Cuideachadh coimhearsnachd an Uibhist

Le draghan mun Choròna-Bhìoras, is daoine suas ann an aois fo chomhairle fuireach nan dachaighean, tha dà bhuidheann coimhearsnachd ann an Uibhist air tighinn suas le taic a nì feum.

Nochd draghan bho dhaoine air na meadhanan sòisealta ann an Uibhist mun uallach a bh' orra a bhith air am fàgail gun cheangal ris a' mhòr-sluagh, lè àitean dùinte is iad fo chomhairle fuireach a-staigh.

Cha robh e fada gus an tàinig freagairt bho thaobh staigh na coimhearsnachd agus daoine, is buidhnean, deònach cuideachadh a thoirt seachad. Tha co-dhiù dà bhuidheann ann an Uibhst a' tòiseachadh air ceanglaichean a dhèanamh eadar an dà chuid.

Dh'fhàg sin a' cheist ciamar a bha daoine a bha ag iarraidh taic a' dol a dh' fhaighinn na cobhair a bha dhìth orra. Sin far an do dh'aontaich Stòras Uibhist a dhol an sàs.

Cruinnichidh iadsan ainmean dhaoine a tha deònach cuideachadh agus, nuair a tha fios aca cò a tha feumach air taic, agus gu dè an taic a tha a dhìth orra, cuiridh iad brath chun an duine a chuidicheas iad.

Aig a' cheart àm, tha Comann Coimhearsnachd Ghriomasaigh air an dearbh rud a dhèanamh airson muinntir an eilein sin, agus iad ag iarraidh air daoine fios a chur thuca ma tha cuideachadh a dhìth.

Chan ann mu dheidhinn a bhith a' tadhal air daoine a bhitheas seo, is daoine mothachail mu na tha an Riaghaltas is buidhnean slàinte a' moladh, ach mu dheidhinn taic pragtaigaich.

Leithid ma tha stuth à bùth neo bhon dotair a dhìth air daoine, agus mura h-eil 's dòcha càirdean faisg orra, faodaidh cuideigin sin fhaighinn dhaibh agus fhàgail aig an taigh, neo aig a' gheata.

Cuideachd thathar ag iarraidh air daoine fios a chur air na buidhnean seo ma tha iad a' faireachdainn aonaranach, agus thèid aig daoine fònadh gu chèile airson beagan còmhraidh.

Tha buidhnean ann an Uibhist leithid Cuimhne agus Tagsa a tha fhathast a' toirt cuideachadh do dhaoine san sgìre mar a b' àbhaist dhaibh co-dhiù.

Is tha buidhnean eile mar Charaidean Uibhist a' cumail sùil air dè a tha fhathast a dhìth 's an t-suidheachadh sin, agus 's docha gun tèid aca air làmh a thoirt air rudan nach eil buidheann eile a' dèanamh.

Airson barrachd fiosrachaidh no ma tha taic a dhìth, cuireabh fòn gu Comann Coimhearsnachd Ghriomasaigh air 01870 603359 neo an seo., taobh a-muigh

Gheibhear grèim air Stòras Uibhist ma tha sibh airson cuideachadh le fòn air 01878 700101 no an seo, taobh a-muigh agus ainm is àireamh fòn a thoirt seachad, agus dè pìos de dh'Èirisgeigh, Uibhist a Deas neo Beinn na Faoghla 's a bheil sibh. No ma 's aithne dhuibh cuideigin a tha feumach air taic cuiribh fòn thuca.

'S e àm dha-rìreabh doirbh a bhitheas ann do ghnìomhachasan anns na sgìrean seo agus tha Stòras Uibhist cuideachd ag iarraidh air a' choimhearsnachd, far an gabh e dèanamh, taic a chumail leothasan cuideachd.