'என்னை கைது செய்தாலும் போராட்டம் தொரும்' - அபிஜித் திப்கே இவ்வாறு கூறியது ஏன்?
பட மூலாதாரம், ANI
காக்ரோச் ஜனதா கட்சியின் நிறுவனர் அபிஜித் திப்கே, தான் கைது செய்யப்பட்டாலும் சுதந்திரமான, நியாயமான தேர்தல்களுக்கான போராட்டம் தொடரும் என்று தெரிவித்துள்ளார்.
அபிஜித் திப்கே இன்று (அக்டோபர் 10) காலையில் மும்பையில் இருந்து டெல்லிக்கு புறப்பட்டார். அதற்கு முன்பாக ஊடகங்களிடம் பேசியபோது, போராட்டம் நடத்துவது தனது அடிப்படை உரிமை என்று கூறினார்.
அபிஜித் திப்கே ஏ.என்.ஐ செய்தி முகமையிடம் பேசியபோது, "இந்த நாட்டின் இளைஞர்களையும் மக்களையும் பார்த்து பிரதமர் ஏன் இவ்வளவு அஞ்சுகிறார் என்று எனக்கு ஆச்சரியமாக இருக்கிறது. அனைத்து ரயில் சேவைகளையும் மெட்ரோ நிலையங்களையும் மூட வேண்டிய அவசியம் என்ன? அவர் இணைய சேவையை நிறுத்தியுள்ளார், சாலைகளையும் மறித்துள்ளார்."
"அவர்கள் ஜம்மு-காஷ்மீரில் இருந்து ராணுவத்தைக் கொண்டு வந்து டெல்லியில் நிறுத்தியுள்ளனர். மேலும், நக்சல் பாதிப்புள்ள பகுதிகளில் இருந்து மத்திய ரிசர்வ் பாதுகாப்புப் படையினரையும் அழைத்து வந்து டெல்லியில் அமர்த்தியுள்ளனர். நரேந்திர மோதியும் அமித் ஷாவும் தங்கள் சொந்த நாட்டு மக்களுக்கு எதிராகப் போர் நடத்த விரும்புகிறார்களா? அவர்களுக்கு ஞானேஷ் குமார் இவ்வளவு முக்கியமானவரா? அதற்காக அவர்கள் தங்கள் சொந்த மக்களுக்கு எதிராக காவல்துறையையும் ராணுவத்தையும் பயன்படுத்தத் தயாராக உள்ளனரா?" என்று கேள்வி எழுப்பினார்.
மேலும் அவர், "பிரதமர் மோதி அச்சத்தில் இருக்கிறார். இந்தச் சம்பவத்திற்குப் பிறகு நாட்டு மக்கள் அவருக்கு வாக்களிக்க மாட்டார்கள் என்று அவர் அஞ்சுகிறார். அதனால், ஆட்சியில் நீடிப்பதற்காக மட்டுமே அவர் ரயில்களில் இருந்து மக்களைப் பிடித்து அழைத்துச் செல்கிறார். மக்கள் போராட்டங்களில் பங்கேற்க வேண்டாம் என்று குடியிருப்பு வளாகங்களில் அறிவிப்புகள் வெளியிடப்படுகின்றன."
"டெல்லி காவல்துறை வீடு வீடாகச் சென்று மக்களை போராட்டங்களில் பங்கேற்க வேண்டாமெனக் கூறுகிறது. ஆனால் நாம் ஏன் பங்கேற்கக் கூடாது? போராட்டம் நடத்துவது நம் அடிப்படை உரிமை. அரசமைப்பின் 19வது பிரிவு, ஜனநாயக முறையிலும் அமைதியான வழியிலும் போராட்டம் நடத்தும் அடிப்படை உரிமையை நமக்கு வழங்குகிறது. அதையே நாங்கள் செய்யப் போகிறோம்" என்றார் அபிஜித் திப்கே.
அவரிடம், டெல்லி விமான நிலையத்தை அடைந்ததும் அவர் கைது செய்யப்பட வாய்ப்புள்ளதா என்று கேட்கப்பட்டபோது, "அவர்கள் என்னை காவலில் எடுக்கவோ கைது செய்யவோ விரும்பினால் அதைச் செய்யட்டும். அதற்குத் தயாராக இருக்கிறேன். அதுவொரு பொருட்டல்ல. யு.ஏ.பி.ஏ. சட்டத்தைப் பயன்படுத்தட்டும், தேசிய பாதுகாப்புச் சட்டத்தையும்கூட பயன்படுத்தட்டும். ஆனால் இந்த நாட்டின் ஜனநாயகம்த்தை பாதுகாக்கவும், சுதந்திரமான, நியாயமான தேர்தல்களுக்காகவும் நாங்கள் தொடர்ந்து போராடுவோம்" என்று பதிலளித்தார்.
இதற்கிடையில், ஜந்தர் மந்தர் மற்றும் அதன் சுற்றுப்புறப் பகுதிகளில் டெல்லி காவல்துறை மற்றும் பாதுகாப்புப் படையினரின் நிறுத்தம் அதிகரிக்கப்பட்டுள்ளது. போராட்டக்காரர்களைத் தடுக்க தடுப்புகள் அமைக்கப்பட்டுள்ளன.
பட மூலாதாரம், EPA/Shutterstock
தடுப்புக் காவலில் வைக்கப்பட்ட துருவ் ரத்தீ
காக்ரோச் ஜனதா கட்சி போராட்டத்துக்கு அழைப்பு விடுத்துள்ள நிலையில், பிரபல யூட்யூபர் துருவ் ரத்தீ சனிக்கிழமை காலை காவல்துறையால் தடுப்புக் காவலில் வைக்கப்பட்டுள்ளார்.
பிபிசி செய்தியாளர் தில்நவாஸ் பாஷா அளித்த தகவலின்படி, துருவ் ரத்தீயின் நெருங்கிய நண்பரும் குருகிராம் காவல்துறையும் அவர் தடுப்புக் காவலில் வைக்கப்பட்டுள்ளதை உறுதி செய்துள்ளனர். துருவ் ரத்தீ குருகிராமின் செக்டார் 56 பகுதியில் இருந்து காவல்துறையால் அழைத்துச் செல்லப்பட்டதாக அவரது நெருங்கிய நண்பர் தெரிவித்தார்.
முன்னதாக, வெள்ளிக்கிழமை இரவு, துருவ் ரத்தீ சமூக ஊடகங்களில் ஒரு ரீலை பதிவிட்டார். அந்த வீடியோவில் அவர் இந்தியா கேட் முன்பாக நடந்து செல்வது தெரிந்தது. அந்தக் காணொளியில், துருவ் ரத்தீ, "நான் டெல்லிக்கு வந்துவிட்டேன். பிரதமர் 50க்கும் மேற்பட்ட மெட்ரோ நிலையங்களை மூடியிருப்பதையும், பல ரயில்கள் மற்றும் பேருந்துகள் ரத்து செய்யப்பட்டிருப்பதையும் பார்த்தேன். போராட்டங்கள் காரணமாக அவர்கள் டெல்லியை முடக்கி வைத்துள்ளார்கள்" என்று கூறினார்.
"மோதி ஜி என்ன செய்கிறார் என்று எனக்குப் புரியவில்லை. ஒருபுறம், போராட்டத்திற்கு மக்கள் கூட்டம் வராது என்று உங்கள் தகவல் தொழில்நுட்பப் பிரிவு கூறுகிறது. மக்கள் கூட்டம் வராது என்றால், பிறகு ஏன் இதையெல்லாம் செய்கிறீர்கள்? நீங்கள் பயப்படுகிறீர்கள் என்று நினைக்கிறேன். உண்மையில், ஒட்டுமொத்த மக்களும் விழித்துக் கொண்டுள்ளனர்" என்றும் அவர் தெரிவித்தார்.
இதற்கிடையே, ஆர்ப்பாட்டத்தில் கலந்துகொள்வதற்காக திரண்டிருந்த பல போராட்டக்காரர்களை டெல்லி காவல்துறை தடுப்புக் காவலில் வைத்துள்ளது.
பட மூலாதாரம், Sandeep Yadav/BBC
டெல்லி: மெட்ரோ ரயில் நிலையங்களை மூடியதற்கு எதிராக உச்ச நீதிமன்றத்தில் நீதிமன்ற அவமதிப்பு மனு
டெல்லியில் பல மெட்ரோ ரயில் நிலையங்கள் மூடப்பட்டதற்கும், ரயில் சேவைகள் ரத்து செய்யப்பட்டதற்கும் எதிராக உச்ச நீதிமன்றத்தில் நீதிமன்ற அவமதிப்பு மனு தாக்கல் செய்யப்பட்டுள்ளது. போக்குவரத்து சேவைகளை முழுமையாக நிறுத்தக்கூடாது என்ற உச்ச நீதிமன்றத்தின் உத்தரவை அதிகாரிகள் மீறியுள்ளதாக அந்த மனுவில் குற்றம் சாட்டப்பட்டுள்ளது.
லைவ் லா வெளியிட்டுள்ள தகவலின்படி, மத்திய உள்துறை அமைச்சக செயலர் கோவிந்த் மோகன், டெல்லி காவல் ஆணையர் அனுராக் குமார், டெல்லி மெட்ரோ ரயில் கழகத்தின் தலைவர் டி. தாரா ஆகியோருக்கு எதிராக இந்த நீதிமன்ற அவமதிப்பு மனு தாக்கல் செய்யப்பட்டுள்ளது.
நியாயமான காரணங்கள் இன்றி ரயில் சேவைகள் ரத்து செய்யப்படுவதாகவும், பல மெட்ரோ ரயில் நிலையங்கள் மூடப்பட்டு இருப்பதாகவும் மனுதாரர் குற்றம் சாட்டியுள்ளார். நீதிமன்றத்தின் உத்தரவுகளை அதிகாரிகள் பின்பற்றத் தவறியதால், டெல்லியில் இயல்பு வாழ்க்கை கடுமையாகப் பாதிக்கப்பட்டு இருப்பதாகவும் மனுவில் தெரிவிக்கப்பட்டுள்ளது.
முன்னதாக, காக்ரோச் ஜனதா கட்சி போராட்டத்தைக் கருத்தில் கொண்டு டெல்லி மெட்ரோ மற்றும் ரயில் சேவைகளுக்குத் தடை விதிக்கும் முடிவை மறுபரிசீலனை செய்யுமாறு மத்திய அரசுக்கும் டெல்லி காவல்துறைக்கும் உச்ச நீதிமன்றம் வெள்ளிக்கிழமை உத்தரவிட்டிருந்தது குறிப்பிடத்தக்கது.
- இது, பிபிசிக்காக கலெக்டிவ் நியூஸ்ரூம் வெளியீடு
