Chaill neach-cùraim a mhaoidh air seann duine an clàradh proifeastanta

Boireannach ann an aodach dubh le a ceann còmhdaichte, agus miotagan dìon gorm na làimh. Tha i na seasamh ri taobh bòrd beag air a bheil siuga, cupa agus truinnsear le pìos ceic SU CHRISTIE

Chaidh Amina Sani fhilmeadh gu dìomhair a' maoidheadh air an duine agus air a chur mun cuairt

Tha neach-cùraim air an clàradh proifeasanta aice a chall an dèidh mar a sheall bhideo a thogadh gu dìomhair i a' magadh air agus a' maoidheadh air fireannach a bha 80 bliadhna de dh'aois agus na leabaidh gun comas coiseachd.

Fhuaireadh gun tuirt Amina Sani, a bhuineas do Nigeria, ris an duine gum faigheadh i na poilis agus gun toireadh i sgleoc dha nuair a dh'fhàs e troimh chèile agus i a' dol a thoirt fras dha an aghaidh a thoil.

Nigh i an duine fhad 's a chùm neach-glanaidh greim air a ghàirdeanan.

Chaidh na thachair aig Dachaigh-cùraim Castlehill ann an Inbhir Nis a chlàradh le camara a chuir nighean an duine air falach, agus nochd am bhideo ann am prògram a' BhBC mu dhraghan theaghlaichean mu inbhe a' chùram sa ghoireas.

Thuirt neach-lagha Amina Sani ri èisteachd mì-ghiùlan Comhairle nan Seirbheisean Sòisealta Albannach nach d' fhuair i trèanadh ceart agus gur e seo a' chiad obair a bh' aice san Rìoghachd Aonaichte.

Ann am brath, thuirt a' chompanaidh leis a bheil an dachaigh - Morar Living - gun do ghabh iad ceumannan cho luath agus a chuala iad mu na draghan.

Thuirt iad nach robh "fìrinn sam bith" sa chasaid aig Sani nach deach a trèanadh gu dòigheil.

Thuirt iad gu bheil sàbhailteachd agus sunnd an luchd-còmhnaidh na phrìomhachas dhaibh.

'S e Morar Highland ainm na dachaigh a-nis agus chaidh a meas mar "math" san sgrùdadh cùraim mu dheireadh.

Tha èisteachd mu mar a dhèilig neach-cùraim eile, Oluwabunmi Salami, ris an aon fhireannach a' leantainn.

Tha Salami air aideachadh mar tha gun do chuir i suas agus sìos a leabaidh gun rabhadh a thoirt dha agus gun do dh'fhàg sin troimh chèile e.