ایران نے قطری وفد کے دورہ تہران کی تصدیق کر دی

،تصویر کا ذریعہGetty Images
ایران کے نائب وزیر خارجہ کاظم غریب آبادی نے سنیچر کو کہا کہ قطر کا ایک وفد گذشتہ شام تہران پہنچا تھا اور اس نے ’دو گھنٹے تک بات چیت‘ کی، تاہم انھوں نے مذاکرات کی تفصیلات نہیں بتائیں۔
امریکہ اور ایران کے درمیان جنگ کے خاتمے کے لیے ہونے والے مذاکرات حالیہ مہینوں میں تعطل کا شکار رہے ہیں۔
تاہم ایران کے وزیر خارجہ عباس عراقچی کہتے ہیں خطے میں جاری بات چیت کو ’موقع دیا جانا چاہیے‘ اور یہ کہ آبنائے ہرمز کی امریکی ناکہ بندی ’معقول انداز میں ختم کی جانی چاہیے۔‘
سرکاری ٹیلی وژن کے مطابق ان کا مزید کہنا تھا کہ ’ہمارا مؤقف واضح ہے، جب تک ایران کے مطالبات پورے نہیں ہوتے، آبنائے ہرمز اور اس کے کھولے جانے کے بارے میں گفتگو بے معنی ہے۔‘
’ہم ہمیشہ مذاکرات کے لیے اپنی آمادگی کا اظہار کرتے رہے ہیں، بالکل اسی طرح جیسے ہم اپنے دفاع کے لیے بھی تیار ہیں۔‘
ایران کے مطالبات میں تمام محاذوں پر جنگ کا خاتمہ، ایرانی اثاثوں پر عائد پابندیوں کا خاتمہ، تیل پر عائد پابندیوں کو اٹھایا جانا اور ایرانی بندرگاہوں کے خلاف امریکہ کی جوابی ناکہ بندی کا خاتمہ شامل ہے۔













