Cuairt dheireannach Chupa MalCivils dheth chun na h-ath-bhliadhna
'S iad Am Bac a bhuannaich Cupa MalCivils an-uiridh.
- Air fhoillseachadh
Dhearbh cathraiche Chomann Ball-coise Leòdhais is Na Hearadh gun tèid cuairt dheireannach Chupa MalCivils am-bliadhna a chur dheth chun a' Ghiblein 2027.
Bha còir aig a' gheama eadar Barraigh is Am Bac a bhith ann Disathairne seo tighinn, às dèidh mar a chaidh a chur dheth an t-seachdain seo chaidh air sgàth na droch shìde.
Thuirt cathraiche a' chomainn, Brian Mac a' Ghobhainn, gu bheil an t-sìde agus trioblaidean siubhail dualtach buaidh a thoirt air a' gheama seo leis gu bheil am Foghair oirnn.
"'S ann air sgàth sin gur e spòrs samhraidh a th' ann am ball-coise sna h-Eileanan an Iar," thuirt e.
"Le sin, ghabh sinn an co-dhùnadh cuairt dheireannach Chupa MalCivils 2026 a ghluasad chun a' Ghiblein 2027.
"Thèid an dearbh là air an tèid an geama a chluich ainmeachadh nas fhaisge air an àm," thuirt e.
'S e seo an cupa airson sgiobaidhean nan Eilean Siar air fad.
'S iad Am Bac a bhuannaich an fharpais an-uiridh nuair a rinn iad a' chùis air an Rubha anns a chuairt dheireannaich 4-3.
