Ffilm Rhys Ifans am fyw â Parkinson's yn 'golygu llawer' i rai â'r cyflwr

Yr actor Rhys Ifans a rhai o'r criw sy'n gyfrifol am drefnu'r dosbarthiadau
- Cyhoeddwyd
Mae menyw sy'n byw gyda chyflwr Parkinson's wedi dweud bod gwylio'r ffilm Onwards and Sideways yn brofiad "emosiynol" sy'n helpu i ddangos "beth mae pobl gyda'r cyflwr yn gorfod ei wynebu".
Cafodd Glenys Mair Davies ddiagnosis o Parkinson's ddwy flynedd a hanner yn ôl ac, ers hynny, mae hi wedi bod yn mynychu dosbarthiadau 'Dance for Parkinson's' yng nghanolfan Pontio, Bangor.
Mae'r actor Cymreig Rhys Ifans yn serennu yn y ffilm ac fe fu'n ymweld â'r dosbarth dawns ym Mangor er mwyn paratoi ar gyfer y rôl.
Yn ôl elusen Parkinson's UK Cymru er bod y ffilm yn llawn hiwmor, dydy hi ddim yn osgoi gwir realiti Parkinson's.
"Mae'n herio stereoteipiau, heb geisio cuddio'r gwirionedd ac yn dangos ffyrdd gwahanol o ddelio gyda'r cyflwr."

Y delyn yn chwarae yn y dosbarth fel cyfeiliant i weithgareddau'r grŵp
I Glenys mae'r dosbarth ar brynhawn dydd Mawrth yn "golygu llawer" gan ei fod yn rhoi cyfle iddi gymysgu gydag eraill sydd yn byw â'r cyflwr.
Er ei bod yn cydnabod fod profiad pawb o Parkinson's yn wahanol - mae mwy na 40 o symptomau'n gysylltiedig â'r cyflwr - mae'r dosbarth yng nghanolfan Pontio yn gyfle i "sgwrsio ac i gwrdd â phobl eraill".
Aeth Glenys i wylio'r ffilm Onwards and Sideways gyda'i merch, gan ei disgrifio yn brofiad emosiynol wrth i'r ffilm drafod elfennau o'r cyflwr nad yw hi wedi'u profi eto.
Er bod y cyflwr yn ddifrifol, dywedodd Glenys bod llawer o bositifrwydd yn y ffilm.
"Roedden i'n meddwl bydde hi'n ffilm drist ond mae'n ffilm sy'n gorffen gydag agwedd bositif a dwi'n meddwl bod hynny yn beth da, er bod iechyd rhywun yn gwaethygu mae 'na bethau positif i weld hefyd," meddai.

Nodyn gan un o aelodau'r grŵp ar bwysigrwydd y dosbarth iddyn nhw
Cafodd y ffilm ei hysgrifennu gan gyd-awdur y gyfres enwog The Vicar of Dibley ar ôl iddo gael diagnosis o Parkinson's yn 2011.
Dywedodd Paul Mayhew-Archer bod y ffilm wedi'i seilio ar ei brofiadau o fyw gyda'r clefyd hwn dros y 15 mlynedd diwethaf.
Mae'r ffilm yn dilyn Emma (Laura Linney) a Tony (Rhys Ifans) am gyfnod o bum mlynedd ers derbyn diagnosis o Parkinson's. Fe gafodd y ddau ddiagnosis yr un diwrnod.
I Dafydd Jones, sy'n gweithio fel rheolwr polisi ymgyrchoedd a chyfathrebu dros dro i elusen Parkinson's UK Cymru, mae'r ffilm yn un "hynod o bwerus".
"Er bod o ella ddim yn hawdd i wylio ar adegau, mae o'n holl bwysig ac mae o'n cydbwyso, dwi'n meddwl, yr heriau efo'r hiwmor ac yn dangos pwysigrwydd cymuned i bobl sy'n byw gyda Parkinson's," meddai.
"Mae'r ffilm yn codi lot o bwyntiau pwysig o gwmpas Parkinson's. Mae o'n portreadu bod pobl yn gallu cael Parkinson's yn ifanc, efallai bod pobl yn meddwl bod o'n effeithio ar bobl hŷn, ac mae un o bob16 yn cael eu diagnosio cyn bod nhw'n 50."

Y ci therapy Sion Telor sydd hefyd yn mynychu'r dosbarthiadau
Mae Helen Wyn Pari yn delynores sy'n chwarae'r gerddoriaeth ar gyfer y grŵp 'Dance for Parkinson's' ym Mangor ers chwe blynedd.
Dywedodd ei bod hi wedi mwynhau croesawu Rhys Ifans i'r dosbarth.
"Roedd o mor ddiymhongar ac yn sensitif iawn, yn amlwg yn gwneud gwaith ymchwil trylwyr iawn cyn chwarae rôl yn y ffilm Onwards and Sideways.
"Fe wnaeth e siarad efo'r unigolion i ddod i 'nabod nhw, ac fe wnaeth o gymryd rhan yn y dosbarth fel pawb arall, yn gwneud y symudiadau."
Yn ogystal â'r ffaith bod y ffilm yn bwysig i'r bobl sy'n byw gyda'r cyflwr, dywedodd Helen Wyn Pari bod y ffilm yn agoriad llygaid i bobl sy'n agos i'r rhai sy'n byw â'r cyflwr.
"Dwi'n meddwl ei bod hi'n ffilm bwysig i bartneriaid pobl sy'n byw efo'r cyflwr hefyd.
"Dwi'n meddwl bod o'n beth da bod nhw'n dangos cymaint o amrywiaeth a hefyd y pethau sy'n digwydd o ganlyniad i'r gwahanol feddyginiaethau a'r problemau sy'n deillio o rai o'r tabledi."
Straeon Perthnasol
- Cyhoeddwyd3 o ddyddiau yn ôl

- Cyhoeddwyd5 Gorffennaf 2025
