"Озод Фаластин" шиори британиялик гуруҳ учун Сингапур эшикларини ёпди
Сурат манбаси, Getty Images
Британиянинг Massive Attack гуруҳи Сингапурга қайта киритилмайди. Бунга гуруҳ аъзоларининг концерт вақтида Фаластин байроғини кўтариб, "Озод Фаластин" деган шиорларни айтгани сабаб бўлган.
Чоршанба кунги концертда томошабинларнинг айримлари ҳам бу шиорларга қўшилгани айтилмоқда.
Сингапур полицияси гуруҳ аъзоларига мамлакатга қайта киришни тақиқлади. Медиа назорати органи эса келажакда уларнинг концерт ўтказиш ҳақидаги аризаларини маъқулламаслигини билдирди.
Сингапур оммавий чиқишлар ва сиёсий мазмундаги тадбирларга қатъий назорат ўрнатган. Расмийлар буни миллатлараро ва динлараро тотувликни сақлаш зарурати билан изоҳлайди.
Жорий йил бошида ҳам Сингапурда Фаластинни қўллаб-қувватлаш учун уюштирилган рухсатсиз юришда қатнашган бир неча киши жаримага тортилганди.
Полиция BBC га берган баёнотида тергов якунлари бўйича Massive Attack гуруҳининг икки аъзосига қатъий огоҳлантириш берилганини маълум қилди.
Улар хорижий байроқларни намойиш этиш ва сиёсий тадбирларни тартибга солувчи қонунларни бузганликда гумон қилинмоқда.
Полиция вакилига кўра, мамлакат ҳукумати ирқий ва диний ҳамжиҳатликка зарар етказиши мумкин бўлган ҳар қандай ҳаракатга жиддий қарайди.
"Турли миллат ва дин вакиллари ўртасидаги тинчликни ўз-ўзидан мавжуд ҳолат деб қабул қилиб бўлмайди. Ташқи можаролар жамиятимизга таъсир кўрсатишига йўл қўймаслигимиз керак", деди у.
Ҳозир дунё бўйлаб гастрол сафарида юрган Massive Attack учун Сингапурдаги концерт биринчи чиқиш бўлган. Гуруҳнинг навбатдаги концерти Сеулда бўлиб ўтиши режалаштирилган.
Трип-ҳоп жанрининг асосчиларидан саналадиган гуруҳ Ғазодаги уруш ва бошқа сиёсий масалалар бўйича очиқ позицияси билан танилган. Унинг асосчилари Роберт Дел Нажа ва Грант Маршалл ҳозир ҳам гуруҳ таркибида қолмоқда.
Роберт Дел Нажа бу йил Лондондаги намойишда қатнашгани учун ҳибсга олинган эди. У Буюк Британияда тақиқланган Palestine Action ҳаракатини қўллаб-қувватлаганликда айбланган.
Гуруҳ вакили BBC сўровига изоҳ беришдан бош тортди.
Singapur ommaviy chiqishlar va siyosiy mazmundagi tadbirlarga qat’iy nazorat o‘rnatgan. Rasmiylar buni millatlararo va dinlararo totuvlikni saqlash zarurati bilan izohlaydi.
Сингапурнинг позицияси
Сингапур расмийлари Исроил-Ғазо уруши билан боғлиқ оммавий акциялар ва рамзларга нисбатан қатъий сиёсат юритади.
2023 йилда Ички ишлар вазирлиги уруш билан боғлиқ рамзлар, жумладан хорижий байроқларни жамоат жойларида намойиш этмасликни тавсия қилган эди.
Полиция уруш билан боғлиқ қатор онлайн ва офлайн тадбирларни ҳам текширган. Амалда бундай йиғилишларга рухсат берилмайди.
Шу билан бирга, Сингапур ҳукумати Исроил ва Фаластин ёнма-ён мавжуд бўладиган "икки давлат ечими"ни қўллаб-қувватлашини билдириб келади. Мамлакат Фаластиннинг БМТга тўлиқ аъзо бўлишини ҳам ёқлайди.
Полиция маълум қилишича, концерт ташкилотчиларига берилган лицензия шартлари юзасидан текширув давом этмоқда. Шартлардан бири тадбир вақтида бирор сабаб ёки ҳаракатни қўллаб-қувватловчи байроқларни намойиш этмасликни талаб қилган.
