Dim camau pellach yn erbyn Dan Thomas wedi ymchwiliad i honiadau o ymosod

Cafodd Dan Thomas ei arestio ym mis Medi ar amheuaeth o ymosod ac ymddwyn mewn modd sy'n rheoli neu'n gorfodi person arall
- Cyhoeddwyd
Mae'r heddlu wedi cadarnhau nad yw cyn-arweinydd Reform yng Nghymru yn wynebu unrhyw gamau pellach wedi iddo gael ei arestio ym mis Medi.
Ymddiswyddodd Dan Thomas fel arweinydd y blaid ar ôl iddo gael ei arestio ar amheuaeth o ymosod ac ymddwyn mewn modd sy'n rheoli neu'n gorfodi person arall.
Fe gadarnhaodd Heddlu Gwent brynhawn Mawrth fod "y dyn 45 oed a gafodd ei arestio" wedi ei ryddhau ac nad oedd yn wynebu unrhyw gamau pellach.
Dywedodd Mr Thomas ei fod wedi mynnu nad oedd wedi gwneud unrhyw beth o'i le o'r dechrau a bod y cyhoeddiad yma "yn brawf o hynny".
Helen Jenner yw arweinydd newydd Reform yng Nghymru
- Cyhoeddwyd21 Medi
Reform ddim yn diarddel y cyn-arweinydd Dan Thomas ar ôl ei arestio
- Cyhoeddwyd16 Medi
Cafodd Dan Thomas ei ddewis gan Nigel Farage, arweinydd Reform UK, i arwain y blaid yng Nghymru cyn etholiad y Senedd yn 2026.
Mewn datganiad ar 15 Medi dywedodd Mr Thomas ei fod wedi ei gyfeirio at yr heddlu a'i ryddhau heb gyhuddiad, ond nad oedd "am i'r penawdau sydd i ddod dynnu sylw oddi ar y gwaith gwych y mae ein tîm yn y Senedd yn ei wneud".
Ni chafodd Mr Thomas ei ddiarddel gan y blaid, ond fe ymddiswyddodd fel arweinydd a chafodd Helen Jenner ei hethol fel ei olynydd.
Dywedodd Ms Jenner mewn neges ar y cyfryngau cymdeithasol ei fod yn "newyddion gwych" a'i bod hi'n falch o weld enw ffrind agos yn cael ei "glirio".
'Cefais fy ngwneud yn destun honiadau ffug'
Mewn datganiad brynhawn Mawrth, dywedodd Dan Thomas: "Ar 13 Medi, cefais fy ngwneud yn destun honiadau ffug a dwi wedi bod yn cydweithredu'n llawn â'r heddlu.
"Mae Heddlu Gwent wedi cadarnhau eu bod yn dod â'r ymchwiliad i ben, heb gymryd camau pellach.
"Pan ddechreuodd hyn, mi ddywedais i nad oeddwn i wedi gwneud unrhyw beth o'i le. Mae'r cyhoeddiad yma yn brawf o hynny."
Fe ddiolchodd i'w blaid ac i Nigel Farage a Helen Jenner yn benodol gan ddweud eu bod wedi dangos "cefnogaeth arbennig".
"I'n nheulu a phobl y Coed-duon, fy nhref enedigol, diolch am sefyll wrth fy ochr.
"Mae'r etholwyr sydd wedi fy stopio ar y stryd i ddymuno'n dda wir wedi rhoi nerth i mi yn ystod y cyfnod yma."
Dywedodd Heddlu Gwent eu bod yn "cymryd unrhyw honiadau o ymosod ac ymddwyn mewn modd sy'n rheoli neu'n gorfodi person arall o ddifrif" a'u bod wedi cynnal "ymchwiliad trylwyr" i'r mater.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol .
Lawrlwythwch yr ap am y diweddaraf o Gymru ar eich dyfais symudol.