Aba 'Marines' b'Ubwongereza binjiye mu bwato bw'Uburusiya bukora rwihishwa bw'ibiva kuri peteroli

Minisitiri w'intebe Sir Keir Starmer yavuze ko ingabo z'Ubwongereza zafashe ubwato bukora rwihishwa bw'Uburusiya butwara ibikomoka kuri peteroli, mu gace ka Channel (La Manche), mu masaha ya kare yo mu gitondo cyo kuri iki cyumweru.

La Manche ni agace k'amazi – cyangwa ubunigo – yo mu nyanja ya Atlantika gatandukanya amajyepfo y'Ubwongereza n'amajyaruguru y'Ubufaransa.

Mu gikorwa cya gisirikare (operation) cyamaze amasaha atandatu, abakomando bo mu mutwe wihariye wa Royal Marine wo mu ngabo zirwanira mu mazi, bafatanyije n'abashinzwe umutekano batojwe mu buryo bw'umwihariko bo mu kigo cy'igihugu cyo kurwanya ibyaha, binjiye muri ubwo bwato, bashyigikiwe n'ingabo zirwanira mu kirere (RAF).

Mu itangazo yasohoye, minisiteri y'ingabo yavuze ko ubwo bwato, bwitwa Smyrtos, buzafungirwa bukanakurikiranirwa ku nkombe yo mu majyepfo y'Ubwongereza mu gihe amaperereza akomeje.

Sir Keir Starmer yagize ati: "Iki gikorwa cya gisirikare cyagenze neza gishegeshe nanone Uburusiya ndetse ni ukwibutsa abenyegeza intambara ya Putin muri Ukraine ko tutazabareka ngo bihishe."

Urubuga rwo kuri murandasi rwitwa MarineTraffic rukurikirana ingendo z'amato rutangaza ko ubwato Smyrtos bugenda buriho ibendera rya Cameroun ndetse bukaba buparikwa ku nkombe yo ku cyambu cya Weymouth, cyo mu Bwongereza, mu bunigo bwa English Channel.

Ubwo bwato bwatangiye urugendo rwabwo ku itariki ya gatanu y'uku kwezi kwa Kamena, buhagurutse ku cyambu cy'Uburusiya cya Ust-Luga, gihunikwamo ibitoro kiri hafi y'umujyi wa St Petersburg, nyuma bwambuka bwerekeza mu burengerazuba bugana mu bunigo bwa Channel kuri uyu wa gatandatu, nkuko ishami rya BBC rigenzura ukuri kw'amakuru, BBC Verify, ryabitahuye.

Bwafatiwe ibihano muri Nyakanga (7) mu 2025 kandi kuva ubwo bwahinduye izina ryabwo riva kuri Myrtos rihinduka Smyrtos, ndetse buhindura inshuro ebyiri ibendera riba riburiho mu ngendo zabwo.

Uburusiya bumaze igihe bukoresha "amato akora mu buryo bwa rwihishwa" atwara ibikomoka kuri peteroli, ba nyirayo badasobanutse abo ari bo, mu rwego rwo gukwepa ibihano amahanga yabufatiye ku bikomoka kuri peteroli bwohereza mu mahanga.

Minisiteri y'ingabo z'Ubwongereza yavuze ko ayo mato akora rwihishwa arenga 700, yikorera 75% by'ibikomoka kuri peteroli byafatiwe ibihano, ari ikintu cy'ingenzi Kremlin (ibiro bya perezida w'Uburusiya) icungiraho.

Minisitiri w'ingabo w'Ubwongereza Dan Jarvis yagize ati: "Uburusiya bucungira ku mato yabo akora rwihishwa kugira ngo bubone amafaranga yo gukoresha mu ntambara yo muri Ukraine kandi uku kubuza [kububuza] kwacu gushegeshe intambara ya Putin inyuranyije n'amategeko."

Icyo gikorwa cya gisirikare cyari gishyigikiwe n'indege yo mu bwoko bwa RAF P-8 y'ingabo zirwanira mu kirere zo mu itsinda rishinzwe ibikorwa byo mu nyanja rizwi nka Maritime Air Group, hamwe n'ubwato bw'intambara bwitwa HMS Sutherland ndetse n'ubwato bw'intambara bwitwa HMS Ledbury.

Muri Werurwe (3) uyu mwaka, Minisitiri w'intebe yatangaje ko ingabo z'Ubwongereza "ubu zifite ubushobozi bwo kwinjira mu mato yafatiwe ibihano arimo kunyura mu mazi yacu".

Ubwongereza busanzwe bwarafatiye ibihano amato arenga 500.

Ibyo bihano bibuza ayo mato kwinjira ku byambu by'Ubwongereza ndetse binabuza kompanyi zo mu Bwongereza n'abantu bo mu Bwongereza guha serivisi z'imari, ubwishingizi, cyangwa ubuhuza (ubukomisiyoneri) amato atwara cyangwa atanga ibikomoka kuri peteroli by'Uburusiya.

Ubwo yavugaga ku ifatwa ry'ubwo bwato, umushinjacyaha mukuru w'Ubwongereza Richard Hermer yagize ati: "Iyi leta yagaragaje neza ko tuzakurikira amato y'Uburusiya akora rwihishwa n'imbaraga zose z'amategeko mpuzamahanga."

Leta y'Ubwongereza yavuze ko irimo gutumbereza ku nyungu z'Uburusiya ziva mu bikomoka kuri peteroli, mu rwego rwo "kuniga ahava inkunga y'intambara y'Uburusiya" yo muri Ukraine.

Perezida wa Ukraine Volodymyr Zelensky yashimye Ubwongereza ku bwo "gufata ingamba y'ingenzi ku bwato bw'Uburusiya butwara ibikomoka kuri peteroli".

Yanditse ku rubuga nkoranyambaga rwa X ati: "Uburayi bucyeneye byihutirwa gufata ingamba zo mu rwego rw'amategeko atari izo gutuma gusa habaho ifungwa ry'amato no kugabanya itwarwa ry'ibikomoka kuri peteroli, ahubwo no gufatira ibikomoka kuri peteroli [ayo mato] atwara."

Kemi Badenoch, umukuru w'abatavuga rumwe n'ubutegetsi mu Bwongereza, yashimye abasirikare b'"intwari" bakoze icyo gikorwa, yongeraho ati: "Nshyigikiye Leta ku bwo kwifatanya na Ukraine."

Minisiteri y'ingabo yavuze ko icyo gikorwa cya gisirikare cyo mu gitondo cyo kuri iki cyumweru cyakozwe ku bufatanye bwa hafi n'Ubufaransa, hubakiwe ku bufasha Ubwongereza buherutse guha ibihugu by'inshuti zabwo.

Ku itariki ya mbere y'uku kwezi kwa Kamena, Perezida w'Ubufaransa Emmanuel Macron yavuze ko ingabo z'igihugu cye, zifashijwe n'Ubwongereza, zafashe ubwato bwafatiwe ibihano butwara ibikomoka kuri peteroli bukora rwihishwa bucyekwaho gukorana n'ubu bw'Uburusiya bwafashwe kuri iki cyumweru.

Icyo gihe minisiteri y'ingabo z'Ubwongereza yabwiye BBC ko kajugujugu y'Ubwongereza yatanze ubufasha muri icyo gikorwa cya gisirikare.