Cymru'n colli yn erbyn Portiwgal ac yn wynebu gemau ail gyfle

Cymru v PortiwgalFfynhonnell y llun, Getty Images
Disgrifiad o’r llun,

Bydd yn rhaid i Gymru aros tan ddydd Gwener i weld pwy fydd y gwrthwynebwyr yn y gemau ail gyfle

GanGwydion Edwards
BBC Cymru Fyw
  • Cyhoeddwyd

Colli a wnaeth Cymru nos Fawrth yn erbyn Portiwgal yng Nghynghrair y Cenhedloedd, gyda sgôr terfynol o 2-3.

Roedd hi'n gêm gyffrous llawn goliau, gyda David Brooks a Sorba Thomas yn rhwydo i'r tîm cartref yng Nghaerdydd. Bruno Fernandes, Pedro Neto a Carlos Forbs wnaeth sgorio dros Bortiwgal.

Ond roedd tynged y Cymry eisoes wedi'i benderfynu cyn y chwiban cyntaf, gan nad oedd posib osgoi gorffen ar waelod y grŵp yn dilyn y golled yn erbyn Norwy ddydd Sadwrn diwethaf.

Golyga hynny, ar ôl chwarae'r holl gemau'n erbyn Portiwgal, Denmarc a Norwy, y bydden nhw rŵan yn gorfod chwarae dwy gêm ail gyfle i drio osgoi disgyn o'r haen uchaf, Adran A, lawr i B yng Nghynghrair y Cenhedloedd.

Caiff enwau'r timau sydd i wynebu ei gilydd yn y gemau dau gymal hynny, eu tynnu o het ddydd Gwener 20 Tachwedd, gyda Chymru i wynebu un o'r timau wnaeth orffen yn ail yn Adran B.

Disgrifiad,

Uchafbwyntiau: Cymru 2-3 Portiwgal

Y tîm oddi cartref sgoriodd yn gyntaf wedi tua 10 munud, wrth i Joao Neves fanteisio ar gamgymeriad gwael gan Josh Sheehan ger y cwrt cosbi ac yna Bruno Fernandes yn chwipio'r bêl i gornel uchaf y rhwyd. 0-1.

Ond ymateb a wnaeth y Cymry yn syth wrth i ergyd Harry Wilson gael ei harbed, ond David Brooks yn ymateb a gorffen yn daclus i gornel y rhwyd.

Roedd y dynion mewn coch yn chwarae'n dda ar y cyfan ac mi gafodd y ddau dîm gyfnodau o gyfleoedd da yn ystod yr hanner cyntaf.

Aeth Cymru ar y blaen am gyfnod, wrth i Brooks fwydo'r bêl o flaen Thomas ac ef yna'n gorffen y cyfle yn effeithiol.

Ond byrhoedlog oedd y fantais honno, wedi'i Francisco Trincao groesi'n ddyfn i'r postyn cefn a Pedro Neto yn cyrraedd i rwydo. 2-2 ar yr hanner.

Sorba ThomasFfynhonnell y llun, Getty Images
Disgrifiad o’r llun,

Roedd Sorba Thomas yn un wnaeth sgorio

Tawelu a wnaeth y cyfleoedd am ran helaeth o'r ail hanner, ond roedd hi'n amlwg bod y ddau dîm eisiau ennill.

Ond wrth i'r gêm ddatblygu roedd y cyfleoedd yn mynd o un cyfeiriad i'r llall eto, gyda nifer o gyfleoedd yn cael eu methu yn y glaw trwm.

Daeth y drydedd i Bortiwgal yn y diwedd, a hynny trwy ffurf Carlos Forbs wrth i Ben Cabango benio pêl hir i ffwrdd i'w gyfeiriad ac ef yna'n gorffen.

Cafodd Neto gerdyn coch gan y dyfarnwr am dderbyn dau felyn wedi hynny.

Er gwaethaf pwysau mawr gan Gymru at derfyn y gêm, 2-3 oedd y sgôr yn y pen draw a cholled arall i'r cochion.

Cerdyn coch i NetoFfynhonnell y llun, Getty Images
Disgrifiad o’r llun,

Cafodd Pedro Neto gerdyn coch

Gallai aros yn Adran A helpu Cymru i gyrraedd Euro 2028, oherwydd y byddai'n eu gwneud yn un o'r prif ddetholion ar gyfer rowndiau rhagbrofol Euro 2028.

Byddai'n eu galluogi i osgoi bod mewn grŵp gyda rhai o gewri Ewrop - timau fel Ffrainc, Sbaen, Yr Eidal a'r Iseldiroedd.

Gan fod Cymru yn un o'r gwledydd a fydd yn cynnal Euro 2028 ar y cyd gyda Lloegr, Yr Alban a Gweriniaeth Iwerddon - mae cyfle gwell na'r arfer o gyrraedd y rowndiau terfynol.

Mae dau le wrth gefn yn cael eu cadw i'r gwledydd sy'n cynnal y gystadleuaeth, rhag ofn iddyn nhw fethu â chyrraedd trwy'r rowndiau rhagbrofol.

Bydd enwau yn dod allan o het eto ym mis Rhagfyr ar gyfer y rowndiau rhagbrofol, gyda'r gemau hynny i gael eu chwarae yn 2027.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.