A' Chòisir Chuèir: "'S e coimhearsnachd an rud as cudromaiche"

Tha còisir Ghàidhlig ùr ann an Glaschu ag amas air luchd-ionnsachaidh agus fileantaich bhon choimhearsnachd LGDT a thoirt còmhla airson òrain Ghàidhlig a sheinn.

Chaidh sanas a sgaoileadh airson Còisir Cuèir, mar a th' aca orra fhèin, aig toiseach na bliadhna agus cha robh e fada mus robh a' chòisir làn, le 40 ball.

Tha a-nis timcheall air 40 neach eile air an liosta feitheimh.

Bha a' chòisir air an àrd-ùrlair airson a' chiad uair riamh oidhche Dhiardaoin aig tachartas GUIR.

'S i an seinneadair Josie NicDhonnchaidh a th' aig an stiùir.

"Cha do rinn sinn auditions no rud sam bith mar sin," thuirt i.

"Tha e doirbh a chreidsinn cho binn 's a tha a h-uile duine.

"Tha sinn gu math fortanach. Ach 's e coimhearsnachd an rud as cudromaiche an àite a bhith cho glan 's a ghabhas."

Tha measgachadh de dh'fhileantaich agus luchd-ionnsachaidh anns a' chòisir.

Tha Robbie Macleòid nam measg agus tha e a' còrdadh glan ris a bhith a' coinneachadh ri diofar Ghàidheal air nach do thachair e roimhe.

Ged a tha esan cuideachd na bhall de chòisirean Gàidhlig eile, tha e a' faicinn sgarradh eadar iad agus a' chòisir ùr, leis nach eil Còisir Cuèir ag amas air farpais aig a' Mhòd.

The a cuideachd den bheachd gu bheil a' chòisir seo air leth cudromach dhan choimhearsanchd LGDT.

"Gu h-àraid san là an-diugh," thuirt e, "tha sinn a' faicinn air feadh na Rìoghachd Aonaichte, bacaidhean gan cur air beulaibh dhaoine cuèir.

"Tha e cho feumail gu bheil àite againn airson a thighinn còmhla.

Tha Còisir Cuèir a' faighinn taic bho Ghlaschu Beò, a tha a' moladh seinn ann an còisir mar deagh dhòigh air Gàidhlig ionnsachadh.

Thathas cuideachd daonnan a' coimhead airson phròiseactan eadar-dhealaichte ris an cuir iad taic, a rèir Oifigear Ealain Gàidhlig na buidhne, Rona Dhòmhnallach.

"Chan eil sinn ag iarraidh gum bi duine sam bith air an oir," thuirt Rona.

"Thàinig Josie NicDhonnchaidh thugainn leis a' bheachd agus 's e beachd làidir, làidir a bh' ann.

"Bha sinn ann an suidheachadh far am b' urrainn dhuinn taic a chur ris agus tha an taic sin a' dol a leantainn."

Tha Còisir Cuèir a' coimhead air adhart ri bliadhna thrang - le fiachaidhean aca airson leithid Geamaichean a' Cho-fhlaitheis, Seachdain Pròis agus am Mòd Nàiseanta - ged nach bi iad a' farpais.

Ach ge b' i dè cho trang 's a bhios iad - chan atharraich prìomhachas na buidhne - sin àrainneachd a tha iad a' cruthachadh do dhaoine LGDT.

"Tha mi a' smaoineachadh gu bheil coimhearsnachd cudromach dhan a h-uile duine," thuirt Josie.

"Ach gu h-àraid nuair a tha dà rud ann a tha a' faireachdainn gu math eadar-dhealaichte, mar eiseimpleir a bhith nad Ghàidheal agus a bhith ann an coimhearsnachd LGBTQI+.

"Ach tha sinn an-còmhaidh air a bhith ann, tha sinn fhathast an seo agus a-nis tha sinn a' seinn còmhla agus tha sin sgoinneil."