Athro 'rhagorol' yn ddieuog o gyhuddiadau rhyw yn ymwneud â bachgen ysgol

Llys y Goron Casnewydd
Disgrifiad o’r llun,

Cafodd David O'Rourke ei ganfod yn ddieuog o bob un o'r naw cyhuddiad yn ei erbyn

GanEleri GriffithsaGwen Aeron
  • Cyhoeddwyd

Mae cyn-athro drama yng Nghaerdydd wedi ei gael yn ddieuog o gyhuddiadau rhyw yn ymwneud â bachgen yn ei arddegau.

Roedd David O'Rourke, 44, yn wynebu naw cyhuddiad yn ymwneud â'r bachgen a honnodd iddo gael rhyw gydag ef mewn swyddfa yn Ysgol Uwchradd yr Eglwys Newydd.

Roedd Mr O'Rourke yn gwadu'r holl gyhuddiadau a daeth rheithgor yn Llys y Goron Casnewydd i'r casgliad ei fod yn ddieuog ar ôl trafod am lai na hanner awr.

Yn ystod yr achos, clywodd y rheithgor dystiolaeth gan gyn-gydweithwyr a chyn-ddisgybl, a ddisgrifiodd ef fel athro proffesiynol, ymroddedig ac uchel ei barch.

Yn ystod yr achos ddydd Iau, clywodd y rheithgor dystiolaeth gan dri athro a fu'n gweithio gyda Mr O'Rourke, cyfreithiwr wedi ymddeol a chyn-ddisgybl.

Dywedodd Jonathan William Davies, athro yn Ysgol Uwchradd yr Eglwys Newydd, iddo gyfarfod Mr O'Rourke am y tro cyntaf yn 2007, pan oedd yn Bennaeth Cynorthwyol y Chweched Dosbarth.

Clywodd y llys fod Mr O'Rourke yn dysgu Saesneg, Drama ac Astudiaethau'r Cyfryngau cyn dod yn bennaeth blwyddyn yn 2009.

Yn y rôl honno, roedd yn adrodd i Mr Davies, a oedd yn gweithredu fel ei reolwr llinell.

Disgrifiodd Mr O'Rourke fel athro oedd yn cynhyrchu "gwaith rhagorol", gan ddweud nad oedd erioed wedi cael unrhyw bryderon am ei ymddygiad tuag at ddisgyblion.

Canmolodd hefyd ei ofal bugeiliol, ei broffesiynoldeb a'i ymrwymiad i ddiogelu plant.

Dywedodd wrth y rheithgor fod Mr O'Rourke "bob amser yn rhoi lles disgyblion yn gyntaf".

'Hynod broffesiynol'

Clywodd y llys hefyd gan Alun Horgan, athro cerddoriaeth yn yr ysgol, a oedd wedi adnabod Mr O'Rourke ers 2007.

Disgrifiodd ef fel aelod o staff "hoffus iawn gan bawb" ac yn "hynod broffesiynol", gan ychwanegu ei fod yn rhywun oedd yn "mynd gam ymhellach na'r disgwyl".

Canmolodd Mr Horgan ei ddawn gerddorol hefyd, gan ei ddisgrifio fel "pianydd, canwr a cherddor dawnus iawn".

Roedd Mr O'Rourke yn ymwneud â nifer o gynyrchiadau theatr yr ysgol, cyngherddau a theithiau tramor, gan gynnwys ymweliadau ag Efrog Newydd.

Cyfeiriodd Mr Horgan at daith yn 2018 pan aeth staff â disgybl ag anghenion ychwanegol gyda nhw, er gwaethaf yr heriau ymarferol.

Dywedodd wrth y llys: "Roedd David yn dod o hyd i ffordd o wneud i bethau weithio. Roedd yn gwneud popeth o fewn ei allu."

Whitchurch HighFfynhonnell y llun, Google
Disgrifiad o’r llun,

Roedd David O'Rourke yn athro drama yn Ysgol Uwchradd yr Eglwys Newydd yng Nghaerdydd

Tyst arall oedd Alexander James Harries, 24, a fu'n ddisgybl yn yr ysgol.

Dywedodd ei fod wedi cael ei ddysgu gan Mr O'Rourke rhwng blynyddoedd 7 a 9, yn ogystal ag yn ystod ei gyfnod yn y chweched ddosbarth.

Er iddo dreulio cryn dipyn o amser gydag Mr O'Rourke yn y stiwdio ddrama, dywedodd Mr Harries nad oedd yr athro "erioed wedi gwneud i mi deimlo'n anghyfforddus".

Ychwanegodd fod Mr O'Rourke "bob amser wedi cael ei barchu'n fawr gan ddisgyblion", a dywedodd nad oedd erioed wedi gweld unrhyw arwydd o anghysur ymhlith disgyblion eraill.

Yn gynharach yn yr achos, clywodd y rheithgor recordiad o gyfweliad yr heddlu gyda'r bachgen yn 2024, pan roddodd wybod am yr honiadau.

Ni ellir enwi'r bachgen am resymau cyfreithiol.

Yn ôl ei dystiolaeth, honnodd iddo ddechrau siarad â Mr O'Rourke ar ap Grindr pan oedd yn 17 oed, cyn i'r ddau gael galwadau fideo rheolaidd drwy Skype.

Dywedodd fod y sgyrsiau wedi datblygu'n rhai "mwy eglur a rhywiol" ac iddo gael ei wahodd i swyddfa Mr O'Rourke yn yr ysgol.

Honnodd y bachgen fod y ddau wedi cael rhyw mewn swyddfa ger y stiwdio ddrama.

Roedd Mr O'Rourke wedi gwadu'r holl gyhuddiadau, ac fe ddaeth y rheithgor i'w canlyniad ar ôl 23 munud o drafod.

Wrth i'r rheithgor gyhoeddi eu dyfarniad, roedd aelodau o deulu Mr O'Rourke yn eu dagrau.

Gwenodd Mr O'Rourke a diolch i'r rheithgor cyn gadael y llys gyda'i deulu.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol .

Lawrlwythwch yr ap am y diweddaraf o Gymru ar eich dyfais symudol.