصویر کا ذریعہReuters
،تصویر کا ذریعہGetty Images
تہران نے امریکہ کے ساتھ مذاکرات کی کوئی درخواست نہیں کی: ترجمان ایرانی وزارتِ خارجہ
،تصویر کا ذریعہisna
ایرانی وزارتِ خارجہ کے ترجمان اسماعیل بقائی نے کہا ہے کہ تہران نے امریکہ کے ساتھ مذاکرات کی کوئی درخواست نہیں کی ہے، تاہم اس نے ایک علاقائی ثالث کی جانب سے ایران کا دورہ کرنے اور تازہ ترین پیش رفت پر بات چیت کرنے کی درخواست کو قبول کیا ہے۔
اسماعیل بقائی نے ایک ٹیلی ویژن انٹرویو میں کہا کہ ’ہماری جانب سے امریکہ کے ساتھ مذاکرات کی کوئی درخواست نہیں کی گئی تھی، لیکن اپنے روایتی ذمہ دارانہ رویے کے پیشِ نظر ہم نے ایک علاقائی ثالث کی جانب سے ایران کا دورہ کرنے اور تازہ ترین صورتحال پر بات چیت کرنے کی درخواست کو مسترد نہیں کیا۔ یہ دورہ مشہد میں ہوا اور ہم نے قطری فریق کے سامنے اپنے خیالات اور موقف کا اظہار کیا۔‘
اسماعیل بقائی نے الزام عائد کیا کہ مفاہمتی یادداشت پر دستخط ہوئے ابھی صرف 21 یا 22 دن ہی گزرے ہیں اور امریکہ نے اس عرصے کے دوران مسلسل اس کی مختلف شقوں کی خلاف ورزی کی ہے۔
وزارت خارجہ کے ترجمان نے مزید کہا کہ بدھ اور جمعرات کے واقعات اس یادداشت کی پہلی اور دوسری شقوں کی واضح خلاف ورزی تھے، اور ایرانی تیل کی فروخت کے لائسنس کی منسوخی نے بھی اس کی ایک اور شق کی سنگین خلاف ورزی کی۔
ان کے مطابق، امریکہ کی جانب سے نئی پابندیاں عائد کرنا اس مفاہمت کی یادداشت کی شق نمبر نو کے منافی ہے۔
’ہم سے غلطی ہوئی،‘ میٹا نے تنقید کے بعد انسٹا گرام پر نیا آرٹیفیشل انٹیلی جنس امیج فیچر ہٹا دیا
،تصویر کا ذریعہMeta
میٹا نے اچانک ایک نئے فیچر کو بند کر دیا ہے جس کے ذریعے صارفین اس کے مصنوعی ذہانت (AI) ٹول کا استعمال کرتے ہوئے انسٹا گرام صارفین کے مواد سے جعلی تصاویر بنا سکتے تھے۔
یہ فیچر ’میوز امیج‘ نامی ایک نئے اے آئی امیج جنریشن ٹول کا حصہ تھا جسے انسٹاگرام کی مالک کمپنی میٹا نے منگل کے روز متعارف کرایا تھا۔
اس فیچر کے ذریعے میٹا اے آئی چیٹ بوٹ استعمال کرنے والے افراد انسٹاگرام کے پبلک اکاؤنٹس کو ٹیگ کر سکتے تھے اور ان اکاؤنٹس پر موجود مواد کو استعمال کرتے ہوئے اے آئی سے تیار کردہ یا ترمیم شدہ تصاویر اور مواد بنا سکتے تھے۔
یہ فیچر بہت جلد رازداری (پرائیویسی) سے متعلق خدشات کی وجہ سے شدید تنقید کی زد میں آ گیا، جس کے بعد میٹا نے تسلیم کیا کہ اس سے ’غلطی ہوئی‘ اور اعلان کیا کہ یہ فیچر ’اب دستیاب نہیں ہے۔‘
میوز امیج میٹا کی جانب سے اے آئی کے ذریعے تصاویر بنانے کے شعبے میں پہلی کوشش تھی، لیکن اسے اس وجہ سے بھی تنقید کا سامنا کرنا پڑا کہ انسٹا گرام صارفین کو اس فیچر میں خودکار طور پر شامل (opt-in) کر دیا گیا تھا۔
اس کا مطلب یہ تھا کہ جس کسی کا بھی انسٹاگرام اکاؤنٹ پبلک تھا، اس کی تصویر یا شناخت اس کی معلومات یا اجازت کے بغیر استعمال کی جا سکتی تھی۔
طوفان ’باوی‘ کی تباہ کاریاں، فلپائن میں لینڈ سلائیڈنگ سے کم از کم 15 افراد ہلاک
،تصویر کا ذریعہGetty Images
گزشتہ کئی دہائیوں کے طاقتور ترین سمندری طوفانوں میں سے ایک طوفان باوی کے باعث جنوبی فلپائن میں لینڈ سلائیڈنگ کے مختلف واقعات میں کم از کم 15 افراد ہلاک ہو گئے ہیں، جبکہ مشرقی ایشیا کے کئی ممالک کے بھی اس طاقتور طوفان کی زد میں آنے کا خطرہ ہے۔
تقریباً ایک ہزار کلومیٹر کے علاقے پر بننے والا یہ طوفان بحرالکاہل سے ہوتا ہوا تائیوان کی جانب بڑھ رہا ہے۔
محکمہ موسمیات کے مطابق طوفان سے قبل تائیوان کے شمالی اور مشرقی علاقوں، جاپان کے دور دراز جزیروں پر موسلا دھار بارشوں کا امکان ہے جس کے بعد سنیچر کے روز یعنی آج اس کے جنوب مشرقی چین کے ساحلی علاقوں سے ٹکرانے کی توقع ہے۔
،تصویر کا ذریعہGetty Images
طوفان کے پیشِ نظر خطے بھر میں درجنوں پروازیں منسوخ کر دی گئی ہیں، جبکہ متعدد علاقوں میں تعلیمی ادارے بند کر دیے گئے ہیں۔ ممکنہ ہنگامی صورتحال کے باعث شہریوں نے ضروری اشیائے خور و نوش اور دیگر سامان ذخیرہ کرنا شروع کر دیا ہے، جس کے نتیجے میں کئی سپر مارکیٹس خالی ہو گئی ہیں۔
فلپائن کے جزیرے منڈاناؤ میں رات کے دوران لینڈ سلائیڈنگ سے کئی خاندان ملبے تلے دب گئے، جبکہ امدادی ٹیمیں اب بھی لاپتا افراد کی تلاش میں مصروف ہیں۔
حکام کا کہنا ہے کہ سنیچر اور اتوار کے دوران بھی ملک کے مختلف علاقوں میں درمیانی سے شدید بارشوں کا سلسلہ جاری رہنے کا امکان ہے، جس کے باعث مزید سیلاب اور لینڈ سلائیڈنگ کا خطرہ برقرار ہے۔
،تصویر کا ذریعہGetty Images
ایران کا مفاہمتی یادداشت پر قائم رہنے کا دعویٰ، امریکہ پر اس کی خلاف ورزی کا الزام
،تصویر کا ذریعہGetty Images
ایرانی وزیرِ خارجہ عباس عراقچی نے امریکہ پر مفاہمتی یادداشت کی خلاف ورزی کا الزام عائد کرتے ہوئے دعویٰ کیا ہے کہ ایران اب بھی اس یادداشت پر قائم ہے۔
سنیچر کو ایکس پر اپنے بیان میں ایرانی وزیرِ خارجہ کا کہنا تھا کہ امریکی وزیرِ خزانہ مفاہمتی یادداشت کی شق نو کی خلاف ورزی کر رہے ہیں۔
اُنھوں نے دعویٰ کیا کہ یہ خلاف ورزی امریکہ کی جانب سے دیگر خلاف ورزیوں اور غلطیوں کا تسلسل ہے۔
خیال رہے کہ گذشہ ماہ امریکہ اور ایران کے درمیان طے پانے والی مفاہمتی یادداشت کی شق نمبر نو کے تحت امریکہ ایران کی تیل، پیٹرولیم مصنوعات اور متعلقہ خدمات، جیسے بینکاری لین دین اور نقل و حمل، کی برآمد کے لیے چھوٹ جاری کرے گا اور کوئی نئی پابندی عائد نہیں کرے گا۔
لیکن چند روز قبل ایران کی جانب سے آبنائے ہرمز میں بحری جہازوں پر حملے کے بعد امریکی وزیرِ خزانہ نے ایران کی بعض کرنسی ایکسچینجز اور کمپنیوں پر پابندی عائد کر دی تھی۔
امریکہ کا آبنائے ہرمز میں حملے روکنے اور راستہ کھلا رکھنے کے لیے ایران کو الٹی میٹم: امریکی نیوز ویب سائٹ ایگزیوس کی رپورٹ
،تصویر کا ذریعہGetty Images
امریکی نیوز ویب سائٹ ایگزیوس نے تین امریکی عہدے داروں کے حوالے سے رپورٹ کیا ہے کہ ٹرمپ انتظامیہ نے ایران سے کہا ہے کہ وہ سنیچر تک عوامی سطح پر یہ اعلان کرے کہ آبنائے ہرمز جہاز رانی کے لیے کھلا ہے اور وہ تجارتی جہازوں پر حملے بند کر دے گا۔
عہدیداروں کا کہنا ہے کہ واشنگٹن نے علاقائی ثالثوں کے ذریعے یہ پیغام براہِ راست تہران تک پہنچایا ہے۔ امریکہ کا کہنا ہے کہ تجارتی جہازوں پر حالیہ حملے اُس مفاہمت کی یادداشت کی خلاف ورزی ہیں جس پر تین ہفتے قبل دونوں فریقین نے دستخط کیے تھے، اور اس بحران نے اس نازک معاہدے کو ٹوٹنے کے دہانے پر پہنچا دیا ہے۔
رپورٹ کے مطابق ایرانی وزیر خارجہ عباس عراقچی سنیچر کے روز مسقط میں عمانی وزیر خارجہ بدر البوسعیدی سے ملاقات کریں گے تاکہ آبنائے ہرمز کے بحران اور سمندری تحفظ پر بات چیت کی جا سکے۔
امریکی عہدیداروں کو توقع ہے کہ ملاقات کے بعد ایران حملے روکنے اور جہاز رانی کے راستے کھلے رکھنے کے حوالے سے عوامی بیان جاری کرے گا۔
ایک امریکی عہدیدار نے خبردار کیا ہے کہ اگر ایران نے ایسا اقدام کرنے سے انکار کیا تو اس کے سنگین نتائج برآمد ہوں گے۔
اس کے برعکس ایرانی وزارت خارجہ کے ترجمان اسماعیل بقائی نے کہا کہ تہران نے آبنائے ہرمز میں جہاز رانی کی آمدورفت کو معمول پر لانے کی مخصوص ذمہ داری قبول کر لی ہے اور اس پر عمل درآمد کے لیے عمان کے ساتھ تعاون کرے گا، تاہم امریکہ کے ساتھ مذاکرات کی درخواست کو مسترد کر دیا ہے۔
