Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 22 Daqiiqadood ka horIlaalada Kacaanka Iiraan oo sheegtay inay weerarro aargoosi ah ku qaaday saldhigyo Mareykan ah

   

   Xigashada Sawirka, EPA/Shutterstock

   Ilaalada Kacaanka Islaamiga ah ee Iiraan (IRGC) ayaa bayaan ay soo saartay ku sheegtay inay weerarro aargoosi ah ku qaaday saldhigyo Mareykan ah oo ku yaalla Baxrayn, Kuwait iyo Urdun, iyagoo sheegay inay burburiyeen bartilmaameedyo ku yaalla dalalkaas.

   Bayaan ay IRGC soo saartay subaxnimadii Isniinta ayaa lagu sheegay in:“Dhowr kayd oo waaweyn oo gantaallo ah iyo haamo shidaal oo ku yaalla Saldhigga Cirka ee Prince Hassan ee Urdun ayaa dab qabsaday kadib markii lagu dhuftay gantaallo iyo diyaarado aan duuliye lahayn.”

   IRGC ayaa sidoo kale sheegtay in, iyadoo ka jawaabaysa weerarradii Mareykanka ee Axaddii iyo subaxnimadii Isniinta, “wajigii labaad ee howlgalkeeda aargoosiga” ay beegsatay xarumo muhiim ah oo lagu dayactiro laguna farsameeyo diyaaradaha qumaatiga u kaca, hangar ay ku jirtay diyaarad dagaal elektaroonig ah oo nooca P-8 ah, iyo xarun lagu hago laguna maamulo diyaaradaha aan duuliyaha lahayn ee ciidamada Mareykanka ee ku taalla Baxrayn.

   Dhanka kale, wakaalado warar oo xiriir la leh Ilaalada Kacaanka ayaa soo sheegay qaraxyo ka dhacay Kuwait.

   Bayaan saddexaad oo ay IRGC soo saartay subaxnimadii Isniinta waqtiga Tehraan ayaa qaraxyadaas ku tilmaamay kuwo la xiriira weerarro lagu qaaday saldhigyada Mareykanka ee Kuwait.

   IRGC waxay bayaankeeda saddexaad ku sheegtay:“Waxaan beegsanay haamaha shidaalka iyo nidaamka difaaca cirka ee Patriot ee saldhigga Mareykanka ee Ali Al Salem ee Kuwait, iyo sidoo kale nidaamka raadaarka istiraatiijiga ah ee FPS ee saldhigga Ahmad Al-Jaber si buuxda u burburisay” bartilmaameedyadaas.,”

   Wakaaladaha wararka gudaha Iiraan sida Tasnim iyo Fars ayaa sidoo kale baahiyay sawirro ay ku sheegeen inay muujinayaan weerarka lagu qaaday saldhigga ciidamada badda Mareykanka ee Baxrayn, hase yeeshee sawirradaas weli si madax-bannaan looma xaqiijin.

2. 57 Daqiiqadood ka horCENTCOM waxay ku dhawaaqday inay soo gabagabeysay duqeymihii ay ka wadeen Iiraan

   

   Xigashada Sawirka, Centcom / US Army

   Qiyaastii shan saacadood kadib markii ay ku dhawaaqday bilowga wareeg cusub oo duqeymo cirka ah oo lala beegsaday bartilmaameedyo ku yaalla Iiraan, Taliska Dhexe ee Ciidamada Mareykanka (CENTCOM) ayaa sheegay inuu soo gabagabeeyay howlgalka weerarrada oo la fuliyay aroornimadii Isniinta, 12-ka Luulyo.

   Sida lagu sheegay war-saxaafadeedka CENTCOM, weerarradan ayaa lagu beegsaday tobannaan bartilmaameed oo ku yaalla goobo kala duwan, iyadoo la adeegsaday hub si sax ah u hago bartilmaameedka, si loo yareeyo awoodda Iiraan ee ay ku sii wadi karto weerarrada ka dhanka ah maraakiibta caalamiga ah ee mara Marinka Hormuz.

   CENTCOM ayaa sheegtay in ciidamada Mareykanka ay beegsadeen nidaamyada difaaca cirka ee Iiraan, xarumaha raadaarka ee xeebaha, awoodaha gantaallada iyo diyaaradaha aan duuliyaha lahayn , iyo sidoo kale doomaha yaryar ee militariga.

   War-saxaafadeedka ayaa intaas ku daray in howlgalka lagu adeegsaday diyaaradaha dagaalka ee Mareykanka, maraakiibta ciidamada badda, diyaaradaha ismiidaaminta ah ee aan duuliyaha lahayn, iyo markii ugu horreysay doomaha ismiidaaminta ah ee aan cidina wadin.

   CENTCOM waxay sidoo kale sheegtay:“Marinka Hormuz waa marin-biyood muhiim u ah ganacsiga caalamiga ah, mana aha marin ay Iiraan maamusho.”

   Taliska ayaa xusay in ciidamada Mareykanka ee gobolka ay si buuxda ugu diyaar garoobeen ilaalinta xorriyadda maraakiibta ganacsiga ee isticmaala marinkaas, inkastoo, sida ay hadalka u dhigeen, ay jiraan “falal gardarro ah, handadaado, dhibaateyn iyo bayaanno aan sharci ku dhisnayn” oo ay ku eedeysay Iiraan.

3. Saacad ka horHalkuu ku muqan yahay hogaamiyaha ruuxiga Iran Mojtaba Khamenei?

4. Saacad ka horIran oo ku hanjabtay inay jawaab adag ka bixin doonto weeraradii xalay ee Mareykanka

   

   Xigashada Sawirka, Getty Images

   Iyadoo laga jawaabayo weerarradii cusubaa ee Mareykanka ee dhacay Axaddii iyo wareeg kale oo weerarro ah oo dhacay aroornimadii Isniinta waqtiga Gacanka Faaris, wasiir ku-xigeenka Arrimaha Dibadda ee Iiraan, Kazem Gharibabadi, ayaa sheegay in ciidamada qalabka sida ee dalka ay tahay inay ka jawaabaan weerarradaas si waafaqsan go'aannada Golaha Sare ee Amniga Qaranka iyo Baarlamaanka Iiraan.

   Mr Gharibabadi ayaa qoraal uu ku baahiyay barta X ku yiri: “Iyadoo la sii wado istaraatiijiyadda jawaabta adag ee ka dhanka ah gardarro kasta oo militari oo lagu soo qaado dalka, waxaa lagama maarmaan ah in la dejiyo xeer cad oo hore u qeexaya jawaabta adag ee dowladda haddii isku day lagu beegsado Hoggaamiyaha Sare ee Kacaanka Islaamiga ah ama mas’uuliyiinta militariga iyo dowladda.

   Hadalkan ayaa yimid iyadoo xiisadda u dhexeysa Iiraan iyo Mareykanka ay sii kordhayso, kadib weerarro isdaba joog ah oo labada dhinac ay isku qaadeen.

5. Saacad ka horDuqeymo xooggan oo xalay ka dhacay magaalooyiin ku yaalla Iran

   

   Xigashada Sawirka, Reuters

   Duqeymo cirka ah oo laga soo sheegay Khuzestan; Qaraxyo laga maqlay Ahvaz, Abadan, Behbahan, Dezful, Omidieh, Shadegan iyo Mahshahr

   Mas’uuliyiinta deegaanka ee gobolka Khuzestan ayaa sheegay in diyaaradaha Mareykanka ay aroornimadii Isniinta duqeymo ka fuliyeen magaalooyin dhowr ah oo ku yaalla gobolkaas koonfurta Iiraan.

   Sida ay baahiyeen wakaaladaha wararka ee dowladda Iiraan, ku-xigeenka madaxa amniga iyo fulinta sharciga ee gobolka Khuzestan ayaa faahfaahin ka bixiyay weerarrada isagoo yiri:

   “Saacaddu markay ahayd 1:35 habeenimo maanta, laba goobood oo ku dhow magaalada Ahvaz ayaa lagu weeraray gantaallo uu soo riday cadowga Mareykanka. Sidoo kale, 1:40 habeenimo waxaa la beegsaday goobo ku yaalla magaalooyinka Behbahan iyo Dezful, halka 1:45 habeenimo afar goobood oo ku yaalla magaalooyinka Omidieh iyo Mahshahr ay noqdeen bartilmaameedyo weerarro cadow.”

   Dhanka kale, wakaaladda wararka ee Fars ayaa soo xigatay mas’uuliyiin ka tirsan maamulka gobolka Khuzestan oo sheegay in ku dhowaad 2:00 habeenimo waqtiga maxalliga ah, qaybo ka mid ah magaalooyinka Abadan iyo Shadegan ay sidoo kale la kulmeen duqeymo cirka ah.

   Si kastaba ha ahaatee, ku-xigeenka guddoomiyaha gobolka Khuzestan ayaa beeniyay wararka sheegaya in qarax laga maqlay ama weerar lagu qaaday dekedda Khamir.

6. 2 Saacadood ka horSaraakiisha Caafimaadka ee Gaza: Ugu yaraan lix qof ayaa lagu dilay weerarrada Israa'iil

   Saraakiisha caafimaadka ee Marinka Gaza ayaa sheegay in ugu yaraan lix qof, oo ay ku jirto gabar sagaal jir ah, lagu dilay weerarro dhowr ah oo ay Israa’iil ka fulisay Gaza.

   Dhakhaatiirtu waxay sheegeen in gabadha sagaalka jirka ah lagu toogtay xero qaxooti oo ku taalla bartamaha Gaza.

   Ciidamada Israa’iil ayaa sheegay inaysan wax war ah ka hayn dhacdadaas.

   Afar qof oo kale ayaa la sheegay inay ku dhinteen duqeyn cirka ah oo lagu qaaday xarun warshadeed oo ku taalla magaalada Gaza.

   Ciidanka Israa’iil ayaa ku dhawaaqay inay weerareen xubno ka tirsan Xamaas oo ay sheegeen inay ku sugnaayeen goob lagu soo saaro hub.

   Weeraradan ayaa dhacay xilli xabbad-joojin u dhexeysa Israa’iil iyo Xamaas ay weli jirto, balse dadaallada lagu gaarayo heshiis waara oo lagu soo afjarayo dagaalka ay weli socdaan.

7. 4 Saacadood ka horDab ka kacay baar ku yaalla Bangkok ayaa dilay ugu yaraan 27 qof

   

   Xigashada Sawirka, Reuters

   Ra’iisul wasaaraha Thailand ayaa sheegay in ugu yaraan 27 qof ay ku dhinteen dab xooggan oo ka kacay baar ku yaalla Bangkok.

   Dab-damiyeyaasha ayaa goobta loo yeeray wax yar kaddib saqdii dhexe ee Axaddii. Mas’uuliyiintu waxay sheegeen in macaamiishu ay isku dayayeen inay ka baxsadaan albaabka hore, kaas oo dabku qabsaday, markii shaqaalaha gurmadku ay yimaadeen.

   Muuqaallo aan weli si madax-bannaan loo xaqiijin ayaa muujinaya holac ka baxaya gudaha dhismaha iyo haweeney ku dhacaysa dhulka iyadoo ay jirto jahwareer ka dhex dhacay dadkii isku dayayay inay baxsadaan, kaddibna kacaysa si ay uga cararto goobta.

   Ra’iisul Wasaaraha Thailand Anutin Charnvirakul ayaa wariyeyaasha kula hadlay goobta, wuxuuna sheegay in 27 qof ay dhinteen, halka dhowr kalena loo qaaday isbitaallo. Wuxuu carrabka ku adkeeyay in sababta dabka ay weli baaritaan ku socoto.

   Wuxuu sidoo kale sheegay inuu la hadlay mid ka mid ah fannaaniintii ka tumaysay goobta markii uu dabku kacay. Sida uu sheegay, fanaanku wuxuu u sheegay in dabku markii hore ka billowday korontada, kaddibna xaaladdu si degdeg ah isu beddeshay.

   Baar-kan, oo Thailand looga yaqaan "Rong Bir Na Lat Phrao", wuxuu ku yaalla deegaanka Chatuchak ee Bangkok.

   Sida uu sheegay wargeyska Daily News of Thailand, waa mid ka mid ah xarumaha madadaalada iyo maqaayadaha caanka ah ee ku yaalla aaggaas ee caasimadda.

8. 5 Saacadood ka horIran oo u digtay dalalka dariska la ah

   

   Xigashada Sawirka, EPA

   Wasaaradda Arrimaha Dibadda ee Iiraan ayaa bayaan cusub kaga falcelisay weerarradii ugu dambeeyay ee Maraykanka, waxayna uga digtay dalalka ku yaalla Gacanka Faaris in haddii ay la shaqeeyaan waxa ay ku tilmaantay "duullaanka militari ee ka dhanka ah Iiraan," ay noqon doonaan bartilmaameed sharci ah oo ay beegsan karaan ciidamada qalabka sida ee Iiraan.

   Bayaanka ayaa waxaa daabacay wakaaladaha wararka ee rasmiga ah ee Iiraan subaxnimadii Isniinta, 12-ka Luulyo,

   "Iyadoo ay 25 maalmood oo keliya ka soo wareegtay saxiixii heshiiska lagu soo afjarayay dagaalka, nidaamka Maraykanku wuxuu si cad ugu tuntay ku dhowaad dhammaan qodobbadii heshiiskaas, wuxuuna galay dambiyo dagaal oo aad u culus isagoo weeraray kaabayaasha gaadiidka ee Iiraan, doomaha kalluumeysiga, maraakiibta xamuulka, xarumaha saadaasha hawada iyo dhismayaal kale."ayaa lagu yiri bayaanka.

   Wasaaradda Arrimaha Dibadda ee Iiraan ayaa sidoo kale sheegtay i dalalka dariska ay waajib ku tahay in ay ka hortagaan duulaan laga soo qaado dhulkooda

   "Dalalka deriska ah waxaa waajib ku ah sharciga caalamiga ah inay ka hortagaan in dhulkooda ama xarumahooda loo adeegsado duullaan militari oo ka dhan ah Iiraan. Goob kasta oo laga soo abaabulo ama laga fuliyo weerarro ka dhan ah Iiraan waxay noqon doontaa bartilmaameed sharci ah oo ay beegsan doonaan weerarrada difaaca ee ciidamada geesiyaasha ah ee Jamhuuriyadda Islaamiga ah ee Iiraan."

   Dhanka kale, hay’adda cusub ee loo xilsaaray maamulka isu-socodka Marinka Hormuz ayaa sheegtay in weerarrada militari iyo dhaq-dhaqaaqa ciidamada Maraykanka ee biyaha Gacanka Faaris ay yihiin sababta loo hakiyay isu-socodka maraakiibta, waxayna ku dhawaaqday in Marinka Hormuz uu xirnaan doono ilaa amar dambe.

9. 6 Saacadood ka hor16 qof oo gaajo ugu dhintay dalka Uganda

   

   Xigashada Sawirka, Getty Images

   Dowladda Uganda ayaa sheegtay in 16 qof ay toddobaadyadii la soo dhaafay gaajo ugu dhinteen gobolka Karamoja, oo ku yaalla waqooyi-bari dalka.

   Sida ay dowladda Uganda sheegtay, abaarta daba dheeraatay ayaa sabab u noqotay macluusha ka jirta gobolka.

   Beeraleyda ayaa sheegay in dalagyadoodii ay baaba’een sababo la xiriira abaarta daran, iyadoo roobabkii la filayay laga bilaabo bisha Abriil ilaa bilowgii xilliga beerashada ay aad u yaraayeen ama gebi ahaanba aysan di’in.

   Khubarada ayaa sheegay in gobolka uu wajahayo cunto yari ay sabab u yihiin isbeddelka cimilada, roob la’aanta, xaalufinta dhirta, daaqsinka xad-dhaafka ah iyo xaalufka deegaanka. Waxay ka digeen in arrimahan ay bulshada u horseedi karaan gaajo baahsan.

   Ra’iisul Wasaaraha Uganda, Robinah Nabanja, ayaa sheegtay in kumannaan qoys ay waayeen cunnadoodii iyo dalagyadoodii. Waxay intaas ku dartay in xafiiskeedu uu sugayo go’aanka Golaha Wasiirrada si gargaar loogu fidiyo deegaannada ay dhibaatadu saameysay.

   Waxay sheegtay in dowladdu ay bixinayso gargaar degdeg ah.

   Sidoo kale, waxaa la sheegay in dalagyo ay ka mid yihiin baradhada, bisinga iyo bocorka ay ku baaba’een abaarta.

10. 7 Saacadood ka horQaraxyo cusub oo laga maqlay agagaarka Sirik, Bandar Abbas iyo Jask ee Iran

    Wakaalado warar oo ku dhow ilo militari oo Iiraan ah ayaa sheegay in qaraxyo laga maqlay deegaannada ku dhow Sirik, Bandar Abbas iyo Jask.

    Isla waqtigaas, Taliska Dhexe ee Ciidamada Maraykanka (CENTCOM) ayaa daqiiqado ka hor ku dhawaaqay in ciidamadiisu ay bilaabeen wareeg cusub oo weerarro ah oo ka dhan ah Iiraan, kuwaas oo billowday 5:00 galabnimo Axaddii (Waqtiga Bariga Maraykanka).

    Bayaanka CENTCOM ayaa lagu sheegay in ujeeddada weerarradan ay tahay in la sii wiiqo awoodda Iiraan ee lagu weeraro maraakiibta rayidka ah iyo kuwa ganacsiga ee si xor ah uga gudba Marinka Hormuz.

    CENTCOM ayaa sidoo kale sheegtay in Taliyaha Guud ee Ciidamada Maraykanka, Donald Trump, uu amar ku bixiyay weerarradan, isagoo ujeeddadu tahay "in ciidamada Iiraan lagula xisaabtamo falalkooda."

11. 7 Saacadood ka horXoghayaha Guud ee Qaramada Midoobay ayaa ugu baaqay Maraykanka iyo Iiraan inay soo afjaraan colaadda

    

    Xigashada Sawirka, Reuters

    Xoghayaha Guud ee Qaramada Midoobay Antonio Guterres ayaa Axaddii ugu baaqay Maraykanka iyo Iiraan inay joojiyaan wareeggan cusub ee dagaalka isla markaana dib ugu laabtaan wada-hadallada si loo soo afjaro colaadda.

    Guterres wuxuu si gaar ah uga hadlay weerarrada Maraykanka ee ka dhanka ah Iiraan, iyo sidoo kale weerarrada Iiraan ay ku qaaday maraakiibta ku sugan Marinka Hormuz iyo saldhigyada ay leeyihiin xulafada Maraykanka ee gobolka Gacanka Faaris.

    "Weerarradan waa in la joojiyaa," ayuu yiri Stephane Dujarric, afhayeenka Antonio Guterres, bayaan uu soo saaray.

    Baaqan ayaa yimid xilli ay iska horimaadyadu sii xoogeysanayeen tan iyo fiidnimadii Axadda.

12. 8 Saacadood ka horBurkina Faso, Mali iyo Niger ayaa ka wada hadlay xoojinta ciidankooda milateri ee wadajirka ah

    

    Xigashada Sawirka, EPA

    Wasiirrada Difaaca ee Burkina Faso, Mali iyo Jamhuuriyadda Niger ayaa kulan ku yeeshay magaalada Ouagadougou, si ay dib ugu eegaan tallaabooyinka lagu xoojinayo ciidanka wadajirka ah ee Isbahaysiga Dowladaha Saaxil (AES), sida ay sheegtay RFI 11-kii Luulyo.

    Wasiirka Difaaca Burkina Faso, Celestin Simpore, ayaa sheegay in ujeeddada kulanku ahayd in la caddeeyo qorshayaasha iyo hawlaha ciidamada wadajirka ah.

    Kulankan ayaa imaanaya xilli ay sii kordhayaan weerarrada kooxaha jihaad-doonka ah, iyadoo weerarro waaweyn ay ka dhaceen Mali iyo Burkina Faso. Weeraradan waxaa lala xiriirinayaa kooxda Jama’at Nusrat al-Islam wal-Muslimin (JNIM) oo xiriir la leh Al-Qaacida.

13. 8 Saacadood ka horWakaaladda Wararka ee Mehr ayaa sheegtay in laba gantaal ay ku dhaceen jasiiradda Abu Musa

    Wakaaladda wararka ee Mehr, oo soo xiganaysa ilo maxalli ah, ayaa sheegtay in qarax laga maqlay Jasiiradda Abu Musa, oo ku taalla qaybta koonfureed ee Iiraan, iyo sidoo kale magaalada Bandar Abbas.

    Wakaaladdu waxay intaas ku dartay:"Qaraxyo kale oo dhowr ah ayaa laga maqlay Bandar Abbas, kuwaas oo u muuqday inay la xiriiraan rasaas ama wax ku dhacay aagga badda. Si kastaba ha ahaatee, lama soo sheegin wax weerar ah oo ka dhacay Jasiiradda Lark."

    Wakaaladda wararka ee Fars ayaa iyaduna sheegtay:"Dhawaqa qaraxyo dhowr ah ayaa laga maqlay bariga Bandar Abbas iyo aagga badda ee Qeshm."

14. 9 Saacadood ka horCiyaaryahan uga qeyb galay Koonfur Afrika Koobka Adduunka oo geeriyooday

    

    Xigashada Sawirka, Getty Images

    Ciyaaryahanka khadka dhexe ee Koonfur Afrika, Jayden Adams, ayaa geeriyooday isagoo 25 jir ah, toddobaadyo uun kaddib markii uu dalkiisa u matalay Koobka Adduunka.

    Adams, oo u ciyaari jiray Mamelodi Sundowns, ayaa ka soo muuqday dhammaan saddexdii kulan ee ay ciyaartay xulka Koonfur Afrika, ka hor intii aan laga reebin tartanka kaddib guuldarro ka soo gaartay martigeliyeyaasha Canada.

    "Waxaan si weyn uga naxay ugana murugooday geerida Jayden Adams," ayuu ku yiri bayaan uu soo saaray Wasiirka Ciyaaraha, Fanka iyo Dhaqanka ee Koonfur Afrika, Gayton McKenzie.

    "Waa maalin murugo u ah kubadda cagta Koonfur Afrika. Waxaan weynay mid ka mid ah ciyaartoydii ugu hibada badnayd ee da'da yar. Dalkeenna wuxuu la murugoonayaa qoyskiisa, saaxiibbadiis kooxda iyo malaayiinta taageerayaal ah ee arkay isaga oo ka soo baxay akadeemiyadda kuna soo baxay heer uu ka noqday ciyaaryahan buuxa oo xulka Bafana Bafana ah," ayuu hadalkiisa ku daray.

    Booliska Koonfur Afrika ayaa sheegay inay bilaabeen baaritaan kaddib markii meydka ciyaaryahanka laga helay gurigiisa oo ku yaalla duleedka Cape Town, subaxnimadii Sabtida.

    Wasiir Gayton McKenzie ayaa sidoo kale sheegay:"Sababta dhimashada Jayden weli lama xaqiijin."

15. 9 Saacadood ka horIiraan ayaa sheegtay in wax soo saarka diyaaradaha aan duuliyaha lahayn uu saddex jibaarmay

    

    Xigashada Sawirka, Getty Images

    Wasiirka ku-meel-gaarka ah ee Difaaca Iiraan ayaa sheegay in intii uu socday dagaalkii u dhexeeyay Maraykanka, Israa’iil iyo Iiraan, aan la joojin mashaariicda soo saarista gantaallada iyo diyaaradaha aan duuliyaha lahayn (drones), balse halkii ay ka sii socdeen, wax-soo-saarka drones-ka uu saddex jibbaarmay.

    Sarreeye Guuto Majid Ibn-e-Reza ayaa hadalkan ka sheegay Sabtidii kulan wadajir ah oo ay yeesheen mas’uuliyiinta Wasaaradda Difaaca iyo xubnaha Guddiga Amniga Qaranka iyo Siyaasadda Arrimaha Dibadda ee Baarlamaanka Iiraan.

    "Waxaan si fiican uga warqabnaa daciifnimada cadowga, sidoo kalena si buuxda ayaan u garanaynaa awooddeena," ayuu yiri General Majid Ibn-e-Reza.

    Wasiirku wuxuu intaas ku daray in Maraykanka iyo Israa’iil ay dagaalka u galeen ujeeddadoodu ahayd inay afgembiyaan nidaamka Jamhuuriyadda Islaamiga ah ee Iiraan, balse ay ku guuldarreysteen inay gaaraan hadafkaas.

    "Dagaalladii dhowaa waxay muujiyeen in aqoonyahannada Iiraan iyo maalgelinta tiknoolajiyada casriga ahi ay yihiin tiirarka ugu muhiimsan ee lagu xoojinayo awoodda difaaca dalka," ayuu yiri Majid Ibn-e-Reza.

    Wasiirka ku-meel-gaarka ah ayaa sidoo kale carrabka ku adkeeyay: "Awoodaha difaaca ee Jamhuuriyadda Islaamiga ah ee Iiraan, gaar ahaan dhinacyada gantaallada iyo diyaaradaha aan duuliyaha lahayn, waa xariiq aan laga gudbi karin marka laga eego dhinaca amniga qaranka. Marna kama mid ahayn, mana noqon doonaan mustaqbalka, waxyaabaha lagu gorgortamo."

16. 12 Luulyo 2026Jasiiradda Qeshm ee Iran oo weerar lala beegsaday

    Guddoomiyaha Jasiiradda Qeshm ayaa ku dhawaaqay in weerarro cusub lagu qaaday jasiiradda.

    Hossein Amir-Teimouri ayaa wakaaladda wararka ee dowladda Iiraan ee IRNA u sheegay in fiidnimadii Axadda ay 10 illaa 11 gantaal ku dhaceen Jasiiradda Qeshm.

    Sida uu sheegay Teimouri, "dhammaan bartilmaameedyadu waxay ahaayeen goobo militari," wuxuuna intaas ku daray in "aysan jirin wax khasaare nafeed ah."

    Horey, warbaahinta Iiraan oo soo xiganaysa ilo deegaanka ah ayaa sheegtay in qaraxyo dhowr ah laga maqlay Bandar Abbas iyo Qeshm.

    Wakaaladda wararka ee Fars ayaa sheegtay in "dhawaqa qaraxyo dhowr ah laga maqlay bariga Bandar Abbas iyo deegaanka badda ee Qeshm."

    Sidoo kale, wakaaladdu waxay sheegtay in "dadka deggan deegaanka Masan, oo ku yaalla koonfurta Jasiiradda Qeshm, ay iyaguna maqleen qaraxyo dhowr ah."

17. 12 Luulyo 2026Kuwait oo shaacisay weeraro cusub oo lagu qaaday xarun Shidaal

    

    Xigashada Sawirka, Getty Images

    War-saxaafadeed ay soo saartay wasaaraddda gaashaandhiga Kuwait ayaa lagu sheegay in "saddex xarumood oo ku yaalla waqooyiga Kuwait lala beegsday weerar cadow, taasoo sababtay khasaare hantiyeed."

    Sidoo kale, war-saxaafadeedka ayaa sheegay in "goob shidaal oo badeed oo ay leedahay Shirkadda Shidaalka Kuwait lagu weeraray diyaarad aan duuliye lahayn , taasoo sababtay khasaare hantiyeed iyo dhaawaca hal shaqaale."

    Ciidamada qalabka sida ee Kuwait ayaa adkeeyay inay diyaar u yihiin inay qaadaan dhammaan tallaabooyinka lagama maarmaanka ah si loo ilaaliyo amniga iyo xasilloonida dalka.

    Dhanka kale, warbaahinta Iiraan ayaa sheegtay in "la weeraray goobta ay ku sugan yihiin cutubka gantaallada dhulka ee Ciidanka Maraykanka ee Kuwait."

    Ilaa hadda, Ciidanka Qalabka Sida ee Iiraan iyo Ciidanka Ilaalada Kacaanka Islaamiga ah (IRGC) midkoodna kama uusan soo saarin war rasmi ah oo ku saabsan arrintan.

18. 12 Luulyo 2026Mareykanka oo sheegay in Marinka Hurmuz uu faran yahay

    

    Xigashada Sawirka, Reuters

    Daqiiqado kaddib markii Iiraan ay mar kale ku celisay in ay xirtay Marinka Hormuz, Taliska Dhexe ee Ciidamada Maraykanka (CENTCOM) ayaa ku dhawaaqay in marinkaasi uu weli furan yahay, isla markaana ciidamadoodu ay "diyaar u yihiin oo la geeyay" si loo xaqiijiyo xorriyadda iyo ammaanka maraakiibta.

    "Marinka Hormuz wuxuu u furan yahay dhammaan maraakiibta si sharci ah uga gudbaya marin-biyoodkan caalamiga ah. Ciidamada Maraykanku waa la geeyay, waana diyaar si loo xaqiijiyo in xorriyadda isu-socodka baddu ay sii socoto,."ayaa lagu yiri qoraalka CENTCOM.

    CENTCOM ayaa sidoo kale carrabka ku adkeeyay:"Iiraan ma maamusho Marinka Hormuz."

    Saacad ka hor bayaanka CENTCOM, hay'adda ay Iiraan u xilsaartay maamulka Marinka Hormuz ayaa ku dhawaaqday in marin-biyoodkaasi uu xiran yahay.

19. 12 Luulyo 2026Ciidamada IRG ayaa sheegay in ay gantaal ku soo rideen dibadda magaalada Khorramabad.

    

    Xigashada Sawirka, IRNA

    Ciidamada Ilaalada Kacaanka Iran IRG ayaa sheegay in ay ku soo rideen “gantaal cadowgu leeyahay” bannaanka magaalada Khorramabad.

    Sida ay sheegtay wakaalada wararka Iran ee IRNA, sarkaalka xiriirka dadweynaha ee Ciidamada Ilaalada Kacaanka, Abolfazl, ayaa sheegay saakay in qalabka casirga ee difaaca hawada ay soo rideen gantaal Mareykanka soo tuuray.

    Dhanka kale madaxda ammanka ayaa sheegay in gantaal Iran oo kor loo qaadayay uu waxyeelo u geystay meel baabuurta la dhigto oo ku taal magaalada Durood.

    “Dhacdadan wax khasaare nafeed ah kama dhallan ama waxyeelo halis ah, mana jirin gantaal magaalada lagu sooweeraray” ayuu yiri Saeed Pourali oo ah ku xigeenka madaxa arrimaha siyaasadda iyo amniga.

    Sii akhri

    Farriin nuucee ah ayay diraysaa wafdiga uu Shiinuhu u diray aaska Ayutallah Cali Khamenei?

    Guddoomiye hore oo baarlamaan ee dal muslim ah oo loo gacan galiyay Maraykanka si loo maxkamadeeyo

    Sidee ayey uga hortagaan jees-jeeska ay la kulmaan ragga sita magaca hooyada?

20. 12 Luulyo 2026Sidee ayey uga hortagaan jees-jeeska ay la kulmaan ragga sita magaca hooyada?