દોડ વખતે કપડાંમાં મળત્યાગ કરનાર મહિલા ખેલાડીએ જણાવ્યું કે રેસમાં શું થયું હતું?

એક ઑસ્ટ્રેલિયન મહિલા ખેલાડીએ સ્વીકાર્યું છે કે તેમણે એન્ડ્યુરન્સ રેસ દરમિયાન પોતાના કપડાંમાં જ શૌચ કર્યા પછી રમવાનું ચાલુ રાખીને અન્ય લોકોની સલામતી જોખમમાં મૂકી હતી.

રમતમાં પાછાં ફરતાં પહેલાં બીબીસી સાથે ખાસ વાત કરતાં, જોઆના વિએત્રઝિકે કહ્યું કે સપ્ટેમ્બરમાં બેઇજિંગમાં હાયરૉક્સ સ્પર્ધા જીતવાનો તેમણે દૃઢ નિર્ધાર કર્યો હતો જેના કારણે તેમણે આ દોડ ચાલુ રાખવાનો નિર્ણય લીધો હતો.

તેમણે કહ્યું, "દોડ ચાલુ રાખવાનો નિર્ણય મારો પોતાનો હતો. તેથી હું તેની સંપૂર્ણ જવાબદારી લઉં છું."

જ્યારે તેમને પૂછવામાં આવ્યું કે તેમણે રેસ કેમ ચાલુ રાખી, ત્યારે તેમણે કહ્યું, "મેં તે સમયે મારી આસપાસના લોકો વિશે વિચાર્યું નહોતું. હવે પાછળ ફરીને જોતાં, મને ખ્યાલ આવે છે કે મેં જે નિર્ણય લીધો હતો તે ખૂબ જ ખોટો હતો. મારા નિર્ણયથી જેમને દુઃખ થયું છે તે બધાની હું દિલથી માફી માગું છું."

24 વર્ષીય જોઆનાએ કહ્યું કે આ ઘટના અને સોશિયલ મીડિયા પર તેમની ટીકા થયા પછી તેમણે ઘણી 'માનસિક તકલીફ' પડી.

આ અનુભવ તેમના માટે ખૂબ જ પીડાદાયક હતો. તેમણે રમતને કાયમ માટે છોડી દેવાનું પણ વિચાર્યું હતું. આ રમતમાં તેઓ વિશ્વ રેકૉર્ડ ધરાવે છે.

હાયરૉક્સ સ્પર્ધામાં ભાગ લેનારા ખેલાડીઓએ એક કિલોમીટર દોડવાનું હોય છે. ત્યારબાદ, તેમણે વિવિધ કસરતો કરવાની હોય છે. આમાં સ્લેજ પુશ, બર્પી જમ્પ, ઇન્ડોર રોઇંગ મશીન પર કસરત અને ખભા પર રેતીની થેલી સાથે લંજિસનો સમાવેશ થાય છે.

આ સ્પર્ધા 2017માં જર્મનીના હેમ્બર્ગમાં શરૂ થઈ હતી. ત્યારથી, તેની લોકપ્રિયતા ઝડપથી વધી છે. હવે, આ સ્પર્ધા વિશ્વના ઘણા દેશોમાં આયોજિત થાય છે.

ગયા મહિને યોજાયેલી સ્પર્ધામાં અડધી દોડ પૂરી કર્યા પછી વિએત્રઝિકને ઝાડા થવા લાગ્યા. મળથી ઢંકાયેલા તેમના શરીરના ફોટા સોશિયલ મીડિયા પર વાઇરલ થયા હતા.

જ્યારે અધિકારીઓએ તેમને પૂછ્યું કે શું તેમણે રેસ અધૂરી મૂકી દેવી જોઈએ, ત્યારે તેમણે કહ્યું કે એ સમયે કોઈએ તેમને આવું કરવાની સલાહ આપી ન હતી.

હાયરૉક્સના સહસ્થાપક મોરિટ્ઝ ફર્સ્ટે આ માટે માફી માંગી છે, અને સ્વીકાર્યું છે કે રેસ દરમિયાન ઝડપથી પગલાં ન લેવાં એ એક ભૂલ હતી.

હાયરૉક્સ સ્પર્ધા માટે હવે નવા નિયમો લાગુ કરવામાં આવ્યા છે. જો કોઈ સ્પર્ધક સ્પર્ધા દરમિયાન ઊલટી કરે, પેશાબ કરે કે શૌચ કરે અને પ્રદૂષણ ફેલાવે અથવા પોતાના અથવા અન્યના સ્વાસ્થ્યને જોખમમાં મૂકે, તો સ્પર્ધાના આયોજકો તે સ્પર્ધકને સ્પર્ધામાંથી દૂર કરી શકશે. આ સ્પર્ધા મુખ્યત્વે બંધ જગ્યાઓમાં યોજાય છે અને બધા માટે કસરતનાં સમાન સાધનોનો ઉપયોગ કરે છે.

વિએત્રઝિકે શરૂઆતમાં એક ઇન્સ્ટાગ્રામ પોસ્ટમાં પોતાના વલણનો બચાવ કર્યો હતો, પરંતુ બાદમાં તેને ડિલીટ કરી દીધી હતી. બેઇજિંગ સ્પર્ધાના એક અઠવાડિયાની અંદર તેમણે માફી માગી હતી, અને જાહેરાત કરી હતી કે તેઓ પોતાની જીત ત્યાગી રહ્યાં છે અને સ્પર્ધામાંથી ખસી રહ્યાં છે.

તેઓ શુક્રવારે (30 ઑક્ટોબર) હેમ્બર્ગમાં ફરી સ્પર્ધા કરશે. તેમણે કહ્યું કે તે સ્પર્ધામાં પાછા ફરવા અંગે થોડાં "અસ્વસ્થ" હતાં, પરંતુ સાથે જ આશા વ્યક્ત કરી કે આ વિવાદાસ્પદ ઘટના તેમની ઓળખનું કારણ નહીં બને.

તેમણે કહ્યું, "મને નથી લાગતું કે લોકોએ મને આ ઘટનાને કારણે ઓળખવી જોઈએ."

બેઇજિંગ ગેમ્સ પછીના પોતાના પહેલા ઇન્ટરવ્યુમાં, વિએત્રઝિકઝિકે કહ્યું કે તેમને ફૂડ પૉઇઝનિંગના કારણે બૅક્ટેરિયલ ચેપ લાગ્યો હતો. પરંતુ જ્યારે તેમણે સ્પર્ધા કરી ત્યારે તેમને કોઈ દુખાવો થયો ન હતો. તેમણે ઉમેર્યું કે તેઓ તાજગી અને ખૂબ જ ઊર્જાવાન અનુભવી રહ્યાં હતાં.

તેમણે બીબીસીને કહ્યું,"આ મુશ્કેલી અચાનક શરૂ થઈ."

"અડધા અંતર સુધી મને દોડ દરમિયાન કોઈ સમસ્યા નહોતી થઈ. બાદમાં અચાનક આ બન્યું. તે ક્ષણે, હું એક સ્પર્ધક અને ઉચ્ચ સ્તરના ખેલાડી તરીકે ફક્ત દોડ પર ધ્યાન કેન્દ્રિત કરી રહી હતી. મારું સંપૂર્ણ ધ્યાન દોડ પૂરી કરવા પર હતું, કારણ કે મને જીતવાની તીવ્ર ઇચ્છા હતી."

તેમણે સ્વીકાર્યું, "હું સ્વીકારું છું કે મેં અન્યોની સલામતી જોખમમાં મૂકી."

આ ઘટના બાદ, હાયરૉક્સ China એ કેટલાક સ્પર્ધકોની પ્રવેશ ફી રિફંડ કરી હોવાના અહેવાલ છે.

રેસ પછી સોશિયલ મીડિયા પરની તેમની પહેલી પોસ્ટ માટે વિએત્રઝિકે પણ દિલગીરી વ્યક્ત કરી, જેમાં તેમણે "સંપૂર્ણ શક્તિથી લડો અથવા પીછેહઠ કરો" અને "વિજય એ વિજય છે" જેવા શબ્દો લખ્યા હતા.

તેમણે કહ્યું કે સારવાર માટે હૉસ્પિટલમાં જતી વખતે પણ તેઓ ખૂબ જ તણાવમાં હતાં.

તેમણે કહ્યું, "મેં તે સમયે વિચાર્યું ન હતું કે લોકો આ ઘટનાને કેવી રીતે જોશે."

શું તેમની માફી નુકસાનની ભરપાઈ કરવાનો પ્રયાસ હતો કે તેમણે માફી માંગવામાં મોડું કર્યું હતું, આ અંગે પૂછવામાં આવતા, તેમણે કહ્યું કે તેમને અપેક્ષા નહોતી કે આ ઘટનાની આટલી વ્યાપક ચર્ચા થશે અને આટલા બધા લોકો સુધી પહોંચશે.

"મને આ ઘટના પર વિચાર કરવા અને શું બન્યું તે સમજવા માટે સમયની જરૂર હતી."

ઉચ્ચતમ સ્તરે રમતા ખેલાડીઓની માનસિકતા વિશે બોલતાં, તેમણે કહ્યું, "આવા ખેલાડીઓ સંપૂર્ણપણે જીતવા અને તેમના શ્રેષ્ઠ પ્રદર્શન પર ધ્યાન કેન્દ્રિત કરે છે. તેઓ વાસ્તવિક સ્પર્ધામાં તાલીમ દ્વારા પ્રાપ્ત કરેલી ક્ષમતાઓનું પ્રદર્શન કરીને વિશ્વ સમક્ષ તેમની ફિટનેસ સાબિત કરવાનો પ્રયાસ કરે છે."

છેલ્લાં કેટલાંક અઠવાડિયાંમાં બનેલી ઘટના પર મનન કર્યા પછી, તેમણે કહ્યું, "જીવનમાં ફક્ત રમવા અને સ્પર્ધાઓ જીતવા કરતાં પણ વધુ મહત્ત્વપૂર્ણ બાબતો છે."

સોશિયલ મીડિયા પર વિટ્રેઝેક્ઝની ઓળખ જાહેર થયા પછી , હાયરૉક્સે સ્પષ્ટ કર્યું કે જે કોઈ પણ ખેલાડી સાથે દુર્વ્યવહાર કરશે અથવા ધમકી આપશે તેને ભવિષ્યની સ્પર્ધાઓમાં ભાગ લેવા પર પ્રતિબંધ મૂકવામાં આવશે.

સોશિયલ મીડિયા પર થઈ રહેલી ટીકા અને તેના ફોટા શૅર કરવા અંગે બોલતાં, જોઆના વિએત્રઝિકએ કહ્યું કે કેટલાક લોકોએ તેમને પૂછ્યું કે શું તેઓ ઠીક છે. પરંતુ આ ઘટનાએ તેમને એ પણ સમજાવ્યું કે સોશિયલ મીડિયા કેટલું "ઝેરી અને ખલેલ પહોંચાડનાર" હોઈ શકે છે.

વિએત્રઝિકે બીબીસીને જણાવ્યું કે તે સમય તેમના માટે "માનસિક અને ભાવનાત્મક રીતે ખૂબ જ મુશ્કેલ" હતો. તેમને અપેક્ષા નહોતી કે આ ઘટનાની દુનિયાભરમાં આટલી ચર્ચા થશે. એટલું જ નહીં, તેમના પરિવારને પણ ધમકીઓ મળી હતી.

"આ અનુભવથી મને ખ્યાલ આવ્યો કે આજના વિશ્વમાં સોશિયલ મીડિયાની કેટલી મોટી અસર થઈ શકે છે. એ એક આંખ ઉઘાડનાર ઘટના હતી. ખાસ કરીને મારા જેવી 24 વર્ષની ખેલાડી માટે, જે ફક્ત સ્પર્ધામાં ભાગ લઈ રહી હતી, તે એક મોટો આઘાત હતો."

"હા, મેં ખોટો નિર્ણય લીધો. પણ સોશિયલ મીડિયા પર મારી આટલી બધી ટીકા અને આટલી બધી નિશાન બનાવવી નહોતી જોઈતી. છેવટે, હું ફક્ત માણસ છું."

વિટરઝેકે કહ્યું કે તેઓ પાછલા કેટલાક સમયથી સોશિયલ મીડિયાથી દૂર રહેવાનો અને દુનિયાથી પોતાને અલગ રાખવાનો પ્રયાસ કરી રહ્યાં હતાં.

તેમણે કહ્યું, "પણ હું આ કાયમ માટે નહીં કરી શકું."

તેઓ ઉમેરે છે કે, "આ રમતમાં મારે હજુ ઘણું હાંસલ કરવાનું છે. તેથી મારા માટે આ મુશ્કેલ સમયમાંથી બહાર નીકળવું અને ફરીથી ઊભા થવું ખૂબ જ મહત્ત્વપૂર્ણ છે. હું ઇચ્છું છું કે અન્ય લોકો મારા અનુભવ અને માનસિક શક્તિથી પ્રેરિત થાય."

બીબીસી માટે કલેક્ટિવ ન્યૂઝરૂમનું પ્રકાશન