Dedfrydu cadeirydd clwb pêl-droed am ddwyn £22,000 i brynu cocên

Karl Morecroft

Roedd Morecroft yn hyfforddwr i'r clwb cyn ei benodi'n gadeirydd

Fe wnaeth cadeirydd clwb pêl-droed ieuenctid ddwyn dros £22,000 gan y clwb i brynu cocên, mae llys wedi clywed.

Roedd Karl Morecroft, 45, wedi dweud celwydd wrth wirfoddolwyr eraill wrth drosglwyddo arian o gyfrif y clwb iddo'i hun a ffugio dogfennau i guddio'r twyll.

Roedd clwb RTB Ebbw Vale yn cefnogi 330 o blant ac yn dibynnu ar ymdrechion codi arian rhieni, gwirfoddolwyr a'r gymuned i dalu am weithgareddau.

Dros gyfnod o 15 mis, cymerodd Morecroft £22,491, gan honni bod yr arian yn cael ei ddefnyddio i dalu am offer pêl-droed, costau cyngor a ffioedd eraill.

Dim ond ar ôl i'r heddlu gael gwybod am y mater y cyfaddefodd Morecroft ei fod wedi twyllo'r clwb, gan addo ad-dalu'r arian.

Ond erbyn y gwrandawiad dedfrydu roedd ond wedi talu £1,232 yn ôl.

'Bradychu' aelodau'r clwb

Dywedodd ysgrifennydd y clwb, Rachel Edwards, eu bod bellach dan "bwysau difrifol" o ganlyniad i weithredoedd Morecroft.

Dywedodd fod y clwb wedi gorfod benthyg arian i dalu am dlysau diwedd tymor, ond na allen nhw fforddio gwneud gwaith cynnal a chadw hanfodol na thalu am gyfleusterau hyfforddi gaeaf mewn pryd.

Dywedodd y barnwr Paul Hobson fod clybiau fel RTB Ebbw Vale yn "hanfodol i'r gymuned leol" a'u bod yn cael eu rhedeg gan wirfoddolwyr heb unrhyw wobr ariannol.

Wrth ohirio dedfryd o 20 mis dan glo, dywedodd y barnwr wrth Morecroft: "Roedd y bobl hynny'n ymddiried ynoch chi - cymaint nes i chi gael eich penodi'n gadeirydd.

"Fe wnaethoch chi fradychu'r ymddiriedaeth honno."

Bydd hefyd yn gorfod cwblhau 180 awr o waith di-dâl a 50 diwrnod o weithgareddau adsefydlu.

Gorchmynnodd y barnwr iddo dalu £21,259 o iawndal o fewn tair blynedd, gyda gorchymyn y bydd yn cael ei garcharu os na fydd yn gwneud hynny.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.