Uriko ubona ku rubuga aherekana amakuru mu nyandiko gusa, hakoresha uburyo buke. Ja ku rubuga nyamukuru ubone amakuru mu nyandiko iherekejwe n'amasanamu.
Njana ku rubuga nyamukuru canke aho gusoma gusa
Ibindi vyerekeye ingene urwo rubuga rugutwara uburyo (ama mega) buke
Inkongi y'umuriro yishe abantu nibura 12 muri 'salle' y'iminsi mikuru i Kinshasa
- Umwanditsi, Didier Bikorimana
- Igikorwa, BBC Gahuzamiryango
- Yatangajwe
- Igihe co gusoma: iminota 3
Abategetsi muri Repubulika ya Demokarasi ya Congo (DRC) bavuze ko inkongi y'umuriro yadutse mu ijoro ryo ku wa gatanu rishyira ku wa gatandatu yishe abantu nibura 12 mu cyumba (salle) kiberamo ibirori by'iminsi mikuru cyitwa Panacée, kiri mu murwa mukuru Kinshasa, iruhande rw'inzu ndangamurage y'icyo gihugu.
Leta yatangaje ko uwo mubare w'abapfuye ari uw'agateganyo.
Itangazo rya minisiteri ishinzwe gutangaza amakuru ya leta rivuga ko abapfuye ari abagore barindwi n'abagabo batanu, mu gihe abantu batanu bakiri mu bitaro naho abandi 21 bakaba basezerewe mu bitaro nyuma yo kwitabwaho ariko bakaba bagomba gusubira kwa muganga kwisuzumisha mu gihe kitarenze amasaha 48.
Ibikorwa byo kumenya imyirondoro y'imirambo itaramenyekana ba nyirayo birakomeje. Amaperereza na yo arakomeje kugira ngo hamenyekane icyateye uwo muriro n'ababa babigizemo uruhare.
Leta ya DRC ntiyatangaje ibirori by'iminsi mikuru byari birimo kubera muri icyo cyumba ubwo iyo nkongi yabaga ariko amakuru amwe yo mu bitangazamakuru byo muri icyo gihugu avuga ko hari harimo kubera ibirori byo kwiyakira by'ubukwe.
Radio RFI yasubiyemo amagambo y'umutegetsi wo mu nzego z'ibanze avuga ko abageni ari bazima ariko ko umugore yagize ihungabana.
Mbere y'itangazo rya leta, ibitangazamakuru byo muri DRC byari byasubiyemo amagambo ya burugumesitiri (umukuru w'akarere) wa komine ya Lingwala byabereyemo, avuga ko umubare w'abapfuye ari abantu nibura 22.
Leta yihanganishije imiryango yabuze ababo ndetse isezeranya ko izababa hafi.
Nyuma y'iyo nkongi, Minisitiri w'ubutegetsi bw'igihugu Jacquemain Shabani yategetse ba guverineri b'intara – izitegekwa na leta – kwihutira kugenzura ibyumba biberamo iminsi mikuru ndetse n'ahantu hagenewe kwakira imbaga y'abantu n'ibikorwa by'imyidagaduro.
Leta yanategetse ifungwa ry'ako kanya ry'inzu iyo ari yo yose yakira imbaga y'abantu idakurikije ingamba z'umutekano ndetse itegeka ikurikizwa ritajenjetse ry'ingamba z'umutekano.
Imiriro ijya yaduka mu bice bimwe byo mu mujyi wa Kinshasa, cyane cyane mu duce dutuwemo mu bucucike, ndetse no kubera uburyo bw'imyubakire hamwe na hamwe budakurikiza ingamba z'umutekano nko mu gihe habaye inkongi.
