Beth yw hoff ymadroddion y Cymry?

Cegau yn siarad a gwenuGetty Images
Angharad Rhys
BBC Cymru Fyw

Wedi i'r iaith Gymraeg chael ei disgrifio gan yr ieithydd Susie Dent fel yr iaith bryderthaf, bu'r prifardd Ifor ap Glyn yn dewis rhai o'i hoff ymadroddion i BBC Cymru Fyw.

Bu ymateb brwd iawn i'w ddewisiadau gan ddarllenwyr Cymru Fyw gyda mwy na 180 ohonoch yn rhannu eich dewisiadau personol ar y cyfryngau cymdeithasol.

Beth felly yw hoff ymadroddion y Cymry?

Anifeiliaid lu...

  • Yn ara' deg mae dal iâr... ond yn gytheiriog mae dal ceiliog

  • Yn ara' deg mae dal iâr ond ar frys mae dal mochyn

Cyw iâr Getty Images

  • Yr oen yn dysgu'r ddafad sut i bori

  • Gwell 'deryn mewn llaw na dau mewn llwyn

  • Adar o'r un lliw hedant i'r un lle

  • Llond bol i fochyn a digon i ddyn

  • Ara' deg a fesul dipyn, mae stwffio bys i din gwybedyn

  • Gwyn y gwêl y fran ei chyw

  • Gormod o bwdin dagith y ci

Ysgol ddrud yw ysgol brofiad…

  • Mwya' byd y bydd dyn fyw, mwya' wêl a mwya' glyw

  • Heb ei fai, heb ei eni

  • Yr hen a ŵyr a'r ifanc a dybia

  • Diwedd y gân yw'r geiniog

  • Cyw a fagwyd yn uffern, yn uffern y myn bod

Gwersi byw

  • Nid aur yw popeth melyn

  • Dim pwynt codi pais ar ôl pisho

  • Rhoi'r ffidl yn y tô

  • Gorau arf, arf dysg

  • Dyfal donc a dyr y garreg

  • Nid ar redeg mae aredig

  • Anodd tynnu dyn oddi wrth ei dylwyth

  • Haws cynnau tân ar hen aelwyd

Roedd nifer fawr o awgrymiadau eraill hefyd sydd heb eu rhestru yma. Yng ngeiriau Ifor ap Glyn, mi fyddai'n "golled annhraethol" i orfod byw heb yr ymadroddion unigryw yma sy'n bodoli yn yr iaith.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Hefyd o ddiddordeb