IKIBIRIRAHO , Umwongereza wanduye Ebola muri RD Congo agiye gusubizwa mu Bwongereza

Amakuru y'ikibiriraho

Didier Bikorimana na Gildas Yihundimpundu

1. Haciye isaha 1Trump avuga ko 'ahanini ni ukuri' ko intambara yo muri Iran ari yo yatumye abarepubulikani batsindwa mu matora

   

   Ahavuye isanamu, Reuters

   Perezida w’Amerika Donald Trump yavuze ko “ahanini ni ukuri” ko intambara Amerika yatangije kuri Iran muri uyu mwaka ari yo nyirabayazana yo gutsindwa kw’abarepubulikani mu matora yo hagati muri manda yabaye ku wa kabiri.

   Trump yabivuze ku wa gatatu nyuma yuko Visi Perezida w’Amerika JD Vance asohoye itangazo rirerire ku mbuga nkoranyambaga avuga ko intambara yo muri Iran ari yo yatumye ishyaka ry’abarepubulikani ritsindwa cyane muri ayo matora, bigatuma imitwe yombi – abadepite n'abasenateri – y’inteko ishingamategeko ubu igiye kugenzurwa n’abademokarate.

   Ni ryo jambo rya mbere Trump yari avuze mu ruhame kuva ishyaka ry’abarepubulikani ritsinzwe muri ayo matora.

   Iryo jambo yarivugiye aharimo kubakwa icyumba kinini cyane cy’ibirori n’iminsi mikuru cyo mu nyubako y’ibiro bye bya White House. Icyo cyumba ni kimwe mu bintu arimo kwibandaho cyane kuri iyi manda ye ya kabiri. Nta byinshi yavuze kuri politike.

   Nubwo nta byinshi yavuze ku byavuye mu matora, nyuma y’ijambo rye yemeye kubazwa ibibazo bicye n’abanyamakuru kuri iyo ngingo.

   Trump yabajijwe kuri iryo tangazo rya Visi Perezida w’Amerika.

   Trump yagize ati: “Ahanini ni ukuri.”

   “Byatumye igiciro cya gaze [gasoline] kizamuka gacye, by’igihe gito.”

   Ariko yavuze ko ku bijyanye n’iyo ntambara n’ubundi yakongera akabikora nk’uko. Yongeyeho ko ibiciro bya gaze ari byo byababaje abatora, ko atari intambara yo ubwayo.

   Kuri Minisitiri w’ingabo Pete Hegseth, Trump yavuze ko atarimo gutekereza ku kumwirukana, avuga ko yakoze “akazi keza cyane”.

   Ku bijyanye n’abademokarate, Perezida w’Amerika yavuze ko yiteguye gukorana na bo, igihe cyose bazaba “badasenya”. Yavuze ko agifite ububasha bwo kuburizamo amategeko yabo mu nteko ishingamategeko.

   Ayandi makuru yacu mushobora kuyakurikira kuri YouTube kuri BBC News Gahuza

   Izindi nkuru wasoma:

   Bamwe mu ba repubulikani bavuga ko Trump ari we watumye batsindwa kandi ko agomba kubibazwa

   Ibintu bibaye ubwa mbere mu mateka y'amatora yo muri Amerika

   Rwanda: Umurwi wa basketball wa APR wakuwe muri BAL kubera ibihano vya Amerika, bivugwa na NBA

2. Haciye amasaha 2Umwongereza wanduye Ebola muri RD Congo agiye gusubizwa mu Bwongereza

   

   Ahavuye isanamu, EPA

   Umwongereza w’umugabo wanduye Ebola muri Repubulika ya Demokarasi ya Congo (DRC) azasubizwa mu Bwongereza.

   Ni we Mwongereza wa mbere wemejwe ko yanduye Ebola muri iki cyorezo cya vuba aha cyatewe n’ubwoko bw’iyo virusi budakunze kuboneka ariko bwica bwa Bundibugyo bwagaragaye muri DRC, bumaze kwica abantu barenga 5,000.

   Ntibisobanutse igihe urugendo rw’indege rw’uwo mugabo ruzabera.

   Mbere, umuvugizi wa leta y’Ubwongereza yavuze ko hari “uburyo buhamye bwo guhangana n’ibintu nk’ibi” ndetse ko ibyago ashobora guteza ku bandi baturage b’icyo gihugu bikiri ku kigero cyo hasi.

   Mu gusubiramo ibiri mu nyandiko y’imbere aho akora BBC News yo itabonye, ibiro ntaramakuru Reuters byatangaje ko uwo mugabo wanduye Ebola ari umukozi wo mu rwego rw’ubuvuzi.

   Abantu bajyana Ebola mu Bwongereza barayanduriye ahandi ni ibintu bibaho gacye cyane mu Bwongereza ndetse nta mpfu byigeze biteza.

   Mu mateka y’Ubwongereza, abantu bane ni bo bemejwe ko banduye iyo virusi. Umwe, wayanduye mu 1976, byari bivuye ku byabereye muri laboratwari, ndetse n’abandi bakozi batatu bo mu rwego rw’ubuvuzi bari bari mu bikorwa byo guhangana n’icyorezo cya Ebola muri Afurika y’uburengerazuba hagati y’umwaka wa 2014 n’uwa 2015.

   Abantu barenga 10,000 bemejwe ko banduye Ebola muri iki cyorezo gishya – cyadutse ku nshuro ya 17 – mu burasirazuba bwa DRC kuva gitangajwe muri Gicurasi (5) uyu mwaka. Ni cyo cya kabiri kimaze kwica abantu benshi cyane, nyuma y’icyo cyo muri Afurika y’uburengerazuba.

   Ubu cyabaye icya mbere kimaze kwica abantu benshi mu mateka ya DRC, aho kugeza mu mpera y’ukwezi gushize cyari kiri ku gipimo cyo kwica kiri ku kigero cya 48.6%.

   Ayandi makuru yacu mushobora kuyakurikira kuri YouTube kuri BBC News Gahuza

   Izindi nkuru wasoma:

   Ebola: Iby'ingenzi wamenya kuri iyi ndwara yica iri muri DRC na Uganda OMS yavuze ko iteje inkeke ku isi

   Abarenga 5000 bamaze kwicwa na Ebola ya kabiri yishe abantu benshi ku isi

3. Haciye amasaha 2Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw'aka kanya.