Adunni Ade, gbajúmọ̀ òṣèrè tíátà pàdánù màmá rẹ̀

Gbajugbaja oṣere tiata nni, Adunni Adewale tọpọ awọn ololufẹ rẹ mọ si Adunni Ade ti padanu mama rẹ lẹyin aisan ọlọjọ pipẹ.

Oṣerebinrin naa lo kede iku mama rẹ lori ikanni ayelujara rẹ lọjọ Aje, ọjọ kọkandinlogun, oṣu Kẹwaa, ọdun 2026.

"Inna lillahi wa inna ilayhi raji'un. Loootọ, ọdọ Allah la ti wa, ibẹ naa la o si pada si," Adunni Ade kọ ọ bẹẹ soju opo rẹ.

Obinrin naa sọ pe ẹdun ọkan nla lo jẹ foun lati padanu mama oun lasiko yii, to si ni ọkan oun gbọgbẹ gidi.

"Pẹlu ọkan to wuwo ati gbigba ifẹ Allah, mo n kede ipapoda mama mi, ẹni to pada si ọdọ Ẹlẹda rẹ lọjọ kejidinlogun, oṣu Kẹwaa, lẹyin aisan ọlọjọ pipẹ," o sọ bẹẹ ninu ọrọ to kọ.

Siwaju sii lo fidi rẹ mulẹ pe mama oun jẹ ẹnikan toun nifẹ si gidi, ti gbogbo awọn ọmọ-ọmọ rẹ, to fi mọ mọlẹbi ko le fi ṣere.

O ni titi lai ni mama oun yoo maa wa ni iranti oun, paapaa gbogbo asiko ti wọn jọ lo papọ.

Adunni Ade wa gbadura pe ki Ọlọrun dariji gbogbo aiṣedeede mama oun, ko si foju aanu wo, ati pe ko ṣe saare rẹ ni ibi aaye to kun fun imọlẹ ati alujanna rere.

Bakan naa lo tun gbadura pe ki Ọlọrun fun oun ati idile to fi silẹ lọ ni oku lati le gbe ibanujẹ naa kuro lọkan.

Siwaju sii lo rọ gbogbo awọn ololufẹ rẹ kaakiri agbaye lati maa gbadura fun mama oun ati gbogbo mọlẹbi patapata lasiko yii.

Bẹẹ lo fidi rẹ mulẹ pe gbogbo bi eto isinku yoo ṣe lọ, ni oun yoo fi to gbogbo eeyan leti, nigba ti asiko ba to.