Iran waxay sheegtay inay mas’uul ka noqon doonto Hormuz, Putin-na wuxuu yiri waxaan ka shaqaynayaa danaha Tehran iyo gobolka

Tebin toos ah

1. 28 Abriil 2026War deg deg ah, Aqalka Cad oo lagu lafa-guray qorshaha Iiraan ee Hormuz

   Afhayeenka Aqalka Cad ee dalka Mareykanka Carolyn Levitt, ayaa la waydiiyay in madaxweynaha Mareykanka uu aqbali doono dalabka Iiraan ee ku saabsan in la is-dhaafsado furitaanka Marinka Hormuz iyo shuruudaha ay wataan, afhayeenka Aqalka Cad Carolyn Levitt ayaa tiri:“Waxaan xaqiijin karaa in madaxweynuhu uu la kulmay kooxda amniga qaranka subaxnimadii maanta.

   Kulankaas wuu sii socon karaa. Si dhab ah uma sheegi karo, balse dalabkaas weli waa la tixgelinayaa. Levitt waxay carrabka ku adkaysay in qadka casaanka ah ee Donald Trump ee ku saabsan Iiraan ay si cad ugu sheegeen shacabka Mareykanka iyo sidoo kale dowladda Iiraan.

   Afhayeenka Aqalka Cad waxay hadalkeeda ku soo gabagabeysay in Madaxweynaha Mareykanka uu si dhow oo shakhsi ah uga hadli doono arrintan.

2. 28 Abriil 2026War deg deg ah, Mareykanka oo is waydiinaya hoggaamiyaha cusub ee Iiraan

   Wareysi uu siiyay Fox News, Xoghayaha Arrimaha Dibadda ee Mareykanka Marco Rubio ayuu kaga hadlay xiisadda ka jirta qaab-dhismeedka awoodda Iran iyo sida ay “u hor istaagto horumarka nabadda Bariga Dhexe,” isagoo intaas ku daray: “Waa nasiib darro, Iran gudaheeda waxaa awoodda dowladda haysta kooxo xagjir ah oo leh aragti mustaqbal oo aad u adag .”

   Mr. Rubio ayaa sidoo kale sheegay: “Hadda Iran waxay leedahay hoggaamiye awooddiisa aan weli la tijaabin, saameyntiisuna ay su’aal ka taagan tahay, kaas oo aan fagaare lagu arkin isla markaana aan hadal ka jeedin . Ma aanan maqal codkiisa.”

3. 28 Abriil 2026War deg deg ah, Degdeg: Israa'iil oo sheegtay in ay duqeysay xaruumo badan oo ku yaalla Lubnaan

   Ciidanka Israa’iil ayaa ku dhawaaqay inay duqeymo ka fuliyeen Dooxada Bekaa iyo dhowr goobood oo kale oo ku yaalla koonfurta Lubnaan, iyagoo sheegay inay beegsadeen in ka badan 20 gxaruumood oo ay ku yaalleen kaabayaal milatari oo ay leedahay Xisbullaah.

   Afhayeenka ciidamada Israa’iil, Avichay Adraee, ayaa war-saxaafadeed uu soo saaray ku sheegay in ciidanku ay beegsadeen bakhaarro lagu kaydiyo qalabka dagaalka iyo goobaha laga rido gantaallada ee Dooxada Bekaa. Waxa kale oo uu sheegay in la duqeeyay goob lagu sameeyo hub iyo meelo lagu keydiyo qalab militari, taas oo uu sheegay in dhawaan laga arkay dhaqdhaqaaq dib-u-habeyn ah.

4. 28 Abriil 2026Afghanistan iyo Pakistan oo dagaal dhexmaray

   Warar ka imaanaya gobolka Kunar ee bariga Afgaanistaan ayaa sheegaya in ugu yaraan saddex qof la dilay, halka konton kale ay dhaawacmeen kadib duqeyn cirka ah oo la sheegay in ay fuliyeen ciidamada Pakistan.

   Dadka dhaawacmay waxaa ka mid ahaa arday ka tirsan Jaamacadda Kunar iyo sidoo kale macallin.

   Muuqaal loo soo diray BBC ayaa muujinaya burburka dhismayaal ka tirsan jaamacadda.Ilaa hadda, mas’uuliyiinta Pakistan kama aysan jawaabin eedeymahan.

   Dhowr iyo tobaneeyo qof ayaa horey u dhintay, halka boqollaal kalena ay dhaawacmeen kadib iska horimaadyo xuduudeed oo toddobaadyadii u dambeeyay ka dhex socday labada dal ee dariska ah.

5. 28 Abriil 2026War deg deg ah, Degdeg: Madaxweynihii Mali iyo mas'uuliyiin kale oo la la'yahay

   Madaxii dowladda milatariga ee dalka Mali iyo qaar ka mid ah taliyeyaasha ugu sarreeya dalkaas ayaan wax war ah laga maqal tan iyo weerarradii ay fuliyeen kooxda Al-Qaacida iyo kooxda gooni u goosadka ah oo ka dhacay dalkaas.

   Tani waxay dhalisay warar sheegaya in madaxweynaha la dhaawacay, ama laga yaabo in laga saaray dalka.

   Waxa kale oo jira warar ku saabsan loollan awoodeed oo dalka ka dhex jira, iyadoo la rumeysan yahay in la isku dayayo in lagu beddelo General Malick Diaw oo laga dhigo madaxweyne ku meel-gaar ah , sida uu sheegay wargeyska madaxa-bannaan ee Nouvel Horizon.

   Ururka Jamaat Nusrat al-Islam wal-Muslimin, ayaa hoggaamiyay weerarro lagu qaaday saldhigyo milatari oo ku yaal Bamako, kuwaas oo lagu dilay wasiirkii difaaca dalka, t General Sadio Camara.

   Mas'uuliyiinta aan war iyo wacaal laga hayn waxaa ka mid ah Madaxweynaha, General Assimi Goïta, La-taliyaha Amniga Madaxweynaha, General Modibo Kone, Wasiirka SAmniga, General Ismael Wagué, iyo kuwo kale.

6. 28 Abriil 2026War cusub oo ka soo kordhay xaaladda dalka Mali

   Wararka ka imanaya dalka Mali ayaa sheegaya in ciidamada dalkaas ay ka baxayaan magaalada Tessit ee waqooyi-bari, iyadoo kooxaha fallaagada ay sii xoojinayaan weerarradooda kadib hawlgal cusub oo ay bilaabeen dhammaadka toddobaadkii aan soo dhaafnay.

   Sida uu sheegay wariyaha BBC, waqooyiga magaalada Kidal iyo koonfurta gobolkaas ayaa ah meelaha ay si aad ah uga firfircoon yihiin kooxaha xagjirka ah ee ka hawlgala dalka Mali.

   Koox xiriir la leh Al-Qaacida ayaa sheegtay inay u oggolaatay askarta inay hubkooda dhigaan isla markaana si nabad ah uga baxaan aaggaas.

   Arrintan ayaa timid kadib markii ay sidoo kale ka baxeen magaalada Kidal ee waqooyiga dalka Mali ciidamo calooshood u shaqeystayaal Ruush ah oo ka hawlgali jiray Afrika, kuwaas oo la socday ciidamada Mali.

   Magaaladan Kidal waxaa ciidamada Mali ay qabsadeen saddex sano ka hor, iyagoo markaas taageero ka helayay Ruushka.

   Dowladda militariga ee Mali weli si rasmi ah ugama aysan hadlin dhacdooyinkan.

7. 27 Abriil 2026War deg deg ah, Trump oo tallaabo cusub oo Iiraan ku saabsan qaaday

   Madaxweynaha Maraykanka Donald Trump ayaa Isniintii isugu yeeray la-taliyeyaashiisa sare ee amniga qaranka si ay uga wada hadlaan xog dhanka Iiraan laga soo weriyay oo sheegaysa in inay waddo qorshe lagu furayo Marinka Hormuz, xilli wada-hadallada ku saabsan xabbad-joojin iyo dib u bilaabidda maraakiibta maraya marin-biyoodkaas ay hakad galeen.

   Marka laga jawaabay su’aal ku saabsan soo jeedintaas oo la sheegay inay shuruud uga dhigeen in Maraykanku ka qaado xannibaadda dekedaha Iran si beddelkeeda loo furo marinka,.

   Afhayeenadda Aqalka Cad, Karoline Leavitt, ayaa shir jaraa’id ku sheegtay in “soo jeedintaasi ay weli ku jirto xaalad wada-hadal ah.”

   Waxay intaa ku dartay in “marka la xaqiijiyo wararka, waxaan xaqiijin karaa in madaxweynuhu uu saaka la kulmay kooxdiisa amniga qaranka,” iyada oo aan faahfaahin ka bixin in Trump uu aqbali doono soo jeedintaas iyo in kale.

   Wasiirka Arrimaha Dibadda ee Maraykanka, Marco Rubio, ayaa sheegay in mowqifka Iran ee ku aaddan marinka Hormuz, oo sida caadiga ah ay maraan qiyaastii shan meelood meel saliidda iyo gaaska dabiiciga ee dunida, uusan waafaqsanayn dalabaadka Maraykanka.

8. 27 Abriil 2026War deg deg ah, Jarmalka oo madaxda Iiraan ugu yeeray kuwa "ceebeynaya Mareykanka"

   Ra’iisul Wasaaraha Jarmalka, Friedrich Merz, ayaa sheegay in hoggaanka Iran uu “ceebaynayo” Mareykanka, isagoo ku eedeeyay inay ergadooda u direen Pakistan kadibna ay ka soo laabteen iyagoo aan wax natiijo ah ka keenin.

   Wuxuu intaa ku daray in “Iraniyiintu ay yihiin khubaro ku xeel-dheer wada-hadallada.”

   Merz wuxuu sidoo kale sheegay inuusan “arkayn wax qorshe ah oo Mareykanka uu ka leeyhaya xaaladda hadda jirta.”

   Dhanka kale, Wasiirka Arrimaha Dibadda ee Iran, Cabbaas Caraqji, ayaa kula kulmay Madaxweynaha Ruushka Vladimir Putin magaalada St. Petersburg, isagoo u xaqiijiyay in xiriirka Ruushka iyo Iran uu sii xoogeysan doono, kuna tilmaamay inuu yahay “iskaashi istiraatiiji ah oo heerkiisu aad u sarreeyo.”

9. 27 Abriil 2026Faransiiska oo canaan u diray Iiraan, Mareykanka iyo Israa'iil

   Wasiirka Arrimaha Dibadda ee Faransiiska, Jean-Noël Barrot, ayaa Isniintii sheegay in Iran ay tahay inay muujiso rabitaan ay ku sameyso tanaasulaad waaweyn inta lagu jiro wadahadallada ay la leedahay Mareykanka, si loo soo afjaro dagaalka ka socda gobolka.

   Intii uu khudbad ka jeedinayay Golaha Ammaanka ee Qaramada Midoobay, Barrot wuxuu adkeeyay in “xal waara oo lagu gaaro xiisadda aysan suurtagal noqon karin ilaa Tehran ay ogolaato inay sameyso tanaasulaad muhiim ah oo ay la socoto ballanqaadyo la taaban karo.”

   Wuxuu intaa ku daray in “Iran ay tahay inay qaadato hab horseedaya wada-noolaansho nabadeed oo u uku jiro deegaanka ay ku noolyihiin iyo guudahaan gobolka, taasoo u oggolaanaysa shacabka Iran fursad ay si xor ah ugu dhistaan mustaqbalkooda.”

   Barrot sidoo kale wuxuu dhaleeceeyay Mareykanka iyo Israa’iil, isagoo sheegay inay dagaal ku qaadeen Iran “iyagoo aan lahayn ujeeddooyin cad oo ka baxsan qaabka sharciga caalamiga ah,” balse isla markaana wuxuu mas’uuliyadda ugu weyn ku eedeeyay “nidaamka Iran” sababo la xiriira barnaamijyadeeda nukliyeerka iyo gantaallada.

   Tani waxay timid intii lagu guda jiray kulan ay codsatay Bahrain, halkaas oo dalal badan ay ku baaqeen in Iran ay dib u furto Marinka Hormuz.

10. 27 Abriil 2026Shil diyaaradeed oo ka dhacay Koonfurta Suudaan iyo faahfaahin ka soo baxaysa

    Diyaarad yar oo nooca rakaabka qaada ah ayaa ku burburtay dalka Koonfurta Suudaan, waxaana ku dhintay dhammaan dadkii saarnaa, sida ay sheegtay hay'adda duulista hawada ee dalkaas.

    Saraakiishu waxay koox u direen goobta shilku ka dhacay si ay baaritaanno ugu sameeyaan, balse warbixinadii ugu horeeyay waxay sheegayaan in diyaaradda laga yaabo inay u soo dhacday "xaalad cimilo xumo awgeed.

    Diyaaradda ayaa ku burburtay meel qiyaastii 20km koonfur-galbeed ka xigta magaalada caasimadda ah ee Juba, saaka oo Isniin ahayd. Waxay ka soo duushay Yei 09:15 wakhtiga maxaliga ah, maamulka hawadana waxa uu lumay xidhiidhkii ilaa 30 daqiiqo markii ay hawada ku jirtay.

    Sida ku qoran liiska rakaabka, saarnaa waxaa ay ahaayen 15- qof , duuliyaha iyo 14 rakaab ahaa, waxaa ka mid ahaa 13 u dhashay Koonfurta Suudaan iyo laba Kenyan ah.

    In ka badan 55 diyaaradood ayaa ku burburay dalka, taasoo sababtay dhimasho badan, tobankii sano ee ka dib xornimadii uu qaatay dalkaan sanadkii 2011-kii.

    Shilalka mararka qaarkood waxaa sabab u ahaa diyaarad duug ah iyo dhowris la'aanta sharciga . Culayska xad-dhaafka ah, cimilo-xumada iyo khaladaadka duuliyeyaasha ayaa sidoo kale lloo tiiriyaa shialalka mararka qaar dhaca.

    Si aad u akhrido sheekooyin kale:

    Ayraboorrada ugu wanaagsan dunida iyo sirta ka dambaysa guushooda

    Warar dheeraad ah oo ka soo kordhay markabka shidaalka qaada ee gacanta ugu jira burcad badeedda Soomaalida

    Maraykanka oo qorsheynaya in uu cunaqabteynta ka qaado Eritrea xiriirna la yeesho

11. 27 Abriil 2026War deg deg ah, Netanyahu oo isna hanjabay iyo tallaabada uu qaadayo

    Ra’iisul Wasaaraha Israa’iil Benjamin Netanyahu ayaa maanta sheegay in gantaallada iyo diyaaradaha aan duuliyaha lahayn ee ay Xisbullah ku soo weerartay Israa’iil iyo ciidamadeeda ku sugan koonfurta Lubnaan ay u baahan yihiin tallaabo milatari oo dheeraad ah.

    War-saxaafadeed ka soo baxay xafiiskiisa ayaa lagu sheegay in Netanyahu uu tilmaamay “laba khatarood oo waaweyn oo ka imanaya Xisbullah: gantaallo 122mm ah iyo diyaarado aan duuliye lahayn. Arrintani waxay u baahan tahay isku-dar hawlo hawlgal iyo farsamo ah” ayuu yiri.

12. 27 Abriil 2026War deg deg ah, Israa'iil oo ku dhawaaqday in sanadkaan uu noqon doono "sanad colaadeed"

    Taliyaha guud ee ciidanka Israa’iil, Eyal Zamir, ayaa maanta sheegay in “sanadkan 2026 ay u badan tahay inuu noqdo sanad dagaallo ay ka dhacaan jihooyin kala duwan.”

    War ka soo baxay milatariga ayaa lagu sheegay in Zamir uu kulanka saraakiisha ka yiri: “Tan iyo 7-da Oktoobar 2023, ciidanku wuxuu ku jiray hawlgal joogto ah oo ka socda dhowr jiho.

    Waxaanu diyaar u nahay oo feejignaan ugu jirnaa suurtagalnimada in dagaallo culus ay dib uga qarxaan dhammaan jihooyinkaas.” Wuxuu intaas ku daray, “2026 waxay noqon kartaa sanad dagaal ka dhaca meel kasta.”

13. 27 Abriil 2026War deg deg ah, Haddii lagu heli dembiga lagu soo oogay ninkaan maxaa dhacaya?

    Garsoorka Maraykanka ayaa dacwad ku soo oogay ninkii hubaysnaa ee isku dayay inuu weeraro cashadii Ururka Saxafiyiinta Aqalka Cad, isaga oo lagu eedeeyay isku day dilka madaxweyne Donald Trump, iyo laba eed oo kale oo la xiriira hub.

    Cole Thomas Allen, oo 31 jir ah, waxa uu wajahayaa xabsi daa’in haddii lagu helo dambiga isku dayga dilka madaxweynaha intii lagu guda jiray casho Sabtidii lagu qabtay hoteel ku yaalla Washington.

14. 27 Abriil 2026War deg deg ah, Eedaymaha loo haysto oo hadda la shaaciyay ninkii weeraray goobtii Trump ku sugnaa

    Garsooruhu waxa uu akhriyey dhammaan eedeymaha lagu soo oogay Allen.

    Kuwaas waa:

    • Isku day dilka Madaxweynaha Maraykanka
    • Isticmaalka hub inta lagu guda jiro fal dembiyeed rabshad leh
    • Qaadista hub gobol ilaa gobol iyada oo ujeedadu tahay in lagu fuliyo dembi culus.

15. 27 Abriil 2026War deg deg ah, Degdeg: Aqalka Cad oo shaaciyay cidda ay ku tuhmayaan weerarlkii dhawaan la rabay in lagu beegsado Trump. Hoos ka akhri

    Aqalka Cad ee Mareykanka ayaa ku eedeeyay waxa ay ugu yeertay “koox naceyb aaminsan oo bidix u janjeerta” inay ka dambeysay rasaastii dhacday intii lagu guda jiray cashadii Ururka Saxafiyiinta oo uu ka qeyb galay Madaxweyne Donald Trump.

    Afhayeenka Aqalka Cad, Caroline Leavitt, ayaa shir jaraa’id ku sheegtay in “kooxda naceybku biyo dhigay ee bidixda ee ka soo horjeeda madaxweynaha iyo dhammaan kuwa taageera ama u shaqeeya ay dhaawaceen oo dileen dad badan, ayna ku dhowaadeen inay mar kale sidaas sameeyaan dhammaadkii toddobaadka.”

    Ninkii hubeysnaa ee isku dayay inuu gudaha u galo goobtii cashada Ururka Saxafiyiinta ee ka dhacaysay hoteel ku yaalla Washington ayaa hadda maxkamad la soo taagayaa.

    Aqalka Cad ayaa Axaddii ku dhawaaqay in tuhmanaha, oo warbaahinta Mareykanka ku magacowday Cole Thomas Allen, 31 jir ah, uu qorsheynayay inuu dilo Trump iyo saraakiil sare oo ka tirsan maamulkiisa intii lagu guda jiray cashada sanadlaha ah ee Sabtidii la qabtay.

16. 27 Abriil 2026Baxrayn oo 69 qof dhalashada kala laabatay sababahan owgeed

    Wasaaradda Arrimaha Gudaha ee dalka Baxrayn ayaa ku dhawaaqday inay dhalashada kala laabatay 69 qof, kuwaas oo dhammaantood asal ahaan aan u dhalan Baxrayn, sababo la xiriira inay muujiyeen "taageero loo samaynayo falalka gardarrada ah ee Iiraan, ama inay u basaasayeen hay'ado shisheeye," ama sababtoo ah inay ka dhasheen qoysaska dadka falalkaas ku kacay.

    Bayaan ka soo baxay wasaaradda ayaa lagu sharraxay in tallaabadani ay qayb ka tahay hirgelinta wax ay ugu yeertay awaamiir ka timid Boqor Hamad bin Isa Al Khalifa, oo ah "in la qaado tallaabooyinka lagama maarmaanka ah ee ka dhanka ah kuwa ku dhiirraday inay khiyaanaan dalka, ama wax u dhima ka bixitaanka ammaankiisa iyo xasiloonidiisa, iyo in dib u eegis lagu sameeyo cidda u qalanta dhalashada Baxrayn iyo cidda aan u qalmin," sida qoraalka lagu sheegay.

    Bayaanka ayaa sidoo kale tilmaamay in tallaabadan ay saldhig u tahay qoraalka Qodobka 10/3 ee Sharciga Dhalashada Baxrayn, kaas oo dhigaya in dhalashada lagala laaban karo qofka, "haddii ay dhacdo in waxyeello loo geysto danaha Boqortooyada ama haddii loo dhaqmo si ka horimanaysa waajibka daacadnimada ee dalka lagu leeyahay."

17. 27 Abriil 2026Muxuu ahaa kaftan ay ka xanaaqday xaaska Trump ee uu sameeyey maajilaystahan

    Marwada kowaad ee Maraykanka Melania Trump ayaa dhaleeceysay barnaamij daadihiyaha ahna maajilayste immy Kimmel kadib kaftan uu ku sheegay inay tahay “haweeney sugaysa inay noqoto carmal”, maalmo yar ka hor dhacdo toogasho ah oo ka dhacday cashadii Wariyeyaasha Aqalka Cad oo ay iyadu la joogtay madaxweynaha.

    Marwada koowaad waxay hadallada Kimmel ku tilmaantay “nacayb iyo rabshad kicin”, waxayna ka codsatay telefishanka ABC inuu tallaabo ka qaado “dhaqankiisa aadka u xun”.

    Nin hubeysan ayaa rasaas furay la maqlay iyadoo cashada loo fadhiyey Sabtidii, weerar ay masuuliyiintu sheegeen inuu bartilmaameedsan karo xubno ka tirsan maamulka Trump. Kaftankaas waxaa la sii daayay Khamiistii, iyadoo Kimmel uu si majaajillo ah uga hadlayay cashada ka hor dhacdada.

    “Marwadayada koowaad, Melania, waa joogtaa. Eeg Melania, aad bay u qurux badan tahay. Mrs Trump, waxaad leedahay iftiin u eg haweeney sugaysa inay noqoto carmal,” ayuu yiri Kimmel.

    Qoraal ay ku daabacday barta X Isniintii, Melania Trump waxay sheegtay in “dadka sida Kimmel oo kale ah aysan ahayn inay fursad u helaan inay guryaha ka daawanao fiid kasta si ay u faafiyaan nacayb”, waxayna ku boorrisay ABC inay “tallaabo qaado”.

    “Hadalkiisa ku saabsan qoyskayga ma aha majaajillo, waa hadallo dhaawacaya oo sii xoojinaya xanuunka siyaasadeed ee gudaha Ameerika,” ayay tiri. “Imisa jeer ayay hoggaanka ABC u oggolaanayaan dhaqankiisa xun iyagoo ku khasaarinaya bulshada?”

    Warbaahinta BBC ayaa la xiriirtay ABC si ay uga hesho faallo.

18. 27 Abriil 2026Agaasimaha FBI-da Maraykanka oo war la yaab leh soo saaray ka dib dhacdadii weerarka

    Agaasimaha FBI-da, Kash Patel, ayaa sheegay "inay si weyn u diyaargaroobi doonaan" ka qaybgalka Donald Trump ee cashada weriyayaasha (correspondents' dinner) ee dhici doonta 30-ka maalmood ee soo socda.

    Wuxuu u sheegay Fox News: "Hannaanka amniga, waxaan u malaynayaa, inuu noqon doono mid gabi ahaanba ka duwan sidii hore.

    "Waxaan la shaqayn doonaa Aqalka Cad, Waaxda Amniga Gudaha, Ciidanka Ilaalada Gaarka ah (Secret Service), iyo Waaxda Booliska ee Metropolitan-ka. FBI-du waxay heli doontaa agab iyo cudud dhamaystiran munaasabaddaas dartiis."

    Isagoo ka hadlayay shaqada FBI-da ee ka dambaysay dhacdadii toogashada, Patel wuxuu sheegay in xafiisku uu wareysiyo ka sameeyay "macno ahaan dalka oo dhan," isla markaana ay qaadeen caddeymo si degdeg ah loo falanqeeyo.

19. 27 Abriil 2026Xog dheeri ah oo laga helay halka ay ku xiran yihiin laba markab oo ciidamada Iiran qabsadeen

    Sawirro dayax-gacmeedka lagu qaaday oo ay aragtay qaybta BBC Verify, ayaa muujinaya in labadii markab ee toddobaadkii hore ay qabteen Ciidanka Ilaalada Kacaanka Islaamiga ah ee Iiraan (IRGC), ay hadda ku xiran yihiin meel ka baxsan jasiiradda Hormuz.

    Sawirro maanta la soo qaaday ayaa muujinaya maraakiibta — MSC-Francesca iyo Epaminondas — oo ku xiran masaafo qiyaastii 8 km (5 mayl) u jirta jasiiradda ku taal Marinka Hormuz.

    Labada markabba waxaa la sheegay inay rasaas kala kulmeen ciidamada IRGC Arbacadii la soo dhaafay, waxaana la sheegay inuu gaaray khasaare. Muuqaallo muujinaya xubno ka tirsan IRGC oo dusha uga baxaya labada markab ayaa toddobaadkii hore laga baahiyay warbaahinta qaranka Iiraan in kasta oo falanqayn ay samaysay BBC Verify ay muujinayso in qaybo ka mid ah muuqaalkaas la duubay ka dib markii maraakiibta la qabtay.

    Taliska Ciidanka Badda ee IRGC ayaa toddobaadkii hore sheegay in markabka Epaminondas oo laga leeyahay dalka Giriigga iyo markabka MSC-Francesca oo sita calanka Panama la qabtay ka dib markii ay "halis geliyeen" ammaanka marinnada badda, iyagoo "ku shaqaynayay fasax la'aan, isla markaana faragelin ku sameeyay nidaamyada hagidda badda."

20. 27 Abriil 2026War cusub oo ka soo yeeray wasiirka arrimaha dibadda Iiraan oo dhinac taagnaa Putin

    Waxaan hadda helaynaa faahfaahin dheeraad ah oo ku saabsan booqashada Wasiirka Arrimaha Dibadda ee Iiraan, Abbas Araghchi, uu ku joogo dalka Ruushka.

    Araghchi oo kula hadlayay weriyayaasha magaalada St. Petersburg, ayaa sheegay in Iiraan ay "hor istaagtay quwadda ugu weyn adduunka [Maraykanka]," isagoo raaciyay in Washington aysan "gaarin mid ka mid ah ujeeddooyinkoodii."

    "Taas ayaa keentay inay codsadaan wadahadallo, annaguna hadda waan ka fiirsanaynaa," ayuu hadalkiisa ku daray. Ilaa hadda wax war ah kama soo bixin dhanka Washington.

    Diblomaasiga ugu sarreeya Iiraan ayaa sheegay in dagaalku uu muujiyay in Iiraan ay "leedahay saaxiibbo iyo xulafo waaweyn sida Ruushka," isagoo u mahadceliyay Kremlin-ka taageeradooda.