ગુજરાત : 17મી તારીખ સુધી આ વિસ્તારોમાં વરસાદનું જોર વધશે

હવામાન વિભાગના બુલેટિન પ્રમાણે દક્ષિણ ગુજરાતમાં છૂટીછવાઈ જગ્યાએ તથા સૌરાષ્ટ્રમાં કેટલીક જગ્યાએ છેલ્લા ચોવીસ કલાકમાં વરસાદ પડ્યો છે. ઉત્તર ગુજરાત અને કચ્છમાં હવામાન સૂકું રહ્યું છે.

છેલ્લા ચોવીસ કલાકમાં ગુજરાતમાં 12 જિલ્લાઓમાં વરસાદ નોંધાયો છે, જેમાં નર્મદાના સાગબારા તાલુકામાં 0.39 ઇંચ અને છોટા ઉદેપુરના કવાંટમાં 0.35 ઇંચ વરસાદ પડ્યો છે. આ ઉપરાંત તાપી, દાહોદ, ભરુચ જિલ્લામાં પણ કેટલીક જગ્યાએ હળવો વરસાદ પડ્યો છે.

હાલમાં ઉત્તર-પશ્ચિમ બંગાળની ખાડી અને ઓડિશાના ઉત્તરના ભાગે તથા આંધ્ર પ્રદેશ પર એક લો પ્રેશર એરિયાની રચના થઈ છે. તેના કારણે એક સાઇક્લોનિક સર્ક્યુલેશન રચાયું છે, જે સમુદ્રની સપાટીથી 7.6 કિમી ઊંચે સ્થિત છે. આગામી ચોવીસ કલાકમાં તે કિનારાવર્તી આંધ્ર પ્રદેશ અને દક્ષિણ ઓડિશા તરફ આગળ વધશે.

આ ઉપરાંત ઉત્તર રાજસ્થાનથી લઈને સાઇક્લોનિક સર્ક્યુલેશન એરિયા સુધી એક ટ્રફ રચાયો છે જે મધ્ય પ્રદેશ, ઉત્તર આંધ્ર પ્રદેશ અને છત્તીસગઢ પરથી પસાર થાય છે.

હવામાન વિભાગ મુજબ સમુદ્રની સપાટી પર એક મોન્સુન ટ્રફ રચાયો છે જે શ્રીગંગાનગર, ચુરુ, શિવપુરી, દામોહ, બિલાસપુરથી લઈને પશ્ચિમ મધ્ય બંગાળની ખાડી પરથી પસાર થાય છે.

બીબીસી માટે કલેક્ટિવ ન્યૂઝરૂમનું પ્રકાશન