لائیو, طلبا کے احتجاج کے بعد انڈیا کے وزیرِ تعلیم مستعفی

لائیو کوریج

1. 20 منٹ قبلپیٹرولیم مصنوعات کی قیمتوں میں اضافے کی وجہ سے ہفتہ وار مہنگائی کی شرح میں 9.66 فیصد اضافہ, تنویر ملک، صحافی

   

   ،تصویر کا ذریعہGetty Images

   پاکستان میں ہفتہ وار مہنگائی کی شرح میں سالانہ بنیاد پر 9.66 فیصد کا اضافہ ریکارڈ کیا گیا ہے۔

   پاکستان کے ادارہ برائے شماریات (پی بی ایس) کے مطابق گذشتہ ہفتے کے مقابلے میں رواں ہفتے حساس قیمتوں کے اشاریے میں بھی 0.91 فیصد اضافہ دیکھنے میں آیا۔

   سرکاری اعداد و شمار کے مطابق مہنگائی میں اضافے کی بڑی وجہ سبزیوں اور دیگر جلد خراب ہونے والی غذائی اشیا کی بلند قیمتیں اور پیٹرولیم مصنوعات کی قیمتوں میں روزانہ ہونے والا اضافہ ہے، جس کے باعث ٹرانسپورٹ کے اخراجات بھی بڑھ گئے ہیں۔

   سالانہ بنیاد پر بجلی کے نرخوں میں 22.79 فیصد، آٹے کی قیمت میں 74.13 فیصد اور ایل پی جی کی قیمت میں 46.87 فیصد اضافہ ریکارڈ کیا گیا، جبکہ پیاز، ٹماٹر، آلو، گائے اور بکرے کے گوشت اور آٹے کی قیمتوں میں بھی نمایاں اضافہ دیکھا گیا۔

   ادارہ شماریات کے مطابق مسلسل بڑھتی ایندھن کی قیمتوں نے نہ صرف گھریلو بجٹ پر اضافی بوجھ ڈالا بلکہ ٹرانسپورٹ کے اخراجات میں بھی اضافہ کیا۔

   

   ،تصویر کا ذریعہGetty Images

   گزشتہ ہفتے کے دوران سب سے زیادہ مہنگی ہونے والی اشیا میں ٹماٹر (39.92 فیصد)، ڈیزل (15.87 فیصد)، انڈے (7.31 فیصد)، پیٹرول (5.23 فیصد)، آلو (3.70 فیصد)، ایل پی جی (0.91 فیصد)، چائے (0.59 فیصد)، سرسوں کا تیل (0.45 فیصد)، لہسن (0.41 فیصد) اور کپڑے دھونے کا صابن (0.21 فیصد) شامل ہیں۔

   اس کے برعکس گزشتہ ہفتے مرغی کی قیمت میں 4.66 فیصد، کیلے میں 1.72 فیصد، مونگ کی دال میں 1.08 فیصد، ماش کی دال میں 1.07 فیصد، چاول میں 0.52 فیصد، مسور کی دال میں 0.40 فیصد، چینی میں 0.09 فیصد اور چنے کی دال میں 0.03 فیصد کمی ریکارڈ کی گئی۔

   سالانہ بنیاد پر ٹماٹر کی قیمت میں سب سے زیادہ 253.04 فیصد اضافہ ہوا، جبکہ پیاز 81.55 فیصد، آٹا 74.13 فیصد، ایل پی جی 46.87 فیصد، ڈیزل 31.92 فیصد، بجلی کے نرخ 22.79 فیصد، پیٹرول 20.32 فیصد، بکرے کا گوشت 16.02 فیصد، مرچ پاؤڈر 15.20 فیصد، گائے کا گوشت 13.09 فیصد، کیلے 12.06 فیصد اور سادہ ڈبل روٹی 9.69 فیصد مہنگی ہوئی۔

   دوسری جانب سالانہ بنیاد پر آلو کی قیمت میں 33.69 فیصد، چنے کی دال میں 21.48 فیصد، چینی میں 17.67 فیصد، نمک میں 14.09 فیصد، مرغی میں 13.73 فیصد، مسور کی دال میں 13.55 فیصد، انڈوں میں 9.59 فیصد اور مونگ کی دال میں 8.67 فیصد کمی ریکارڈ کی گئی۔

2. ایک گھنٹہ قبلطلبا کے احتجاج کے بعد انڈیا کے وزیرِ تعلیم مستعفی

   

   ،تصویر کا ذریعہGetty Images

   گذشتہ ایک ماہ سے جاری احتجاج کے بعد سنیچر کے روز انڈیا کے وزیرِ تعلیم دھرمیندر پردھان نے استعفیٰ دے دیا۔

   زیادہ تر نوجوان طلبہ پر مشتمل مظاہرین گذشتہ ماہ سے وزیرِ تعلیم دھرمیندر پردھان کے استعفے کا مطالبہ کر رہے ہیں۔ ان کا مؤقف ہے کہ بار بار امتحانی پرچوں کے لیک ہونے سے تعلیمی نظام کی ساکھ بری طرح متاثر ہوئی ہے۔

   سوشل میڈیا سائٹ ایکس پر جاری بیان میں دھرمیندر پردھان کا کہنا ہے کہ ’جنتر منتر اور ملک میں جو صورتحال پیدا ہوئی ہے، ملک مخالف عناصر کو اس سے فائدہ نہیں اٹھانا چاہیے۔ ملک کا اتحاد برقرار رہنا چاہیے۔‘

   ان کا مزید کہنا ہے کہ انڈیا کے ایک بھی طالب علم کا مستقبل قانونی پیچیدگیوں میں نہیں الجھنا چاہیے۔ ’ہمارے بچے اپنا وقت تعلیم میں گزاریں اور اپنے کیریئر کی تعمیر پر توجہ دیں۔ ان تمام باتوں کو مدنظر رکھتے ہوئے، میں نے اپنا استعفیٰ وزیرِ اعظم کو ارسال کر دیا ہے۔‘

   اس سے قبل کانگریس سمیت تمام اپوزیشن جماعتیں دھرمیندر پردھان کے استعفے کے مطالبے پر اصرار کر رہی تھیں۔

3. 3 گھنٹے قبلایرانی وزیرِ خارجہ کی روسی ہم منصب سے ملاقات: آبنائے ہرمز میں عدم تحفظ کی وجہ امریکی وعدہ خلافی ہے، عراقچی

   

   ،تصویر کا ذریعہAnadolu via Getty Images

   ایرانی میڈیا کے مطابق ایران کے وزیر خارجہ عباس عراقچی نے شنگھائی تعاون تنظیم (ایس سی او) کے رکن ممالک کے وزرائے خارجہ کے اجلاس کے موقع پر روسی ہم منصب سرگئی لاروف سے ملاقات کی۔

   جمعہ کے روز کرغزستان میں ہونے والی ملاقات کے دوران عباس عراقچی نے آبنائے ہرمز میں پائی جانے والی عدم تحفظ کی صورتحال کو ’امریکہ کی وعدہ خلافی کا براہِ راست نتیجہ‘ قرار دے دیا۔

   عراقچی کا کہنا تھا کہ ایران نے جس طرح سفارت کاری کے میدان میں سنجیدگی کا مظاہرہ کیا ہے، اسی طرح وہ اپنے مفادات اور قومی سلامتی کے دفاع اور امریکہ کی جانب سے آبنائے ہرمز کو استعمال کرتے ہوئے ایران کی قومی سلامتی کو خطرے میں ڈالنے کی کوششوں کو روکنے کے لیے پر عزم ہے۔

   ایرانی وزیرِ خارجہ نے گذشتہ روز مصر اور عمان کے وزرائے خارجہ سے بھی ٹیلی فون پر بات کی تھی۔

4. 4 گھنٹے قبلفرانس اور سپین میں جنگلات میں لگی آگ کے باعث دو لاکھ 20 ہزار افراد نقل مکانی پر مجبور

   

   ،تصویر کا ذریعہAFP via Getty Images

   فرانسیسی حکام نے بورڈو کے قریب مزید تقریباً 60 ہزار افراد کو علاقہ خالی کرنے کا حکم دیا ہے، جس کے بعد فرانس اور سپین میں جنگل میں لگی آگ کے باعث اب تک دو لاکھ 20 ہزار سے زائد افراد کو نقل مکانی کا مشورہ دیا جا چکا ہے۔

   جنوب مغربی فرانس کے گیروند اور لانڈز کے علاقوں سے تقریباً دو لاکھ افراد کو محفوظ مقامات پر منتقل ہونے کا کہا گیا ہے۔ فرانسیسی صدر ایمانویل میکخواں نے امدادی کارروائیوں میں معاونت کے لیے فوج کو متحرک کر دیا ہے۔

   دوسری جانب سپین کے حکام نے خبردار کیا ہے کہ میڈرڈ کے قریب لگی آگ اب فائر فائٹرز کی قابو پانے کی صلاحیت سے باہر ہو چکی ہے۔

   دارالحکومت کے مغرب میں لگنے والی تین الگ الگ آگیں یکجا ہو کر ایک بڑی آگ کی صورت اختیار کر گئی ہیں جس کے بعد حکومت نے قومی ایمرجنسی نافذ کر دی ہے۔

   حکام کے مطابق 25 ہزار افراد کو علاقہ خالی کرنے کی ہدایت کی گئی ہے جبکہ تقریباً 40 ہزار افراد کو گھروں کے اندر رہنے کا مشورہ دیا گیا ہے۔

   میڈرڈ کے علاقائی صدر ازابیل دیاز آیوسو نے اسے ’خطے کی تاریخ کی بدترین آگ‘ قرار دیتے ہوئے کہا کہ علاقے شدید گرمی، مسلسل تیز ہواؤں اور مختلف مقامات پر لگی آگ کے یکجا ہونے کے باعث ایک بڑی آفت کا سامنا ہے۔

5. 5 گھنٹے قبلاسرائیلی وزیرِاعظم بنیامن نیتن یاہو اگلے ہفتے امریکہ کا دورہ کریں گے: صدر ٹرمپ

   

   ،تصویر کا ذریعہGetty Images

   امریکی صدر ڈونلڈ ٹرمپ کا کہنا ہے کہ اسرائیلی وزیرِاعظم بنیامن نیتن یاہو اگلے ہفتے امریکہ کا دورہ کریں گے۔

   انھوں نے یہ اعلان جمعہ کے روز وائٹ ہاؤس کے نامہ نگاروں کے عشائیے سے خطاب کے دوران کیا۔

   اس سے قبل اسرائیلی وزیرِاعظم کے دفتر نے اعلان کیا تھا کہ نیتن یاہو سوموار کے روز واشنگٹن جائیں گے اور ان کی منگل کے روز ڈونلڈ ٹرمپ سے ملاقات متوقع ہے۔

   نیتن یاہو کے دفتر سے جاری بیان میں یہ بھی کہا گیا تھا کہ وہ سابق امریکی سینیٹر لنڈسی گراہم کی آخری رسومات میں بھی شرکت کریں گے۔

6. 7 گھنٹے قبلبحیرۂ عمان میں جس ٹینکر کو نشانہ بنایا گیا اس نے چار مرتبہ ناکہ بندی توڑنے کی کوشش کی تھی: امریکی فوج کا دعویٰ

   

   ،تصویر کا ذریعہUS Centcom

   امریکی فوج نے بحیرۂ عمان میں ایک آئل ٹینکر پر حملے کے بارے میں مزید تفصیلات جاری کرتے ہوئے کہا ہے کہ جہاز نے نشانہ بنائے جانے سے قبل کم از کم چار مرتبہ امریکی کی جانب سے ایرانی بندرگاہوں پر عائد ناکہ بندی توڑنے کی کوشش کی تھی۔

   امریکی مرکزی کمان (سینٹکام) کے ترجمان ٹِم ہاکنز نے اے ایف پی کو بتایا کہ ٹینکر کے عملے کو کئی بار خبردار کیا گیا تھا، تاہم انھوں نے ہدایات پر عمل نہیں کیا۔

   انھوں نے کہا کہ اس کے بعد موقع پر موجود امریکی افواج نے جہاز کو آگے بڑھنے سے روکنے کے لیے اس کے انجن روم کو نشانہ بنایا۔

   سینٹکام کے ترجمان نے مزید کہا کہ یہ ٹینکر اب ایران کی جانب نہیں جا رہا۔

   اس سے قبل ایک امریکی عہدیدار نے روئٹرز کو بتایا تھا کہ امریکی افواج نے ایم ٹی لاوِن ٹینکر کو اس وقت نشانہ بنایا جب اس نے ایرانی بندرگاہوں پر عائد ناکہ بندی کو عبور کرنے کی کوشش کی۔

7. 7 گھنٹے قبلحوثیوں کا سعودی عرب پر شہری تنصیبات کو نشانہ بنانے کا الزام، جوابی کارروائی کی دھمکی

   

   ،تصویر کا ذریعہAFP via Getty Images

   یمن کے حوثیوں نے سنیچر کے روز سعودی عرب کے خلاف جوابی کارروائی کی دھمکی دی ہے۔

   انھوں نے الزام عائد کیا ہے کہ سعودی عرب نے شہری تنصیبات کو نشانہ بنایا ہے، جس سے خطے میں جاری جنگ میں مزید شدت آنے کے خدشات پیدا ہو گئے ہیں۔

   آس سے قبل سعودی عرب کی قیادت میں قائم اتحاد نے فضائی حملوں میں یمن میں حوثیوں کے ’فوجی ٹھکانوں‘ کو نشانہ بنانے کا دعویٰ کیا تھا۔ اتحاد کے ترجمان کے مطابق یہ حملے یمنی گروپ کی جانب سے سعودی عرب کے خلاف بحری ناکہ بندی کے اعلان کے بعد کشیدگی میں اضافے کے تناظر میں کیے گئے۔

8. 7 گھنٹے قبلامریکہ اور برطانیہ آبنائے ہرمز میں بحری اتحاد کے قیام کے لیے اجلاس کی تیاری کر رہے ہیں: امریکی ویب سائٹ کا دعویٰ

   

   ،تصویر کا ذریعہUS Centcom

   امریکی نیوز ویب سائٹ ایگزیوس کے نامہ نگار باراک راوِد نے دو یورپی سفارت کاروں اور دو باخبر ذرائع کے حوالے سے خبر دی ہے کہ امریکہ اور برطانیہ اگلے ہفتے لندن میں ایک اعلیٰ سطحی اجلاس منعقد کرنے کا ارادہ رکھتے ہیں جس میں آبنائے ہرمز میں تجارتی جہاز رانی کے تحفظ کے لیے ایک بین الاقوامی اتحاد کے قیام کے امکانات کا جائزہ لیا جائے گا۔

   ایگزیوس کے مطابق اجلاس کی حتمی تاریخ اور ایجنڈا ابھی طے نہیں ہوا ہے تاہم امکان ہے کہ اس میں مغربی ممالک اور خطے کے بعض ملکوں کے وزرائے دفاع اور سینیئر فوجی کمانڈر شریک ہوں گے۔ امریکی وزیر دفاع پیٹ ہیگستھ اور امریکہ کے جوائنٹ چیفس آف سٹاف کے چیئرمین جنرل ڈین کین بھی ممکنہ طور پر شرکت کریں۔

   وائٹ ہاؤس کے ایک عہدیدار نے اصولی طور پر اس بات کی تصدیق کی کہ واشنگٹن اور لندن مشترکہ طور پر اس اجلاس کی منصوبہ بندی کر رہے ہیں، تاہم واشنگٹن میں برطانوی سفارت خانے نے اس معاملے پر تبصرہ کرنے سے انکار کیا ہے۔

   ایگزیوس کا کہنا ہے کہ آبنائے ہرمز کو تجارتی جہاز رانی کے لیے دوبارہ کھولنا ایران کے ساتھ تنازع کے خاتمے اور عالمی توانائی منڈیوں میں استحکام لانے کے لیے کسی بھی امریکی حکمت عملی کا ایک اہم حصہ ہے۔

   رپورٹ کے مطابق واشنگٹن چاہتا ہے کہ اس کے اتحادی خطے میں بارودی سرنگیں صاف کرنے والے جہاز، جنگی بحری جہاز اور ڈرون سمیت دیگر سازوسامان بھیجیں تاکہ جہاز رانی کے راستوں کے تحفظ میں مدد دی جا سکے۔

9. 7 گھنٹے قبلامریکہ کے دو ایرانی بحری جہازوں پر حملے جنگی جرائم کے زمرے میں آتے ہیں: ایران

   

   ،تصویر کا ذریعہGetty Images

   اقوام متحدہ میں ایران کے سفیر اور نائب مستقل نمائندے غلام حسین درزی نے سلامتی کونسل کو لکھے گئے ایک خط میں ناجی-15 اور ناجی-16 نامی جہازوں پر امریکی حملوں کو ’بین الاقوامی قوانین کی سنگین اور کھلی خلاف ورزی‘ اور جنگی جرم کی مثال قرار دیا ہے۔

   بی بی سی فارسی کے مطابق غلام حسین درزی کا کہنا ہے کہ جب ان دونوں جہازوں کو نشانہ بنایا گیا تو وہ کسی بھی قسم کی فوجی سرگرمی میں ملوث نہیں تھے اور ان پر جان بوجھ کر حملہ کیا گیا۔

   امریکہ نے ابھی تک اس الزام یا اس دعوے پر کوئی ردعمل نہیں دیا ہے۔

10. 7 گھنٹے قبلتنازع کے خاتمے کے لیے بات چیت جاری ہے، تاہم تہران ابھی کسی معاہدے تک پہنچنے کے لیے تیار نہیں: ٹرمپ

    

    ،تصویر کا ذریعہAFP via Getty Images

    امریکی صدر ڈونلڈ ٹرمپ نے جمعے کے روز کہا ہے کہ واشنگٹن اور تہران کے درمیان تنازع کے خاتمے کے لیے بات چیت جاری ہے، تاہم انھوں نے ایک بار پھر دہرایا کہ ایران ابھی کسی معاہدے تک پہنچنے کے لیے تیار نہیں۔

    وائٹ ہاؤس میں صحافیوں سے گفتگو کرتے ہوئے ٹرمپ کا کہنا تھا کہ ’ہم ان سے بات کر رہے ہیں۔ میرے خیال میں وہ سنجیدہ ہیں، اور وہ پہلے کے مقابلے میں کہیں زیادہ سنجیدہ ہیں، لیکن اس کا یہ مطلب نہیں کہ کوئی معاہدہ ہو جائے گا۔ دیکھتے ہیں کیا ہوتا ہے۔‘

    سعودی عرب کے ساتھ سویلین جوہری تعاون کے معاہدے کے بارے میں بات کرتے ہوئے ڈونلڈ ٹرمپ نے کہا کہ جب تک سعودی عرب ابراہیمی معاہدوں میں شامل ہو کر اسرائیل کے ساتھ اپنے تعلقات معمول پر نہیں لاتا، وہ اس معاہدے کو آگے نہیں بڑھائیں گے۔

    امریکہ اور سعودی عرب نے بدھ کے روز ایک ایسے معاہدے کا اعلان کیا تھا جس کے تحت ریاض کو امریکی ٹیکنالوجی کی مدد سے یورینیم افزودہ کرنے اور جوہری ری ایکٹر تعمیر کرنے کی اجازت دی جائے گی۔ اس پر اقوام متحدہ کے وہ معائنے فوری طور پر لاگو نہیں ہوں گے جنھیں واشنگٹن ایران کے لیے ضروری قرار دیتا رہا ہے۔

    سعودی عرب نے تاحال اسرائیل کے ساتھ تعلقات معمول پر لانے پر آمادگی ظاہر نہیں کی ہے۔

11. 8 گھنٹے قبلامریکی عہدیدار کا بحری ناکہ بندی کی خلاف ورزی کرنے والے ٹینکر کو قبضے میں لینے کا دعویٰ

    ایک امریکی عہدیدار نے خبر رساں ادارے روئٹرز کو بتایا ہے کہ امریکی افواج نے جمعے کے روز خلیجِ عمان میں ایم ٹی لاوِن نامی آئل ٹینکر کو نشانہ بنا کر اپنے قبضے میں لے لیا ہے۔ عہدیدار کے مطابق یہ جہاز ایرانی بندرگاہوں پر عائد بحری ناکہ بندی کی خلاف ورزی کرنے کی کوشش کر رہا تھا۔

    اس سے قبل ایرانی خبر رساں ادارے فارس نیوز ایجنسی نے ایک ’باخبر ذریعے‘ کے حوالے سے خبر دی تھی کہ بحیرۂ عمان میں مائع قدرتی گیس لے جانے والے ایک آئل ٹینکر پر امریکی میزائل حملے میں عملے کے دو ارکان ہلاک ہوئے ہیں جبکہ جہاز کے انجن روم کو نقصان پہنچا۔

    فارس نیوز ایجنسی نے یہ دعویٰ بھی کیا کہ امریکہ کو شبہ تھا کہ یہ ٹینکر ایران سے گیس لے جا رہا تھا۔

    فارس نیوز کی خبر میں جہاز کا نام نہیں بتایا گیا، تاہم ایک امریکی عہدیدار کی جانب سے روئٹرز کو فراہم کی جانے والی نئی تفصیلات سے ظاہر ہوتا ہے کہ دونوں رپورٹس غالباً ایک ہی واقعے سے متعلق ہیں۔

    امریکی فوج نے تاحال حملے میں ہونے والی ممکنہ ہلاکتوں یا استعمال کیے گئے ہتھیار کی نوعیت کے بارے میں کوئی تفصیلات جاری نہیں کی ہیں۔

12. 8 گھنٹے قبلسعودی اتحاد کا یمن میں حوثیوں کے ’فوجی ٹھکانوں‘ کو نشانہ بنانے کا دعویٰ

    

    ،تصویر کا ذریعہReuters

    سعودی عرب کی قیادت میں قائم اتحاد نے یمن میں حوثیوں کے ’فوجی ٹھکانوں‘ کو نشانہ بناتے ہوئے فضائی حملے کیے ہیں۔ اتحاد کے ترجمان کے مطابق یہ حملے یمنی گروپ کی جانب سے سعودی عرب کے خلاف بحری ناکہ بندی کے اعلان کے بعد کشیدگی میں اضافے کے تناظر میں کیے گئے۔

    بی بی سی عربی کے مطابق اتحاد کے ترجمان میجر جنرل ترکی المالکی کا کہنا ہے کہ یہ فضائی حملے بحیرہ احمر میں تجارتی جہازوں کو نشانہ بنائے جانے کے جواب میں کیے گئے۔

    المالکی نے ایکس پر جاری اپنے بیان میں کہا ہے کہ اتحاد نے ان جائز فوجی اہداف کو نشانہ بنایا جو حوثی عسکریت پسند گروپ کے زیرِ استعمال تھے اور بحیرہ احمر میں جہاز رانی کے لیے خطرہ بن رہے تھے۔

    ترکی المالکی کے مطابق حدیدہ کی بندرگاہ کو نشانہ نہیں بنایا گیا، اور یمن کی تمام بندرگاہیں بشمول حدیدہ، رأس عیسیٰ اور الصلیف بحری آمدورفت کے لیے کھلی ہیں۔

    ان کا مزید کہنا تھا کہ فوجی کارروائی مکمل ہو چکی ہے اور اس میں متناسب ردعمل کے اصول کے ساتھ طے شدہ عملیاتی اہداف حاصل کر لیے گئے ہیں۔

    سعودی سرکاری خبر رساں ایجنسی ایس پی اے کے مطابق بحیرہ احمر میں ایک تازہ حملے کے دوران ایک سعودی جہاز کو نشانہ بنایا گیا تھا۔

    دوسری جانب یمن میں حوثیوں سے وابستہ المسیرہ ٹی وی نے خبر دی ہے کہ سعودی فضائی حملوں میں حوثیوں کے زیرِ کنٹرول شہر حدیدہ اور جزیرہ کمران میں مواصلاتی تنصیبات کو نشانہ بنایا گیا۔

    المسیرہ ٹی وی کے مطابق ان حملوں میں دو افراد زخمی ہوئے۔

13. 24 جولائی 2026پاکستان میں پیٹرول اور ڈیزل کی قیمتوں میں پھر اضافہ

    

    ،تصویر کا ذریعہEPA

    پاکستان کی حکومت نے پیٹرول کی فی لیٹر قیمت میں 3.66 روپے جبکہ ڈیزل کی قیمت میں 4.8 روپے اضافے کا فیصلہ کیا ہے۔

    پیٹرولیئم ڈویژن کی جانب سے جاری کردہ نوٹیفیکیشن کے مطابق پیٹرول اور ڈیزل کی نئی قیمتیں بالترتیب 335.18 اور 383.46 روپے مقرر کی گئی ہیں۔

    گذشتہ ہفتے پاکستان کی حکومت نے پیٹرولیئم مصنوعات کی قیمتیں روزانہ کی بنیاد پر طے کرنے کا فیصلہ کیا تھا جس کے تحت اوگرا بین الاقوامی تیل کی قیمتوں میں اتار چڑھاؤ اور زرِمبادلہ کی شرح میں تبدیلیوں کے مطابق روز قیمتوں پر نظرِثانی کرتا ہے۔

    18 جولائی سے اب تک پیٹرول کی قیمت میں 19.03 روپے فی لیٹر اضافہ ہوا ہے۔ پیٹرول کی قیمت 316.15 روپے فی لیٹر سے بڑھ کر 335.18 روپے فی لیٹر ہو گئی ہے۔

    جبکہ 18 جولائی سے اب تک ہائی سپیڈ ڈیزل (ایچ ایس ڈی) کی قیمت میں 29.11 روپے فی لیٹر اضافہ ہوا ہے، جو 354.35 روپے فی لیٹر سے بڑھ کر 383.46 روپے فی لیٹر ہو گئی ہے۔

14. 24 جولائی 2026عمانی وفد تہران پہنچ گیا

    ایران کے سرکاری خبر رساں ادارے ارنا کے مطابق آبنائے ہرمز سے متعلق مذاکرات کے لیے ایک عمانی وفد تہران پہنچ گیا ہے۔

    ارنا کے مطابق عمانی وفد کے دورۂ ایران کا مقصد یہ ہے کہ ’آبنائے ہرمز میں بحری جہازوں کی آمدورفت کے انتظام کے لیے مناسب طریقہ کار وضع کیا جائے۔‘

    دریں اثنا ایران کے وزیر خارجہ عباس عراقچی نے جمعے کی شام عمان کے وزیر خارجہ بدر البوسعیدی سے ٹیلیفون پر گفتگو کی۔ اس گفتگو کی تفصیلات جاری نہیں کی گئیں۔

    ایران آبنائے ہرمز کے معاملے پر مسقط کے ساتھ ہم آہنگی قائم کرنا چاہتا ہے۔

    عمانی وفد کا تہران کا یہ دورہ ایسے وقت میں ہو رہا ہے جب امریکہ اور ایران کے درمیان جنگ جاری ہے اور دونوں ممالک کے درمیان مذاکرات کی بحالی کے لیے نئی کوششیں کی جا رہی ہیں۔

15. 24 جولائی 2026یورپی یونین کی ایرانی ججز پر پابندیاں

    یورپی یونین نے مبینہ طور پر انسانی حقوق کی ’سنگین خلاف ورزیوں میں ملوث‘ چھ ایرانی شہریوں پر پابندیاں عائد کی ہیں۔

    یورپی یونین کی کونسل کے مطابق چھ میں سے پانچ افراد ایرانی عدالتوں میں ججز ہیں جو مذہبی اقلیتوں اور سیاسی مخالفین کے مقدمات کی سماعت میں شریک رہے ہیں۔

    کونسل کا مزید کہنا ہے کہ اس نے نیما صالحی نامی ایک ایرانی کمپیوٹر انجینیئر اور ہیکر پر بھی پابندیاں عائد کی ہیں، جن کے بارے میں کہا گیا ہے کہ وہ سائبر گروپ ’آشیانہ‘ کے بانی اور اہم رکن ہیں۔ اس کے مطابق یہ ڈیجیٹل سکیورٹی گروپ ایران کی فتا پولیس اور پاسدارانِ انقلاب کے ساتھ قریبی تعاون کرتا ہے، ملک میں ناقدین اور اصلاح پسندوں کے خلاف وسیع پیمانے پر سائبر حملوں کے ساتھ ساتھ غیر ملکی اداروں پر بھی حملوں کا ذمہ دار ہے۔

    اس فیصلے کے بعد یورپی یونین کی انسانی حقوق سے متعلق پابندیوں کی زد میں آنے والے ایرانی افراد کی تعداد 269 اور اداروں کی تعداد 53 تک پہنچ گئی ہے۔ ان پابندیوں میں اثاثوں کو منجمد کرنا، یورپی یونین کے رکن ممالک میں سفری پابندی اور فہرست میں شامل افراد اور اداروں کو مالی وسائل فراہم کرنے پر پابندی شامل ہے۔

16. 24 جولائی 2026چین اور روس نے وعدہ کیا کہ وہ ایران کو ہتھیار فروخت نہیں کریں گے: ٹرمپ

    

    ،تصویر کا ذریعہGetty Images

    امریکی صدر ڈونلڈ ٹرمپ کا کہنا ہے کہ چین اور روس کے صدور نے ان سے وعدہ کیا ہے کہ وہ ایران کو ہتھیار فروخت نہیں کریں گے۔

    ٹرمپ نے ’ٹروتھ سوشل‘ پر ایک پوسٹ میں لکھا کہ ’بیجنگ میں ہماری حالیہ ملاقات کے دوران صدر شی نے مجھ سے کہا تھا کہ وہ کسی بھی صورت میں ایران کو ہتھیار نہیں دیں گے اور نہ ہی فروخت کریں گے۔ اور اس میں چینی کمپنیاں بھی شامل ہیں۔‘

    ٹرمپ نے مزید کہا کہ ولادیمیر پوتن نے بھی ان سے ایسا ہی وعدہ کیا تھا۔ ’وہ سمجھتے ہیں کہ میں یوکرین کو ہتھیار نہیں بیچ رہا بلکہ نیٹو ممالک کو فروخت کر رہا ہوں۔ وہ ان ہتھیاروں کی پوری قیمت ادا کرتے ہیں اور مجھے کوئی اندازہ نہیں کہ وہ ان ہتھیاروں کے ساتھ کیا کرتے ہیں۔‘

    ٹرمپ نے مزید کہا کہ ’جن دو بڑے ممالک کا لوگ اکثر ایران کے حوالے سے ذکر کرتے ہیں، مجھے نہیں لگتا کہ وہ اس میں شامل ہیں۔ اگر وہ شامل ہوتے تو یقینی طور پر یہ ان کے اپنے مفاد میں نہ ہوتا۔‘

17. 24 جولائی 2026بنگلہ دیش کے صدر مستعفی

    

    ،تصویر کا ذریعہGetty Images

    بنگلہ دیش کی سابق وزیر اعظم شیخ حسینہ کی جانب سے وطن واپسی کے اعلان کے بعد ملک کے صدر محمد شہاب الدین اپنے عہدے سے مستعفی ہو گئے ہیں۔

    شہاب الدین کا استعفیٰ ایسے وقت میں سامنے آیا ہے جب چند روز قبل شیخ حسینہ نے خبر رساں ادارے روئٹرز کو بتایا تھا کہ وہ بنگلہ دیش واپس جائیں گی۔ شیخ حسینہ کو بنگلہ دیش میں 2024 میں طلبہ کے احتجاج کو کچلنے کے الزام میں سزائے موت سنائی گئی تھی۔ اسی احتجاج کے نتیجے میں ان کی حکومت کا خاتمہ ہوا تھا۔

    ذرائع نے بی بی سی بنگلہ کو بتایا کہ اس کے بعد سے شہاب الدین پر استعفیٰ دینے کا دباؤ تھا۔

    صدر کے دفتر کے متعدد اہلکاروں نے بتایا کہ شہاب الدین نے جمعے کی دوپہر اپنے استعفے پر دستخط کیے تھے۔ خط میں انھوں نے خراب صحت کو عہدہ چھوڑنے کی وجہ قرار دیا ہے۔

    استعفے کا خط پارلیمان کے سپیکر حافظ الدین احمد کو جمع کرا دیا گیا ہے۔ ذرائع نے بی بی سی بنگلہ کو بتایا کہ سپیکر نے تھائی لینڈ کا دورہ مختصر کر دیا جہاں وہ طبی علاج کے لیے گئے تھے۔

    نئے صدر کے انتخاب تک سپیکر صدر کے فرائض انجام دیں گے۔ بنگلہ دیش کے آئین کے مطابق پارلیمان کو 90 دن کے اندر نیا صدر منتخب کرنا ہوگا۔

18. 24 جولائی 2026اقوامِ متحدہ کا آبنائے ہرمز میں پھنسے تقریباً چھ ہزار ملاحوں کی واپسی کا مطالبہ

    

    ،تصویر کا ذریعہGetty Images

    اقوامِ متحدہ نے مشرقِ وسطیٰ کی جنگ میں شامل ممالک سے کہا ہے کہ وہ آبنائے ہرمز میں پھنسے ہوئے تقریباً چھ ہزار ملاحوں کے انخلا اور واپسی کے لیے تعاون کریں۔

    اقوامِ متحدہ کے ہائی کمشنر برائے انسانی حقوق، وولکر ترک، نے ان ہزاروں ملاحوں کی صورتحال پر فوری توجہ دینے کا مطالبہ کیا ہے جو ان کے مطابق اس آبی گزرگاہ میں ’انسانی اور انسانی حقوق کے لحاظ سے ایک شدید بحران‘ کا سامنا کر رہے ہیں۔

    اس سے پہلے، ایران اور امریکہ کے درمیان دوبارہ کشیدگی شروع ہونے سے پہلے، اقوامِ متحدہ کی بحری ایجنسی نے اعلان کیا تھا کہ آبنائے ہرمز میں سینکڑوں جہازوں پر سوار کم از کم چھ ہزار ملاح پھنسے ہوئے ہیں اور جنگ بندی کے باوجود انھیں ابھی تک علاقے سے نکالنے اور وہاں سے جانے کا موقع نہیں مل سکا ہے۔

19. 24 جولائی 2026بریکنگ, ٹانک: شدت پسندوں نے بارود سے بھری گاڑی فوج اور پولیس کی مشترکہ چیک پوسٹ سے ٹکرا دی، 12 فوجی اہلکاروں سمیت 15 افراد ہلاک

    

    ،تصویر کا ذریعہgettyimages

    پاکستان میں صوبہ خیبرپختونخوا کے ضلع ٹانک میں پولیس اور فوج کی ایک مشترکہ چیک پوسٹ ’مانچھی خیل‘ پر شدت پسندوں کی جانب سے کیے گئے حملے کے نتیجے میں 12 فوجی اہلکاروں سمیت 15 افراد ہلاک ہو گئے ہیں۔ ہلاک ہونے والوں میں دو پولیس اہلکار اور محکمہ جنگلات کا ایک اہلکار بھی شامل ہے۔

    پاکستانی فوج کے شعبہ تعلقات عامہ (آئی ایس پی آر) کی جانب سے جاری کردہ پریس ریلیز کے مطابق شدت پسندوں کی جانب سے یہ حملہ جمعرات اور جمعہ کی درمیانی شب کیا گیا جس کے دوران حملہ آوروں نے بارودی مواد سے بھری ایک گاڑی کو چیک پوسٹ کی حفاظتی دیوار سے ٹکرا دیا اور دھماکے کی شدت سے ’چیک پوسٹ کا بنیادی ڈھانچہ بُری طرح متاثر ہوا۔‘

    آئی ایس پی آر کا دعویٰ ہے کہ جمعرات کی شب حملہ آوروں نے ابتدائی طور پر چیک پوسٹ کی سکیورٹی بریچ کرنے کی کوشش کی تاہم سکیورٹی فورسز کی جانب سے اس حملے کو ناکام بنایا گیا اور اس دوران فرار ہونے والے شدت پسندوں کا تعاقب کر کے انھیں نشانہ بنایا گیا جس کے نتیجے میں 12 شدت پسند ہلاک ہوئے۔

    پاکستانی فوج کے مطابق ’حملہ آوروں نے اپنی ناکامی اور بوکھلاہٹ میں بارودی مواد سے بھری ایک گاڑی کو چیک پوسٹ کے حفاظتی احاطے کی دیوار سے ٹکرا دیا‘ جس کے نتیجے میں 12 فوجی اہلکاروں سمیت چیک پوسٹ پر موجود 15 افراد کی ہلاکت ہوئی۔

    نمائندہ بی بی سی عزیز اللہ خان کے مطابق چیک پوسٹ پر ہوئے اس حملے کے نتیجے میں مانجھی خیل چیک پوسٹ مکمل طور پر منہدم ہو گئی ہے جبکہ حملے کے فوراً بعد زخمی اہلکاروں کو قریبی ہسپتالوں میں منتقل کیا گیا۔

    دوسری جانب سکیورٹی خدشات کے پیش نظر ضلعی انتظامیہ نے ضلع بھر میں سیکش 144 نافذ کر دیا ہے، جبکہ شہریوں سے گھروں میں رہنے اور غیر ضروری نقل و حرکت سے گریز کرنے کی اپیل کی گئی ہے۔

    آئی ایس پی آر کے مطابق علاقے میں کلیئرنس آپریشن جاری ہے۔ اس موقع پر اس عزم کا اظہار بھی کیا گیا کہ شدت سپندوں کے خلاف انسدادِ دہشت گردی کی کارروائیاں جاری رہیں گی۔

    یاد رہے کہ جمعہ کی دوپہر پولیس لائن ٹانک میں ہلاک ہونے والے دو پولیس اہلکاروں، کانسٹیبل بلال خان اور کانسٹیبل طلا محمد، اور محکمہ جنگلات کے فارسٹ گارڈ نور اعظم کی نمازِ جنازہ سرکاری اعزاز کے ساتھ ادا کی گئی۔

    نمازِ جنازہ میں انسپکٹر جنرل آف پولیس خیبر پختونخوا ذوالفقار حمید سمیت سرکاری و سیاسی شخصیات نے شرکت کی۔

    آئی جی خیبر پختونخوا نے اس سے قبل شدت پسندوں کے اس حملے میں زخمی ہونے والے پولیس اہلکاروں کانسٹیبل عصمت اللہ، کانسٹیبل جسیم خان، کانسٹیبل داؤد خان اور کانسٹیبل پیر غلام کی عیادت کی۔

    

    ،تصویر کا ذریعہFacebook/Tank-Police

    مانجھی خیل چیک پوسٹ کہاں واقع ہے؟

    مانجھی خیل چیک پوسٹ ٹانک شہر سے لگ بھگ 15 کلومیٹر دور ٹانک، ڈیرہ اسماعیل خان روڈ پر واقع ہے۔

    خیبر پختونخوا کا جنوبی ضلع ٹانک حالیہ عرصے میں شدت پسند حملوں سے متاثرہ علاقوں میں شامل رہا ہے۔

    رواں برس کے اوائل میں، 12 جنوری 2026 کو، ٹانک کے علاقے گومل میں شدت پسندوں نے پولیس کی ایک بکتر بند گاڑی کو بارودی مواد سے نشانہ بنایا تھا جس کے نتیجے میں چھ پولیس اہلکار ہلاک ہوئے تھے۔ اسی طرح رواں ماہ 13 جولائی کو ٹانک، جنڈولہ روڈ پر گڑہ حیات، ماشا جان بنگلہ کے قریب پولیس کی ایک اور بکتر بند گاڑی کو مبینہ ریموٹ کنٹرول آئی ای ڈی سے نشانہ بنایا گیا، جس میں دو پولیس اہلکار ہلاک اور دو زخمی ہوئے تھے۔

    جغرافیائی اعتبار سے ٹانک خیبر پختونخوا کے جنوبی حصے میں ڈیرہ اسماعیل خان ڈویژن کا ضلع ہے۔ ٹانک شہر ڈیرہ اسماعیل خان کے شمال مغرب اور جنڈولہ کے جنوب مشرق میں واقع ہے، جبکہ ضلع کے مغرب میں جنوبی وزیرستان اور شمال مشرق کی جانب لکی مروت کا علاقہ واقع ہے۔

    جنوبی وزیرستان کے ساتھ اس کی قربت کے باعث ٹانک قبائلی علاقوں اور خیبر پختونخوا کے بندوبستی اضلاع کے درمیان ایک اہم جغرافیائی گزرگاہ بھی سمجھا جاتا ہے۔

    

    ،تصویر کا ذریعہKPK Police

20. 24 جولائی 2026مقبوضہ مغربی کنارے کے علاقے نابلس میں جھڑپیں، چار فلسطینی اور ایک اسرائیلی ہلاک

    مقبوضہ مغربی کنارے میں نابلس کے جنوب مغرب میں واقع گاؤں تل کے قریب جمعے کو ہونے والی جھڑپوں میں چار فلسطینی اور ایک اسرائیلی ہلاک ہوگیا، جبکہ جھڑپوں کے آغاز کے بارے میں فلسطینی اور اسرائیلی مؤقف ایک دوسرے سے مختلف ہیں۔

    فلسطینی وزارتِ صحت نے کہا کہ چاروں فلسطینی اسرائیلی فوج کی فائرنگ سے ہلاک ہوئے، جبکہ چار دیگر زخمی ہوئے جن میں سے تین کی حالت تشویشناک ہے۔

    وزارت کے مطابق یہ واقعہ اس وقت پیش آیا جب گاؤں کے رہائشیوں نے آبادکاروں کے حملے کا مقابلہ کیا۔

    وزارت نے ایک مختصر بیان میں کہا کہ آبادکاروں نے تل میں فلسطینی گھروں پر حملہ کیا اور ان پر براہِ راست گولیاں چلائیں۔ طبی ذرائع کے مطابق ہلاکتوں میں مزید اضافے کا خدشہ ہے۔

    دوسری جانب، اسرائیلی امدادی سروسز نے بتایا کہ تل گاؤں اور حفات گلعاد نامی اسرائیلی بستی کے قریب ہونے والی جھڑپوں میں ایک اسرائیلی ہلاک ہوگیا۔

    ایک فلسطینی عینی شاہد نے بی بی سی کو بتایا کہ گاؤں کے رہائشی تقریباً 30 آبادکاروں کا مقابلہ کرنے گئے تھے جو علاقے میں فلسطینی گھروں پر حملے کر رہے تھے۔

    اس کے برعکس، اسرائیلی فوج کا کہنا ہے کہ چند اسرائیلی شہری پیدل چل رہے تھے جن پر حملہ کیا گیا، جس کے بعد فوج نے ان کے دفاع کے لیے مداخلت کی۔

    اسرائیلی اخبار ’یسرائیل ہیوم‘ نے اسرائیلی موقف نقل کرتے ہوئے دعویٰ کیا کہ ایک فلسطینی نے ایک بستی کے سکیورٹی اہلکار سے اسلحہ چھین لیا اور اسرائیلیوں پر فائرنگ کی۔

    بی بی سی کے لیے جھڑپوں کے آغاز کے حوالے سے دونوں موقف کی آزادانہ طور پر تصدیق کرنا ممکن نہیں ہو سکا۔