Nigeria evacuate Ebola patient to Switzerland afta govment release 10billion naira emergency funding

Nigeria don evacuate Ebola patient wey be di first confirmed case since ova a decade.

Dem evacuate di patient to Switzerland through air ambulance.

Nigeria health minister Ali Pate say kontri only case of Ebola virus dey evacuated to Switzerland along wit her husband by air ambulance on Monday.

Dis na afta Nigeria govment don release ₦10bn ($6.7m) in emergency funding to support laboratory testing, purchase protective equipment, mobilise health workers and strengthen oda containment measures, afta di kontri confam one case of Ebola virus.

Di 42-year old Ugandan-born wife of Swiss diplomat dey declared Nigeria first case of di virus last Tuesday.

Di health minister say di patient dey clinically improved, stable, conscious, communicating, and her clinical laboratory test results closing towards baseline.

"Dis no mean she no still dey infectious, hence di strict protocols in place.", Pate add

Di patient husband remain asymptomatic according to health officials.

"I confam say, wit my approval, earlier dis morning, di index case for Nigeria first imported Ebola virus disease depart Abuja for Switzerland.", Ali Pate tok for post on X.

Di health minister say officials go provide details about di patient and her husband later today.

Wetin state govments dey do to curb Ebola for Nigeria

Lagos state: Govnment say di state dey on high alert. Di state commissioner for health Prof Akin Abayomi highlight seven preparatory measures dem don put in place, wey include upgrade of isolate centres for di state, screening at aiports plus oda points of entry, simulation, laboratory testing among odas.

E add say retraining of health workers across public and private facilities on infection prevention and control don start.

"One dedicated Ebola Research Committee don dey review di latest evidence on treatment and vaccines to guide our decisions," Abayomi tok.

Delta state: Di state commissioner for health, Joseph Onojaeme say di ministry of health dey strengthen surveillance at entry points, health facilities and within communities, while prioritising regular training for frontline health workers, public awareness campaigns plus di provision of essential medical supplies to support emergency response efforts.

Na on 20 October, di kontri health minister announce say Nigeria govment don confam one case of Ebola virus for di Federal Capital Territory (FCT) and na for di body of ome woman wey recently land Nigeria from Uganda.

Di 42-year-old woman na di wife of one Swiss diplomat.

Di case wey involve di Bundibugyo strain, one rare form of Ebola virus disease wey don affect some African countries.

Health officials dey investigate weda Nigeria first case bin cross paths wit Kenya first patient. Believe dey say both of dem travel through Uganda Entebbe International Airport earlier dis month.

Ebola na one severe and often fatal disease. E dey spread through direct contact wit di blood or oda bodily fluids of infected person, or through contaminated materials. E no dey spread through di air.

Prof Pate don ask Nigerians to remain calm but vigilant, follow public health guidance and immediately report symptoms or suspected exposure to health authorities.

"We need Nigerians to cooperate wit health workers, observe di recommended public health protocols at home and for public places, and seek medical attention if dem develop symptoms or believe say dem fit don dey exposed," e tok.

However, di imported infection don bring back concerns about public health preparedness for kontri of more dan 200 million pipo, particularly for densely populated urban communities wia poor sanitation and limited access to healthcare fit increase vulnerability in case di virus spread.

Signs and symptoms of Ebola

Ebola na rare but deadly disease wey virus dey cause.

Ebola viruses normally dey infect animals, typically fruit bats, but outbreaks among humans dey sometimes start wen pipo eat or handle infected animals.

E dey take two to 21 days for symptoms to appear. E dey come suddenly and start like flu or malaria, wit fever, headache and tiredness.

Di symptoms include:

As di disease progress, di pesin go start to dey vomit and develop diarrhoea and e fit lead to organ failure. Some, no be all, patients dey develop internal and external bleeding.

Di virus dey spread from one pesin to anoda by contact wit infected bodily fluids like blood or vomit.

How to prevent Ebola virus

Di Ebola outbreak on record na for 2014 for West Africa wit ova 11,000 pipo wey die. Dat epidemic kill five times more dan all oda known Ebola outbreaks wey don happun.

Di current Ebola outbreak for di Democratic Republic of Congo now na di deadliest of di 17 outbreaks di kontri don face and e don continue to spread.

Now, how you fit keep yourself safe and prevent di virus:

- Wash your hands evri time wit soap and water - Health pipo say make we wash hands wit soap and water and clean surfaces wit chlorinated water.

- No dey touch pipo wey don dey infected - To prevent more of di infection, health professionals advise make pipo avoid contact wit pipo wey dey infected, including for dem to stop to shake hands.

- Avoid dead bodies.

- No dey kill, touch or chop bush meat.

E get vaccine for di Zaire strain of Ebola, wey dey common for di past for Democratic Republic of Congo. And currently no approved vaccine dey for di Sudan strain of Ebola.

Howeva, early treatment of specific symptoms, fit improve survival of di pesin wey get am.

For medical teams, dem must wear full Personal Protective Equipment, PPE, wen dem dey attend to cases to prevent infection. Deadi bodi dem, for any body bag, must dey buried by pipo wey dey wear proper PPE.

Why Ebola dey always come back

Ebola dey quick spread. Small sweat or spit from pesin or animal wey get di disease fit infect pesin.

According to di WHO, new Ebola outbreak go ever dey happun for Dr Congo because di virus dey live for animal reservoir wey dey for many parts of di kontri.

Fruit bats na di main carrier of di disease, but pipo fit dey infected if dem come in close contact wit blood, organs or bodily fluids of animals wey get di virus like chimpanzees, gorillas, monkeys, antelope and porcupines.

Di disease dey very rampant for dis area and e no go dey possible to destroy all di animals wey fit dey carry Ebola.

As long as pipo dey touch and eat dem, possibility dey say Ebola go always return.