Rhai wedi methu â chael mynediad i ŵyl Tafwyl yn dilyn 'ambell anhawster'

Cefn pennau nifer fawr o bobl yn ciwio i gael mynedfa i ŵyl Tafwyl yng Nghaerdydd ddydd Sadwrn

Roedd ciwiau mawr wrth fynedfa safle Tafwyl ddydd Sadwrn - mae amcangyfrif fod diwrnod cyntaf digwyddiad eleni wedi denu 20,000 o bobl

Mae trefnwyr gŵyl Tafwyl wedi cydnabod bod rhai pobl wedi methu â chael mynediad i'r digwyddiad ddydd Sadwrn a bod oedi hir wrth y fynedfa i gannoedd wrth iddyn nhw gyrraedd.

Maen nhw hefyd yn ystyried lleoliadau posib eraill ar gyfer y dyfodol.

Mae 'na amcangyfrif bod 20,000 o bobl wedi mynychu diwrnod cyntaf yr ŵyl yng Nghastell Caerdydd.

Bydd Menter Caerdydd, sy'n trefnu'r digwyddiad, yn cynnal trafodaethau â Chyngor Caerdydd ynglŷn â lleoliadau posibl eraill yn y dyfodol.

Fe gafodd newidiadau eu cyflwyno wrth y fynedfa ddydd Sul i gyflymu'r broses o wneud gwiriadau diogelwch ar gyfer ail ddiwrnod yr ŵyl, sy'n dathlu 20 mlynedd eleni.

Mae trefnwyr hefyd yn dweud bod yna gyfarfod gyda swyddogion diogelwch cyn agor y giatiau ddydd Sul i drafod achos "anffodus" o atal dyn mewn crys Palesteinaidd ddydd Sadwrn mewn ymgais i osgoi achos tebyg ddydd Sul.

Dywedodd prif weithredwr Menter Caerdydd, Heulyn Rees bod denu "miloedd ar filoedd" i'r ŵyl ddydd Sadwrn "yn fater o lwyddiant ac yn fater i ddathlu, ond yn amlwg mae hynny'n achosi ambell i drafferth i rai".

Bu'n rhaid "gwthio'r amser agor yn ôl bore ddoe" gan fod "sawl problem wedi codi" wrth orfod aros tan nos Wener i gael mynediad i'r safle a chodi'r holl seilwaith dros nos.

O ganlyniad, meddai, roedd "llawer iawn, iawn o bobol wedi troi lan mewn ffenest fer iawn a hynny yn achosi i rai bobol i fethu dod mewn ar yr amser fydden nhw wedi dymuno".

Ciwiau ar safle Tafwyl ei hun

Roedd yna gryn giwio ar dir y castell i ymwelwyr ar ôl cael mynediad i'r ŵyl

Dywedodd bod tir Castell Caerdydd "wedi bod yn lleoliad bendigedig i Tafwyl ar hyd y blynyddoedd" ond bod twf yr ŵyl yn golygu bod angen ailystyried.

"Dwi'n credu bydde fe'n deg i ddweud efallai bod ni wedi gordyfu hwn fel lleoliad," meddai.

"Fydden ni'n edrych i gynnal trafodaethau ar y posibilrwydd o gael safle fydd mor hygyrch â phosib, a sydd mor eang â phosib er mwyn caniatáu pawb sydd yn dymuno dod i Tafwyl i allu dod - dyna'r gobaith".

Heulyn Rees yn ardal cefn llwyfan safle ŵyl Tafwyl ddydd Sul

Dywed Heulyn Rees bod gweld y fath niferoedd yn dod i'r ŵyl yn beth da, ond bod "ambell anhawster" wedi codi oherwydd y niferoedd

Pwylseisiodd Heulyn Rees bod y trefnwyr yn "awyddus iawn i gadw'r ŵyl am ddim", yn hytrach na chodi tâl a docynnau i reoli'r nifer ymwelwyr.

"Ni'n gw'bod bod 'na bobol sydd 'm ond ar ymylon y Gymraeg sy'n dod i Tafwyl ac mai hwnna falle yw eu hunig brofiad o'r Gymraeg, a 'dan ni ddim eisie peryglu hynny... mae'n rhywbeth sensitif iawn, iawn i'w warchod.

"Ar yr un pryd ma'n rhaid diogelu niferoedd a gallu staffio yn iawn ar gyfer y digwyddiad.

"Ma'r niferoedd eleni... er mae'n wych gweld y brwdfrydedd i ddod, mae e wir wedi achosi ambell anhawster i ni."

'Dim polisi i wahardd baneri Palesteinaidd'

Mewn ymateb i honiad ar y cyfryngau cymdeithasol bod swyddogion diogelwch wedi atal mynediad i ddyn am wisgo crys-T Palesteinaidd, a bod yna waharddiad ar faneri Palesteinaidd ar safle'r ŵyl, fe gyhoeddodd y trefnwyr ddatganiad yn dweud "hoffem gadarnhau nad dyma bolisi Tafwyl".

Ychwanegodd y datganiad: "Fodd bynnag, yn unol â deddfwriaeth a chanllawiau perthnasol Llywodraeth y DU, ni chaniateir unrhyw faneri, baneri protest na hysbysfyrddau sy'n hyrwyddo neu'n cynrychioli sefydliadau neu grwpiau sydd wedi'u gwahardd o dan y gyfraith."

Dywedodd Heulyn Rees wrth BBC Cymru: "Mae 'na gyfarfod wedi digwydd gyda'r tîm diogelwch cyn i ni agor heddi a mae pawb yn hollol ymwybodol beth yw polisi Tafwyl ynglŷn â chaniatáu crysau-T.

"A tra bod crysau-T yn gyfreithiol, mae croeso i bobol wisgo pa bynnag grys-T y maen nhw'n dymuno gwisgo i Tafwyl.

"Mae e'n ddigwyddiad anffodus ond yn sicr ni'n hyderus na 'neith hynny godi ei ben eto heddi."

Torf yn mwynhau un o berfformiadau'r prif lwyfan

Roedd Martha Elen, Buddug, Bob Delyn a'r Ebillion a Sage Todz ymhlith yr artistiaid ar y prif lwyfan ddydd Sadwrn

Ychwanegodd y datganiad bod angen cynnal archwiliadau bagiau yn sgil "y risg uwch i ddiogelwch cenedlaethol" ar hyn o bryd, gan apelio ar bobl i "gyrraedd mewn digon o amser a chaniatáu ar gyfer unrhyw oedi ychwanegol a allai godi o ganlyniad i'r gwiriadau diogelwch hyn".

"Diolch i bawb am eu cydweithrediad wrth helpu i sicrhau bod Tafwyl yn parhau'n ŵyl ddiogel a chroesawgar i bawb."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Straeon perthnasol