Atiku Abubakar emeriela ntuliaka imeụlọ ADC

Atiku Abubakar bụbu osote onyeisiala Naịjirịa eturula ugo na ntuliaka imeụlọ pati African Democratic Congress (ADC) mere iji họpụta onye ga-azọrọ ha ọkwa onyeisiala na ntuliaka afọ 2027.

ADC kwuru na Atiku Abubakar ji vootu 1,846,370 merie Rotimi Amaechi bụbu gọvanọ Rivas steeti onye ritere vootu 504,117 ebe Mohammed Hayatu-Deen ritere vootu 177,120.

N'okwu nnabata mmeri ya, Atiku Abubakar toro ndị pati ya maka etu ha si hazie ntuliaka ahụ n'ụzọ iwu kwadoro ma kwuo na nke a gosiri na ọchịchị onyekwuouche ya ka kwụrụ chịm na pati ADC

Onyeisioche pati ADC bụ David Mark kwuru na mpụtara ntuliaka ahụ bụ nke gosiri ọchịchọ ndị pati ha ma kọwaa na enweghị mago mago ọbụla dị na ntuliaka ahụ.

ADC akwụsịtụla ịkpọpụta mpụtara ntuliaka imeụlọ onyeisiala maka emume Sallah 'Eid-el-Kabir'

Pati Afrcan Democratic Congress (ADC) ekwuola na ha akwụsịtụla ịkpọpụta mpụtara ntuliaka imeụlọ onye ga-azọrọ ha ọkwa onyeisiala na ntuliaka afọ 2027.

Onyeisioche kọmitii na-ahụ maka ntuliaka imeụlọ ahụ bụ Ikechi Emenike, kwuru na ha mere nke a iji nye ndị otu ha bụ ndị okpukperechi Alakụba ohere imerube emume Eid-el-Kabir.

Ọ kọwakwara na ọ bụkwa iji nye ndị rụrụ ọrụ dịka n'oge ntuliaka ahụ na steeti dị iche iche ohere ka ha mee njem laghachita Abuja.

Emenike kwuru na ha ga-amalite ịkpọpụta mpụtara ntuliaka ahụ ọzọ ma ọ kụọ elekere asatọ nke abalị n'ụbọchị Wenezde 27 Mee, 2026.

Cheta na ADC nọrọ n'ụbọchị Tuzde 26 Mee, 2026, malite ịchịkọta mpụtara ntuliaka imeụlọ ha mere na Naịjirịa niile gbaa gburugburu.

Ọ bụ Rotimi Amaechi bụbu Gọvanọ Rivas steeti nakwa minista na-ahụ maka njem na Naịjirịa, Atiku Abubakar bụbu osote onyeisiala Naịjirịa na onye ji ego achụ ego bụ Hayatu Deen zọrọ ntuliaka imeụlọ ADC ahụ.

Ka ọ dị ugbua, ọ bụ Atiku Abubakar na-emeri na mpụtara steeti dị iche iche ADC kpọpụtagoro ugbua na ntuliaka ahụ ebe Rotimi Amaechi na Hayatu-Deen gbara isi akwara ma kwuo hoo ha na ha anabataghị mpụtara ntuliaka ahụ.

Ka mpụtara ahụ si kwụrụ ugbua

Akụkọ kwuru na a kpọpụtala mpụtara ntuliaka ahụ si na steeti iri abụọ na anọ ebe ọ bụ naanị steeti iri na abụọ fọdụrụ tupu a kwụsịtụ ịkpọpụta mpụtara ahụ.

Steeti ndị a kpọpụtara mpụtara ha bụ Borno, Kebbi, Anambra, Abia, Ekiti, Ondo, Gombe, Oyo, Imo, Yobe, Nasarawa, Enugwu, Benue, Osun, Adamawa, Kogi, Kano, Akwa Ibom, Ebonyi , Niger, Plateau, Sokoto, Taraba Zamfara nakwa Abuja.

Ozi kwuru na Atiku Abubakar nwetara mmeri na Gombe, Abia, Ebonyi, Sokoto, Zamfara nakwa ọtụtụ steeti ndị ọzọ.

Zamfara Steeti:

Atiku Abubakar – 60,500

Hayatu-Deen – 446

Rotimi Amaechi – 191

Yobe Steeti:

Atiku Abubakar – 44,841

Hayatu-Deen – 365

Rotimi Amaechi – 300

Sokoto Steeti:

Atiku Abubakar – 68,823

Hayatu-Deen – 319

Rotimi Amaechi – 292

Gombe Steeti:

Atiku Abubakar – 139,334

Hayatu-Deen – 464

Rotimi Amaechi – 1,150

Abia Steeti:

Atiku Abubakar – 25,152

Hayatu-Deen – 3,264

Rotimi Amaechi – 18,339

Ebonyi Steeti:

Atiku Abubakar – 15,300

Hayatu-Deen – 200

Rotimi Amaechi – 2,200

Edo Steeti:

Atiku Abubakar – 17,729

Hayatu-Deen – 1,906

Rotimi Amaechi – 10,116

Kebbi Steeti:

Atiku Abubakar – 65,523

Hayatu-Deen – 454

Rotimi Amaechi – 5,931

Anambra Steeti:

Atiku Abubakar – 58,556

Hayatu-Deen – 7,861

Rotimi Amaechi – 17,085

Ekiti Steeti:

Atiku Abubakar – 18,395

Hayatu-Deen – 149

Rotimi Amaechi – 1,574

Amaechi na Hayatu-Deen ajụla ịnabata mpụtara ntuliaka imeụlọ ADC dịka Atiku na-emeri na steeti 22

Rotimi Amaechi na Mohammed Hayatu-Deen ekwuola na ha anabataghị mpụtara ntuliaka ime pati African Democratic Congress (ADC) mere iji họpụta onye ga-eji ọkọlọtọ ha zọọ ọkwa onyeisiala na ntuliaka afọ 2027.

Ozi Amaechi wepụtara n'akara X ya n'ụbọchị Tuzde 26 Mee 2026, kwuru na ekweghị ọtụtụ ndị otu pati ADC tụọ vootu na ntuliaka imeụlọ ahụ na steeti dị cihe iche dịka ọ kọwara na e nwere ọtụtụ nrụrụaka e mere na ntuliaka ahụ.

Amaechi kwuru na mpụtara ntuliaka imeụlọ ahu rụrụ arụ.

N'otu aka ahụ, Hayatu-Deen kwuru na ya agaghị abịa ebe a na-akpọpụta mpụtara ntuliaka imeụlọ ahụ. O kwupụtara nnukwu nchegbu ya banyere akụkọ mmebi iwu na , nrụrụaka na aghụghọ mere na gburugburu Naịjirịa na ntuliaka ahụ.

Amaechi na Hayatu-Deen rụtụrụ aka na ha na-atụle ihe ha ga-eme mgbe e mechara ntuliaka imeụlọ ahụ.

Atiku na Amaechi ga-ama aka na ntuliaka imeụlọ pati ADC maka ịzọ ọkwa onyeisiala

Onye bụbu osote onyeisiala Naịjirịa na onye bụbu minista na-ahụ maka njem na Naịjirịa nakwa otu onye rụburu ọrụ n'ụlọakụ bụ mmadụ atọ e kwupụtara na ha ga-ama aka na ntuliaka imeụlọ nke pati African Democratic Congress (ADC).

Atiku Abubakar, Rotimi Amaechi na Mohammed Hayatu-Deen ga-ama aka dịka pati ADC ga-ahọpụta onye ga-eji ọkọlọtọ pati ha zọọ ọkwa onyeisiala na ntuliaka Naịjirịa ga-eme n'afọ 2027.

N'agbanyeghị na ADC bu ụzọ tụlee ịnabata usoro iwepụta otu onye mmadụ niile ga-akwado, ugbu a pati ahụ ga-aga n'ihu ime ntuliaka imeụlọ n'ihi na akụkọ kwuru na o nweghị onye chọrọ iwezuga onwe ya na ntuliaka ahụ.

Cheta na Atiku Abubabar bụ onye zọburu ọkwa onyeisiala Naịjirịa ugboro ugboro, arụọla ọrụ dị mkpa n'ịgbalị ijikọta ndị na-agba gọọmenti mgba ọnụ n'okpuru pati ADC tupu ntuliaka nke afọ 2027.

Dịka ya na onye bụbu onyeisi ụlọomeiwu Sineti Naịjirịa bụ David Mark na onye bụbu gọvanọ Osun steeti bụ Rauf Aregbesola, na-arụkọ ọrụ — ndị bụzi onyeisioche mba na odeakwụkwọ mba nke pati ahụ — Atiku akwadola ịmepụta otu ndị ga-ama Onyeisiala Bola Tinubu aka na ntuliaka 2027.

Ọtụtụ ndị isi ndọrọ ndọrọ ọchịchị a ma ama a kọrọ na ha so na ndị otu ya gụnyere onye bụbu Ọkaiwu Ukwu nke Naịjirịa bụ Abubakar Malami, onye bụbu Gọvanọ Kaduna steeti bụ Nasir El-Rufai, onye bụbu minista Egwuregwu bụ Bolaji Abdullahi, na onye bụbu odeakwụkwọ nke gọọmentị naịjirịa bụ Babachir Lawal.

N'aka nke ọzọ, Chibuike Rotimi Amaechi bụbu aka chịrị Riva steeti bụkwa onye ndọrọ ndọrọ ọchịchị ọzọ karaaka na-ama Atiku Abubabar aka na ntuliaka imeụlọ ADC a.

Amaechi bụkwa onye a mara dịka otu n'ime ndị malitere otu pati n'ọchịchị bụ All Progressive Congress (APC) ma bụkwa onye na-egosipụta onwe ya dịka onye nwereike iweghachi ntụkwasị obi ọhanaeze n'ọchịchị Naịjirịa.

Onye nke atọ bụ Mohammed Hayatu-Deen, na-egosipụta onwe ya dịka onye teknụzụ nwere ahụmịhe iji merie nsogbu akụnaụba na ọchịchị Naịjirịa.

Onye ọkachamara n'ihe gbasara akụnụba dị afọ iri asaa na abụọ ekwuola ugboro ugboro na Naịjirịa chọrọ ọchịchị lekwasịrị anya n'ikike, ọzụzụ na amụma ndị mmadụ nọ.

Onye bụbu onyeisi ụlọọrụ FSB International Bank Plc lekwasịrị anya na iweghachi akụnaụba, ọrụ ndị ntoroọbịa, na mgbanwe ụlọọrụ - okwu ndị o kwuru dị oke mkpa bụ iji dozie ihe isi ike na enweghị ntụkwasị obi nke mba ahụ.

ADC ewepụtala oge ha ga-eme ntulịaka, họpụta ndị ga-azọrọ ha ọkwa n'afọ 2027

Otu ndọrọndọrọ ọchịchị 'African Democratic Congress (ADC) ewepụtala oge ha ga-eme ntulịaka, họpụta ndị ga-azọrọ ha ọkwa dị icheiche n'afọ 2027.

ADC mere ka a mata nke a n'akwụkwọ ozi odeakwụkwọ ha bụ Bolaji Abdullahi binyereaka n'ụbọchị Sọnde.

Dịka akwụkwọ ozi ahụ si kwuo, ADC ga-amalite ire akwụkwọ ikike ịzọ ọkwa ọchịchị bido n'abalị ise nke ọnwa Mee ruo n'abalị iri nke ọnwa Mee, 2026.

Ha tinyere abalị iri na otu, nakwa abalị iri na atọ dịka ụbọchị ndị zụtara akwụkwọ ikike ịzọ ọkwa ọchịchị ga-enwechita ya azụ dịka ha tinyechara ndekọ ha.

N'abalị iri na anọ ruo abalị iri na ise nke ọnwa Mee bụ ụbọchị a ga-eme nnyocha n'isi ndị zụtara akwụkwọ ikike ịzọ ọkwa na Patị ha; ebe Mee 18 na Mee 19, 2026 bụ ụbọchị ndị nwere okwu maka ndị chọrọ iji Patị ha zọọ ọkwa ga-enwete ozi ha mkpesa, mana Mee 20 bụ ụbọchị a ga-enwepụta ahụ ndị niile ga-azọrọ ha ọkwa.

Ihe ọzọ gbara ọkpụrụkpụ ADC kwuru bụ ego ndị chọrọ ịzọ ọkwa ga-akwụ maka akwụkwọ ikike.

Ego ele ha ga-akwụ gụnyere:

ADC na-eme nnukwu ọgbakọ ha n'agbanyeghị esemokwu banyere onye bụ onyeisioche ha

Pati African Democratic Congress' nke David Mark nọ n'isi ya, ekwuola na nnukwu ọgbakọ ha ga-aga n'ihu n'agbanyeghị esemokwu nakwa nsogbu inweta ogige ha ga-anọ mee ọgbakọ ahụ.

Ọgbakọ a na-abịa dịka a na-atụ anya mkpebi ụlọikpe mkpegharị banyere arịrọ David Mark n'akwụwkọ ikpe ọ gbara megide ikpe banyere onye bụ onyieisioche ADC.

Cheta na Nafiu Bala kpụpụrụ ADC n'ụlọikpe ma kwuo na ọ bụ ya kwesịrị ịbụ onyeisioche pati ahụ.

Esemokwu ahụ bụ ihe mere ụlọọrụ Independent National Electoral Commission (Inec) jiri kwuo na ha agaghị ahụta David Mark maọbụ Nafiu Bala dịka onyeisioche pati ADC ruo oge ụlọikpe kpebiri ikpe ahụ.

Ọ bụ mkpebi a mere ọtụtụ ji na-ajụ ka ụlọọrụ Inec a ga-anabata mpụtara nnukwu ọgbakọ a maka na ha kwuru na ha agaghị anabata David Mark na ndị ọrụ NWC ọzọ.

Ladan Salihu bụ osote onyeisioche mgbasaozi maka nnukwu ọgbakọ aụ kwuru na ha nwere olileanya na ha ga-eweta mmeri na mkpebi ụlọikpe ahụ.

O kwuru na usoro Inec wepụtara a ga-eji mee ntuliaka afọ 2027, bụ ihe mere ha ga-eji ghara iche ka ụlọikpe kpebie ikpe ahụ tupu ha eme nnukwu ọgbakọ ha.

Nsogbu banyere ogige ọgbakọ ahụ

Nnukwu ọgbakọ a ADC ga-eme ga-akpotụ n'ogige Rainbow Events Center dị n'Abuja.

Nke a na-abịa dịka mịnịsta na-ahụ Maka FCT bụ Nyesom Wike nakwa gọọmenti etiti kwuru na ha achọghị ka nnukwu ọgbakọ ahụ gaa n'ihu.

Ladan Salihu kwuru na pati ADC degaara ụlọọrụ na-ahụ maka ogige Eagle Square dị n'Abuja ka ha nye ha ikike ime nnukwu ọgbakọ ahụ ebe ahụ mana ha ekweghị. Ọgara n'ihu kwuo na ọtụtụ ụlọ oriri na nkwari dị n'Abuja ekweghị ka ADC mee ọgbakọ ha n'ogige ha.

O kwuru na otu ụlọ oriri na nkwari ha kwụrụ ụgwọ, mechara nyeghachi ha ego ha ma kwuo na ADC agaghị eme ọgbakọ ha n'ogige ha.

Salihu kwuru na o doro ha any ana mịnịsta FCT na gọọmenti etiti Naịjirịa na-arụkọ ọrụ igbochi ADC ime ọgbakọ ahụ.

N'aka nke ọzọ, Nyesom Wike kwuru na enweghị oge ọbụla pati ADC ji detara ya akwụkwọ ka e nye ha ikike iji ogige Eagle Square mee nnukwu ọgbakọ ha.

N'okwu Wike "Enwghị onye ọbụla detaara anyị akwụkwọ inye ha ikike maka ogige ahụ, enweghị ihe ga-egbochi anyị inye ha ya makana anyị ji ogige enweta ego".

Ozi Atiku Abubakar wepụtara n'ụtụtụ Tuzde 14 Eprel, 2026, kwuru na ụlọọrụ Rainbow Events Centre kwuru na NDỊISI FCT gwara ha na a ga-anapụ ha ikike ha ma ha nye ADC ogige ha maka nnukwu ọgbakọ ha chọrọ ime.

Atiku Abubakar kwuru na ADC kwụrụ ụgwọ niile ha kwesịrị ikwọ ma kọwaa nay a amaghị ihe mere e ji chọọ igbochị ha ime nnukwu ọgbakọ ha n'udo.

Ihe a na-atụ anya n'ọgbakọ a

A na-atụ anya ndị delegate dị 3,000 ga-esi mpaghara Naịjirịa niile n'ọgbakọ ahụ a ga-eme na Rainbow Events Center Abuja.

Ọnụ na-ekwuru ADC bụ Bolaji Abdulahi kwuru na ọgbakọ ahụ abụghị ọgbakọ e ji eme nhọpụta ndịisi ọhụrụ.

Nnukwu ọgbakọ di etu a, bụ oge pati ndọrọ ndọrọ ọchịchị ọbụla ji agbakọ ma nwee nkwekọrịta banyere ihe ụfọdụ na pati ha.

Bolaji kwuru na nnukwu ọgbakọ a bụ iji nye ohere ka ndị delegate ilebanye anya n'ihe ụfọdụ mkpebi ndịisi pati kpebiri.

A na-atụ anya na ADC ga-eji ohere ọgbakọ a gwa ndị nkwado ha niile na Naịjirịa gbaa gburugburu atụmatụ ha ji aga na ntuliaka afọ 2027 dịka pati dị iche iche ga-amalite ime ntuliaka ime ụlọ iji họpụta ndị ga-azọrọ ha ọkwa n'ime otu izuụka na-abịa dịka ntuziaka usoro Inec wepụtara si kwuo.