Gemau Norwy a Phortiwgal yn bwysig i obeithion Cymru o gyrraedd Euro 2028

Rheolwr Cymru Craig Bellamy yn dathlu ennill 2-1 yn erbyn Norwy yng Nghynghrair y Cenhedloedd. Ffynhonnell y llun, Getty Images
Disgrifiad o’r llun,

Doedd Cymru erioed wedi ennill gêm yn Adran A Cynghrair y Cenhedloedd tan eleni

GanOwain Llyr
Chwaraeon BBC Cymru
  • Cyhoeddwyd
Disgrifiad,

Beth sy’n y fantol i Gymru yn erbyn Norwy a Phortiwgal?

Mae 'na lot yn y fantol i Gymru pan fyddan nhw'n chwarae yn erbyn Norwy a Phortiwgal dros yr wythnos nesaf.

Maen nhw'n gwybod y byddai dau ganlyniad positif yn rhoi gobaith iddyn nhw aros yn Adran A Cynghrair y Cenhedloedd.

Ac os y bydd hynny'n digwydd, mi fyddai'n hwb mawr i'w gobeithion o gyrraedd Euro 2028.

Mi fydd yr enwau yn dod allan o'r het ym mis Rhagfyr ar gyfer y rowndiau rhagbrofol, gyda'r gemau i gael eu chwarae yn 2027.

Grŵp A4 yng Nghynghrair y CenhedloeddFfynhonnell y llun, BBC Sport
Disgrifiad o’r llun,

Grŵp Cymru yng Nghynghrair y Cenhedloedd

Y fuddugoliaeth yn erbyn Norwy oedd y tro cyntaf erioed i Gymru ennill gêm ym mhrif haen Cynghrair y Cenhedloedd.

Y tro diwethaf iddyn nhw chwarae'n Adran A yn 2022 fe gollon nhw bum gêm, a chael un gêm gyfartal yn erbyn Gwlad Pwyl, gan orffen ar waelod y grŵp a syrthio nôl i Adran B.

Mae Craig Bellamy yn hynod o awyddus i osgoi gweld yr un peth yn digwydd y tro hwn.

Cyn y ddwy gêm olaf, y newyddion da i Gymru ydi nad ydyn nhw ar waelod y grŵp.

Er bod y ddwy wlad ar yr un nifer o bwyntiau a bod gwahaniaeth goliau Norwy yn well - mae'r ffaith bod Cymru wedi ennill y gêm yn Stadiwm Dinas Caerdydd rhwng y ddwy wlad ym mis Hydref yn hollbwysig.

Mae record benben rhwng dau dîm yn cael blaenoriaeth dros wahaniaeth goliau.

Stadiwm Principality yng Nghaerdydd cyn gêm gyfeillgar rhwng Cymru a Sbaen yn 2018Ffynhonnell y llun, Getty Images
Disgrifiad o’r llun,

Stadiwm Principality fydd yn cynnal gêm gyntaf Euro 2028

Felly sut gall aros yn Adran A helpu Cymru i gyrraedd Euro 2028?

Wel yn syml - mi fydd 'na 12 grŵp yn y rowndiau rhagbrofol, ac mi fydd y prif ddetholion yn cael eu dewis ar sail ble maen nhw'n gorffen yng Nghynghrair y Cenhedloedd.

Os byddan nhw'n osgoi gorffen ar waelod eu grŵp, mi fydd Cymru ymhlith y 12 tîm gorau yng Nghynghrair y Cenhedloedd yn 2026 - fyddai'n eu gwneud yn un o'r prif ddetholion ar gyfer rowndiau rhagbrofol Euro 2028.

Ac os bydd hynny'n digwydd mi fydde nhw wedyn yn osgoi bod mewn grŵp gyda rhai o gewri Ewrop - timau fel Ffrainc, Sbaen, Yr Eidal a'r Iseldiroedd.

Gan fod Cymru yn un o'r gwledydd fydd yn cynnal Euro 2028 ar y cyd gyda Lloegr, Yr Alban a Gweriniaeth Iwerddon - mae ganddyn nhw siawns gwell na'r arfer o gyrraedd y rowndiau terfynol beth bynnag.

Mae 'na ddau le wrth gefn yn cael eu cadw i'r gwledydd sy'n cynnal y gystadleuaeth, rhag ofn iddyn nhw fethu â chyrraedd drwy'r rowndiau rhagbrofol.

Ond dymuniad Craig Bellamy ydi sicrhau eu lle yn Euro 2028 mewn steil drwy ennill eu grŵp rhagbrofol, ac i hynny ddigwydd mi fyddai o gymorth mawr iddyn nhw fod yn brif ddetholyn.

Disgrifiad,

Harry Wilson yn hollbwysig i Gymru - Iwan Roberts

Y newyddion da i Craig Bellamy cyn y gemau'n erbyn Norwy yn Oslo a Phortiwgal yn Stadiwm Dinas Caerdydd ydi fod tri chwaraewr dylanwadol yn holliach unwaith eto.

Mae Harry Wilson, Karl Darlow a Joe Rodon yn ôl yn y garfan ar ôl colli'r pedair gêm yng Nghynghrair y Cenhedloedd ym mis Medi a mis Hydref.

Ers i Bellamy gael ei benodi does 'na neb wedi sgorio na chreu mwy o goliau i Gymru na Wilson.

Ar ôl dweud hynny mae'r tymor yma wedi bod yn un rhwystredig iddo yn Uwch Gynghrair Lloegr ers iddo symud i Leeds United o Fulham dros yr haf.

Gyda Ben Cabango wedi ei wahardd ar gyfer y gêm yn erbyn Norwy a Dylan Lawlor dal wedi ei anafu mae'r ffaith fod Joe Rodon ar gael eto yn rhywbeth i'w groesawu.

Y broblem yw mai dim ond tri munud o bêl droed mae'r amddiffynnwr canol wedi ei chwarae i Leeds ers mis Awst.

Mae'n annhebygol felly y bydd yn gallu chwarae dwy gêm ryngwladol mewn pedwar diwrnod.

A does 'na ddim amheuaeth mai Karl Darlow yw dewis cyntaf Bellamy yn y gôl - yn enwedig ar ôl camgymeriad Danny Ward yn y golled o 1-0 yn erbyn Denmarc ym mis Hydref.

Fydd hi ddim yn hawdd i Gymru gael y canlyniadau maen nhw eu hangen yn erbyn Norwy a Phortiwgal, ond mae cael tri chwaraewr allweddol yn rhan o'r garfan yn sicr yn mynd i fod o gymorth.