Gorau Cymru am giciau rhydd? Capten Cymric yn dathlu carreg filltir

Pwy yw'r pêl-droediwr gorau yng Nghymru am gymryd ciciau rhydd? Harry Wilson? Neco Williams?... efallai ei fod yn chwarae ym mhedwaredd haen Cymru!

Mae Rhys Jones yn gapten ar dîm pêl-droed Cymric yng Nghaerdydd.

Sefydlwyd Clwb Pêl-droed Amatur Cymry Cymraeg o Gaerdydd, i'w roi enw swyddogol, yn 1969, dwy flynedd wedi i Glwb Rygbi Cymry Caerdydd ffurfio.

Ffurfiwyd y clwb er mwyn i bêl-droedwyr allu defnyddio'r Gymraeg yn rhydd wrth hyfforddi a chwarae yng Nghaerdydd, ond eto mae clybiau eraill sydd â chynrychiolaeth Gymraeg yn y brifddinas wrth gwrs.

Y penwythnos diwethaf fe gyrhaeddodd Rhys garreg filltir arbennig - 200 o gemau dros y clwb.

I ddathlu cyfraniad Rhys i'r clwb rhyddhawyd fideo arbennig o rai o'i goliau, gan ei fod yn dipyn o arbenigwr ar gymryd ciciau rhydd.

Meddai: "O'n i'n chwarae i Lannefydd o pan o'n i'n 16 ac yna es i i'r coleg yng Nghaerdydd. 'Nes i chwarae dros y Gym Gym (Cymdeithas Gymraeg Prifysgol Caerdydd) tra yn coleg, gan fynd adre i chwarae dros Lannefydd yn ystod y gwyliau ac ati."

Bellach yn 29 oed mae Rhys wedi chwarae dros Cymric am wyth tymor.

Yn chwaraewr ganol-cae gweithgar mae wedi creu dipyn o enw i'w hun yn ddiweddar yn y grefft o gymryd ciciau rhydd.

"Dwi ddim yn teimlo gymaint o bwysau wrth gymryd ciciau rhydd - mae'n dipyn o free hit," meddai Rhys.

"Dwi reit wael ar giciau o'r smotyn gan fethu cwpl mewn shoot outs, felly falle mai'r pwysau ydi hynny! Does 'na ddim disgwyliad i sgorio o giciau rhydd felly mae hynny'n gwneud o'n haws.

"Dwi ddim ond yn cymryd ciciau rhydd ers rhyw ddwy flynedd. 'Nes i roi cynnig ar un ac a'th o fewn, a 'nes i sgorio rwbeth fel pedair o'r wyth cic rydd wedi hynny, felly dwi 'di parhau i gymryd nhw, a 'di sgorio dipyn diolch byth."

Mae Rhys wedi sgorio 63 o goliau yn ei amser gyda Cymric.

Felly, pwy yw arwr ciciau rhydd Rhys? Messi? Pirlo? Beckham?

"Gan fod o'n chwarae i Leeds ma'n rhaid i mi ddweud Anton Stach," meddai. Fel ei dad, y cyflwynydd radio Dylan Jones, mae Rhys yn cefnogi'r gwynion o Swydd Efrog.

Mae Cymric yn chwarae ym mhedwaredd haen pêl-droed Cymru, ac yn anelu am ddyrchafiad eleni ar ôl gorffen yn drydydd y llynedd.

"Mae 'na dîm bach da 'ma a rheolwr newydd, a'r gobaith ydi bydd y clwb yn mynd o nerth i nerth."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.