Urraman do dhithis anns na h-Eileanan an Iar

Chaidh urraman a bhuileachadh air dithis anns na h-Eileanan an Iar air liosta Urraman Co-là breith an Rìgh.

Tha OBE a' dol gu Malcolm Burr, a bha fad bhliadhnaichean na àrd-oifigear air Comhairle nan Eilean Siar is cuideachd na fhear-gairm air Bòrd Stiùiridh Taghaidh na h-Alba.

Chaidh Mgr Burr cuideachd a chur mar stiùiriche air Stòras Uibhist bho chionn ghoirid.

Tha e air OBE fhaighinn airson seirbheisean poblach.

Chaidh urram BEM a bhuileachadh air Bella Chamshron, Ceannard a' Chidsein ann an Loidse Ghroigearraidh ann an Uibhist a Deas.

Tha seo airson seirbheisean gu Aoigheachd agus an Eaconamaidh Dhùthchail ann an Uibhist a Deas.

Thuirt Morair-ionaid a' Chrùin anns na h-Eileanan an Iar, Iain MacAmhlaigh, gu bheil an dithis air seirbheis phoblach ionmhalta a dhèanamh is gu bheil iad gu math airidh air urram fhaighinn.